Cavanlar səs-səsə verdilər. Əvvəlcə bir şey çıxmadı, sonra iş yoluna düşdü.
Yol getmək ləzzət verdi. “Belə yaxşıdır, – deyə Tanabay düşündü. –
Belə yaxşıdır. Ən yaxşısı orasındadır ki, nəhayət, bizi bir yerə yığırlar.
Danışacaqlar yəqin, kolxozların məsələsini həll eləyəcəklər. Əlbəttə,
rəhbər işçilər bu işləri bizdən yaxşı bilir. Biz ancaq öz işimizi bilirik,
özgə bir şey bilmirik. Bir söz deyərlər, eşidərik, biz də işdən ayrı cür
yapışarıq...”
Rayon mərkəzində adam çox idi, səs-küydən qulaq batırdı. Klubun qabağındakı
meydançada xeyli maşın vardı, araba vardı, minik atlarının
əlindən tərpənmək mümkün deyildi. Çayçılar, kababçılar həmişəki kimi yan-yana
düzülmüşdü. His qalxırdı, tüstü ucalırdı; şey satanlar hay verib
müştəri çağırırdılar.
Burada Çoro Tanabayın yolunu gözləyirdi.
– Düşün gedək, tez olun, özünüzə yer tutun. İndicə başlanacaq. Tanabay, hara
gedirsən?
–
Mən bu saat qayıdıram, – deyə Tanabay atların arasına soxulub, zorla qabağa
yeridi. O, hələ maşında ikən Gülsarını sezmişdi, onun yanına gedirdi.
Tanabay yazdan bəri Gülsarını görməmişdi.
Buradakı yəhərli atların arasında Gülsarı özünün açıq-sarı rəngi, enli,
qüvvətli gövdəsi və iri başı ilə
seçilirdi.
Tanabay özünü atın yanına verdi:
– Salam, Gülsarı, – dedi, – salam! Hə, necəsən, qardaş?
Yorğa at alma gözlərini açıb, öz köhnə sahibini
tanıdı, fısıldadı, ayaqlarını qaldırıb qoydu.
– Yox, yaxşısan, pis deyilsən. Qəşəng kürək sallamısan, Gülsarı, deyəsən, çox
qaçırsan. O vaxt sənə bərk
əziyyət verdilər, eləmi? Bilirəm... Şükür elə ki, indi yaxşı ələ düşmüsən.
Özünü sakit apar, hər şey qaydasında olacaq, – deyə Tanabay atın
boynundakı heybəni əlləşdirdi. Hələ heybənin dibində xeyli yulaf vardı.
Deməli, Çoro atı ac qoymurdu. Sən burda dur, Gülsarı, mən gedirəm.
Klubun
qabağındakı divara qırmızı şüarlar vurulmuşdu: “Kommunistlər, irəli!”,
“Komsomol – sovet gənclərinin qabaqcıl dəstəsidir!”
Adamlar dəstə ilə kluba
doluşurdular, foyeyə, tamaşa zalına axışırdılar. Qapının qabağında Tanabay,
Çoro və kolxoz sədri Aldanovla rastlaşdı.
Aldanov Tanabayı qırağa çəkdi.
–
Bura gəl, – dedi, – sənə sözüm var. Adını biz qeyd elətdirmişik, bu da
bloknotun. Sən bu gün çıxış eləməlisən. Partiyanın üzvüsən, bizim ən yaxşı
ilxıçımızsan.
– Mən orda nə barədə danışmalıyam?
– Deyəcəksən ki, sən, bir kommunist kimi, geridə qalmış sahəyə gedirsən.
Çobanlığa, qoyun otarmağa.
–
Elə bu?
– Sonra öhdəçilikdən danışarsan. Partiyanın və xalqın qarşısında, deyərsən,
söz verirəm: Hər yüz qoyundan yüz on bala alacağam, hər qoyundan
üç kilo yun qırxacağam.
– Mən sürünün heç üzünü də görməmişəm. Bu sözü necə deyə bilərəm?
– Sən sözünü de, sürü qaçmır!
Çoro söhbətə qarışdı:
– İstədiyin
qoyunları seçib götürə bilərsən. Narahat olma. Bir də onu de ki, iki nəfər
komsomolçu çobanı hamiləyə götürürsən.
– Kimi?
Çoro siyahıya baxdı.
–
Bolotbekov Eşimi, bir də Zarlıkov Bektayı.
– Axı, mən onlarla danışmamışam, bəlkə heç razı deyillər?
Sədr hirsləndi:
– Sən yenə dediyini deyirsən!
Qəribə adamsan. Gərək mütləq onlarla danışasan? Fərqi nə imiş? İtməyəcəklər
ki? Harda olsalar, tapılacaqlar. Biz onları sənə təhkim eləmişik, məsələ
çoxdan həll olunub.
– Madam ki, həll olunub, nə üçün mənimlə məsləhətləşirsiniz?
Tanabay getmək istədi, Çoro qoymadı.
– Dayan, – dedi, – deyəcəyin
sözlər yadından çıxmaz ki?
