135
təhkiyəçi obrazı da odur.
Bu günə qədər əksər şifahi və yazılı ədəbiyyat nümunələrində
olduğu kimi, Məmməd Orucun bu povestində Qəşəmalı da bu uzaq
qohumlarına övlad gözü ilə, insan gözü ilə baxmır, onları nökər kimi
işlədir: 13 yaşlı bu yetim oğlan onun qoyun sürüsünü otarır, mal-
heyvanına, qaz sürüsünə baxır, tövləni təmizləyir, ot biçib gətirir.
Balaca bacısı isə Güllübəyimin körpələrini saxlayır, onları kürəyindən
yerə qoymur.
Y.Səmədoğlunun ”Qətl günü” romanında Baba kaha,
İ.Məlikzadənin ”Gümüşgöl əfsanəsi” povestində Gümüşgöl,
Ə.Əylislinin ”Ağ dərə” romanında təbiətin min bir rəngləri, şüaları
haqqın, ədalətin keşiyindədir, ədalət uğrunda mübarizədə sarsılmaz
qüvvədir. Bu povestdə isə həmin vəzifəni ağ leyləklər yerinə yetirir.
Yeniyetmə yetim oğlan hər dəfə Qəşəmalının zülm və işgəncələri ilə
qarşılaşdıqca, Qəşəmalının vurduğu təpiklərin ağrısından qıvrılıb-
açıldıqca leyləkləri yada salır, ümid işığını leyləklərdən alır. 13 yaşlı
bu oğlanın nəzərində leyləklər haqq işığıdır və bu haqq işığını onun
qəlbində hələ körpəlikdən anası yandırmışdır: ”... anam bu quşlarla
mənim aramda nəsə sirli bir ünsiyyət yaratmışdı; o demişdi ki,
leyləklər ”o dünyanın” quşlarıdır, leyləklər yuva quran ocaqda xeyir-
bərəkət əskilməz, leyləklər yuva quran ocaqda haqq-ədalət nazilməz,
leyləklər yuva quran ocağa həmişə haqq işığı düşər.” Haqqa, həqiqətə,
haqq işığına ananın köməyilə yaradılmış bu inam onun əzablı
gündüzlərinin, narahat gecələrinin əsas təsəlli mənbəyidir.
Yuxularında da ağrı və acılarını sevimli anası və sevimli leyləklər
çıxarır: ”... anam da, leyləklər də yuxuma girəndə mən yuxuda
ağlayırdım. Həmişə yuxuda ağlayanda səhər yataqdan rahat
qalxırdım.” Qəşəmalı onun məktəbə getməsinə mane olmaq istədikdə
təbiəti leylək ağlığı, leylək şəfəqləri ilə görmək istəyən bu uşağın qəlbi
üsyan edir və Vasyanın motosikleti ilə məktəbə getdiyi ilk günlərdə
başı üzərində leylək ədalətini, leylək nəzarətini görür. 13 yaşlı bu uşaq
iki mərtəbəli evdə daim küsülü yaşayan bu bir neçə nəfərin
barışmağını da, bir süfrə başına toplaşmağını da leylək ədalətində
görür: ”Fikirləşirdim ki, heç nədən məni vururlarsa, heç nədən araya
söz düşürsə, heç nədən bu yamacın beş-üç adamı bir-birinə dəyirsə,
deməli, bizi leyləklərin ahı tutub, demək, bizim bu ocaqda haqq
nazilib, demək, bizim bu ocağa haqq işığı düşmür.” Bütün bu cür
ziddiyyətli düşüncələrə, çətinliklərə, üzüntülü hallara baxmayaraq,
leyləklər onun arzularını, ümid və istəklərini daim qanadlandırır, o bu
dünyaya gəlməyin, bu dünyada yaşamağın, bu dünyanın əzablarının
136
da qiymətini bilir, dünyanı düzgün qiymətləndirməyi də bacarır: ”Yox
dedim öz-özümə, əgər bu dünya nahaqqa qılınc verəndə haqqı da
qalxansız qoymursa, nahaqqı qaranlıq kimi üstünə göndərəndə səndən
də işığını əsirgəmirsə, hələ bu dünyaya yenidən gəlməyə dəyər. Bu
dünya yaşamalı dünyadı.”
Oğlanın dilində ”qoy bizi tanıyan qurd yesin” məsəli son
dərəcə təbii səslənir və bu sözlər, şübhəsiz, bu bacı-qardaş üçün
mehriban himayəçi keyfiyyətlərindən çox uzaq olan Qəşəmalını
hədəfə alır: ”Qəşəmalı, bacım demişkən, bizi tanıyan qurd idi.” Son
dərəcə kobud bir şəxs olan Qəşəmalı arvadına - üç körpə uşağın anası
Güllübəyimə də çox amansızdır. O axşam olmaz ki, bir bəhanə ilə onu
ağzı köpüklənənə, huşunu itirənə qədər döyməsin. Kiçik bir narazılıq
üstündə həftələrlə öz işçilərini - Vasyanı, Qasımı dindirib-danışdırmır,
küsülü gəzir. Həm də dəhşətli var-dövlət hərisidir, qəbiristanlıq
üzərində yaranmış dəryaçanın balığını min məşəqqətlə, oğurluqla
tutub satmaq, pul qazanmaq istəyir. Canavar boğub öldürdüyü
qoyunların leşini satır və s. Qəşəmalının xisləti, şübhəsiz, leyləklərlə
də ziddiyyət təşkil etməlidir və həqiqətən də onun leyləkləri görməyə
gözü yoxdur, ”qovmaq lazımdır, bu quş bizim ocağa düşmür”, - deyə
ata leyləyə işarə edir. Amma bu quşların bu ocağa düşməməyinin
səbəblərini balaca oğlan daha yaxşı dərk edir: ”Ona görə ki, sizin oca-
ğın mayasında haram var; ona görə ki, sizin ocaqda haqq nazilib.” Elə
arvadı Güllübəyim də özlüyündə bu fikri təsdiq edir: ”... bunların evi
də, tayası da (Qəşəmalını deyirdi) yanmalı idi; o evin də, o tayanın da
mayasında haram vardı.”
