1
F.Köçərli adına Respublika
Uşaq Kitabxanası
“Azərbaycan, mənim taxtım – tacım, oy!”
Almas İldırımın anadan olmasının 110 illiyi münasibəti ilə
mərkəzi kitabxanaların uşaq şöbələri, MKS-nin şəhər, qəsəbə,
kənd kitabxana filialları üçün hazırlanmış metodik vəsait
Bakı-2017
2
Tərtibçi: Zahirə Dadaşova
İxtisas redaktoru və Şəhla Qəmbərova
buraxılışa məsul: Əməkdar Mədəniyyət işçisi
“Azərbaycan, mənim taxtım – tacım, oy!” metodik vəsait /
tərt.ed.Z.Dadaşova; ix. red. və burax. məsul Ş.Qəmbərova;
F.Köçərli adına Respublika Uşaq Kitabxanası.- Bakı, 2017.-
23s.
©F. Köçərli adına Respublika Uşaq Kitabxanası, 2017
3
Ön söz
Almas İldırımın yaradıcılığı Azərbaycan mühacirət
poeziyasının bənzərsiz səhifələrindən birini təşkil edir. Şairin
milli azadlıq və müstəqillik uğrunda mübarizəyə həsr olunmuş
əsərlərində xalqımızın ağrılı tarixi taleyi, vətən məhəbbəti və
qəriblik mövzusu dolğun bədii əksini tapmışdır.
Kitabxanaçılara təqdim etdiyimiz metodik vəsaitdə əsas
məqsədimiz
Azərbaycan
ədəbiyyatının
inkişafında
özünəməxsus xidmətləri olan Almas İldırımın yaradıcılığı ilə
onları daha da dərindən tanış etməkdir. 2017-ci ildə Almas
İldırımın 110 illik yubileyidir. Bu münasibətlə il ərzində bütün
mədəniyyət ocaqlarında silsilə tədbirlər keçirilməsi nəzərdə
tutulmuşdur.
Yaxşı olar ki, hər bir kitabxanaçı vəsaitdə verilmiş
müxtəlif tədbir formalarından istifadə etməklə ömrünün sonuna
qədər vətən həsrətli ilə yaşayan nakam şairimiz Almas İldırımı
öz oxucularına tanıtsın.
Metodik vəsait iki bölmədən ibarətdir:
I Böımə: “Qara taleyin dastanı”(A.İldırımın həyat və
yaradıcılığı haqqında məlumat)
II Bölmə: “A.İldırım- 110” kitabxanada keçiriləcək yubiley
tədbirləri
II bölmədə verilmiş tədbir formaları yeniyetmə və gənclərin
vətənpərvərlik ruhunda yetişdirilməsində xüsusi əhəmiyyət
kəsb edəcəkdir.
Metodik vəsaitdən uşaq, məktəb, gimnaziya, lisey, kollec,
kütləvi və s. kitabxanaların kitabxanaçıları istifadə edə bilər.
4
I Böımə:
“Qara taleyin dastanı”
Könlümə tək kəbə yapdım səni bən,
Sənsiz nedəm qürbət eldə günü bən.
Sənsiz nedəm Allahı mən, dini bən,
Azərbaycan, bənim tacım, taxtım oy!
Oyanmazmı kor olası baxtım oy!
Ötən yüzilliyin otuzuncu illərində yazılmışdı bu şeir.
1920-ci ildə Rusiyanın Azərbaycanı qanlı caynağına alıb
yenidən işğal etdiyi, milli dövlətimizi yıxıb köləlik
boyunduruğunu yenidən boynumuza taxdığı bir vaxtda. Onda
bu boyunduruğu boyunbağı kimi görüb sığallayanlar da varıydı,
köləlik zənciri olduğunu duyub qırmağa, onu boynundan
çıxarmağa can atanlar da. Birinciləri öpüb göz üstünə
qoyurdular, ikinciləri gözümçıxdıya salırdılar. Yuxarıdakı
sətirləri yazan Almas İldırımın adı ikincilərin sırasındaydı,
sözsüz ki, onu öpüb göz üstünə qoymazdılar, qoymadılar da!
1988-ci ilə qədər onun adını Azərbaycanda çox az adam
eşitmiş, şeirlərini çox az adam oxumuşdu, çünki sovet
ideoloqları milli düşüncəyə, milli şüura qənim kəsilmişdilər.
Kölə psixologiyasını xalqın iliyinə, qanına hopdurmaq üçün
milli nə vardısa, hamısının ölümünə fərman verilmişdi. Milli
oyanışın, özünüdərkin qarşısını almaq üçün hər şeyə əl atırdılar.
Bu işdə pantürkçü damğası imperiya ideoloqlarının ən güclü
silahıydı. "Mən türkəm" deyənin dilini kəsir, səsini batırırdılar.
"Azərbaycanı könlümə tək kəbə yapıb", "Azərbaycan,
mənim tacım, taxtım oy! Oyanmazmı kor olası baxtım oy!"
deyən Almas İldırım təpədən dırnağa azadlıq eşqilə
yoğrulmuşdu. Köləliklə barışa bilmirdi. O, bir bulud kimi
dolmuşdu, ildırım kimi çaxmalıydı. İldırımı ram eləmək olmur.
