51
gələcəyi və ümididir’. Bunlar bizim tariximizdən götürülmüşdür, bu yanaşmalar
bu gün də mövcuddur...”(Nəbi, bir qızı, bir oğlu var, Lerik/Lənkəran)
5.2. Nəsilvermədə tənəzzül
Oğlan uşaqlarına üstünlük verilməsi Azərbaycanda yeni yaranmış fenomen deyil. Dünyaya
gələn uşaqların cinsə görə nisbətində tarazlıq tənəzzülə uğrayan nəsilvermə əmsalı ilə
birlikdə 1990-cı illərdən pozulmağa başlamışdır. Xüsusən də qərb ölkələrində müşahidə
olunan inkişaf etmiş təhsil, urbanizasiya və gender bərabərliyi ailə strukturunda uşaqların
kəmiyyətini deyil həyat keyfiyyətini yaxşılaşdırmağa doğru dəyişikliklərə yol açır (Kirk,
1996). Nəsilvermədə tənəzzül dünyaya gələn uşaqların cinsə görə nisbətinin pozulması
səbəblərindən biri kimi müəyyən olunur, belə ki, uşaqların sayı azaldıqca oğlan uşaqlarına
üstünlük verilməsi daha aydın şəkildə nəzərə çarpır. Digər tərəfdən, bu da aydındır ki, “oğlan
uşaqlarına üstünlük verilməsi tendensiyası zəif olsa idi nəsilvermədə baş verən sürətli
tənəzzül dünyaya gələn uşaqların cinsə görə nisbətinin anormal şəkildə yüksək əmsalına və
həddən ziyadə qız uşağı ölümü ilə nəticələnməzdi.” (Bonqaarts, 2013; Li et al, 2007).
Tədqiqata cəlb olunmuş iştirakçılar dünyaya gələn uşaqların cinsə görə nisbətinin pozulması
səbəblərindən biri kimi nəsilvermədə tənəzzülün məhdudlaşdırıcı təsirini vurğulamış və
ölkədə qızların sayının azalmasını bir problem kimi xüsusi qeyd etmişlər. İqtisadi şərait,
keçirilən dövlət siyasəti, cəmiyyətdə fərdiliyə doğru olan meyllər və dəyişən sosial dəyərlər
nəsilvermədə tənəzzülün səbəbləri kimi göstərilmişdir.
“Ailədə çoxlu uşaqların olması daha yaxşıdır. Mənim babam iki dəfə ailə
qurmuşdur. Onun 18 uşağı və çoxlu nəvələri var. İndi kişilər söyləyir ki, onların
maddi imkanı olmadığından iki uşaq kifayətdir.” (qrup müzakirələrinin iştirakçısı,
yaşlı kişi, Tovuz/Gəncə-Qazax)
İştirakçılar dəfələrlə vurğulamışlar ki, iqtisadi mühit daha çox sayda uşaqların olmasına güclü
maneə olaraq, oğlan uşaqlarının olması istəyinin başlıca səbəbini təşkil edir. Müzakirələr
zamanı gənc bir qadının söylədiyi kimi, “iqtisadi vəziyyət yaxşılaşarsa və bizim gücümüz
olarsa qız uşaqlarının sayı da artar. Bizim qız uşaqlarının olmasına ehtiyacımız var” (fokus
qrup müzakirələri iştirakçısı, Tovuz/Gəncə-Qazax). Oğlan uşaqlarına üstünlük verilməsinin
ciddi nəticələri və təcili addımların atılmasına ehtiyac iştirakçılar tərəfindən müzakirə
edilmişdir.
“… Bu, bizim faciəmizdir. Tarazlığın saxlanılması Allah tərəfindən yəqin edilir,
biz isə bu tarazlığı pozuruq, bu məsələyə qarışırıq. Xeyr, biz qarışmırıq, biz
faktiki olaraq pozuruq. Qadınların sayının azalması ilə hara gəlib çıxacağıq? Bu
gənclər 20-30 ildən sonra kiminlə ailə quracaqlar? Kim ana olacaq? Ev işlərini
kim yerinə yetirəcək? Bu, böyük faciədir. Bunun qarşısı alınmalıdır. Mən bundan
çox narazıyam.” (Asif, 61 yaş, orta ümumi təhsilli, iki qızı, iki oğlu var, Abşeron
regionu)
Keyfiyyət əsaslı məlumatların təhlili
52
Tədqiqatda iştirak edən həkim nəsilvermədə ixtisarlarla bağlı dölün cinsinə görə selektiv
süni abortların gələcək təhlükələrini vurğulamışdır: “Deyirlər ki, ana bətnində qız uşaqları
olduğu halda süni abortların sayı indi daha çoxdur …mən bunu gələcək faciə kimi başa
düşürəm, çünki onlar gələcək anaları öldürürlər. Analar yoxdursa oğullar da olmayacaq”.
