göndərsin.
Təzə-tər, gözəl-göyçək qızlar idi. Uşaq evində çətinlikləri çox olmuşdu. Elə
sevinirdilər. Onları əcnəbi qonaqlarıma təhvil verdim ki, bu sizə bakirə qız hədiyyəsi, necədir?
(Leyla hönkürdü) Barda görüşdüyün Zəminə həmin qızlardan biridi. Amma həyatını zəhərləsəm
də, Zəminə taleyi ilə barışıb mənim yanımdan ayrılmadı. İnsafən, mən də ona pis baxmırdım.
İndi barda işləməyinə baxma, əvvəllər onun üçün gözəllik salonu açmışdım. Özünə ev aldı. İndi
mənim vəziyyətim pisdir deyə, bara qayıdıb. Gör necə sədaqətlidir! Görən kimi atılıb boynumu
qucaqladı. Nə isə, əməlimin üstü açıldı. Məktəbin müdirəsini həbs etdilər, mən pul-para ilə
canımı qurtardım. Sonra qəzetlərdə şayiə buraxdılar ki, guya universiteti bitirdiyim il qiymət ala
bilməyən tələbə qızlara müştəri tapırmışam, amma ağ yalandır, heç vaxt belə olmayıb.
Sonralar Vüqarla münasibətlərimiz korlandı. Klara ilə görüşürdü.
- Kiminləəə?!! - Elə bil məni ildırım vurdu. Diksinib gözlərimi üzünə bərəltdim.
- Klara ilə... Niyə təəccübləndin?
- Heç... heç... buyur, buyur, eşidirəm. - Udqundum. Qəzetdə Klara ilə bağlı yazılar gözümün
qabağına gəldi. Bir cümləsi hələ də ilişib ağlımda qalmışdı: “Sonrakı illərdə atasının sürətli
karyera uğurlarından doğan imkanları hesabına sözü hər yerdə keçən və “qəzəbli dişi canavar”
adı ilə çağırılan Klara cavan musiqiçi ilə tanış olandan sonra, həyatında hər şey yoluna düşür”.
Qorxudan bədənimə üşütmə gəlmişdi. Viski dolu qədəhi başıma çəkdim.
- Klara haqqında bir azdan sənə danışaram. Bu yaxınlarda qəzetlər də yazdılar.
- Oxu... oxumuşam. - Kəkələdim. - Bəlkə balkona çıxıb havamızı dəyişək?
Payız küləyi üzümə vurduqca eynim açıldı. Deməli, belə! Klara, Klara... Dişi canavar, general
qızı... Sənin adamlarındır mənim günümü-gündüzümü zəqquma döndərən... Bədənimə üşütmə
gəldi. Leyla da tir-tir titrəyirdi. Evə keçdik.
- Nədən danışırdım... - fikirləşdi. - Hə, Vüqarla tanış olandan sonra istəyirdim ondan uşağım
olsun.
Daha doğrusu, bu təkcə mənim istəyim deyildi, Vüqar da arzulayırdı. Amma arzulamağa
nə verirlər? Bu həmin vaxtlar idi ki, Gülüstanın uşağının üstünə qaynar su tökülüb ölmüşdü.
Sənə demişəm, əri atandan sonra bədbaxt havalandı, dəlixanaya düşdü. Uşaq sarıdan heç
birimizin bəxtimiz gətirmədi. Onun altı il müalicədən, nəzir-niyazdan sonra doğulan uşağı öldü,
mənim də getmədiyim xəstəxana, yalvarıb-yaxarmadığım həkim qalmamışdı. Sən demə, uşaq
vaxtı kor bağırsaqda edilən əməliyyatda həkimin səhlənkarlığı, naşılığı ucbatından uşaqlıq
borularım, yumurtalıq zədələnibmiş. Buna görə xeyli müalicə aldım. Həkimlər demişdi ümidini
Allahdan üzmə, hamilə qalacaqsan. Həm Allahdan uşaq istəmək, həm də... murdar işlərlə məşğul
olmaq... bir... bir yerə necə sığar? Elə bil ilahidən gözümü-könlümü bağlamışdılar, qəlbim daş
idi, daş!
Bir gün həkim sevincək muştuluq istədi: hamiləsən! İlahi, yerə-göyə sığmırdım. Qanad açıb
uçmaq, hamını bağrıma basmaq,
sevincimdən dəli kimi, hönkür-hönkür ağlamaq istəyirdim.
Dünya gözümdə işığa, nura qərq olmuşdu. Hamiləliyin üç ayı tamam olanda, hətta oğlum, yoxsa
qızım olacağını öyrənmək üçün xəstəxanaya getmədim. İstəyirdim hər şey təbii, sürprizli olsun.
