-Nazir Bakatin çıxış etdi, - dedim. - Göstərdi ki, o günlər talançıların sayı beş
mindən artıq olmayıb. Eyni zamanda bunu da Bakatin dedi - həmin günlər Bakıdakı
daxili qoşunların sayı 12 min nəfər imiş. Deməli, bir talançıya iki yarım milisioner
düşür. Bəs niyə talanların qarşısını ala bilmədilər?
M. S. Qorbaçov düz gözümün içinə baxaraq:
- Doğrudan da, niyə talanların qabağını ala bilmədilər? - deyə soruşur. Məndən
soruşur.
Yazımın bu yerində bir sual (?) və üç nida (!!!) işarəsi qoymaqdan savayı əlacım
qalmır.
Nəhayət, görüşümüzün bir məqsədindən də söz açırıq: söhbət Ali Sovetin qəbul
edəcəyi qərara yanvar hadisələrinin, qanlı divanın müqəssirlərini ittiham edən abzasın
salınmasından gedir. Mən bu abzası əvvəlcədən yazıb hazır etmişəm, oxuyur və
Qorbaçova təqdim edirəm. Bu abzasın qərara salınmağına heç cür razılıq vermir.
Bəllidir ki, heç vəchlə ordunu narazı salmaq istəmir. Təkidlərimizdən sonra bir az
yumşalır. Müəyyən redaktəylə abzasın qərara salınmasına razılıq verir. Tənəffüsdən
sonrakı iclasda mən yenə çıxış elədim və dediyim abzası gecə yazdığım kimi oxudum.
Qorbaçov son sözündə: "Mən deputat Rzayevin hisslərini başa düşürəm", - dedi, amma
son məqamda (artıq iclasdan sonra, bizsiz, Rəyasət heyəti aparatında mətbu mətn
hazırlanarkən) yenə də bu abzas çıxarıldı. Belə qalmaqallı vaxtda hakimiyyətə dayaq
olan Ordunun təəssübünü çəkmək - bütün qeyri-mülahizələrə, faktlara, həqiqət və ədalət
hissinə üstün gəlmişdi.
Bu məsələdə ölkə parlamentində qələbə çala bilmədiksə, məğlub da olmadıq. Hər
halda hadisələrin məğzini, mahiyyətini əsl mətləbdən bixəbər deputatlara çatdıra,
səsimizi, etirazımızı, fəryadımızı eşitdirə bilmişdik. Bir növ qəribə tənasüb yaranmışdı
Ali Sovetdə. Qarabağ məsələsində bizim mövqeyimizdə durmayan "sol - radikal"
deputatlar Ordunun Bakıya divan tutmasından qəti narazılıqlarını bildirirdilər, ordunun
hərəkətini dəstəkləyən "mühafizəkar" və hərbçi deputatlar isə Qarabağ məsələsində
bizimlə tam həmrəy idilər. Ümumiyyətlə, bu tənasüb həm qurultaylarda, həm də Ali
Sovetin sessiyalarında bizim siyasi xətt-harəkətimizi, taktik gedişlərimizi
müəyyənləşdirmək üçün nəzərə alınası vacib faktordur. Bu cəhətdən bəzi deputatlarla
qısa söhbətlərim çox səciyyəvidir. Marşal Axromeyevə yanaşdım, Bakıda olanları
danışdım, ordunun amansız davranışı haqqında mənim rəyimlə qəti surətdə razı
olmadığını bildirdi, amma dərhal əlavə etdi ki, Qarabağ məsələsində yüz faiz
Azərbaycanın mövqeyini müdafiə edir. Sobçaka Yanvar divanı münasibətilə müraciət
etdiyim zaman, "əlbəttə, ordunun hərəkətləri bağışlanmazdır, - dedi, - amma sizin,
Azərbaycan ziyalılarının da günahı var, niyə Bakıdakı erməni talanlarının qarşısını ala
bilmədiz? - Bakı iki milyonluq şəhərdir, - dedim. -Bəs nədən Moskva ziyalıları
Ədəbiyyat evində yəhudi talanının qarşısını ala bilmədi? - dedim. Sobçak: mən
moskvalı deyiləm, leninqradlıyam, - dedi və söhbətimiz bununla bitdi.