Almas İldırımı da ram eləyə bilmədilər. Əqidəsindən dönmədi,
5
yolundan sapmadı, fikrindən daşınmadı, sözünü dəyişmədi,
Azərbaycanın boynuna taxılmış köləlik zəncirilə barışmadığını
gizlətmədi. İçi od püskürdü, qələmi alov saçdı.
1930-cu ildə "Dağlar səslənirkən" adlı şeirlər kitabı işıq
üzü gördü. Heç onun sevincini yaşamağa da qoymadılar. 2 mart
1931-ci il tarixli "Kommunist" qəzetində B.Zəngili təxəllüslü
(Hüseyn Bünyadov) birisi qılıncını çəkib düşdü kitabın üstünə.
Bu həmin Zəngiliydi ki, ömrü boyu cəmi 5-6 yazı yazmışdı.
Əslində onları yazı yox, 37-ci il repressiyalarına hazırlıq
mərhələsində məhkəməyəqədərki ittiham adlandırmaq daha
doğru olar. Biri Səməd Vurğuna, biri Mikayıl Müşfiqə, biridə
Almas İldırıma oxunmuşdu bu ittihamnamələrin. Hamısının da
altında "B.Zəngili" imzası. Bu Zəngilinin məqalələrini ona
görə ittihamnamələr adlandırırıq ki, onlar 37-ci il
repressiyasının qurbanları haqqındakı ittihamnamələrlə eyni
üslubda,
kəskinlikdəvə
ovqatda
yazılmışdı.
M.Müşfiqin ittihamnaməsindən götürülmüş aşağıdakı
cümləyə fikir verək: "İstintaq müəyyənləşdirdi ki, 1926-cı
ildən 1930-cu ilə qədər Almas İldırımzadə və Nəsir
Quluzadə tərəfindən İsmayılzadə Mikayıl Müşfiq Qədir oğlu
əksinqilabi
müsavatçı
ruhunda
hazırlanmışdır".
Görəsən, Almas İldırımla Mikayıl Müşfiqin bir-birinə
bağlanması təsadüf idimi, yoxsa B.Zəngilinin hər iki şair
haqqındakı məqalələri onları bir-birinə bağlamağa əsas
vermişdir. Axı həmin "İnqilab və mədəniyyət" (indiki
"Azərbaycan") dərgisinin 1931-ci il 3-4-cü sayında çap etdirdiyi
"Şairin andı" məqaləsində Səməd Vurğunu bəy nəslindən
olmaqda günahlandırır, "Hücum" dərgisinin 1931-ci il 7-8-ci
sayında çap etdirdiyi "Küləklər" məqaləsində M.Müşfiqi "öz
vaxtının sürətindən geri qalmış" adlandırır, "Kommunist"
qəzetinin 1931-ci il 2 mart tarixli sayında çap etdirdiyi "Dağlar
səslənirkən" məqaləsində Almas İldırımın əsərlərində
6
"meşşanlıq izi" axtarırdı. Bəlkə də ittiham üçün başqa tutarlı
əsas tapmadığından bu cür böhtana əl atmışdır. Əslində Almas
İldırım gözəllərin simasında da vətəni görür, sevgi şeirlərində
də Vətəni önə çəkir, onun taleyini yazırdı. Onun dərdi, qəmi
qadınlar, qızlar yox, vətəndir, xalqdır. Təzəcə qol-qanadı
sındırılıb qəfəsə salınmış vətən! Təzəcə boynuna boyunduruq
taxılmış xalq! "O gözələ" adlı şeiri oxuyanda biz bunu aydın
görürük. Şeir "O gözələ" adlansa da, burada sevginin,
məhəbbətin ünvanı qız yox, vətəndir. Şair "O gözələ" üz tutub
yenə yurdunun, vətəninin dərdindən, qəmindən danışır,
azadlığını, dövlətçiliyini itirdiyindən ürək ağrısıyla söhbət açır:
Kəbəm oldun, mehrabına diz qoydum,
Xızrım oldun, dərgahına göz qoydum.
Qərib düşdüm, torpağına üz qoydum,
Bir sormadın, nədir dərdim, gözəlim?
Hara getsəm arxamda bir ahım var,
Yazıb baş qoymağa bir dərgahım var.
Əlbət ki, mənim də bir Allahım var,
Gün gəlir, hürr olur yurdum, gözəlim.
Sonuncu misradan şairin o gözələ niyə üz tutduğu, nə demək
istədiyi bəlli olur. Bəlli olur ki, şair çox uzaqgörənliklə üz
tutduğu gözələ yurdunun bir gün öz azadlığına qovuşacağını,
köləlik zəncirini qırıb atacağını deyir. Şair həmin günü görməsə
də, biz gördük. Bu, onun uzaqgörənliyiydi ki, bəhrəsi bizim
qismətimizə düşdü. Almas İldırım yaxşı bilirdi ki, bu cür
işgəncələrlə, sürgünlərlə onu sındırmağa, əyməyə çalışırlar.
