Мавзу 1: пeдaгoгикaнинг умумий асослари

a) mashq va o‘rgatish
b) topshiriq
v) pedagogik talab
Mashq va o‘rgatish usullari - o‘rgatish usuli o‘quvchilarning hayotini, mehnatini, dam olishlarini batafsil o‘ylab chiqilgan holda tashkil etishni hamda dastlabki axloq normalarini tarkib toptirish maqsadida o‘quvchilarni yurish-turish qoidalarini bajarishga o‘rgatib borishni nazarda tutadi.
Ayniqsa boshlang‘ich maktabda o‘rgatish o‘qituvchining biror-bir hatti- harakat namunasini, surat, fil’mlar namoyish qilish, ta’sirli, namunali hikoyani o‘qib berish yordamida boshlanadi.
Xalq pedagogikasida, o‘qituvchilarning tarbiyaviy tajribalarida o‘rgatish usuli mustahkam o‘rin egallaydi. Zotan, tarbiyaning o‘zi o‘rgatishdan boshlanadi.
Ota-onalar bolalarni ham juda kichik vaqtidanoq, vaqtida uxlash, o‘z buyumlarini yaxshi tutish, odobli bo‘lish, kattalarni hurmat qilish, ota-onalar bilan, katta yoshdagi kishilar bilan xushmuomala bo‘lish kabi fazilatarga o‘rgatadilar. Kattalarning (o‘qituvchilar, ota-onalarning) bolalar hatti-harakatini nazorat qilib turishi ham o‘rgatishda muhim ahamiyatga ega. Bu nazoratning muntazam, tizimli va puxta bo‘lishi juda muhimdir. O‘rgatish usuli bolalarning yoshi va tarbiya sharoitlariga qarab o‘zgarib turishi mumkin. Chunki, har doim bolalarning oldiga biror hatti - harakat usullarini egallab olish vazifasini qo‘yish hamma vaqt ham maqsadga muvofiq emas.
Tarbiyachi bolaga ma’lum bir topshiriqni (navbatchilikni) berishi mumkin. Tarbiyalanuvchi bu topshirqni bajarish davomida zarur axloq normalarini egallab boradi. Odatda maktabgacha tarbiya yoshidagi bolalarni va kichik yoshdagi o‘quvchilarni o‘rgatish shu yo‘l bilan amalga oshirib boriladi. Lekin ba’zida bolalar oldiga, o‘zini ma’lum bir holatda tutish, masalan, hushmuomala, ehtiyotkor bo‘lish vazifasi ham qo‘yiladi. Bunday holda bolalarga aniq bir obrazni ko‘rsatish va ularda bu obrazga taqlid qilishga intilish uyg‘ota bilish katta ahamiyat kasb etadi.
Turli-tuman mashqlar tarbiyada muhim o‘rinni egallaydi. Bu mashqlarning o‘zi bevosita o‘rganish bilan bog‘langandir.
O‘quv ishlarida mashqlardan o‘quvchilarda malaka va ko‘nikmalar tarkib toptirish uchun foydalaniladi. Ba’zi hollarda mashqlardan tarbiyada biror-bir narsani o‘rgatish maqsadida qo‘llaniladi. Yaxshi odatlarga o‘rganishda, axloqiy ko‘nikmalarni hosil qilishda mashq usulining ahamiyati katta. Bunda o‘quvchi ma’lum faoliyat bo‘yicha biron-bir vaziyatga qo‘yilib ayrim harakatlarni takroran bajaradi.
Mashq harakatlarni takrorlash bo‘lib, axloqiy ko‘nikma, malaka va odat hosil qilish maqsadida o‘quvchilarning maxsus uyushtirilgan faoliyatidir.
Mashq usuli ta’lim jarayonida ham ishlatiladi, ammo tarbiyadagi mashq ta’limdagi mashqdan farq qiladi.
Tarbiyadagi mashqda o‘quvchi bir xil mashqni turli sharoitlarda qo‘llaydi. Masalan: Axloqiy mashqlar hayotning turli vaziyatlarida qo‘llaniladi, intizomlilik dars paytida ham, tanaffusda ham, ijtimoiy paytlarda ham bir xilda talab etiladi.
Tarbiyada mashqlardan faqat hatti-harakat uslubini singdirish usuli sifatidagina emas, balki inson shaxsini tarkib toptirish yo‘li sifatida ham foydalanish kerak. Shuning uchun o‘rgatish va mashq qildirish usulidan foydalanishda bolalarning axloq borasida erishilgan natijalaridan qanoatlanish va o‘z shaxslarini takomillashtirib borishga intilish hissini sezishlari muhimdir. Mashq qilishning yana bir ko‘rinishi bu muntazam ravishda o‘quvchilarni tarbiyaga o‘rgatish mashqlari hisoblanadi. Oqilona, izchil amalga oshiriladigan tarbiya bo‘lmasa, tarbiyani faqatgina dono so‘zlar bilan amalga oshirib bo‘lmaydi.
Tarbiyaga rioya qilish ayniqsa, quyi sinf o‘quvchilari uchun katta ahamiyatga ega, chunki ularda uyushqoqliq intizom, sabot, iroda hali yetarlicha shakllanmagan bo‘ladi. Tarbiya o‘quvchilarni faqatgina o‘quv mehnatinigina bajarishga qaratilmay, balki, axloqiy, estetik odatlar qo‘nikmasini hosil qilishga ko‘maklashadi.