Bu böyük xoşbəxtlikdən sarı intizar çəkməyə dəyərdi. Xatırlayırsansa, belə vəziyyətdə rayonları
gəzdim, on beş günə yaxın açıq havada konsertlərim oldu. Efirdə-ekranda bir-birinin dalınca
sujetlər hazırlanırdı, suallar verirdilər ki, uşağın atası kimdi? Yaxşı bir yalan uydurmuşdum:
guya ailə qurmuşam, amma belə şeylər haqqında danışmağı xoşlamıram.
Dost-tanışlar, hətta anam da çox çalışdılar ki, UZİ-yə gedim, yenə razı olmadım. Rayona
gedəndə bir qohumumuz bizə gəlmişdi. Köhnənin təcrübəli mamaçalarındandı. Xalq təbabətini,
türkəçarəni də gözəl bilir. Özü də uşaqxasiyyət, macərapərəst adamdı. Axşam mənə dedi, oğlun
olacaq. Yerimdə donub qaldım. Necə yəni oğlum olacaq, bu hardan bildi? İnanmadım,
fikirləşdim yəqin ürəyimdən oğlan keçdiyini hiss edib,
ona görə könlüm xoş olsun deyə, danışır.
Hətta məndən muştuluq da istədi. Razılaşdıq ki, əgər oğlum olsa, ona arzuladığı hədiyyəni
alaram. Sən demə, arvad səhər tezdən mənim bütün hərəkətlərimə göz qoyurmuş. Arvadın
bicliyinə bax: demə, hamilə qadın bir şey götürmək istəyəndə sağ əlini uzadırsa, yaxud ayaq üstə
dayanandan sonra birinci sağ ayağını atırsa, bu, oğlan doğmağın əlamətidir. Heyrətdən donub
qaldım, amma yenə inanmadım. Arvad bunu hiss edəndə məni xəlvətə çəkdi:
- Hamilə olandan sonra cinsi yaxınlığa meylin azalıb, düzdür?
Doğrudan, əvvəlki halımdan əsər-əlamət qalmamışdı. Bəzən gecələr səhərəcən yatmır, Vüqarı
çimir almağa qoymurdum. Gecəboyu beş-altı dəfə orqazm olur, həzzdən bayılırdım. Həmişə
içimdə vəhşi bir ehtiras olub, düşünmüşəm, dünyanın heç bir kişisi məni doyuzdura, istədiyim
ləzzəti yaşada bilməz. Əslində, Vüqara dəfələrlə xəyanət etməyimin səbəbi də bu olub. Demə,
qadın cinsi yaxınlığa az meyil edirsə, bu, oğlan olmağın əlamətidir.
Həmin ərəfədə sol döşümə
nisbətən sağ döşüm böyüməyə, şişməyə başlamışdı. Arvad dedi bəs nə, bu o deməkdi, bətnində
oğlan gəzdirirsən. Ürəyimin şübhəsi tam çəkilsin deyə, bir boşqab su gətirib qapını arxadan
bağladı.
- Döşünü çıxar, - pəsdən dilləndi. - Bilmirdim nə edim, bir az da acığım tutdu. Arvad əl çəkmədi,
özü köynəyimin yaxasını açdı. Hardansa axmaq bir fikir gəldi ağlıma: bu arvadı illərdi
tanımamışam; xalis lezbiyandı, belə şeydən xoşlanır, kef tutur. Nə düşündüyümü davranışımdan,
baxışlarımdan hiss edib pərt oldu. Amma işindən qalmadı, döşümü əlinə alıb boşqabın içinə bir
iki damcı süd sağdı.
- Süd qabın dibinə çöksə, deməli, qızdır. Yox, suyun üzündə qalarsa... mən dediyimdi: oğlan...
Heyrətə gəldim. Süd həqiqətən suyun üzündə qaldı.
Maraq mənə güc gəldi. Bakıya qayıdandan sonra birbaş getdim xəstəxanaya. Gördüm, həkimin
gözləri gülür: oğlun olacaq!
Həmin vaxtlar dünyada məndən
bəxtəvər adam yoxuydu, inanırsan? Bəzən saatlarla oğlumla
söhbət etməkdən usanmırdım. Hərdən bətnimdə yüngül çırpıntılar, tərpəniş hiss edəndə
sevincimdən ağlayırdım. Sənət də, səhnə də, dostlar da gözümdən düşmüşdü. Daha doğrusu, heç
birini meylim çəkmirdi. Amma xəstə eqoistliyim yavaş-yavaş baş qaldırdı: hamiləliyim gündəmi
tutmaq üçün əla fürsət idi. Axşam düşən kimi uşaq pal-paltarı satılan mağazaları gəzib ələk-
vələk edirdim. O qədər oyuncaq, körpə paltarları almışdım...