Ancaq o nə sınır, nə əyilir, nə də əqidəsindən, məsləkindən
dönürdü. Dağıstanda sürgündə olduğu vaxtda da qələmi ehtiyat
bilmədən yazıb-yaradırdı. Şairi Dağıstanda da sakit buraxmır,
izləyir, nə yazdığına, necə yazdığına göz qoyurdular. 1931-ci
7
ildə 24 yaşında Dağıstandan Türküstana sürgün edilərkən
"Əlvida, Bakı" adlı şeirində vətənə "can" dediyinə görə
vətəndən qovulduğunu, ancaq vətənin "bu qurbana" acımadığını
yana-yana, ürək ağrısıyla belə ifadə etmişdir:
Günahım "can" dedim, sana, qovuldum,
Acımadın bu qurbana, əlvida.
Təkcə bu iki misranın üstündə nə qədər düşünmək, nə
qədər söz demək olar. Almas İldırım bu şeirdə vətəndən niyə
qovulduğunu açıb göstərir. Biz onun "öz günahını" yaxşı
anladığını bütün şeirlərində hiss edirik. "A dağlar" şeiri də
başdan-ayağa şairin "günahları"yla yoğrulmuşdur:
Of Bakı... bu ayrılıq mənə ölümdən ağır,
Aləmə bahar gəldi, sənə yağmur, qar yağır.
Gündüzlərin dumanlı, gecələr dilsiz, sağır,
Bu boğulan səsimi varmı duyan, a dağlar?
Bu şeirdəki dağlar vətəniydi. Şair "dağlar" deyəndə vətəni
nəzərdə tuturdu. "Aləmə bahar gəldi, sənə yağmur, qar yağır"
misrasında açıq-aydın Azərbaycanın işğalına işarə vururdu.
B.Zəngilinin məqalələrindən sonra Mikayıl Müşfiq 37-ci il
repressiyalarını gözlədi, Səməd Vurğun təsadüf nəticəsində
ölümün gözündən yayındı, Almas İldırım isə heç o günü
gözləmədi. Türküstandan xəlvətcə İrana, oradan da son ümid
yeri olan Türkiyəyə qaçdı. Həmin vaxt onun vətən həsrətinin
ağrı-acılarını ancaq Türkiyə ovuda bilərdi. Ancaq orada az da
olsa təskinlik tapa bilərdi. Belə də oldu. Türkiyə onu doğma
balası kimi qucağına aldı, boyunu oxşadı, qayğısını çəkdi.
Almas İldırım Azərbaycanı o qədər ürəkdən sevirdi ki,
buradan ayrılarkən iki yolu varıydı: ya ürəyini Azərbaycanda
8
qoyub getməliydi, ya da Azərbaycanı ürəyində aparmalıydı.
Birinci halda həm ürəksiz, həm Azərbaycansız yaşamaq
olmazdı. Ona görə də ikinci yolu seçdi. Azərbaycanı ürəyində
apardı.
Almas İldırım haqqında ilk kitab yazan ədəbiyyatşünas
alim, akademik Bəkir Nəbiyev apardığı araşdırmalar
nəticəsində öyrənib ki, həqiqətən Almas İldırımın həyatı çox
ağır və məşəqqətli keçib. Dağıstandan sonra onu Türkmənistana
sürgün ediblər. Ömrü-günü qəriblikdə keçib. Müxtəlif ölkələri
dolaşıb. Amma öz doğma yurduna dönə bilməyib. Dəhşətlisi
odur ki, şairi heç harda rahat buraxmırdılar. O dövrün
mətbuatında Almas İldırımın ünvanına nələr yazmırdılar. Onu
gah "sinfi düşmən şairi", gah da "burjua tör-töküntüsü"
adlandırırdılar. Bütövlükdə onun bütün fəaliyyəti nəzarətə
alınmışdı. Doğrudur, Almas İldırım ona qarşı olan hücumlara
mətbuatda cavab verirdi. Amma onun harayı eşidilmirdi. Uzun
müddətdən sonra şairin son pənah yeri Türkiyə oldu. Şair bu
seçimində yanılmamışdı. Burada onun həyat tərzi tədricən
sahmana düşdü. Almas İldırımın çətin günlərinin dayağı ömür-
gün dostu Zivər xanım olub. O qürbət ellərdə üzləşdikləri
çətinlikləri birlikdə dəf etməyə çalışıblar. Cəmi 45 il ömür
sürmüş Almas İldırım ömrünün 17 ilini Şərqi Anadolunun
əyalət şəhərlərində yaşadı. Müxtəlif idarələrdə kargüzarlıqla
məşğul oldu. Hətta bir müddət müəllimlik də etdi. Ömrü boyu
"Azərbaycan, mənim baxtsiz anam oy!" deyərək həsrətlə vətəni
harayladı. 1952-ci ildə vəfat edən Almas İldırımdan üç övlad
yadigar qalmışdır.
9
II Bölmə: “ A.İldırım- 110” kitabxanada keçiriləcək yubiley
tədbirləri
Bütün kitabxanalarda ilk növbədə “Nakam taleli şair”,
“Vətənpərvər ürəyin işığında”, “Vətən nisgilli şair”, “Almas
İldırım - 110”, “Mən sənə yad deyil, doğma oğuldum...” və s.
kimi başlıqlı kitab sərgiləri tərtib olunmalıdır. Haqqında
kitablar çox az olduğundan sərgidə dövri mətbuatda dərc
olunmuş qəzet və jurnal məqalələrinin foto-surətindən istifadə
etmək olar. Həmçinin sərginin daha dolğun görünməsi və bədii
tərtibat cəhətdən diqqəti cəlb etməsi məqsədilə onun
şeirlərindən parçaları sitat vermək olar. Məsələn:
“Mən anlamaq istəməm nə məzhəb, nə yol, nə din,
Mənim yalnız ümidim Türk qəlbi, iradəsi,
Mənim yalnız tutduğum millətimin haqq səsi.”
