Qarshi muhandislik-iqtisodiyot instituti

1. Mustaqillik yillarida buyuk ajdodlar va tarixiy shaxslarga bo‘lgan e'tibor. O‘zbekiston davlat mustaqilligini qo‘lga kiritgan kundan boshlaboq xalqimizning boy ma’naviy merosini tiklash va rivojlantirish, jamiyat ma’naviyatini yuksaltirish davlat siyosati darajasiga ko‘tarilib, uni ta’minlovchi madaniy-ma’rifiy islohotlarning yo‘nalishlari belgilab olindi. Mustaqillik tufayli O‘zbekiston ma'naviy hayoti, madaniy taraqqiyoti uchun yangi davr boshlandi. Istiqlol tufayli xalqimiz ma'naviy zug‘umlardan ozod bo‘ldi, erkin fikrga, milliy tiklanishga keng yo‘l ochildi. Ma'naviy hayotdagi tub sifat o‘zgarishlar xalqimiz ma'naviy salohiyatini mamlakatimizning ertangi porloq istiqboli uchun, milliy o‘zligimiz va qadriyatlarimizning tiklanishi uchun va qolaversa, milliy ongi va g‘ururi, uyg‘oq vatanparvar insonni tarbiyalashga qaratildi. Islom Karimov ta'kidlaganidek: “Davlatimizning qanchalik tez ulg‘ayishi, kuch-quvvat ado etishi, dunyo hamjamiyatida o‘ziga munosib o‘rin egallashi, avvalambor, xalqimiz ma'naviy saviyasi, g‘ururi va faxri nechog‘liq yuksak bo‘lishiga bog‘liqdir. Ana shuni inobatga olgan holda yangi jamiyat barpo etmoqchi bo‘lib, eng asosiy yo‘nalishlardan biri sifatida xalqimiz tarixini, ma'naviy qadriyatlarimizni tiklash vazifasini qo‘ydik”. Darhaqiqat, mustaqilligimizning dastlabki kunlaridanoq xalqimizning ko‘p asrlar mobaynida yaratgan g‘oyat o‘lkan bebaho ma'naviy va madaniy merosini tiklash davlat siyosati darajasiga ko‘tarilgan nihoyatda muhim vazifa sifatida qaralib, keng ko‘lamli jiddiy tadbirlar amalga oshirila boshlandi. O‘zbekiston Respublikasi Prezidentining 2013-yil 12-iyundagi “O‘zbekiston Respublikasi davlat mustaqilligining yigirma ikki yillik bayramiga tayyorgarlik ko‘rish va uni o‘tkazish to‘g‘risida”gi Qarorida ham buhaqda “davlatimiz tomonidan mustaqillikning ilk kunlaridan boshlab aholi, birinchi navbatda, yoshlarimizning jismonan baquvvat, ma’naviy jihatdan yetuk avlod bo‘lib ulg‘ayishiga berilayotgan yuksak e’tiborning tasdig‘i sifatida mamlakatimizda davlat budjeti xarajatlar qismining 60 foizga yaqini ta’lim, sog‘liqni saqlash, ilm-fan, madaniyat va san’at, sport sohalari rivojiga yo‘naltirilgani dunyo tajribasida kamdan-kam uchrashini, O‘zbekiston ayni sohalarda jahonda yetakchi o‘rinlarni egallab borayotgani nufuzli xalqaro ekspertlar va tahlil markazlari tomonidan e’tirof etilayotgani” qayd etilgan. Bu boradagi tarixiy ishlarning amalga oshirilishi yangi jamiyatimiz ma'naviyati binosining qad rostlashiga muhim omil bo‘lmoqda. Natijada respublikamizda madaniyat, ma'naviyat sohasining yangi tizimi vujudga kela boshladi. “Ma'naviyat va ma'rifat” jamoatchilik markazi, “Ta'lim markazi”, “O‘zbekkino”, “O‘zbeknavo”, “O‘zbekraqs”, “O‘zbekteatr”, “O‘zbekmuzey”, Badiiy akademiya, O‘zbek amaliy san'at markazi, Milliy madaniy markazlar, Markaziy Osiyo madaniyat xodimlari assotsiatsiyasi kabi madaniy-ma'rifiy tashkilotlar va ko‘plab jamg‘armalarning tuzilishi respublika ma'naviyati asosiy sohalarining tarkib topishi va rivojlanishiga zamin bo‘ldi.