Qəşəmalı ziddiyyətli obrazdır. O, tam pozulmuş, insanlıq
simasını itirmiş də deyil. Hərdən az qala (ona görə ki, bu da
şübhəlidir) anasının səsini - haqq səsini, vicdan səsini eşidir. Hərdən
kövrəlir və nökər kimi işlətdiyi ”uzaq qohumunu” bağrına basıb öpür,
gözləri yaşarır. Oğlan onun işkəncələrinə dözməyib bu yerlərdən
getmək istədiyini bildirdikdə, yumşalır, az qala adam olur: ”O bizi
inandırdı ki, bu dünyada ona bizdən yaxın adam yoxdur. O bizi
inandırdı ki, bizim buradan getməyimizə tablamaz, ölər.” Qəşəmalı işə
də məsuliyyətlə yanaşır, xarab olmuş nasos stansiyasını təmir edib işə
saldıqda Qasımı, Vasyanı qucaqlayıb öpür. Beləliklə, yazıçı,
Qəşəmalının insani keyfiyyətlərini də unutmur, onu gözlənilməz əks
xüsusiyyətlərə malik bir tip kimi təsvir edir. Qasım onun təbiətindəki
ziddiyyətli cəhətləri görür və buna təbii baxır: ”bu da belə adamdı, bu
da belə tipdi.”
Qasım və Vasya xeyirxah, işgüzar adamlardır. Onlar gənc oğ-
137
lanın nəzərində leylək xeyirxahlığının qoruyucularıdır. Bərk ayaqda
Güllübəyimi də, yetimləri də Qəşəmalının əlindən onlar alır, onlar
qoruyur, onlar təsəlli verirlər. Əsərin sonuna yaxın Bakıdan rəssamlıq
texnikumunun son kursunda oxuyan ”su sonası kimi” bir qızın bu
yerlərə gəlməsi Qasımın əhvalını dəyişir, rahatlığını pozur. Lakin
Qasımın məhəbbəti əsərdə kifayət qədər öz ifadəsini tapa bilməmişdir;
əksinə, bu qızın özündən xeyli kiçik yetim oğlana təsiri daha artıq
duyulur, oğlan hər dəfə onu gördükcə çiçək kimi açılır, elə bil, bahara
düşür, çiçək açmış ağaclar görür, adını bilmədiyimiz bu oğlan az qala
öz adını belə unudur.
Məmməd Orucun povestində təhkiyəçi obrazının təbiətindən
doğan lirizm üstün yer tutur. Leyləklərin təsvirində lirizm və rəmzi
fikirlər daha güclüdür. Hiss olunur ki, müəllif bu povesti yazmaq üçün
xüsusi tədqiqat aparmış, leyləklərin həyatı, xasiyyət və xarakteri ilə
bağlı elmi-nəzəri ədəbiyyatı diqqətlə öyrənmiş, bilavasitə müşahidələr
aparmışdır. Leyləklərin məhəbbət və mübarizəsinin, yaşayış tərzinin
təsviri povestdə təsirlidir. Leyləklərin bala çıxarma prosesini və bu
zaman ana leyləyin necə gözəlləşdiyini, onların sağlam nəsil uğrunda
mübarizəsini müəllif inandırıcı detallarla təsvir etmişdir. Qəşəmalı
leyləklərin yuvasına da əl uzadır, yuvadakı leylək yumurtalarından
birini qaz yumurtası ilə əvəz edir. Bu təhqirə dözməyən ana leylək
özünü təndirə vurub yandırır, ata leylək isə qaz balasını göyə qaldırıb
yerə çırpır. Qəşəmalının hiyləsi ilə düşmənə çevrilən sevgili
leyləklərin bu cür təsvirində təsirli cizgilərlə yanaşı, rəmzi məna da
var: burada dirilik və mübarizə üçün sağlam nəsil yetişdirmək ideyası
təlqin edilir: ”... leyləklər bəzən özlərinin də xəstə, zəif balalarını
yuvadan çıxarıb tullayırlar ki, soyları, kökləri korlanmasın, dünyaya
xəstə, zəif leylək gəlməsin, leylək güclü, sağlam olmalıdır ki, uzaq
uçuşlara tab gətirsin, uzaq uçuşlarda leylək səfini, leylək ordusunu
pozmasın.” Bu ”uzaq uçuşlar” insan övladının da mənəvi və fiziki
sağlamlığını qorumağı tələb edir. İ.Hüseynov, Ə.Əylisli və başqa-
larında olduğu kimi, Məmməd Orucun nəsrində də səciyyəvi detalların
təkrarı lirizmi artırır: ”dibinin daşı, çınqılı, yosunu görünən sularda”,
”Vasyanın oğlu və su sonası kimi Nadejda adlı arvadı” və s. kimi
ifadə-detallar təkrar olunduqca xatirələr oyadır.
Məmməd Oruc da yumorsuz keçinmir. Povestdə yumor və
istehza daha çox Qəşəmalı ilə bağlıdır. Dəryaçadan tutulmuş balığın
oğurluq olduğunu dedikdə ”çayı bizim, suyu bizim, balığı oğurluq
olur” deyə mövcud qanunlara istehza ilə cavab verir. Küsüb heç kimi
dindirmədikdə ”Qəşəmalı Dumandan başqa (itin adıdır - Q.K.) heç ki-
Dostları ilə paylaş: |