Az Book Library qizilgüLÜn adi
Yüklə 2,97 Mb. Pdf görüntüsü
|
545 ALTINCI GÜN İ K İ N D İ V A X T I ,
Baş rahibin mənzili iclas zalının üstündə yerləşirdi, bizi qəbul etdiyi geniş və təmtəraqlı otağın pəncərəsindən bu aydın, amma küləkli havada monastır kilsəsinin damı üzərindən Binanın nəhəng cizgiləri görünürdü. Abbat pəncərənin qarşısında dayanıb, onu seyr edirdi; içəri girdiyimiz zaman vüqarla başını tərpədib, onu göstərdi. “Gözəl qaladır, - dedi, - quruluşu qızıl qaydaya tabe olan nisbətdədir, tağların biçimini də üstələyir. Üç mərtəbədən ibarətdir, çünki üç - müqəddəs Üçlüyün sayıdır, İbrahimi ziyarət edən mələklərin sayıdır, Yunusun böyük bir balığın qarnında keçirdiyi günlərin sayıdır; İsa və Lazar öz məzarlarında üç gün qaldılar. Məsih öz Səmavi Atasına üç dəfə yalvardı ki, acı qədəhi onun dodaqlarından uzaqlaşdırsın; üç dəfə həvarilərlə birlikdə dua etdi. Peter ona üç dəfə xəyanət elədi, dirilişdən sonra tərəfdarlarının gözünə üç dəfə göründü. İlahiyyat fəzilətləri üçdür, müqəddəs dillər də üçdür, ruhun üç şöbəsi var. Şüurlu məxluqlar üç növdür: mələklər, insanlar və şeytanlar. Səsin tərkibi üçdür: avaz, ucalıq və ahəng. Bəşər tarixi üç dövrə bölünür: qanundan əvvəl, qanun dövrü və qanundan sonrakı dövr. “Mistik uyğunluqların heyrətamiz toplusu”, - deyə Vilhelm razılaşdı. “Amma dördkünc biçimlər də, - abbat sözünə davam etdi, - spiritual örnəklərlə zəngindir. Əsas fəzilətlərin sayı dörddür, il dörd fəsildən ibarətdir, dörd təbii maddə var; isti, soyuq, rütubət və quruluq dördlükdə mövcuddur; sonra doğuluş, böyümə, yetkinlik və qocalıq; dörd növ heyvan vardır - səmada, yerdə,
546 havada və suda yaşayan heyvanlar; göy qurşağının əsas rəngləri - dörddür; üç yüz altmış altı günlük uzun il dörd ildən bir olur”. “Hə, əlbəttə, - Vilhelm cavab verdi, - üçlə dördün cəmi isə yeddi edir, rəqəmlərin ən sirlisi; üçün dördə hasili on iki edər - həvarilərin sayı; on ikini on ikiyə vuranda yüz qırx dörd edir seçilmişlərin sayı”. Rəqəmlərin mistik aləminə dair bu son bilik nümayişinə abbatın əlavə edəcəyi başqa heç nə yox idi. Beləcə, Vilhelm mövzunu açmağa yaxşı imkan qazandı. “Son günlərin sizə məlum hadisələri haqqında danışmaq istəyirəm. Mən uzun müddət onların haqqında düşündüm”, - o dedi. Üzü pəncərəyə tərəf dayanmış abbat dönüb Vilhelmə baxdı. Baxışları sərt idi. “Mən deyərdim ki, lazım olduğundan da uzun. Bunu gizləmirəm, Vilhelm qardaş, sizdən çox şey gözləyirdik. Sizin gəlişinizdən altı gün keçmişdir. Bu altı gün ərzində, Adelmodan başqa, dörd rahib də öldü. İkisi də inkvizisiya tərəfindən həbs edildi. Əlbəttə ki, onlar haqlı olaraq həbs edildilər, amma inkvizitor üstü açılmamış cinayətlərlə şəxsən özü məşğul olmasaydı, bu rüsvayçılığın qarşısını ala bilərdik. Son olaraq, mənim vasitəçi kimi çıxış etdiyim mühüm görüş məhz bu çirkin hadisələr üzündən açınacaqlı nəticələr verdi... Razılaşın