70
Etnoqrafik ədəbiyyatdan məlum olduğu kimi dulus kürələrindən biri də
təndir formalı kürələrdir. Belə kürələrdə nisbətən iri məmulatlar bişirilirdi. Bişirmə
texnologiyası digər dulus kürəsi olan dəmlə eyni olub bilavasitə odda bişirilirdi.
Təndirdə məmulat odun ilə əhatə olunurdu, yəni odda bişirilirdi. Bizə elə gəlir ki,
IV qazıntı sahəsindəki V kvadratda açılan iri həcmli təndir məhz bu məqsəd üçün
nəzərdə tutulmuş təndirdir.
Darvazalarda istifadə olunan cəftələr, həncamalar və qıfıllar da bələdçi rolu
oynayaraq Ağsu sakinlərinin taxta darvazalardan geniş istifadə etdiklərini
söyləməyə imkan verir. Cəftələr müxtəlif forma və quruluşa malik olub dəmirdən
hazırlanmışdır. 4-cü kvadratdan tapılan cəftə və halqalar taxta qapıya məxsus
olmaqla tapıldığı ərazidə belə bir qapının olmasını göstərir. Cəftənin qarmaqlı
tərəfi qapının üstünə vurulur, qarşı tərəfə isə qıfıl keçirmək üçün deşiyi olan başqa
bir hissə vurulur. Cəftənin ortasında açırımı olan uzunsov halqası həmin qıfıl
bağına keçirilir və qıfıl da öz növbəsində qıfıl sağının deşiyindən keçirilərək
bağlanırdı. Qıfıl bağlanmasına ehtiyac olmayan qapılar isə sadəcə olaraq qarmaqla
bağlanırdı. 6a kvadratından əldə olunan qarmaqlardan çox güman ki, təsərrüfat
tikililərinə aid qapıların bağlanmasında istifadə olunmuşdur.
Qıfıl bağlamaq üçün başqa bir vasitə midvardır. Midvar da
eyni qayda ilə qapının hər iki tərəfinə vurulur, qıfıl bağlamaq üçün
hər iki tərəfə halqalar keçirilirdi. Ərazidən xeyli miqdarda midvarın
tapılması sübut edir ki, ondan inşaat materialı kimi geniş istifadə
olunmuşdur. Onun praktik əhəmiyyəti və istifadə təyinatı o qədər
çoxşaxəli olmuşdur ki, bu günə qədər əksər dağ kəndlərində hələ
də istifadədən çıxmamışdır. Etnoqrafik müşahidələr Şamaxının
Dəmirçi, Qaleybuğurd, Dədəgünəş, Zarat, İsmayıllının Lahıc, Basqal, Ağsunun
Ülgüc və s. kəndlərində midvardan hələ də istifadə edildiyini sübut edir.
Midvar iki üsulda hazırlanırdı. Birinci üsulda isti döymə yolu ilə ucları bir-
birinə birləşdirildikdən sonra çarxlanaraq itiləşdirilirdi. İkinci üsulda isə
midvarların ucları birləşdirilmir, pəncərə və ya qapı dirəyinə vurulduqdan sonra
dirəyin digər tərəfinə çıxan ucları qatlanır, bununla da daha etibarlı dayanıqlığa
malik olurdu. IV sahənin 3-cü kvadratından əldə olunan həncamalar buna misal ola
bilər.
4a kvadratından əldə olunan halqalar qapı cəftəsinə (midvara) taxılaraq qıfıl
bağlamaq üçün istifadə olunmuşdur. Belə halqalardan daha çox evlərdə uşaq
nənnisi asılmasında istifadə olunurdu. Belə ki, midvar evin dam çardağının tirinə
vurulur, nənninin təhlükəsizliyini təmin etmək üçün hər bir midvardan iki ədəd iri
həcmli halqa asılırdı. Nənni ipləri bu halqalara bağlanırdı. IV sahədən aşkarlanan
belə halqanın diametri 5 sm olmaqla ağır çəkili yüklər üçün nəzərdə tutulmuşdur.