1994 yildayoq respublikamizda “Ma'naviyat va ma'rifat” jamoatchilik markazini tuzish to‘g‘risida farmon chiqarilganligi, mustaqillik yillirida ma'naviy me'rosimiz rahnamolarining nomlari tiklandi hamda ular tavallud topgan kunlar keng nishonlandi, asarlari chop etildi va etilmoqda. Chunonchi, Bahovuddin Naqshband tavalludining 675 yilligi; Najmiddin Kubro tavalludining 850 yilligi keng nishonlandi. 1998 yilda Imom al-Buxoriy hazratlarining 1225 yilliklari, Ahmad al-Farg‘oniyning 1200 yilligi nishonlanganligini ta'kidlash mumkin.
Mustaqillik yillari Qur'oni Karim o‘zbek tiliga tarjima qilinib ko‘p nusxada chop etildi. Imom al-Buxoriyning to‘rt jildlik hadislari chop etish tugallandi. Xoja Ahmad Yassaviyning “Xikmatlar” to‘plami chop etildi. Ko‘plab Qur'oni Karim sharhlariga oid kitoblar ham chop etilganligini va ulardan xalqimiz bahramand bo‘layotganligi yuqorida ta'kidlangan fikrlar sirasiga kiradi.
Mustaqillikning dastlabki kunlaridanoq dunyo taraqqiyotiga, jahon sivilizatsiyasiga katta hissa qo‘shgan ajdodlarimiz – buyuk mutafakkirlar, davlat arboblari ma'naviy merosini va hayotini o‘rganish yo‘lga qo‘yildi. Jumladan, Imom Buxoriy, At-Termiziy, Ahmad Yassaviy, Najmiddin Kubro, Bahovuddin Naqshband, Burhonuddin Rabg‘uziy kabi mutafakkirlarning asarlari chop etilishi milliy qadriyatlarimizni tiklashda katta yutuq bo‘ldi. Vatanimiz ozodligi yo‘lidashahid ketgan Abdulla Qodiriy, Cho‘lpon, Fitrat, Behbudiy, Usmon Nosir va boshqa allomalarimizning hurmati o‘z joyiga qo‘yildi va ma'naviy meroslari xalqimizga qaytarildi. Buyuk ajdodlarimiz tavalludlarining yirik sanalarini nishonlash ham xalqimizning ulug‘vor an'analariga aylanmoqda. Jumladan, istiqlol yillarida Alisher Navoiy (1991), Zahiriddin Bobur (1993), Feruz (1995) kabi buyuk ajdodlarimizning tavallud kunlari, shuningdek, Mirzo Ulug‘bekning 600 yillik (1994), Amir Temurning 660 yillik (1996), Ahmad Farg‘oniyning 1200 yillik (1998), Jalolliddin Manguberdining 800 yillik (1999), Kamoliddin Behzodning 545 yillik (2000), islom olamining donishmandlari, mutafakkirlari Imom Buxoriy tavaluddining 1225 yilligi, Imom Termiziyning 1200 yilligi, Abu Mansur Moturidiyning 1130 yilligi, Mahmud Zamaxshariyning 920 yilligi, Xoja Abdulxoliq G‘ijduvoniyning 900 yilligi, Najmiddin Kubroning 850 yilligi, Burhoniddin Marg‘inoniyning 910 yilligi, Bahovuddin Naqshbandning 675 yilligi, Xoja Ahror Valiyning 600 yilligi yubileylariga bog‘liq tadbirlar nafaqat o‘lkamizda, balki YUNESKO homiyligida xalqaro doiralarda nishonlanishi vatandoshlarimizda milliy faxr tuyg‘ularini kuchaytirdi.
