Sanki, o kağızın zəhmi burada oturanların hamısını basmışdı. Aldanov məmnun
halda ətrafına göz gəzdirib, sınayıcı nəzərlərlə hamını süzdü, sanki, öz
baxışları ilə o, Tanabaya olan nifrətini hamıya təlqin etmək istəyirdi.
Sonra Seqizbayev qətiyyətlə sözə başladı:
– Yoldaş büro üzvləri, sizin
icazənizlə mən bu işə bəzi əlavələr etmək istəyirəm. Kommunist Bakasovun
hərəkətlərini adi bir xuliqanlıq kimi qiymətləndirə biləcək adamları indidən
xəbərdar etmək istəyirəm. Əgər belə olsaydı, inanın ki, mən bu məsələni
büroya çıxarmazdım. Xuliqanlarla mübarizə üçün bizdə başqa vasitələr vardır
və mən, şübhəsiz ki, burada öz təhqir edilmiş heysiyyətimin qeydinə qalmıram.
Bakasovun mənə dediyi sözlər, hər şeydən əvvəl, rayon partiya
komitəsinin və onun simasında, demək olar ki, bütün partiyanın ləyaqətinə
toxunur və mən razı ola bilmərəm ki, partiyanın avtoritetini ləkələyən belə
bir fakt cəzasız qalsın. Onu da deməliyəm ki, bütün bunlar bizim kommunist və
bitərəflər arasında apardığımız siyasi tərbiyə işinin yarıtmazlığını və
raykomun ideoloji işindəki nöqsanları aşkara çıxarır. Bundan əlavə, biz
Bakasov kimi sıravi kommunistlərin düşüncə tərzinə görə cavab verməliyik.
Bəlkə bu adam tək deyildir. Bəlkə belə düşünən başqa kommunistlər də vardır?
“Xəzpaltolu təzə ağa!” Bu sözlərin arxasında gizlənən mənaya fikir
verirsinizmi? Palto bir yana dursun, Bakasovun dediyindən belə çıxır ki, mən
sovet adamı, öz partiya borcumu yerinə yetirən bir şəxs, təzə ağayam,
istismarçıyam, xalqın qanını soruram. Fikir verin! Bu sözlərin arxasında
görün nə mətləb gizlənir! İzahata ehtiyac yoxdur... İndi işin o biri
tərəfinə keçək. Mən “Ağ qaya” kolxozunda heyvandarlığın necə yarıtmaz bir
halda olduğunu görəndə, doğrusu, özümü itirdim. Guya, öz sosialist
öhdəçiliyini unutmuş Bakasovun verdiyi təhqiramiz cavabların müqabilində mən
onu ziyanxor və xalq düşməni adlandırdım, dedim ki, sənin yerin partiya
deyil, türmədir. Etiraf edirəm ki, bu sözlərlə mən onun heysiyyətinə
toxunmuşdum və ondan üzr istəməyə hazır idim. İndi isə əminəm ki, səhv
etməmişəm
və dediyim sözləri geri götürmürəm. Əksinə, bu adamın qorxulu, düşmən əhval-
ruhiyyəli bir element olduğunu təsdiq edirəm...
Tanabay dünyada nələr
görməmişdi. Müharibənin başından vurub ayağından çıxmışdı, ancaq heç yuxusuna
da girməmişdi ki, insan ürəyi nə qədər dəhşətlə döyünə bilər. Bu
aramsız döyüntü içində ürək gah şişir, gah sıxılırdı, gah qalxır, gah
düşürdü. Ürək həyat uğrunda mübarizəyə qalxırdı, ancaq bu gülləbarana ürəkmi
dözərdi? Tanabay ürəyinin səsini eşidirdi: “Nə oldu, ilahi, nə oldu o şeylər
ki, bir vaxt mənim həyatımın mənası idi? O qədər ölmədim – xalq düşməni
oldum. Niyə mən özümü oda-közə vururdum; tövlə dərdi, yem dərdi, yolunu azmış
Bektayın dərdi. Nə üçün? Kim üçün?..”.
– Məlumat vərəqəsində qeyd
etdiklərimin əsas məğzini bir daha nəzərinizə çatdırmaq istəyirəm, – deyə
Seqizbayev sözləri ağır dəmir kimi bir-birinə pərçimləyirdi: – Bakasov
bizim quruluşa nifrət edir, onun kolxozu, sosializm yarışını, ümumiyyətlə,
bütün həyatımızı görməyə gözü yoxdur. Bütün bunları o, kolxozun partiya
təşkilat katibi Sayakov yoldaşın yanındaca açıq-aşkar bəyan etmişdir. Bundan
əlavə, öz vəzifəsini yerinə yetirən dövlət nümayəndəsinə əl qaldırmaqla
Bakasov başqa bir cinayət də törətmişdir. Xahiş edirəm, məni düzgün başa
düşəsiniz, mən Bakasovun məhkəmə məsuliyyətinə cəlb edilməsi üçün sanksiya
verilməsini tələb edirəm və şərt qoyuram ki, bu adam, buradan çıxanda nəzarət
altına alınsın. Onun törətdiyi cinayətlər əlli səkkizinci maddəyə
tamamilə uyğundur. Bakasovun partiya sıralarında qalıb-qalmamaq məsələsinə
gəldikdə, bu barədə danışmağı yersiz bilirəm...