Arxeoloji qazıntılardan əldə olunan qıfıllar oksidləşərək öz əzəli formasını
itirdiyindən onların yerli istehsala məxsus olub-olmadığını söyləmək mümkün
deyildir. IV sahədə 2c, 4c və 8-ci kvadratlardan tapılan üç ədəd qıfıl əsasında
71
yalnız onu demək olar ki, əhali şəhəri tərk edərkən bəlkə də qayıtmaq ümidi ilə
qapılara qıfıl vurmuşdur. Daha maraqlı tapıntılardan biri də darvazaların bədii
tərtibatı məqsədilə istifadə olunan bəzək nümunəsidir. Bildiyimiz kimi taxta
darvazalarda taqqılbab və bəzəklərə xüsusi diqqət verilirdi. IV sahənin 5a
kvadratından tapılan əşya darvazaların bəzədilməsində istifadə olunmuşdur.
Kənarları lentşəkilli, mərkəzi hissəsi isə oval formalıdır. Tən ortada deşik
açılmışdır. İlk baxışda bilərziyə bənzəyən bu hissələri diaqonal şəklində üst-üstə
yığdıqda 6 guşəli ulduz əmələ gəlir ki, bu da darvaza bəzəyindən başqa bir şey ola
bilməz. 6 guşəli ulduz təsviri Şərq aləmində geniş yayılmışdır. Buna Süleyman
möhürü də deyilir.
Xalq yaşayış evlərinin daxili sahmanı ailənin maddi imkanlarının real
təzahürü idi. Hər bir evin daxili interyerində camaxatanın (yük yerinin) olması ən
mühüm məişət elementlərindən biri idi. Xüsusi divar açırımlarından istifadə
etməklə yaradılan camaxatanlar evin ölçüsünə uyğun 2 və ya 3 ədəd olmaqla qapı
ilə üzbəüz divarda yerləşdirilirdi. Əsasən yorğan-döşək, işlənməyən xalça-gəbə,
bayır-bacaq paltarları, hətta ailədəki qızların cehizi sandığa yığılaraq
camaxatanlara qoyulurdu. Camaxatanlardan yeri gəldikcə ərzaq saxlamaq üçün də
istifadə olunurdu. Camaxatanların qarşısı ailənin imkanından asılı olaraq ipək və
ya pambıq parçalardan hazırlanmış, bəzən güləbətin və zərəndaz tikmələrlə
bəzədilmiş pərdələrlə tutulurdu. Etnoqraf Fəzail Vəliyevin yazdığına görə Şirvan
bölgəsində gəlinin cehizləri arasında camaxatan pərdələrinin olması vacib sayılırdı.
Ona görə də toydan xeyli əvvəl oğlan evinin yük yerlərinin ölçüsü götürülərək ona
müvafiq pərdələr tikilər, baş tərəfinə rəngbərəng parçalardan qıyqac bükülmüş
pərdəbaşlığı tutulardı. Etnoqrafik müşahidələr sübut edir imkanlı ailələrdə belə
pərdəbaşlığına güləbətin qotazlar dataxılıdı. Güləbətin tel və ipək saplarla ipək
saplarla toxunan bu qotazlar ipək qaytan vasitəsilə pərdəyə əlavə olunurdu.
Güləbətin tellər qızıl, gümüş, bürünc və misdən həddə adlanan alət
vasitəsilə çəkinirdı (güləbətin telin çəkilməsi çarpaz tellərinin əldə olunması üsulu
ilə eynidir. Sadəcə olaraq güləbətin tellər həddənin daha kiçik gözlərindən
keçirilir). Onun üzərinə ipək sap sarınır ki, bu da güləbətin adlanırdı. Qazıntılar
nəticəsində əldə olunmuş güləbətin hissəsinin pərdə qotazı olduğunu hesab edirik.
IV sahədən aşkarlanan misdən çəkilmiş güləbətin tel, ipək sap və toxunuşu başa
çatmamış məmulat bölgədə güləbətin tikmənin intişar tapdığı haqqındakı
məlumatları təsdiqləyir.
Eyni funksiyanı yerinə yetirən digər bir məişət elementi taxçadır. Taxçalar
cəmaxatandan yalnız ölçüsünə görə fərqlənirdi. Camaxatanların ölçüsü təxminən
eni 1-1,3 m, hündürlüyü 1,45 m, divardakı dərinliyi isə 60-70 sm, taxçanın ölçüsü
isə hündürlüyü 1,40 m, eni 80 sm, divardakı dərinliyi isə 25-30 sm olaraq
qoyulurdu. Ağsunun XVIII əsrə aid evlərinin demək olar ki, hamısında bu tip
elementlərə rast gəlmək mümkündür.
Dostları ilə paylaş: |