Buyuk allomalarimiz yubileylari munosabati bilan ularning o‘nlab noyob asarlari turli tillarda nashr etildi, ularga atab haykallar o‘rnatildi, ziyoratgohlar, bog‘lar yaratildi. Masalan, 1991-yilda buyuk bobomiz Alisher Navoiy tavalludining 550 yilligi keng nishonlandi. Shu yili O‘zbekiston Fanlar akademiyasi Adabiyot institutiga Alisher Navoiy nomi berildi, Alisher Navoiy nomidagi Davlat mukofoti ta’sis etildi. Yubiley yilida “Lisonut-tayr”, “Sab’ai sayyor”, “Farhod va Shirin”, “Layli va Majnun”, “Hayrat-ul Abror” asarlari nashr qilindi, kinofilmlar va sahna asarlari yaratildi. 1991-yil 28-sentabr kuni Toshkent shahrida barpo etilgan Alisher Navoiy haykali va Navoiy nomidagi O‘zbekiston Milliy bog‘ining ochilish marosimi bo‘lib o‘tdi. 1994-yil oktabr oyida Mirzo Ulug‘bek tavalludining 600 yillik yubileyi o‘tkazildi. Ulug‘bek madrasasi, Ulug‘bek yashagan davrdagi astronomic asboblar, Toshkentdagi Ulug‘bek haykali aks etgan pochta markalari muomalaga chiqarildi. O‘sha yil 24-oktabrda Parijda YUNESKO zalida “Ulug‘bek va Temuriylar davri” mavzusida Xalqaro konferensiya hamda “Ulug‘bek va an’anaviy san’at” ko‘rgazmasi bo‘lib o‘tdi. Bu tadbirlar Mirzo Ulug‘bek qoldirgan ilmiy merosning umuminsoniy qadriyatga molik ekanligini yana bir bor isbot etdi.
1998-yil 23-oktabrda Farg‘onada buyuk alloma Ahmad al-Farg‘oniyning 1200 yillik yubileyi nishonlandi. Uning noyob ilmiy merosi xalqimizga qaytarildi. Farg‘ona shahrida al-Farg‘oniy bog‘i yaratildi va buyuk allomaga haykal o‘rnatildi.
Atoqli ma’rifatparvar allomalarimizning ijodiy meroslarini tadqiq etish va hozirgi zamon o‘zbek tiliga ko‘chirish va nashr etish ishlari amalga oshirildi. Tarixiy adolat qaror topib, Xorazmda Ma’mun akademiyasi qayta tiklandi. Zero, buyuk vatandoshlarimiz bo‘lmish olim-u fuzalo va mutafakkirlarning boy madaniy merosini o‘rganish va targ‘ib qilishni yo‘lga qo‘yish hozirgi jamiyatimiz uchun g‘oyaviy jihatdan yetuk, ilmli, barkamol milliy kadrlarni yetishtirishni ta’minlashga ko‘mak berishi bilan ham muhim ahamiyat kasb etadi. Abdulla Qodiriy, Cho‘lpon, Fitrat, Behbudiy, Fayzulla Xo‘jayev va boshqa arboblarning yubileylarini o‘tkazish yuzasidan ko‘rilgan chora tadbirlar ham ma'naviy hayotdagi muhim qadamlar bo‘ldi. Islom Karimov tashabbusi bilan Toshkentda mustamlakachilik davri qurbonlari xotirasini abadiylashtirish maqsadida 2000-yil 12-mayda Toshkentning Yunusobod tumanidagi Bo‘zsuv bo‘yida “Shahidlar xotirasi” yodgorlik majmui ochildi. 2001-yil 31-avgust – qatag‘on qurbonlarini yod etish kuni sifatida O‘zbekistonda ilk bor o‘tkazildi. 2002-yil 31-avgust kuni Toshkentning “Shahidlar xotirasi” yodgorlik majmuida “Qatag‘on qurbonlari xotirasi” muzeyi tashkil qilinib, 2008-yil 31-avgustda uning yangi ekspozitsiyasi ochildi. Yosh avlodni ma'naviy barkamollik ruhida tarbiyalashda “Alpomish” dostoni yaratilganligining 1000 yilligini (1999), “Avesto” yaratilganligining 2700 yilligini (2001) nishonlash ham muhim voqea bo‘ldi.
