189
dramaturgiyası məhz şairin dramaturgiyasıdır, onda rejissor Oruc Qurbanova bir daha
haqq qazandırmaq olar.
Maraqlı sujet xəttinə malik olan bu pyes müharibə əleyhinə yazılmış bir əsərdir.
Damokl qılıncı insanlığın başı üzərində böyük bir təhlükə kimi verilmişdir. Nazik bir
ipdən asılmış bu qılınc hər dəqiqə yerindən qopub düşə bilər.
Əsər A.B.adlı talesiz bir insanın məktubu ilə başlayır. Məktubda atom bombası ilə
havada keşik çəkən, yaşamaqdan cana doymuş A.B. məktəb yoldaşı Arxitektora bildirir
ki, saat səkkizdə o, bombalar atıb bütün bəşəriyyəti məhv edəcəkdir. O, yazır:
“Bombalar atacağam. Ondan sonra qiyamət qopacaqdır. Mən intiqam Allahıyam. Mən
hər şeyi darmadağın edən, günahların təmizlənməsini tələb edən bir Allaham. Düz
səkkiz tamamda... Siz əvvəlcə motorun uğultusunu eşidəcəksiniz. Əvvəlcə sizin
şəhəriniz yox ediləcəkdir. Sonra isə müharibə başlanacaq. Bütün dünya darmadağın
ediləcək”.
A.B. yoxsul adamdır. Hələ uşaqkən sinif yoldaşları həmişə onu ələ salarlarmış.
Vaxtilə onunla bir məktəbdə oxumuş Arxitektor isə həmişə A.B.-yə yaxşı münasibət
bəsləyibmiş. Elə ona görə də əsərin qəhrəmanı ən çətin, çıxılmaz dəqiqədə - bütün
bəşəriyyəti qırğına verəcəyi bir zamanda öz niyyətini yalnız Arxitektora bildirir. A.B.
“əmr alanlar”dan olur. Ona nə deyilirsə, yerinə yetirir. Hamıya “baş üstə” deyir. Onun
buyruq qulu olmasından istifadə edən rəzil adamlar – Aptekçinin oğlu, Boksçu,
Komissionçu və başqaları A.B.-ni hər addımda alçaldırlar. Bu uğursuz taleli insanın
başına əlli min oyun açırlar. O, pilot məktəbinə göndəriləndə tamaşaçıya elə gəlir ki,
A.B.-nin qarşısında, nəhayət ki, yaşıl işıq yandı. Amma ilk baxışda belə görünür. Əsərin
qəhrəmanı tez bir vaxtda yenə uğursuzluğa yuvarlanır. Yaşamağından bezən, onu əhatə
edən mühitdən təngə gələn bu saf qəlbli insan birdən-birə dəyişir, bütün bəşəriyyəti
məhv etmək istəyir. Ancaq... bacarmır.
Bələdiyyə teatrında tamaşaya qoyulmuş əsərin ən cəlbedici, unudulmaz
epizodlarından biri məhz bu hadisənin səhnə həllidir. Dəhşətli uğultu səsindən sonra
insanların məhv olmaq qorxusundan doğan hayqırtılar birdən-birə kəsilir və səhnədə
A.B.görünür. O, belə deyir: “Mən ata bilmədim. Mən uşaq arabalarına, çiçək
səbətlərinə bomba ata bilmədim”. Nazim Hikmət uşaq arabalarını insanlığın, çiçəkləri
190
isə təbiətin rəmzi kimi vermişdir. A.B.-nin əsərin sonunda dediyi ürək titrədən
sözlərindən sonra onun dilindən bu kəlmələri eşidirik: “Mən İntiqam Allahı olmağı
bacarmadım. Amma başqa birisi olacaqdır...” Bu son sözlərin dramatik təcəssümü də
quruluşçu rejissor tərəfindən məharətlə işlənmişdir.
Bələdiyyə Teatrının səhnəsində tamaşaya qoyulmuş “Damokl qılıncı”nın uğuru
təbii olaraq, əsasən, aktyor ansamblı ilə bağlıdır. Elxan Rzayev A.B. rolunu məharətlə
oynayır. Əsərdə qəhrəmanın başına gələn müsibətlər, keçirdiyi daxili sarsıntılar bu gənc
aktyorun ifasında dəqiq, ifadəli şəkildə təcəssüm olunmuşdur. Əsərin maraqlı obrazları
arasında Kar və onun arvadını ayrıca qeyd etmək istərdim. Bunlar simvolik obrazlardır.
Yəni dünyada elə insanlar var ki, baş verən hadisələrə biganədirlər, daha dəqiq desək,
kardırlar. Bütün bəşəriyyət məhv olmaq təhlükəsi qarşısında qalanda, onlar öz
aləmlərində yaşayırlar. Yəni, Nazim Hikmətin dediyi kimi, hadisələrə kar kimi
münasibət bəsləyirlər, sanki heç nə eşitmirlər. Karın arvadı obrazı Mahirə Yaqubovanın
ifasında çox inandırıcıdır. O, yaratdığı surətin mahiyyətini dərindən dərk etmişdir. Ona
görə də tamaşaçı aktrisanın hər sözünü alqışlarla qarşılayır. Eyni sözləri Kar rolunun
ifaçısı Vaqif Əliyev haqqında da demək olar. Onun səhnəyə hər gəlişini tamaşaçı təqdir
edir, bəyənir. Kazım Abdullayev (Aptekçi) püxtələşmiş aktyordur. O, Aptekçi surətini
özünəməxsus orijinal tərzdə yaratmışdır. Bələdiyyə teatrının aktyorlarından Tofiq
Bayramovun (Hakim), Aydın Əliyevin (Komissionçu), Zemfira Səidinin (Hakimin
qızı), Qadir Ramazanovun (Boksçu), Arzu Şuşanovanın (Benzinsatanın qızı), Rafiq
İbrahimovun (Arxitektor), Esmiralda Şahbazovanın (Arxitektorun arvadı) və
başqalarının yaratdıqları obrazlar yaddaqalandır, təsirlidir.
Bütün bu müsbət keyfiyyətlərlə yanaşı, bir qeydimi də deməyi özümə borc bilirəm.
Tamaşada aktyorların səs tonunun bəzən yüksək olması, yersiz çığırtı əsərin ümumi
dəyərinə xələl gətirməsə də, islah olunmalı cəhətdir.
Bəlkə də bu tənqidi qeydim Şəhriyar klubunun akustikası ilə bağlıdır. Yəni
aktyorlar, tamaşaçı yaxşı eşitsin deyə, sözlərini uca səslə deyirlər.
Mənə elə gəlir ki, inşallah, bir gün gələr ki, Bələdiyyə Teatrının öz binası olar və
həmin binadakı teatr səhnəsində biz belə qüsurlara rast gəlmərik.
191
Teatrın sərəncamçı müdiri Yusif Muxtarovla söhbətdə mənə məlum oldu ki,
“Damokl qılıncı” pyesi 2002- ci ilin aprel ayında Nazim Hikmətin 100 illiyi münasibəti
ilə İstanbulda nümayiş etdiriləcəkdir.
İndidən, Bələdiyyə Teatrının bədii rəhbəri və direktoru, millət vəkili, xalq artisti,
Dövlət mükafatları laureatı, bir çox yenilikçi tamaşaları ilə sənət aləminin haqlı
rəğbətini qazanmış Amaliya xanım Pənahovaya və onun başçılıq etdiyi aktyor
ansamblının bütün üzvlərinə böyük uğurlar arzulayıram.
“Azərbaycan” qəzeti, 21 fevral 2002.
Dostları ilə paylaş: |