Sevinci hamıyla bölən Nətavan.
Dərdi, möhnətiyləbaş-başa qalan
O ellər anası xoşbəxt deyildi,
Ürəyi qəm içib, dərd çeynəyirdi.
Xasay xan ölmüşdü azad olmuşdu
Qəlbinə başqa bir kədər dolmuşdu.
Yeni böhtanlara tuş olmamaqçün
Adı dildə-dişdə söz olmamaqçün
Kasıb bir oğlana ərə getmişdi.
Elə bilməyin ki, söz-sov bitmişdi.
Bu da onun üçün günahdı-suçdu
Yazıq Nətavanın arzusu puçdu.
Rəiyyət oğluna getməklə guya
Nəsilin adını salmamış saya
Yeni bir ittiham, yeni bir “günah”
Yazıq binəvaya çəkdirir min ah.
Ruhunu oxşayan, könlünü alan
Gələcək günlərə xoş körpu salan
Həmdəmi yox idi, qəlbi tək idi
Firqətli bir ömür yükü çəkirdi
Üstəlik nadanlar atdığı daşın
Ağrısı tökürdü gözünün yaşın.
Zamanın bu haqsız qanunlarına
Dövrünün bu azğın məlunlarına
Gücü çatmasa da, boyun əymirdi,
Heç söz götürmürdü, töhmət yemirdi.
Məğrurluq heykəli, çox qürurluydu.
Ürəyi sevgiylə, eşqlə doluydu.
Ömrünün ən gözəl bəzəyi, nuru
Tükənməz sevinci, dönməz qüruru.
Gözü tək sevdiyi balalarıydı,
Onlar Nətavanın dağ vüqarıydı.
Onların eşqiydi onu yaşadan,
Taleyə pəl vuran, ömrə daş atan
Olmasaydı əgər şirin həyatda
Ömürlər xoş keçər, solmaz həyat da.
Ana ürəyinin ən şirin barı,
Tükənməz dövləti, qiymətli varı.
Gözünün işığı oğuldu qızdı
Ona nə etsə də düşünür azdı.
Xurşud da ömrünün şirin varını
Sevirdi, sevimli övladlarını.
Ən xoş təsəllisi onlardı ancaq,
Bilmirdi sabahı necə olacaq.
Tanrım da çox gördü bunu anaya
Ən ağır dərd verdi bu binəvaya
Sevimli balası Mir Abbasının
Yazdı taleyinə acı yasını.
Övlad həsrətini, bala dağını
Fəraqda əridən ürək yağını.
Analar anlayar bu Nətavanı,
Dərd-ələm içində üzüldü canı.
Gözünün yaşını töküb ovcuna,
“Getmə” söylədi əziz oğluna.
İçirdi zəhəri acı bal kimi
Gəzirdi otaqda bir xəyal kimi
Ağılar deyirdi gül balasına
Ürəyi dözmürdü onun yasına.
Sonsuz ağrılarla keçirdi günü
Göyləri dəlirdi fəryadı, ünü.
Get-gedə taqətdən düşürdü dizi,
Ağlamaqdan artıq tor görür gözü.
Ah, mənim sevimli, şairə nənəm,
Bəxtiyar olmayan gülüzlü sənəm,
Həyat kitabını vərəqlədikcə,
Könül səslərini mən dinlədikcə,
İkiqat ağrılar üzür qəlbimi,
Elə bil görürəm mən öz dərdimi
Olaydı sənin tək gücüm, qüvvətim,
Bir də şair kimi gözəl qüdrətim,
Omrümün ən ağır qəmin, möhnətin,
Qəlbimi kül edən sonsuz həsrətin
Sözbəsöz hörəydim bir inci kimi
Ömrümün ən böyük sevinci kimi.
Şer xəzinəsinə töhfə verəydim
Könlüm rahatlanıb, qəlb dincələydi.
Əfsus ki, yox mənim elə qüdrətim
İkinci Natəvan olarmı? Çətin.
Ay nigaran ruhlu şairə nənəm,
Acı bir həqiqət söyləyim sənə.