Respublika rahbariyati, eng avvalo xalqimizning ehtiyoji, orzu istaklarini hisobga olib, azaliy milliy bayramlarni tiklashga yangi istiqlol bayramlarini xalqning qadimiy an'analariga monand holda shakllantirishga katta e'tibor berdi. Masalan, Prezident farmonlari asosida Navruz, Ramazon va Qurbon hayitlar bayram kuni sifatida nishonlana boshlandi. Undan tashqari, istiqlol sharofati bilan “Mustaqillik kuni”, “Konstitutsiya kuni” va “O‘qituvchilar va murabbiylar kuni” bayramlari joriy etildi. Davlat tili haqidagi qonun chiqqan kun – 21-oktyabr tabiiy ravishda “Til bayrami”ga aylandi. Tilimizga davlat tilimaqomining amalda qaytarilishi, o‘zbek tilida rasmiy idoraviy ish yuritish, boy adabiy-tarixiy merosimizni o‘qib o‘rganish, milliy qadriyatlarni tiklash va izchil davom ettirish imkoniyatini berdi. Shuningdek, lotin yozuviga asoslangan o‘zbek alifbosining joriy etilishi mamlakatning har tomonlama rivojlanishi va jahon komunikatsiyasi tizimiga kirish uchun ancha qulay shart-sharoit yaratib berdi. Ayni paytda Mehrjon,Hosil bayrami, Qovun sayli, xalq bayramlari, sportning milliy turlari hamda turli xalq o‘yinlari keng o‘rin oluvchi badiiy sport bayramlarining keng ko‘lamda tiklanishi fuqarolarimizning, ayniqsa, yoshlarimiz dunyoqarashi – e’tiqodini shakllantirish va mustahkamlashda, ularda ona zaminga mehr-muhabbat bilan qarash, rizq-ro‘zimiz asosi bo‘lmish suvni tejab-tergab sarflash, tabiatni, yer osti va yer usti boyliklarini asrash, bobodehqon mehnatini e’zozlash, umuman, o‘lkamizdagi jamiki jonzod va tabiatni asrab-avaylash ruhida tarbiyalashda muhim omil hisoblanadi. 1999-yil 2-martda O‘zbekiston Respublikasi Prezidentining “9-mayni Xotira va qadrlash kuni, deb e’lon qilish to‘g‘risida”gi Farmoni e’lon qilindi. Farmonning ijrosi sifatida 1999-yil 9-mayda mamlakatimizda birinchi bor 9-may – Xotira va qadrlash kuni sifatida nishonlandi. Mazkur tadbirlar xalqimizda milliy ongni yuksaltirishga, tarixiy xotiraning tiklanishiga, yoshlarni milliy istiqlol g‘oyalari ruhida tarbiyalashga xizmat qilmoqda.