Bir çox iştirakçılar əhali üzrə qadınların daha az sayda olması və əcnəbi gəlinlərin
artması problemini qaldırmışdır. Həkimlərdən biri oğlanlara üstünlük verilməsi meylində
uzaqgörənliyin olmadığını vurğulamışdır:“Təsəvvür edin ki, bu il bizdə dünyaya gələn uşaqlar
arasında 3.000 nəfər oğlan uşağı və 1.000 nəfər qız uşağımız olmuşdur. Əgər 20 ildən sonra
1.000 nəfər kişi 1.000 nəfər qadınla evlənərsə digər 2.000 nəfər kişi nə edəcək? Onlar bu
barədə fikirləşmirlər. Bizim xalqımız 20 ildən sonra nə baş verəcəyini düşünmür”.
Müzakirələr zamanı çoxlu sayda əcnəbi gəlinlərin milli ənənələrə təsiri əsas məsələ kimi
qaldırılmışdır. Siyəzən/Quba-Xaçmaz regionunda yaşlı bir nəfər öz narahatlığını aşağıdakı
kimi qeyd etmişdir:
“…Hər il sentyabr ayında biz statistik məlumatlar əldə edirik və görürük ki, sinifdə
20 nəfərdən yalnız 4-ü qız uşağıdır. Bütün qalan uşaqlar oğlanlardır. Biz başa
düşürük ki, bu, çox təhlükəlidir. Gələcəkdə Azərbaycanda qızların sayı məhdud
olacaq və xalq arasında ailə qurmaq üçün başqa millətlərdən qızların alınması
geniş vüsət alacaq. Ölkəmizin adət-ənənələri gələcəkdə yoxa çıxacaq, çünki
ailədə uşaqların əsas etibarilə təlim-tərbiyəsi ilə məşğul olan analardır.”
5.3. Dölün cinsinə görə selektiv abortlar
Abort xidmətlərinin olması, müyəssərliyi, effektivliyi, cəmiyyət tərəfindən qəbul edilməsi və
məsələnin qanunla tənzimlənməsi Azərbaycanda doğulan uşaqların cinsə görə nisbətinin
pozulmasına zəmin yaradan başlıca amil olan abortların vüsət almasında böyük rol oynayır
(Guilmoto, 2013; Bongaarts, 2013). Keyfiyyət üsulları ilə toplanan məlumatlar sosial
normalar, doğuşdan əvvəl diaqnostik texnologiyaların istifadəsi, həmçinin sui-istifadəsi,
təcrübədə qanunlardan yayınma, abortun mahiyyəti ilə onun təcrübədə istifadəsi arasında
ziddiyyət, habelə selektiv abortlara ginekoloqların yanaşması haqqında dolğun informasiya
verir.
5.3.1. Abort məsələlərini tənzimləyən hüquqi çərçivə və abort üsulları
Hamiləliyin pozulması (abortlar) ilk dəfə Sovet İttifaqında 1920-ci ildə qanuniləşdirilmişdir.
Əhali artımının kəskin azalmasına cavab olaraq 1936-1955-ci illərdə abort qanunla qadağan
edilmişdir. Lakin bu qanunun abortların sayına əhəmiyyətli təsiri olmamışdır və 1955-ci
ildə bütün sovet ölkələrində bu sahədə qeyri-qanuni əməllərə yüksək tələbatı və onlardan
asılılığı həll etmək məqsədilə xahiş əsasında edilən süni abortlar haqda qanuna düzəliş
edilərək abort nəsilverməyə nəzarət üsulu kimi qəbul edilmişdir (Avdeev, 1994).
5-ci fəsil