B.N.Yeltsinin Yaponiyada çıxışlarının birində Bakıdakı qanlı Yanvar faciəsindən
danışdığını, ordunun hərəkətlərini pislədiyini eşitmişdim. Dəh-lizdə ona yanaşdım, belə
mövqeyi üçün təşəkkür etdim - Mən Rəyasət heyətinin iclasında da sizi müdafiə etdim,
- dedi. Sonra bizim cəbhəçilər sayağı yumruğunu "Rot-Front" cestiylə qaldırdı: - Mən
sizinləyəm, - dedi, amma iclasda Yanvar qırğınının müzakirəsi zamanı bir kəlmə də
dinib-danışmadı. Litva nümayəndələri İttifaqlar Sovetində bizim qarşımızdakı sırada
otururdular. "Çernı yanvar" kitabını Kazimira Prunskeneyə verdim. Arif Məlikov ona
dəhşətli Yanvar fotolarını təqdim etdi. Prunskene: - "Sizə bu divanı tutublar ki, bizi də
qorxutsunlar", - dedi. "Bizim başımıza gələn, sizin də başınıza gələ bilər" - dedim. -
Bəli. Amma Prunskene də, başqa Baltik deputatları da, Orta Asiya nümayəndələri də
müzakirə zamanı susmağı, məsələyə qarışmamağı üstün tutdular.
Bütün bunları yazmaqda məqsədim - şahidi olduqlarımı, duyub-düşündüklərimi,
olub-keçənləri artırıb-əskiltmədən qələmə almaqdır, həm olanları tarixin gələcək çək-
çeviri üçün hifz etmək istəyirəm, həm də bugünkü qüvvələr nisbətinə ayıq real
mövqedən yanaşmağa çağırıram. Deputat korpusumuzun işini nöqsansız saymıram.
Bəlkə də başqa deputatlar bizdən daha səmərəli fəaliyyət göstərə bilərdi. Nə deyim...
Amma xalqımızın mənafeyi, şərəfi və ləyaqəti yolunda əlimizdən gələni, bacardığımızı
etdik və bu cəhətdən tarix qarşısında da, millətimiz qarşısında da alnımız açıq, üzümüz
ağdır. Şübhə etmirəm ki, tarix özü yaxşını-yamanı ayırd edəcək, həqiqi əməllə havayı
sözləri fərqləndirəcək, çətin parlaman döyüşləriylə asan çayxana tənqidlərinin hərəsini
öz yerinə qoyacaq. Üzücü siyasi deyişmələrlə gurultulu şeir gecələrinin başqa-başqa
canrlar olduğu, yəqin bir gün hər kəsə aydın olacaq. Halva-halva deməklə ağız şirin
olmadığı kimi "qeyrət, qeyrət" deməklə də insan qeyrətlənmir. Əlbəttə, adama bir az yer
eləyir ki, deputatlarımız Moskvada rəqiblərimizlə çarpışan zaman burda da bəziləri
deputatlarımızın kölgələrini qılınclayır, onlara həcv yazırdılar. Elə bil düşmənlərimizin
cızdığı çox dəqiq bir layihəni həyata keçirirdilər - xalqı ziyalılara, deputatlara qarşı
qoymaq, parçalamaq və hökm etmək. Xalqın tarixi zəkası dövrün hər hansı keçəri, ötəri
oyunlarına, fəndlərinə üstün gələsidir. Ziyalıları hörmətdən, nüfuzdan salmaq, onların
ünvanına hər çeşidli föhş və böhtanlar yağdırmaq faşist və totalitar recimlərin ən dürüst
göstəricisi, ən dəqiq əlamətidir. Faşist Almaniyası da, Çinin maoçu mədəni inqilabı da,
dini fanatiklərin hökm sürdüyu quruluşlar da, hər hansı qaraguruh hərəkatı da, bütün
fərqli cəhətlərinə baxmadan bir ümumi nöqtədə birləşir - ziyalılara nifrətdə. Qəribəsi də
odur ki, bəzən bu nifrəti ziyalıların özləri oyadır, yayırlar! Daha doğrusu, ziyalıların bir
qismi başqa qismini gözdən salmağa, damğalamağa, sıradan çıxarmağa çalışır ki, öz
yerləri gen-bol olsun. Amma bu xam xəyaldır. Ziyalıları, ümumiyyətlə ziyalılıq
anlayışını ləkələməyə çalışanlar üstünə qonduqları budağın özünü baltalayırlar. Məşhur
xalq məsəli var - hörmətli yazıçımız İsmayıl Şıxlı həmin məsəli yerində yadımıza saldı:
"Sapı özündən olan baltalar" ifadəsi həm də özləriözlərini baltalayan ziyalılara aiddir.
Çingiz Aytmatovun manqurtluq anlayışı da bir tərəfdən milli köklərini dananlara
aiddirsə, o biri tərəfdən öz ziyalılıq borcundan vaz keçənlərə, mədəniyyət və
mənəviyyat irsindən imtina edənlərə şamil edilə bilər. Hər şey ötüb keçəcək, xalqın
həqiqi dəyərləri qalacaq. Zamanın bütün tozanaqlarını və haray-qışqırıqlarını yarıb
keçən əbədi meyarlar qalacaq.
Dostları ilə paylaş: |