2. O‘zbekiston Respublikasi Birinchi Prezidenti Islom Karimovning ajdodlar merosi va milliy qadriyatlarni tiklash borasidagi xizmati. Tarixiy shaharlar (Buxoro, Samarqand, Marg‘ilon, Qarshi, Toshkent, Xiva, Shahrisabz) yubileylarining xalqaro miqyosda keng nishonlanishi. Ma'naviy-madaniy merosimizni tiklashda katta ahamiyatga molik tadbirlardan biri olamshumul tarixiy me'morchilik inshootlarining keng ko‘lamda ta'mirlanishi, jumladan Buxoro, Samarqand, Xiva, Shahrisabz, Qarshi, Toshkent kabi shaharlarda hamda Quva, Chelak shaharlarida tarixiy me'moriy yodgorliklarning tiklanishi, o‘lkamizning o‘nlab ko‘hna shaharlari yubileylari nishonlanishi: Samarqand shahrining – 2750 yilligi, Qarshi shahrining – 2700, Shahrisabz shahrining – 2700, Buxoro shahrining – 2500, Xiva shahrining – 2500, Termiz shahrining – 2500, Andijon shahrining – 2500, Toshkent shahrining – 2200 yoshi, Marg‘ilon shahrining – 2000 yilligi nishonlanish tantanalari, “Buyuk ipak yo‘li”ni tiklash borasidagi amaliy ishlar xalqimiz madaniy hayotida muhim voqea bo‘ldi.
Jumladan, 1997 yil 20 oktyabr – Xiva shahrining 2500 yillik yubileyiga bag‘ishlangan tantanali marosim o‘tkazildi. Shahar memoriy ansanbili yaxlitligi jihatdan O‘rta Osiyoda yagona hisoblanadi. Bu ansanblning ichida dastlab Ichan qala (yani ichki qala, shahriston) bunyod etilgan. Ichan qalada – xon saroyi, aslzodalar yashaydigan maskan, maqbara, madrasa, masjidlar joylashgan. Ichan qalaning umumiy maydoni 26 gektar. Devorning uzunligi 2200 metr. Ichan qalada o‘zar kesishadigan ikkita katta ko‘cha o‘tgan. Bu ko‘chalarda to‘rtta darvoza qurilgan. Bu darvozalardan Dichan qalaga chiqiladi. Dichan qalada esa hunarmand, kosiblar, savdogarlar yashashgan va ularning rastalari joylashgan. Dichan qalaning uzuligi 1250 metr bo‘lib, uning o‘nta darvozasi bo‘lgan. Xiva nafaqat O‘rta Osiyoda, ayni paytda dunyoga ham mashhur shahar. Buning isboti – 1997 – yilda YUNESKO qarori bilan shu shahar 2500 yilligi nishonlanganligidir. Bugungi avlod o‘z ota-bobolarning madaniy meroslari bilan haqli ravishda faxrlanadilar. Xiva xonligining yana bir yirik shahari – Ko‘hna Urganchdir. Bu shaharga asos solinganiga 2000 yildan oshdi. Bu bayram dastlab YUNESKO ning Parijdagi Bosh qarorgohida boshlandi. Xiva shahrining Ark maydonida 1997 yil 20 oktyabrda o‘tgan teatrlashgan tomosha o‘z mohiyati, tarixiy falsafiy teranligi (muallif O.Matjon, rejissyor Rustam Hamidov, bastakor Rustam Abdullayev) bilan e'tiborga molik. Unda shahar tarixi umumlashgan badiiy sahnaviy yechimlarda taqdim etilgan.
Xiva shahri haqidagi rivoyat asosidagi “Farishtalar raqsi”da tariximizning o‘qilmagan sahifalari qayta jonlandi. Xivaning qutlug‘ bayramiga kelgan mehmonlar – vazirlik, idora va tashkilotlar rahbarlari, diplomatik korpus va xalqaro tashkilotlar, xorijiy mamlakatlar vakillari bayramona bezatilgan ark maydonidan joy oldilar. Yig‘ilganlar nigohida shahar sehru sinoatidan hayrat, qalbida hayajon: go’yo ular shu onlarda olis moziy bag‘rida turgandek. Badiiy lavhalarida Xorazm ahlining jo‘shqin va jozibali san'ati yana bir karra namoyon bo‘ldi. Xiva shahrining 2500 yilligiga bag‘ishlangan tantanalar shodu xurramlik bilan ko‘tarinki ruhda nishinlandi.
