Ali Sovetin sessiyalarında da Oljasın bizə dost və arxa olduğunu dönə-dönə görmüşük.
Ermənistan zəlzələsində ora yardıma gedənlərin təyyarə qəzasında həlak olması və bu
barədə "Komsomolskaya Pravda" qəzetində çıxan məlumatı Oljasa verdim və o,
çıxışında bu barədə təsirli sözlər dedi... Sonralar bizə irad tutanlar da tapıldı: Niyə bu
faktı Azərbaycan deputatları yox, Oljas dedi? Məgər bunun özümüzün deyil, başqa
respublikanın nümayəndəsinin dilindən səslənməsi daha əhəmiyyətli, daha tutarlı
deyilmi?
Yanvar faciəsində Oljas bir neçə gün Bakıda oldu, bədbinləşənlərə ürək-dirək
verdi. Bir növ həyan oldu bizə. "Bölüşülmüş sevinc ikiqat sevinc, bölüşülmüş dərd
yarım dərddir", - deyirlər.
Oljas Bakıda xəstələnmişdi, "Azərbaycan" mehmanxanasında yatırdı. Ona
dəyməyə getmişdim. Yanında Xalq Cəbhəsindən cavanlar vardı. Azadlıq meydanı
bomboş idi. Bir azdan həngamə başladı. Tanklar hay-küylə meydana daxil olub Dəniz
vağzalına tərəf getdilər, gəmilərə atəş açdılar. Mehmanxanaya tərəf də güllə atırdılar.
Cavanlar pəncərədən dəhlizə düşmüş güllələri Oljasın nömrəsinə gətirdilər, bizə
göstərdilər. Gənc operator mehmanxananın eyvanından bu "dəniz döyüşü" səhnələrini
cəsarətlə çəkirdi.
Gecələr atəş səsi eşidilirdi - daraq-daraq, qatar-qatar avtomat atəşi.Gecələr
gəmilər ulayırdı. Nə məşum səs idi bu - qışın zülmət gecəsində dalğa-dalğa şəhərin
üzərinə yayılırdı. Gecələr yuxum ərşə çəkilirdi.
Hər gün Yanvar müsibətinin yeni-yeni təfərrüatı, faktları üzə çıxırdı.
***
Elə qara Yanvar günlərindəcə faciəmizi dünyaya, ölkəyə çatdırmaq üçün, ona ən
kəskin qiymət vermək üçün müəyyən işlər görüldü. Bu baxımdan ən mötəbər və
əhəmiyyatli kürsülərdən biri, bəlkə də birincisi SSRİ Ali Sovetinin sessiyası idi.
Sessiyada xalqımızın faciəsini bütün ölkəyə, dünyaya çatdırmalıydıq. Asan məsələ
deyildi bu. Yaxşı bilirdik ki, biz 19 yanvar hadisələrinə qiymət vermək tələbini irəli
sürən kimi 13-14 yanvar hadisələrini üzümüzə çırpacaqlar. Həm də ki, 19-20 yanvar
hadisələrinin üstündən az qala tam sükutla keçən mərkəzi informasiya vasitələri 13-14
yanvar hadisələrini yerli-yataqlı və hətta şişirdərək ölkəyə, dünyaya yaymış, bizə qarşı
əsaslı mənfi rəy yarada bilmişdilər. 1989-cu il aprelin 9-da Tbilisidə baş vermiş
faciədən bizim fəlakətimizin fərqli cəhəti bunda idi və bu vəziyyətdən ləyaqətlə çıxmaq
gərəkdi. Ləyaqətlə və həqiqətə sədaqətlə...
Fevralın 13-də "Moskva" mehmanxanasında E.Qafarovanın nömrəsində
toplaşdıq. Səhərisi, sessiya açılırdı. Qərara gəldik ki, hamımızın adından akademik
Midhət Abbasov danışsın. O, 19-20 yanvar hadisələrini araşdıran komissiyanın -
Azərbaycan SSR Ali Sovetinin yaratdığı komissiyanın sədri idi. Komissiya artıq
müəyyən işlər görmüşdü, xeyli fakt, məlumat toplamışdı və nəyin bahasına olursa
olsun, bütün bunları ölkə deputatlarına çatdırmaq lazım idi.
Amma mən başqa sarıdan da nigaran idim. Əmin idim ki, iclas başlayan kimi
erməni deputatlar qabağa düşüb 13-14 yanvar hadisələrindən söz açacaq, o günlər həlak
olanların xatirəsini yad etməyi təklif edəcəklər. Bundan sonra bizim də durub ikinci bir
təkliflə çıxış etməyimiz - 19-20 yanvar şəhidlərinin xatirəsini yad etmək təklifimiz -
təkrar və təqlid kimi, bəhsəbəhs kimi görünərdi, yerinə düşməzdi. Eyni zamanda 19-20
yanvar şəhidlərini yad edib 13-14 yanvarın üstündən sükutla keçmək də olmazdı. Bu,
xalqımıza xas olan insani keyfiyyətlərlə, alicənablıqla, ürək genişliyilə uyuşmayan,
əxlaqa zidd bir şey olardı və hamıya çox pis təsir bağışlardı, əleyhdarlarımızın
dəyirmanına su tökərdi. Yeganə məqbul yol - qanlı yanvarda həlak olanların hamısının
xatirəsini yad etməkdi və bu təklifi məhz biz etməliydik. Bu mülahizələrimi
deputatlarımızla bölüşdüm, mənimlə razılaşdılar.