Dilimi göynətsə, yandırsa da söz.
Dərd bağrım başında olsa da köz-köz.
Qulaq as, gəl sənə açım qəlbimi,
Söyləyim dünyaya sığmaz dərdimi.
Candan çox sevdiyin Qarabağının,
Üz qoyub yatdığın bu torpağının,
Sevərək gəzdiyin hər qarışına,
Hər ağac dibinə, hər bir daşına.
Neçə igidlərin qanı tökülmüş,
Neçə ana bağrı qəmdən sökülmüş,
Hər şəhid oğulun arzularında
Nalan anaların ah-amanında
Sənin kədərindən bir pay yaşayır
Qəmini bu gün də onlar daşıyır.
Sizin gözünüz tək qoruduğunuz
Şəninə yüz şer doğurduğunuz,
Bu gözəl diyarı verdik biz bada,
Taleyin tapşırdıq yağı, cəllada.
Bir ağrı yandırır kövrək qəlbimi,
Yadlar tapdalayır ulu qəbrini,
Sevdiyin bənövşə bitmir qəbirində.
Onlar da ölübdür vətən dərdindən,
Bir vaxt xəyalların gəzən göyləri,
Ruhun dolaşmayır nə vaxtdan bəri,
Didərgin düşübdür vətəndən o da.
Çatır qulağıma bir səs, bir səda.
Ayılın, yurddaşlar, qalxın ayağa.
Dönün vətən üçün arxa, dayağa.
Alın düşmənlərdən qisası, qanı
Bu günün Nəbisi, Babəki hanı?
Cavanşir nəslindən qalmayıb bir kəs?
Hanı, hardadılar, eşitmirəm səs.
Zaman yetirməyib bəlkə qəhrəman?
Bəlkə doğulmayıb yeni Cavad xan?
Hardadır gəlsinlər Koroğlu, Nəbi
Toplasın başına nər igidləri.
Qalxsınlar qovğaya, girsin döyüşə,
Tanrı rəvac verər özü haqq işə.
Sökülsün çadırlar, bitsin bu həsrət.
Qayıtsın öz doğma yurduna hər kəs.
Ulu Qarabağın şanlı tarixin
Yada əyilməyən canlı tarixin.
Etməyin şərəfsiz ölümə məhkum,
Bu ulu ruhları etməyin məhzun.
Cəmləyin qeyrəti, qovğaya girin.
Haqq sözü, bir daha eşidin, bilin
Şərəfsiz həyatdan ölüm yaxşıdır,
Ləyaqət hər kəsin ömür naxşıdır.
Hekayəni necə yazdım, bilmədim,
Gördünüz Natəvan öldü demədim,
Çünki ölməyibdir, o ölə bilməz.
Ona öldü demək, dilimə gəlməz,
Natəvan yaşayır bu gün bizlərdə,
Əli qələm tutan şair qızlarda,
Üzümü tuturam mən sizə indi
Gəlin unutmayaq nənəmiz kimdi
Biz ondan öyrənək həyat dərsini,
Ləyaqət dərsini, şərəf dərsini,
Vətən səngərində süngüyə dönək,
Onun sevgisiylə döyünsün ürək,
Bu eşqin alovu yandırsın bizi,
Hiddətlə ayağa qaldırsın bizi.
Üzü Qarabağa yüyürsün hamı
Alınsın düşməndən yurd intiqamı.
Göylərdə sərgərdan qərib ruhların,
Nigaran ruhların, zərif ruhların,
Qoy üzü yönəlsin doğma səmaya,
Sirdaşlıq eləsin ulduza, aya,
İnanın, biz bunu etməsək bu gün,
O ulu ruhları yaşatsaq sürgün,
Ölümlə ömrümüz görüşən zaman,
Tanrı bağışlamaz, verməz də aman
Nə torpaq götürər, nə göy saxlayar,
Dünya məhvərindən çıxar, laxlayar.
Diqqətlə düşünək, daşınaq bir də,
Əlac tapmalıyıq mütləq bu dərdə,
Dostları ilə paylaş: |