1997 yilda YUNESKO Bosh assambleyasining qaroriga ko‘ra, Buxoro shahrining 2500 yillik to‘yi o‘tkazilishi munosabati bilan shaharni zamonaviy me'morchilik tarhiga asosan qayta qurishga kirishildi. Sport-sog‘lomlashtirish maskanlari, stadion yangicha ko‘rinishda bunyod etildi. “Dehqon bozori” kengaytirilib, milliy an'analar asosida barpo qilindi. Shahar bag‘rida ichki aylanma yo‘l ishga tushirildi. Bu eski va yangi shaharni o‘zaro bog‘ladi. Viloyat hokimiyati inshootlari atrofida shaharning zamonaviy markazi vujudga keltirildi. Yangi maydonlar, xiyobonlar yaratildi. Buxoro davlat universitetining ta'mirlangan, qayta qurilgan imoratlari, o‘quv dargohlari, kollejlar va litseylarning yangi binolari shahar ko‘rkiga ko‘rk qo‘shdi.
Buxoroda zamonaviy va milliy shaharsozlik an'analari asosida qayta qurish, bunyodkorlik ishlari 2010 yildan keyin yanada kuchaydi. Shaharga sharq tomondan kiraverishdagi 107 gektarlik joy haqiqiy qurilish, bunyodkorlik maskaniga aylandi. Bu yerda nihoyatda muazzam maydon, bog‘-xiyobon yaratishga kirishildi. Bog‘-xiyobonning markazida viloyat musiqali drama teatrining muhtasham binosi barpo etildi. Old qismi yoy shaklida, ulug‘vor ustunlar bilan bezatilgan binoga tepadan nazar tashlasangiz, bino bag‘rini ochib, odamlarni kutayotganga o‘xshaydi. Binoning ichki qismlari ham nihoyatda hashamatli qilib bezatilgan. Teatr foyesi, zali tomoshabinlarning madaniy dam olishlari uchun qulay qilib yaratilgan. Zamonaviy, hamma imkoniyatlarga ega tarzda ishlangan teatr sahnasi drama san'atining barcha turdagi asarlarini ijro qilishga mos tarzda bunyod qilingan. Shuning uchun ham bino haqiqiy san'at koshonasiga aylandi. Teatr binosiga yaqin joyda yozgi amfiteatr ham qurildi. Bu yerda konsertlar uyushtirish, har xil anjumanlar o‘tkazish, teatrlashtirilgan tomoshalar tashkil qilish uchun barcha qulayliklar mavjud.
Bog‘-xiyobonning eng baland nuqtasida yana bir mahobatli inshoot — “Ko‘hna va boqiy Buxoro” monumenti qad rostladi. Monument-yodgorlik bog‘-xiyobonning barcha nuqtalaridan ko‘zga yaqqol tashlanib turadi. Yodgorlikning eng tepa qismiga dunyo xaritasini namoyon qiluvchi globus joylashtirilgan. Globusda ona yurtimiz O‘zbekiston joylashgan hudud alohida bo‘rttirib ko‘rsatilgan. Mamlakatimiz xaritasining globusda alohida kattalashtirib ko‘rsatilishi bejiz emas. Unda O‘zbekiston Buxoro, Samarqand, Shahrisabz, Xiva, Toshkent kabi ulug‘vor shaharlar o‘rin olgan buyuk davlat ekanligi e'tirof etilgan. Yodgorlikning o‘rta qismida Buxoroning olis va yaqin o‘tmishi tarixi bilan bog‘liq ko‘rinishlar — Ark, Somoniylar maqbarasi, Kalon masjidi va minorasi, Chor minor, Labi hovuz majmuasi, Mag‘oki attor masjidi, shahar taqdiri bilan nomi bog‘langan ulug‘ allomalar, muarrixlar, shoirlar, adiblar, siyosatchi va jamoat arboblarining toshga o‘yma hamda bo‘rtma shaklda ishlangan tasvirlari o‘rin olgan. Tasvirlar markazida zaminga daraxt o‘tqazayotgan bobo va nabira holati ham mavjud. Bu ajdodlardan avlodlarga meros bo‘lib kelayotgan sharif shahar taqdiriga ham ishora. Bir so‘z bilan aytganda, ushbu monument Buxoro shahriga, uning tarixi va bugungi kuniga, kelajagiga qo‘yilgan yodgorlikdir. Shuning uchun ham yodgorlik nomi “Ko‘hna va boqiy Buxoro”, deb ataladi.