Leyla barmaqlarının ucunu yanaqlarında gəzdirib göz yaşlarını sildi. Yenə nəsə demək istəyirdi,
sözü dilində öldürdü. Boğazına yığılan qəhərdən boğuldu, sonra bir topa acı qəhər qaynar
qurğuşun kimi sinəsinə yayılıb içini közlədi.
- Vüqar get-gedə məndən soyumağa başladı. Əvvəl-əvvəl onu başa düşmürdüm. Əslində, hamilə
qalandan sonra o məni daha çox sevməli, nazımı çəkməliydi.
Sonradan öyrəndim ki, Klara ilə
görüşür. Klaranın adını çoxdan eşitmişdim, amma kim olduğunu bilmirdim. Daha doğrusu, heç
kim bu haqda danışmaq istəmirdi. Müğənnilər arasında bir yazılmamış qayda vardı: Kimliyindən
asılı olmayaraq, onun bütün tapşırıqları sözsüz yerinə yetirilməliydi. Belə deyək, Klara bizim
gözəgörünməz idarəçimiz idi. Eşitmişəm, təkcə şou-biznes yox, qəzetlər,
televiziyalar da onun
nəzarətindədir. Məsələn, o istəyəndə iki düşmən müğənni efirdə qucaqlaşıb öpüşməli, bir-birinə
can deməliydilər. Düzdü, belə şeylər çox az-az olurdu, amma ona nə var, kefinə düşəndə
istədiyini boğazımıza tıxamaqdan qalmırdı. Klaranın Türkiyədə, Rusiyada, Avropa ölkələrində
böyük şirkətləri, bankları var. Nə bilim, hətta deyirlər, dünyanın böyük narkobaronları ilə dostuq
edirmiş. Adı gələndə hamı nəfəsini içinə çəkib hürkürdü. Çox nadir hallarda tədbirlərə qatılır.
Adətən, onun iştirak etdiyi məclislərdə çal-çağır, oxuyub-oynamaq olmazdı: rəsmi, quru,
maraqsız çıxışlar, vəssalam... Televiziyada bir
departament rəhbəri var, etibarlı, inandığım
adamdı, işdən çıxardılar. Bir dəfə söz arası mənə demişdi ki, Klaranın psixoloji problemləri var,
uşaqlıqda travma alıb. Bilmirəm, bu yaxınlarda qəzetdə yazılanları oxudun, ya yox?! Onunla
mənim heç vaxt problemim olmayıb. Daha doğrusu, bilirsən, ola da bilməzdi axı, qorxurdum.
Bir gün Vüqar hər şeyi özü danışdı. Sən demə, məndən əvvəl onunla bir yerdə olub. Sonra qız
özü bundan uzaqlaşıb. Amma səbəbsiz-filansız. Deyib, lazım olanda, ürəyim istəyəndə
çağıracam, birdəfəlik gələrsən.
- Leyla... vallah..., düzünü deyim, inandırıcı gəlmir nəsə. Bəlkə nəyisə danışmırsan, ona görə...
Klara haqqında lap çoxdan eşitmişəm, qəzetdə yazılanları da oxudum. Amma belə adamın
Vüqara meyil salmağı... bəlkə ola bilər, nə bilim...
- Başa düşürəm səni. Amma Vüqarı ələ keçirməkdən sarı çox qızlar çalışıblar. Klara da qadındır.
Düzdür, o istəsəydi Vüqarı hər vaxt yanına çəkə bilərdi. Görünür, uzun ayrılıqdan sonra meyli
indi çəkib. Şərt
var-dövlətin az-çoxluğunda, hörmətdə, şan-şöhrətdə deyil, Vüqar hər dona
məharətlə girib adamın gözünə kül üfürsə də, əclaflığını gizlətməyi bacarır. Sənə dedim axı,
həddən artıq maraqlı adamdır. İnsanın qəlbini şeytan kimi oğurlamağı bacarır. Bir də, hansı
qadın istəməz ki, yanında belə istedadlı bəstəkar olsun. Tanınır, sevilir, hər yerdə ehtiramla
qarşılanır, yaraşıqlıdır... Mən heç vaxt bilməmişəm ki, o, əvvəllər Klara ilə görüşüb. Ətrafımda
olan, Vüqarı məndən qabaq tanıyan adamlar da bunu hiss etdirməyiblər. Vüqara görə yox,
Klaranın qorxusundan.