Bu tələblə Seqizbayev çox
uzağa getdiyini yaxşı bilirdi. Ancaq büro Tanabayı məhkəmə məsuliyyətinə
almağı lazım bilməsə də, bu cür tələbdən sonra onu mütləq partiyadan
çıxarmalı olacaqdı. Bu tələbi Kaşkatayev də qəbul etməyə bilməyəcəkdi və
nəticədə Seqizbayev öz niyyətini həyata keçirəcəkdi.
Səsindən aşkar əsəbilik
sezilən Kaşkatayev Tanabaya müraciət elədi:
– Bu haqda siz nə deyə bilərsiniz, yoldaş Bakasov?
– Heç nə. Hamısını dedilər. Belə çıxır ki, mən əvvəldən
də ziyanxor, xalq düşməni olmuşam, indi də düşmənliyimdə qalıram. Mənim fikir
deməyimin nə mənası var? Hər şeyi özünüz həll eləyin...
– Siz özünüzü
vicdanlı kommunist hesab edirsinizmi?
– İndi belə şeyi sübut eləmək çətindir.
– Müqəssir olmağınızı boynunuza alırsınızmı?
– Xeyr.
– Özünüzü hamıdan
ağıllı hesab edirsiniz?
– Yox, hamıdan axmaq hesab eləyirəm. Döşündə komsomol nişanı olan cavan bir
oğlan ayağa qalxdı. O, hamıdan cavan idi; cılız,
cansız; lap uşaq kimi görünürdü.
– İcazə verin, mən deyim.
Cavan oğlanın burada oturduğunu Tanabay yalnız indi gördü. Ürəyində: “Döşə
gəlsin, – dedi, –
cavan oğlan, döşə gəlsin, vaxt olub mən də döşəmişəm...”
Kaşkatayev başı ilə razılıq verdi:
– Buyurun, Kərimbəyov.
Kərimbəyov həyəcanını gizlətməyə
çalışaraq sözə başladı:
– Mən yoldaş Bakasovun hərəkətinə haqq qazandırmaq istəmirəm. Öz hərəkətinin
müqabilində o, lazımi partiya cəzası amalıdır.
Ancaq mən yoldaş Seqizbayevlə də razı deyiləm. Üstəlik, təklif eləyirəm ki,
yoldaş Seqizbayevin məsələsi də müzakirəyə qoyulsun...
Kimsə Kərimbəyovun
sözünü kəsdi:
– Vay səni! Bu qanunları sizin komsomolmu icad eləyib?
Kərimbəyov qızardı. Daha da özünü itirdi:
– Qanun hamı üçün eynidir, – dedi və bir
anlığa tutulub, özünü ələ almağa çalışdı. Sonra o, daha sərt, daha kəskin
danışmağa başladı: – Kolxozçunu, çobanı, köhnə kommunisti təhqir etməyə
sizin nə ixtiyarınız vardı?.. Deyirsiniz ki, kolxozda heyvandarlığın pis
halda olduğunu görüb əsəbiləşmişsiniz. Bəlkə buna görə çoban sizdən də əsəbi
imiş? Bunacan siz nə vaxt onun yanına getmişdiniz, onun işi ilə, həyatı ilə
nə vaxt maraqlanmışdınız? Bilirdinizmi, maldarlıq niyə bu haldadır,
quzular nə üçün tələf olur? Xeyr, yazdığınızdan məlum olur ki, siz elə çatan
kimi çobanın üstünə düşmüsünüz, dişinizin dibindən çıxanı demisiniz.
Kolxozlarda doğum kampaniyasının vəziyyəti hamıya məlumdur. Mən özüm tez-tez
yerlərdə oluram, bizim komsomolçu çobanları görəndə xəcalət çəkirəm.
Çünki biz onlardan hər şey tələb eləyirik, ancaq özümüz onlara heç bir
praktiki kömək göstərmirik. Bir yandan yarıtmaz tövlələr, bir yandan aclıq,
yemqıtlığı. Mən özüm çoban oğluyam. Bilirəm ki, hər quzunun ölməyi çoban üçün
nə deməkdir. İnstitutlarda bizə başqa şeylər öyrədiblər, ancaq yerlərdə
işlər köhnə qayda ilə gedir. Bütün bunları görəndə adamın ürəyi ağrıyır!..
Seqizbayev onun sözünü kəsdi:
– Yoldaş Kərimbəyov, siz çalışmayın ki, bizi
ağladasınız. Hiss – nisbi məfhumdur. Hissə qapılmaq lazım deyil. Fakt
lazımdır, fakt!
– Bağışlayın, – deyə Kərimbəyov yenidən sözə başladı, – burada
biz cinayətkarlıq məsələsindən danışmırıq, öz partiyaçı yoldaşımızın işini
müzakirə eləyirik. Burada partiya bileti daşıyan bir yoldaşın taleyi həll
olunur. Buna görə də gəlin fikirləşək: yoldaş Bakasovu bu işə nə vadar
etmişdir? Mən Bakasovun hərəkətinə, əlbəttə, haqq qazandırmıram, ancaq
kolxozun ən yaxşı maldarlarından olan Bakasovun belə bir vəziyyətə gəlib
çıxmağının səbəbini də, məncə, aydınlaşdırmaq lazımdır.
Kərimbəyovun
çıxışından narazı qalmış Kaşkatayev qeyzlə:
– Oturun, – dedi. – Siz bizim diqqətimizi əsas məsələdən yayındırırsınız,
yoldaş Kərimbəyov. Kommunist
Dostları ilə paylaş: |