Shuningdek, 2006 yil 27 oktyabr – Qarshi shahrining 2700 yilligiga bag‘ishlangan tantanali marosimlar ko’tarinki va jozibali tarzda bo‘lib o‘tdi. Qarshi mustaqillik yillarida qayta tug‘ildi. Shahar tarixida katta voqyea bo‘lgan O‘zbekiston Respublikasi Prezidentining 2006 yil “Qarshi shahrining 2700 yilligiga tayyorgarlik ko‘rish va uni o‘tkazish to‘g‘risida”gi Qarori shahrimiz hayotini, jamolini butunlay o‘zgartirib yubordi. Nafaqat Qashqadaryo vohasi, balki butun O‘zbekiston hayotida qutlug‘ sana bo‘lib qolgan shaharning 2700 yillik to‘yi keng miqyosda nishonlandi. Qarshining 2700 yillik to‘yi shaharning ijtimoiy, madaniy hayotida yangi sahifalar ochdi. Shahar tarixi, bugungi hayoti haqida o‘nlab tarixiy-ilmiy, badiiy, publitsistik, teatr va san'at asarlari yaratildi. Tariximizga doir hamda ijtimoiy, iqtisodiy, ma'naviy-ma'rifiy, madaniy sohalarda amalga oshirilgan ishlar Qashqadaryo viloyati xalqining moddiy va ma'naviy mulkiga aylanib qoldi. Qarshi shahrining 2700 yilligiga bag‘ishlangan kitob ham nashr etildi. Kitob ingliz tilida yozilgan bo‘lib asosan yurtimiz tarixi bilan yaqindan tanishmoqchi bo‘lgan xorijlik mehmon, sayyoh va turistlar uchun foydali malumot manbai hisoblanadi. Bunda Qarshi shahrining tarixiy obidalari tasvirlanib ularning tarixi yozilgan. Qarshi (1926 - 37 yillarda Behbudiy) — Qashqadaryo viloyatidagi shahar (1926 yildan), viloyat markazi (1943 yildan). Qashqadaryo vohasining markazida, Qashqadaryo bo‘yida, xalqaro temir yo‘l va avtomobil yo‘llari kesishgan joyda joylashgan.
Qarshi O‘zbekistonning qadimiy shaharlaridan biri. U turli davrlarda Bolo, Nashebolo, Naxshab, Nasaf, nomlari bilan yuritilib, XIV-asrdan Qarshi deb atala boshlagan. "Qarshi" nomining kelib chiqishi to‘g‘risida turli fikr va taxminlar mavjud. V.V. Bartold shaharning nomi mo‘g‘ul xoni Kepakxon qurdirgan "Qarshi" (qadimgi turkiychada "saroy" ma'nosini anglatgan) bilan bog‘liq deb ta'kidlaydi. "Qutadg‘u bilig" ("Saodatga yo‘llovchi bilim") dostonida "Qarshi" atamasi "saroy" va "qarama-qarshi turish" ma'nosida qo‘llangan. "Boburnoma"da ham bu nom mo‘g‘ul tilidan olinganligi ta'kidlangan. Keltirilgan taxminlarda atamaning "qarshi"- saroy, qasr ma'nolari ko‘proq qo‘llanadi. Dastlabki shahar Qashqadaryo vohasida "Naxshab" (suv obod qilgan, suv naqsh bergan manzil) nomi bilan miloddan avvalgi VII-asrda Yerqo‘rg‘on o‘rnida vujudga kelib, uning atrofi qal'a devori bilan o‘rab olingan (ushbu qal'a devorlarining qoldiqlari arxeologlar tomonidan 1999 yilda o‘rganilgan).