“Gizli yol kəsmədim, qaçaq olmadım,
Sakit bir həyatı pozmadım mən ki!..
Heç kimə qanlı bir bıçaq olmadım,
Heç bir qətlə fərman yazmadım mən ki!..”
“Mənim imanım bir, eşqim, özüm bir,
Bir çeşmədən axdım, qaynar gözüm bir,
Türk oğlu türkəm mən, mərdəm, sözüm bir,
Yol ver, yol ver öz yurduma gedəm mən.”
“Buraxın, parçalansın zülmün haqsız yapısı,
Silinsin yer üzündən kommunizmin kabusu,
Millətlərə açılsın öz yurdunun qapısı,
İnsanlara hürriyyət! Bu dilək, şan mənimdir!!!”
10
Kitabxanalarda orta yaş qrup oxucularla Maarif
Teymurun tərtibatı, Yusif Günaydının redaktorluğu ilə çap
olunmuş “Qara dastan” kitabının icmalını, şerləri və
poemalarından parçalarla şer müsabiqəsi keçirmək olar.
Böyük yaş qrup oxucularla inşa müsabiqəsi də keçirilə
bilər. Bu məqsədlə kitabxananın girəcəyində keçiriləcək
müsabiqənin elanı asılır. Orada tədbirin keçirilməsi ilə bağlı
bütün şərtlər göstərilir. Müsabiqədə iştirak edən oxucular bir
daha repressiya qurbanı olmuş söz-sənət ustalarının
yaradıcılığını dərindən öyrənməklə öz inşa yazıları ilə nakam
soydaşımıza öz fikirlərini bildirmiş olurlar.
Müsabiqədə fərqlənənlər mükafatlandırılmaqla yanaşı
tədbirlə bağlı məlumatlar uşaq qəzetlərində, radio
verilişlərində
verilsə
daha
yaxşı
olar.
Böyük yaşlı oxucularla “İgidlərə səsləniş”, “Qara dastan”
kitabları üzrə icmal keçirmək olar. İcmalı belə başlamaq olar:
“Mədəniyyətin, incəsənətin təəssübünü çəkmək xalqın
şərəfini qorumaqdır. Dünya sənəti böhrana düşəndə antik dövrə
qayıdır, ondan ilhamlanır. O dövrdə isə sənətkarlar –
dramaturqlar, aktyorlar, yazıçılar, şairlər cəmiyyətin ən yüksək
təbəqəsi sayılır, onların yaradıcılığı üçün hər bir şərait yaradılır.
Sənətkarları günəş, işıq, müdriklik allahı Appolon himayə edir.
Görəsən, bizim dövrdə necə? Mədəniyyətinə, incəsənətinə
qayğı göstərməyən istər ölkə olsun, istərsə də şəxs nə qədər varlı
olsa da, mənəviyyatca yoxsul deyilmi? Onların tikdikləri,
yığdıqları qum üstündəki evə bənzər. Nə yaxşı ki, bizdə sənətə,
sənətkara qiymət verən layiqli ölkə başçıları olub. 1997-ci ildə
ulu öndərimiz H.Əliyev öz çıxışlarında pepressiya qurbanı
olmuş söz, sənət, elm adamlarını öyrənib tədqiq etməyi,
yubileylərini keçirməyi tövsiyə etdi. Həmin vaxt xeyli işlər
görüldü, oxucularımız bu nakam soydaşımızın zəngin mənəvi
11
irsi ilə tanış olmaq imkanı əldə etdilər. “Qara dastan ” kitabı
çapdan buraxıldı...
Almas İıldırım 1933-cü ildə Türkiyədə-Elazıqda məskunlaşır.
Çox səfalı təbiəti olan Elazığda kiçik bir göl də varmış-Gölcük
adında. Ona bir şeir də həsr edir. 1935-ci ildə Atatürkə məktub
yazır ki, bəs mən Azərbaycandan gələn bir qaçqınam.
Mümkünsə vətənimin Xəzər dənizinə oxşayan Gölcük məhz
Xəzər adlandırılsın. Şairin bu xahişi yerinə yetirilir. Beləcə,
Bakının Xəzəri Elazığın Xəzəriylə adaş olur. Türkiyədə
onun “Ninnilər” və “Bayatılar” kitabları çapdan çıxır. O
kitablardakı şeirləri sonralar “Qara dastan”da dərc olunur.
Vətənsevər şair, türklüyə körpü salan mühacir şair kimi
qalacaq. Ruhlar ölmür. Onun ruhu hər an yurdunu qarış-qarış
gəzir. ”
Bədii gecələrin uşaq kitabxanalarında təşkili daha maraqla
oxucular tərəfindən qarşılanır. Bu məqsədlə də “Qaranlıqda
işıqlar” adlı ədəbi-bədii gecənin ssenarisini veririk:
“Qaranlıqda işıqlar”
(bədii kompozisiya)
I aparıcı:
Hər bir sənətkar üçün xalqın faciələrlə dolu keçmişinin
tarixini yaratmaq mənəvi borcudur. Bu tarixi yaradan
üçün ən böyük məktəb xalqın həyatı və taleyi, ən ümdə
məqsəd isə unudulmuşları qaytarmaq, bərpa etməkdir.