ki, sizdən Adelmonun ölümü ilə bağlı təhqiqat aparmağınızı rica etdiyim zaman daha uğurlu nəticələrə ümid etməyə əsasım vardı...” Vilhelm günahkarcasına susmuşdu. Əlbəttə, abbat haqlı idi. Hekayəmin əvvəlində ustadımın mülahizələrinin çevikliyi, insanları heyrətləndirməyi xoşladığını göstərmişdim. Onun qürurunun bu haqlı ittihamlarla necə yaralandığını təsəvvür etmək olardı. “Siz haqlısınız, - o cavab verdi. - Mənə göstərilən etimadı doğrultmadım. Lakin zati-aliləri, bunun səbəbini izah etmək istərdim. Cinayətlərin heç biri rahiblər arasındakı düşmənçiliklə, ya da qisasçılıqla bağlı deyil. Monastırınızın keçmiş tarixindən qaynaqlanan səbəblər üzündən bu cinayətlər baş verir...” Abbat səbirsizliklə Vilhelmin sözünü kəsdi. “Nə demək istəyirsiniz? Mən də bilirəm ki, cinayətlərin səbəbini zavallı keların
547 tarixçəsində axtarmaq lazım deyil. Keların bəd əməlləri başqa əxlaqsızlıqlarla üst-üstə düşdü, hansı ki, bunlardan müəyyən dərəcədə məlumatım var. Lakin əfsus, bu barədə danışmağa haqqım yoxdur... Mən ümid edirdim ki, siz öz ağlınızla bunları aşkara çıxaracaq və özünüz deyəcəksiniz...” “Zati-aliləri günah etiraf etmə zamanı əldə edilmiş məlumatları nəzərdə tutur?” Abbat üzünü çevirdi. Vilhelm sözünə davam etdi: “Conab-əqdəslori mənim zati-alinizdən öyrənmədən, Berenqarla Adelmo və Berenqarla Malaxia arasında yasaq münasibətlər olduğunu bilib-bilmədiyimi öyrənmək istəyirlərsə, bəli, monastırda hamı bilir bunu”. Abbat hirsindən qızardı. “Belə şeylərin mürid yanında müzakirə olunmasını məsuliyyətsizlik hesab edirəm. Həm də indi, görüş bitdikdən sonra, məncə, sizin mirzəyə ehtiyacınız yoxdur. Sən çıx, oğlum”, - amiranə səslə dedi. Utandırılmış halda otağı tərk etdim. Amma çox maraqlandığım üçün qapını azca aralı qoyub, arxasında gizləndim və söhbətin davamına qulaq verdim. Vilhelm yenidən sözünə davam etdi. “Bu əxlaqsız münasibətlər olsa da belə, onların qətllərlə, demək olar ki, əlaqəsi yoxdur. Burada səbəb başqadır və güman edirəm ki, siz bunu bilirsiniz. Bütün qətllər Afrikanın sərhədində illərdir saxlanılan bir kitabı ələ keçirməkdən ötrü törədilmişdir, indi bu kitab Malaxianın səyləri ilə yerinə qoyulub. Buna baxmayaraq, siz də gördünüz ki, cinayətlər bitmədi”. Uzun səssizlik çökdü. Sonra abbatın səsi eşidildi. Gözlənilməz sözlərdən sarsılmış bir adamın xırıltılı səsi. “Bu mümkün deyil. Siz... Siz Afrikanın sərhədi haqqında necə öyrənə bildiniz? Yoxsa qoyduğum qadağanı pozub, kitabxanaya girmisiniz?” Vilhelmin etiraf etməsi lazım idi. Amma o zaman abbatın qəzəbi sərhəd tanımazdı. Fəqət Vilhelm də yalan danışmaq istəmirdi. Ona görə də suala sualla cavab verib vəziyyətdən çıxdı. “Zati-aliləri ilk görüşümüzdə Kəhəri heç görmədən dəqiq təsvir edə bilən mənim kimi bir adamın, girişi qadağan olunmuş yerlər haqqında çətinlik çəkmədən fikir yürüdəcəyini deməmişdimi?”
Yüklə 2,97 Mb. Dostları ilə paylaş:
|