Ancaq Tanabay dayanmadı:
– Çıxmaz, çıxmaz, – deyə o gedə-gedə əsəbi halda cavab verdi...
13
Müşavirə axşam çağı qurtardı.
Rayon mərkəzi boşaldı. Adamlar dağılışıb getdilər: kimisi dağlara, fermalara,
sürülərin, naxırların yanına, kimisi də kəndlərə, aullara.
Tanabay
gəldiyi maşınla da geri qayıtdı. Aleksandrov yoxuşunu çıxdılar, çöl boyu
səssiz-səmirsiz yol getdilər. Axşam idi, sərinlik düşmüşdü, külək adamın
iliyinə işləyirdi. Payız küləyi. Tanabay bir küncə qısılmışdı, kürkünün
yaxasını da qaldırmışdı, öz fikrində, xəyalətində idi. Bu da müşavirə: oldu
da, qurtardı da. O özü ağıllı bir söz deməsə də, heç olmasa başqaları deyəni
eşitdi. Hər şeyi yoluna qoymaq üçün hələ, görünür, çox iş görmək lazım
idi. Düz deyirdi o eynəkli kişi, obkom katibi: “Bizim üçün heç bir hazır yol
yoxdur, yolu özümüz açmalıyıq”. İşə bax, otuzuncu ildən bəri gah yuxarı,
gah aşağı, gah eniş, gah yoxuş... Doğrudan, çətin məsələ imiş bu kolxoz
deyilən şey. O özü bu yolda saç ağartmışdı, bütün gəncliyini bu işə sərf
eləmişdi. Bu yolda o, nələr görməmişdi, nələr etməmişdi; səfeh işləri də az
olmamışdı, buna baxmayaraq, Tanabay arzu elədiyi o həyata müdam can
atmışdı, o dövranı bu gün-sabah gözü ilə görəcəyinə həmişə ümid bəsləmişdi,
ancaq kolxozun müsibətləri qurtarmırdı ki, qurtarmırdı...
Nə etmək, madam
ki, işləmək lazım idi, işləyəcəkdilər. Katib düz deyirdi – müharibədən sonra
çoxları səhv eləmişdi, həyat öz-özünə dəyişə bilməzdi. Hər kəs onu öz
çiynində aparmalı idi, ölənəcən aparmalı idi... Bircə orası pis idi ki, bu
həyat deyilən şey bəzən çox ağır olurdu, adamların çiynini əzirdi, qabar
eləyirdi. Hələ qabar nədir ki, ona dözmək olardı. Barı, ürək razı qalaydı –
öz işindən də, özgələrin işindən də. İnsan biləydi ki, onun əməyi kiməsə
xoşbəxtlik gətirir... Tanabay qoyuna getməyi boynuna götürdü. Görəsən, bu
işin axırı nə olacaqdı? Caydar nə deyəcəkdi? Tanabay dükana getməyə də
macal tapmadı – qızlar üçün konfet almaq lazım idi. Söz vermişdi... Hər yüz
qoyundan yüz on bala, hər başa üç kilo yun – sözdə asan görünür. Amma
gərək hər quzunu doğuzdurasan, bəsləyib böyüdəsən. Yağışı var, küləyi, soyuğu
var. Yun işi daha çətin. Tükdür, əlinə alırsan, zorla gözə görünür,
bircə dəfə puf eləyirsən, görürsən ki, yoxdur. Bəs kiloqramlar hardan olacaq?
Qızıl kiloqramlar! Yəqin, çoxlarının heç ağlına da gəlmir ki, o tükün
hər kilosu nə qədər əzab tələb eləyir...
Bəli, Çoro onu çaşdırdı, bərk çaşdırdı. “Çıxış elə, ancaq qısa, öz
öhdəçiliklərindən de. Özgə şey lazım
deyil. Məsləhət görmürəm”. Tanabay da ona qulaq asdı. Tribunaya çıxan kimi
cəsarəti tükəndi, bir kəlmə ürək sözünü deyə bilmədi. Gurhagur
öhdəçilikdən danışıb aşağı düşdü. Tanabay xəcalətindən bilmirdi ki, neyləsin.
Ancaq Çoro razı idi. Görəsən, niyə o, bu qədər ehtiyatlı olmuşdu?
Xəstəlikdənmi idi, yoxsa sədrlikdən düşməyi Çoronu belə qorxaq eləmişdi?
Tanabayın ehtiyatla danışmağı onun nəyinə lazım idi? Yox, deyəsən, onda nəsə
dəyişmişdi, Çoro başqa adam olmuşdu. Səbəbi də, görünür, o idi ki, ömrü boyu
Çoro sədrlik eləmişdi, böyüklər ömrü boyu onu danlamışdılar,
söymüşdülər. İndi isə bicləşmişdi, deyəsən...
Tanabay düşünürdü: “Dayan, dost, vaxt gələr, üz-üzə oturarıq, haqq-hesabı
birdəfəlik çürüdərik...”
Küləksə aramsız əsirdi, adamın iliyinə işləyirdi. Hələ evə çox qalırdı. Orada
Tanabayı, kim bilir, nə gözləyirdi...
Dostları ilə paylaş: |