II aparıcı:
Azərbaycan mədəniyyət tarixinin elə səhifələri var ki, az
qala 70 ilə yaxın bir müddətdə xalqdan gizlədilmiş, onun
inkişafında böyük rol oynamış şəxsiyyətlərin həyat və
yaradıcılıq taleyi çox az adama məlum olub. Ötən əsrin
12
90-cı illərinə qədər mədəniyyət tariximizin belə ağ
səhifələrindən
biri
də
Azərbaycan
mühacirət
poeziyasının görkəmli nümayəndələrindən olan Almas
İldırımın adı ilə bağlı idi. Onun ömür yolunu və zəngin
poetik irsini həyat və yaradıcılığı ilə bağlı sənədlərin və
xatirələrin dili ilə demək bizim mənəvi borcumuzdur.
I aparıcı:
Azərbaycan poeziyasının görkəmli nümayəndələrindən
biri olan Almas İldırım taleyin amansız gərdişinə tuş
olmuş ağır və əzablı həyat sürmüş bir vətən aşiqi, azadlıq
carçısı idi. Ədəbiyyatımızın şah damarlarından sayılan
bu nakam taleli söz sahibinin yazıb yaratdıqlarından
uzun müddət xəbərimiz olmayıb. Yaşıdları - onunla
birlikdə ədəbiyyata gəlmiş həmkarları və bəzi
tədqiqatçılar istisna olmaqla, sovet hakimiyyəti illərində
şeir, sənət həvəskarları, oxucular Almas İldırım adlı bir
şairi tanımayıblar. Halbuki Süleyman Rüstəm, Məmməd
Rahim, Osman Sarıvəlli, Səməd Vurğun... kimi şairlərlə
eyni dövrün şəriki olan Almas İldırım poeziyamızın
inkişafında özünəməxsus rol oynayıb.
II aparıcı:
Onlara ya "xalq düşməni", ya da "millətçi" damğası
vuraraq gedər-gəlməzə göndərirdilər. Bir faktı
xatırladaq ki, Almas İldırım Mikayıl Müşfiq, Rəsul Rza,
Hüseyn Cavid, Seyid Hüseyn, Cəfər Cabbarlı, Abdulla
Şaiq, Tağı Şahbazi, Hacıkərim Sanılı kimi qələm
sahibləri ilə birlikdə ədəbi fəaliyyətlə məşğul olurdu.
Almas İldırım yurduna bağlı, vətənini, millətini çox
sevən istedadlı qələm sahibi idi. Lakin o dövr
cəmiyyətdə gedən münaqişələr onun da taleyinə çox
əzablı məqamlar bəxş etdi. Ona əvvəlcə, "millətçi"
damğası vuraraq Dağıstana sürgün etdilər. Bununla
13
yanaşı Almas İldırımı "xırda burjua" yazıçısı
adlandıraraq
Azərbaycan
Proletar
Yazıçılar
Cəmiyyətindən xaric etdilər. O dövrdə millətinə qənim
kəsilənlər kimlərinsə xoşuna gəlmək üçün söyləyirdilər.
"Almas kimilərinin başları sovet çəkici ilə əzilməlidir".
Bu cür mənəvi terror sonralar qəfildən Cəfər
Cabbarlının ürəyini susdurdu, Mikayıl Müşfiqi,
Hüseyn
Cavidi...
zindanlara
saldırdı.
I aparıcı:
Almas İldırım ömrü acı taleli, təqiblərlə dolu,
sürgünlərdə və qürbətdə keçən məşəqqətli bir yol idi.
Azərbaycan televiziyasının hazırladığı "Almas İldırım"
adlı sənədli filmini şairin taleyi və poeziyası haqqında
kədərli bir hekayət adlandırmaq olar. Filmin elmi
məsləhətçisi Maarif Teymurun araşdırmaları əsasında
bədii söz və onun müəllifi A.İldırımın ekran həyatı daha
maraqlı təsir bağışlayır. Şairin yaşayıb-yaratdığı dövr,
ötən əsrin 20-ci illərinin hadisələri ekranda ustalıqla
canlandırılır, poeziyasında açıq duyulan vətən həsrəti
tamaşaçıya onun yaradıcılığı vasitəsi ilə parlaq şəkildə
təqdim olunur.
( Ekranda proyektor vasitəsilə "Almas İldırım" adlı
sənədli filmdən bir parça nümayiş etdirilir.)
II aparıcı:
A.İldırım yaradıcılığının və həyatının ekran dili ilə
yeni, həm də zənnimizcə, çox uğurlu ifadəsi olan bu
sənədli film şairə yeni baxışın üzə çıxmasıdır.