Fevralın 14-də sessiyanın səhər iclası başlananda Tofiq İsmayılov inadla və əzmlə
(iclasın sədri ona mane olmağa çalışsa da) bu təklifi irəli sürdü və deputatlar, o sıradan
hərbi libasda olanlar da, ayağa qalxıb Bakıda qırılanların xatirələrini sükutla yad etdilər.
Elə həmin səhər iclasındaca Azərbaycan deputatları 19-20 yanvar Bakı qırğınını
müzakirə etmək və bu hadisələrə qiymət verilməsi haqqında fikir yürütdülər. Lakin həm
sədrlik edən A.İ.Lukyanov, həm də erməni deputatları bu məsələni - yenə də uydurma
bir problemin - Dağlıq Qarabağ probleminin müzakirəsinə çevirməyə çalışdılar. Dağlıq
Qarabağ deputatı Vaqif Cəfərov Lukyanova müraciətlə: Anatoli İvanoviç, bildirin fevral
ayından başlayaraq bu məsələ 20 dəfədən artıq müzakirə olunub, - dedi. - Qərarlar qəbul
olunub, amma biri də yerinə yetirilmir. Odur ki, biz qəti surətdə bu məsələnin yenidən
müzakirə olunmasının əleyhinəyik. (Gətirdiyim bütün sitatlar sessiyanın çap olunmuş
stenoqramlarındandır). Başqa bir regionun deputatı qaçqınlar məsələsini müzakirə
etməyi təklif etdi. Yeni mübahisələr başlandı. Mikrofona yanaşıb: "Bakıda dəhşətli faciə
baş verib, - dedim. - On min hərbçini Bakıya göndərmək üçün beş gün kifayət imiş.
Amma 540 deputatı - Ali Sovet üzvlərini Moskvada toplayıb onların rəyini soruşmaq
üçün bu beş gün azlıq edib. İndi biz burda oturub sakitliklə müxtəlif şeyləri müzakirə
edirik, elə bu zaman Bakıda göz yaşları tökülür, qan axır. Bu məsələ müzakirə
olunacaqmı? Seçicilərimizin qəti rəyi belədir: əgər bu məsələyə biganəlik
göstəriləcəksə, Ali Sovetin işində iştirak etməyək (salonda səs-küy).
Fasilədən sonra, saat 12-də ikinci iclas başlanan kimi sədr Midhət Abbasova söz
verdi və Midhət müəllim Bakı faciəsinin bütün acı həqiqətlərini əks etdirən, ordu
hissələrinin qəddarlıq faktlarını göstərən, konkret günahkarları ittiham edən ətraflı və
inandırıcı məruzəylə çıxış etdi. Bu məruzə mətbuatda dərc olunmadısa da Ali Sovetin
bülletenində çap edildi və ölkə ictimaiyyətini Parlament səviyyəsində hadisələrin əsl
mahiyyətilə tanış edən çox mühüm bir sənəd mövqeyini qazandı. Ordunun şəhərə
soxulması, dinc əhalinin qırğını məruzədə Azərbaycan xalqına qarşı törədilmiş təcavüz
və cinayət kimi qiymətləndirilir və 5 maddədən ibarət konkret təkliflər irəli sürülürdü.
Lakin sədrlik edən yenə də müxtəlif fəndlərlə bu məsələni müzakirəyə
qoymamağa çalışdı. Elə həmin gün saat 16-da davam edən iclasda Rüstəm
İbrahimbəyov Azərbaycan nümayəndələri adından bəyanat verdi:
"Bakıda qan tökülməsi davam etdiyinə görə biz təklif etmişdik ki, palata
vətənimizdəki vəziyyəti müzakirə etsin və bu hadisələrə siyasi qiymət versin. Ali
Sovetin bu biganəliyi nəticəsində respublikada vəziyyət daha da mürəkkəbləşə və
problemlər çıxa bilər. Biz təkid edirik ki, bu məsələ ən təcili surətdə müzakirəyə
qoyulsun və hadisəyə hərtərəfli siyasi qiymət verilsin».
M.S.Qorbaçovun replikası: Mənim mövqeyimi bilməniz üçün deməliyəm ki, o,
sizin mövqeyinizə uyğun gəlir: məsələni müzakirə etməliyik. Amma o biri tərəfdən
Dostları ilə paylaş: |