Muhazirə 13
Blokların yapışqanla bərkidilməsində istifadə olunan
avtomatik xətlər
Yapışdırma prosesi mürəkkəb çoxçeşidli fiziki-kimyəvi və digər təzahürlərlə müşayiət olunur. Bu halda yapışqan maye haldan bərk hala keçərək yapışan səthləri birləşdirən möhkəm yapışqan plyonkası yaradır. Broşürləmə-cildləmə proseslərində adətən lifli materiallar – kağız, karton, parça və s. yapışdırılır. Bu halda maye yapışqan materialın lifləri arasındakı boşluğa nüfuz edərək orada bərkiyir və yapışan materiallar arasında plyonka yaradır. Plyonka yaranmanın sürəti xüsusən yüksək məhsuldarlıqlı mexanikləşdirilmiş və avtomatlaşdırılmış avadanlıqlarda yapışdırma əməliyyatları yerinə yetirilərkən böyük əhəmiyyət kəsb edir. Termoyapışqanın bərkiməsi demək olar ki ani olaraq (1-2 san) baş verir. Digər yapışqanların sürətli quruması üçün isə quruducu qurğulardan istifadə edilir.
Kitab nəşrlərinin möhkəmliyi və uzunömürlüyü, bir çox hallarda onların ayrı-ayrı elementlərinin yapışdırılma keyfiyyəti ilə müəyyən edilir.
Yapışdırma keyfiyyəti yapışqanın tərkibindən, yapışdırılan materialların xüsusiyyətindən və onların səthlərinin xarakterindən; yapışqanın özlülüyündən və onun temperaturundan; yapışqan plyonkasının qalınlığından; yapışdırma zamanı yaranan təzyiqdən asılıdır.
Broşürləmə-cildləmə əməliyyatları və digər şərtlər müəyyən xüsusiyyətlərə malik olan minimal qiymətli yapışqandan istifadə etməni ciddi olaraq tələb edir. Bu öz növbəsində hər hansı bir universal yapışqandan istifadə etməyə icazə vermir. Ən çox istifadə olunan cildləmə yapışqanları sintetik polimer əsaslı yapışqanlardır (polivinilasetat dispersiya, lateks, termoyapışqan və s.).
Üst-üstə yığmaqla komplektləşdirilmiş nəşrlərin istehsalı üçün avtomatik broşürləmə xətlərində yalnız bloklar üzrə, bir qayda olaraq, yapışqanlı bərkitmədən və ya bəzi hallarda blokların kombinə edilmiş bərkidilməsindən istifadə olunur. Bu halda bütün əməliyyatlarda məhsulun emalı bloklar üzrə yerinə yetirilir. Xəttin məhsuldarlığı nəşrin həcmindən asılı olmur.
Dəftərlər üzrə sapla bərkitmə üsulu məhsuldarlıq dəyişdiyi (blokların həcmindən asılı olaraq sapla tikmə avtomatlarının məhsuldarlığı dəyişir) üçün axın xəttinə uyğun gəlmir.
Üst-üstə yığmaqla komplektləşdirilmiş nəşr bloklarının bərkidilmə üsulu üzrə broşürləmə axın xətlərini iki əsas növə – blokların üstdən məftillə tikilməsindən istifadə etməklə mexanikləşdirilmiş və blokların yapışqanla bərkidilməsindən istifadə etməklə avtomatlaşdırılmış xətlərə bölmək olar.
Blokların məftillə üstdən tikilməsindən istifadə etməklə broşürləmə xətləri kitab bloklarının yapışqanla bərkidilməsinin intensiv inkişafı ilə əlaqədar geniş tətbiqini tapmamışdır.
Belə xətlərin əksəriyyətində qatlanmış dəftərlərin kötüyünün kəsilməsi və kötüyün “soyuq” yapışqanla (məsələn, PVAD) və ya termoyapışqanla yapışdırılmasından istifadə olunur. Termoyapışqandan istifadə PVAD ilə yapışdırmadan istifadəyə nisbətən avadanlığı və texnologiyanı sadələşdirir. Lakin PVAD-ilə bərkidilmiş blokların möhkəmliyi və uzunömürlüyü termoyapışqanla bərkitmə ilə müqayisədə yüksəkdir.
Texnoloji imkanlardan, məhsuldarlığından və broşürləmə avtomatik xəttinin qiymətindən asılı olaraq yapışqanla bərkitmədə istifadə edilən avtomatik xətləri üç qrupa bölmək olar.
Dostları ilə paylaş: |