Filmin ssenari müəllifi Əhməd Oğuz, rejissoru
Şahəddin Eyvazovdur. Rejissor şairin ekran
14
taleyinin maraqlı və təsirli çıxması üçün qocaman
operator, yüzlərlə sənədli filmin müəllifi Nəriman
Şıxəliyevlə birlikdə kino texnikasının vasitələrindən
bacarıqla istifadə edib, onlar A.İldırımın insan və
şəxsiyyət kimi bitkin obrazını yaratmağa nail
olublar. Alim və naşirlərimiz tərəfindən şairin
həyat və yaradıcılığının araşdırılıb tədqiq
edilməsi, ekran ustalarımız tərəfindən şairin
ekrana gətirilməsi mühacir şair Almas İldırımı
xalqımıza qaytarır, onun mənəvi ömrünü uzadır.
I aparıcı:
Cəmi 45 il ömür sürən Almas İldırımın xoşbəxtliyi
və səadəti çox az çəkib. Əhməd Cavad, Hüseyn
Cavid və Cəfər Cabbarlının əsərlərindən ilhamlanan
Almas İldırım gənc yaşlarından şer yazmağa
başladı.
Azərbaycan
Xalq
Cümhuriyyətinin
yarandığı və süqut etdiyi vaxt şair yeniyetmə olsa da,
o, bu yeniliyi duya bilir və onun süqutunun acısını
bütün
ömrü
boyu
dərindən
yaşayır.
Proletar yazıçılar cəmiyyətində ona qarşı kəskin
çıxışlar səslənir: " Yazarlar arasında müsavatçılara
aşiq və Türkiyə çavuşlarının həqiqi şagirdi
bulunan Almas İldırımlar yer almış olduğu
meydana çıxmaqdadır. Bunlar Əhməd Cavad
və
Hüseyn
Cavidlərin
yolçusudurlar".
Bundan sonra A.İldırım Yazıçılar Cəmiyyətindən
xaric edilir. Dövlət Siyasi İdarəsi tərəfindən daima
təqib olunan şair doğma Azərbaycandan ayrı
yaşamaq məcburiyyətində qalır. "İçində bir sızı,
gözündə nəm" olan şair vətəni, eli, obanı tərk
15
etdikdən sonra da onun mübarizəsi Vətən uğrunda,
istiqlal uğrunda olur.
II aparıcı:
Harada olursa - olsun - Azərbaycanda,
Dağıstanda, Türkmənistanda, İranda, Türkiyədə
- təqiblər, məhrumiyyətlər onun yaradıcılıq
əzmini zəiflədə bilmədi. Uşaqlığı Xəzər
sahilində keçdiyi üçün Xəzər coşğunluğu,
sonralar isə ömrünün yarısından çoxunu
sürgündə, qürbətdə yaşadığı üçün Xəzər həsrəti,
Xəzər nisgili hiss olunurdu şerlərində.
(Səhnəyə oxucular gəlir. Musiqi sədaları altında şeirlər
səslənir)
I oxucu:
Harda məni gül qoynunda doğuran,
Xamırımı göz yaşıyla yoğuran,
Beşiyimdə "layla balam!" çağıran
Azərbaycan, mənim baxtsız anam oy!...
Neçə ildir həsrətində yannam oy!..
Salam desəm, rüzgar alıb götürsə,
Ağrı dağdan Alagözə ötürsə,
Gur səsimi göy Xəzərə yetirsə,
Xəzər coşub zəncirini qırsa oy!..
Hökm etsə, bu sərsəm gediş dursa oy!..
II oxucu:
Xəbər alsam Muğanımdan, Milimdən,
Nazlı Bakım, o neft qoxan gülümdən,
Kim demiş ki, düşmüş adı dilimdən?!
Azərbaycan, mənim eşsiz yurdum oy!...
Ölməz eşqim, içimdəki dərdim oy!..
Könlümə tək Kəbə yapdım səni mən,
16
Sənsiz neylim qürbət eldə günü mən,
Sənsiz neylim Allahı mən, dini mən,
Azərbaycan, mənim tacım, taxtım oy!...
Oyanmazmı kor olası baxtım oy?!
I aparıcı:
Dəhşətli dərd-bəla çəkdiyi zaman, hər yerdən əli
üzüləndə dağa pənah apardı, üzünü dağa tutub dərdini
söylədi.
III oxucu:
Əzəldən can deyərək bu sevdalı ölkəyə,
Hər qadasın aldığım sənə əyan, a dağlar.
Oxşarkən hər dərdini söz verdim ölüm deyə,
Onunçün bu çəkdiyim dərd bipayan, a dağlar...
Doğma yurdu tərk edib atıldım diyar-diyar,
Görmədim şikəstə qəlb oxşayacaq bir bahar.
Döndü hər düşmən oldu dost denilən hər nə var,
Sən gəl öz dostluğunda möhkəm dayan, a dağlar.
IV oxucu:
Of Bakı... bu ayrılıq mənə ölümdən ağır,
Aləmə bahar gəldi, sənə yağmur, qar yağır.
Gündüzlərin dumanlı, gecələr dilsiz, sağır;
Bu boğulan səsimi varmı duyan, a dağlar?
Hicrinə tab edərsəm, dağları dələcəyəm,
Bir qanlı Sezar kimi mən yenə gələcəyəm,
Bir gün İldəgiz kimi hayqıra biləcəyəm,
Artıq oyan, a dağlar, artıq oyan, a dağlar!..
17
Bir gün gələr qoşaraq yurdumun harayına,
Mən atəş açacağam düşmənin sarayına;
Nə düşər yurdu batmış bir igidin payına?
Ya şərəfli istiqlal, ya qızıl qan, a dağlar!..
II aparıcı:
Almas İldırımın bütün yaradıcılığını bir qara taleyin
dastanı adlandırmaq olar. Bu dastanın qəhrəmanı da
paralanmış, yaralanmış, bölünmüş, işğal olunmuş,
xoşbəxtliyi əlindən alınıb qəfəsə salınmış Azərbaycandı.
"Özü dərd içində boğulmuş, sevənləri diyar-diyar
qovulmuş" Azərbaycan! "Qopuzu susdurulmuş",
"Kamanı sındırılmış", "Tarını, sazını proletarın
sevmədiyi"Azərbaycan:
Dörd bir yana dağılmış türk soyları,
Sönmüş ocaq, köçmüş, getmiş boyları.
Dərdli-dərdli axar bozkır çayları,
Saxlar içdən gizli ümid, güman hey,
Qoca türkün düşdüyü gün yaman hey...
Azərbaycan dərd içində boğulmuş,
Sevənləri diyar-diyar qovulmuş.
Ağla, şair, ağla yurdun dağılmış,
Nerdə qopuz, nerdə qırıq kaman hey?
Nerdə böyük vətən, nerdə Turan hey?
II aparıcı:
25 yaşında Azərbaycana "əlvida" deyən şair bu həsrətlə
cəmi 20 il yaşaya bildi. 20 il onun ürəyindəki yara
için-için göynədi, korun-korun sızıldadı. Bu yaranı
Almas İldırım Azərbaycandan aparmışdı. Buradan
18
apardıqlarının üstünə də orada bir həsrət göynərtisi gəlib
onun ağrı-acısını birə beş qat artırdı. "Nərdə böyük
vətən, nərdə Turan hey?" deyə-deyə hayqıran Almas
İldırımın ürəyi içini didən dərdə, qəmə 20 il tab gətirə
bildi. Almas İldırım az yaşadı, kişi kimi yaşadı. Özünü
tox tutdu, qəddini şax tutdu, sözünü də uca! Əqidəsini
bir qarın çörəyə, ucuz şöhrətə, gərəksiz orden-medallara,
yalançı təriflərə qurban vermədi. Ona görə də indi
adıyla, əməlləriylə ürəklərdə yuva salıb yaşayır. Dünən
adları dillərdən düşməyənlərin çoxları indi unudulub,
dünən adını da bilmədiyimiz Almas İldırımın adı isə bu
gün neçə-neçə dillərin əzbəridir. Nə qədər ki,
Azərbaycan var, onun misraları da yaşayacaq.
III oxucu:
Başımızdan fırtınalar gəlib keçdi, ölmədik,
Torpağımız qan udaraq daşlarımız qızardı,
Sultanlara yol vermədik, şahlara yar olmadıq,
Sinəmizdən keçən yolçu dumanlardan azardı...
II aparıcı:
A.İldırım Vətən, Ana, İstiqlal sözlərini daima uca tutdu,
doğma Azərbaycanın müstəqilliyini həyatından vacib hesab
etdi.
V oxucu:
Verin mənə yurdumu olsun cənnət bucağı,
Bir dövlət qurayım ki, sülhün doğma ocağı,
Başında dalğalansa üç boyalı bayrağı,
O zaman zənn edərəm bütün cahan mənimdir.
I aparıcı:
Çox təəssüf ki, şair müqəddəs arzularının zəmanəmizdə
həqiqətə çevrilməkdə olduğunu görə bilmədi. O,
Azərbaycan xalqının öz müstəqil dövlətini qurmaqda
19
olduğunu və başının üzərində onun arzuladığı kimi "üç
rəngli bayrağın" dalğalandığını görmədən bu dünyadan
getdi.
VI oxucu:
Ağlama, ağlama, ey gözləri bulutlu yar,
Barı uzaqdan olsa qadanı ala bilsəm...
Bir tərlan kimi qonsam o qar yallı dağlara,
Bir ovçu vursa, düşsəm, sinəndə qala bilsəm,
Qurbanın ola bilsəm...
Yenə yaşlar göründü o dalğın gözlərində,
Bir qurbanmı gedən var o buz dənizlərində?
Yıllar boyu bir bahar görməyən düzlərində,
Gül kimi açılsam da, gül kimi sola bilsəm,
Mən sənin ola bilsəm...
II aparıcı:
M.Teymur kitabın girişində yazır: "Şairi əbədiyyətə
qovuşduran onun sözləridir. Lakin bu ürək yanğısı ilə
yazılmış sözlər müəyyən səbəblər üzündən oxuculara
çatmırsa, şair də yaşamır, oxucu ömrü də solğun,
mənasız olur. Şairin sözlərini bu ağır iqtisadi günlərdə
oxuculara çatdırmağı öz üzərinə götürən "Aydın"
İstehsalat-Kommersiya Mərkəzinə bir daha dərin
minnətdarlığımızı bildiririk... "Qara dastan"ı vərəqlə
oxucu, oxu, düşün və uzun illər boyu min bir ideoloji
diversiya vasitəsi ilə adı, irsi səndən səylə gizlədilən, üç
boyalı müqəddəs bayrağın ana yurdun üfüqlərində bir
daha dalğalanacağına ən ağır anlarda belə inamını
itirməyən ölməz həmvətənini önündə gör!".
İnam, etiqad ilə yaşanan ömür şərəfli ömürdür. Təmiz
əqidəlilər, təmiz məsləklilər təqib oluna bilərlər, lakin
onları ləkələmək qeyri-mümkündür. A.İldırımı təqib
20
edənlər öz əməlləri ilə özlərini tarixin qara səhifələrinə
yazdılar. Və bir zamanlar yurd həsrətilə coşaraq:
Mənim imanım bir, eşqim, özüm bir,
Bir çeşmədən axdım, qaynar gözüm bir,
Türk oğlu türkəm mən, mərdəm, sözüm bir,
Yol ver, yol ver, öz yurduma gedəm mən! –
deyən Almas İldırım isə artıq bu gün öz doğma
yurdunda, Vətənindədir!
21
Ədəbiyyat siyahısı:
İnternetdə:
www.google.az
www.edebiyyatqazeti.com
www.azadliq.org
Kitablar:
İldırım A. (1907-1952). Seçilmiş əsərləri – B.: Öndər,
2004. – 160 s.
Almas İldırımın seçilmiş əsərlərindən ibarət olan bu kitabına
müəllifin milli istiqlal, azadlıq, müstəqillik uğrunda
mübarizəyə həsr olunmuş şeirləri toplanmışdır. Şeirlərdə Vətən
həsrəti, tarixi keçmişimizlə bağlı poetik düşüncələr öz parlaq
əksini tapmışdır.
Azərbaycanın didərgin salınmış övladı şair
Almas İldırım şerlərilə: Tərtib və ön söz H.Hacıyevindir– B.:
Azərnəşr, 1990. – 31 s.
Dövri mətbuat:
Abbasov İ. “...Öz yurduma gedəm mən”:Vətən nisgilli
şair heykəl olub Vətənə döndü // Xalq qəzeti. - 2000. – 9 iyun.
Ağbabalı T.O. “Mən sənə yad deyil, doğma
oğuldum...”(Almas İldırım -90) // Xalr qəzeti. - 1997. – 12
oktyabr.
Almas İldırım: "Mən uzaq bir Göy Gölün yolunda
böylə soldum" : Almas İldırımın kitabı Türkiyədə nəşr
olunacaq // Ədəbiyyat qəzeti. - 2006. - 27 yanvar. - S.3.
Almas İldırımın 100 illik yubileyinin keçirilməsi
haqqında Azərbaycan Prezidenti İlham Əliyevin Sərəncamı
(Bakı şəhəri,16 aprel,2007) // Xalq qəzeti. - 2007. - 17 aprel. -
S.2. ; Azərbaycan. - 2007. - 17 aprel. - S.1.
22
Bəşirova S. “Azərbaycan, mənim taxtım – tacım, oy!”
(Repressiya qurbanı olmuş nakam şairimiz Almas İldırım
haqqında) //Səhər. – 1992. – 8 dekabr.
Cəfərova , Xatirə. Vətən yanğılı şair : Almas İldırım -
100 // Ədəbiyyat qəzeti. - 2007. - 25 may. - S.1-3
İsmayıloğlu A. Sənət təəssübü //Ədəbiyyat qəzeti. -
1995. – 14 aprel. - S.8
Qəribli İ. "Didərgin şair" // Ədəbiyyat qəzeti. - 2005. -
30 dekabr. - S.7. - Nəbiyev B. Didərgin şair. - B.: "XXI - Yeni
nəşrlər evi", 2005. kb-na res-ya.
Nəbiyev B. Nakam həyatın salnaməsi // Bakı. – 1993.
– 23 sentyabr.
Onu ancaq Azərbaycan dərdi öldürə bilərdi : Türkiyədə
Elzağ vilayətində mühacir şair Almas İldırımın yubileyi
keçirilmişdir // Yaddaş. - 2007. - 19 aprel. - S.8.
Teymur M. Almas İldırımın yaradıcılığından
yadigarlar...// Bakı, 1993, 4 may.
Teymur M. Azəri-türk uluslararası ünlü şairimiz :
Almas İldırım - 100 // Ədəbiyyat qəzeti. - 2007. - 6 aprel. -
S.6.
Türkiyədə Almas İldırımın yubileyi keçirilir : yubiley
tədbirlərinə Azərbaycan nümayəndə heyəti də qatılıb // Yeni
Azərbaycan. - 2007. - 13 aprel. - S.8.
Zeynallı Z. "Gözlər yaşlı, boynu bükük, vətənsizmı
öləcəyəm?" : Almas Yıldırım-100 // Ulduz. - 2007. - № 3. -
S.82-83.
23
“Azərbaycan, mənim taxtım – tacım, oy!”
(metodik vəsait)
Kompyuter yığımı
və dizayn: Zahirə Dadaşova
Ünvan:AZ-1022 Bakı şəh.,S.Vurğun küç.88;
E-mail: childlibbaku@yahoo.com
URL:www.clb.az
F.Köçərli adına Respublika
Uşaq Kitabxanasında
çap olunmuşdur.
Sifariş: 26
Çapa imzalanmışdır:18.02.2017
Tirajı:100
Pulsuz
Dostları ilə paylaş: |