73
UKRAYNANIN ƏMƏK VƏ SOSİAL SİYASƏT NAZİRİ MİXAİL PAPİYEV İLƏ
GÖRÜŞDƏ SÖHBƏT
16 sentyabr 2003-cü il
İ l h a m Ə l i y e v: Hörmətli cənab nazir!
Əziz qonaqlar!
Mən sizi salamlayıram, Azərbaycana xoş gəlmisiniz. Eşitmişdim ki, Bakıya gəlməyə hazırlaşırdınız,
bizim nazirlə razılaşmışdınız. Buraya səfərinizdən çox şadıq.
Ölkələrimiz arasında
siyasi sahədə də, iqtisadi sahədə də, mədəni sahədə də səmimi münasibətlər, dostluq
əlaqələri mövcuddur. Ona görə də Ukraynanın belə səviyyədə nümayəndəsinin hər bir səfəri əlaqələrimizin daha
da möhkəmlənməsinə kömək edəcəkdir. Prezidentlərimiz arasında çox yaxşı şəxsi dostluq münasibətləri var.
Dövlət başçılarımızın dəfələrlə həyata keçirdikləri qarşılıqlı səfərlər müstəqillik dövründə ölkələrimizin necə
yaxınlaşdığını nümayiş etdirmişdir. Keçmişdə bir ölkədə – Sovet İttifaqında yaşadığımız dövrdə də belə
olmuşdur. Əlbəttə, indi bu münasibətlər tamamilə yeni səviyyəyə qalxmışdır.
GUÖAM kimi regional təşkilatlar çərçivəsində çox yaxşı əməkdaşlığımız var. Ukrayna ilə Azərbaycan
arasında iqtisadi əməkdaşlıq yüksələn xətlə inkişaf edir. Bir çox Ukrayna şirkətləri ölkəmizdə həyata keçirilən
layihələrdə iştirak edir, öz məhsullarını göndərirlər. Biz bunda çox maraqlıyıq.
Ölkələrimizin, xalqlarımızın həmişə bir-birinə rəğbət, dostluq hissləri bəslədiyi hamıya məlumdur. Bu gün
də beynəlxalq aləmdə bir çox məsələlərdə mövqelərimiz uyğun gəlir. Ona görə də sizə xoş hisslərimizi və bütün
istiqamətlərdə əməkdaşlığı davam etdirmək arzusunda olduğumuzu bildirmək istərdim.
Bilirəm ki, nazirliklərimiz arasında səmimi münasibətlər yaranmışdır, təcrübə mübadiləsi aparılır.
Son illər
Azərbaycanda bu sahədə böyük iş görülmüşdür. Cənab Nağıyevin, onun rəhbərlik etdiyi nazirliyin fəaliyyəti
nəticəsində insanlara, ehtiyacı olanlara böyük qayğı göstərilir. Bu, ölkəmizdə xüsusilə aktualdır, çünki bizdə
erməni təcavüzündən zərər çəkmiş çoxlu insan, çoxlu yaralı və müharibədə sağlamlığını itirmiş adamlar, əlillər
var. Dövlət onların güzəranının yaxşılaşdırılması üçün mümkün olan bütün işləri görür. Nazirliyin xətti ilə evlər,
reabilitasiya mərkəzləri, obyektlər tikilir və bunlar, ilk növbədə, döyüşlərdə sağlamlığını itirmiş insanlara kömək
edir. Bu insanlara maddi yardım göstərilməsi, onların minik avtomobilləri ilə təmin olunması baxımından da çox
işlər görülür və sair. Bütün bu konkret nəticələr və konkret işlər hökumətin sosial siyasəti ilə bağlıdır. Real nailiy-
yətlərə əsaslanmayan siyasət, bir qayda olaraq, səmərəli olmur.
Eşitmişəm ki, Ukrayna bu istiqamətdə müsbət təcrübəyə malikdir. Odur ki, qarşılıqlı əlaqələr
və təcrübə
mübadiləsi faydalı olacaqdır.
Mən sizi bir daha salamlamaq və arzu etmək istəyirəm ki, Azərbaycana səfəriniz uğurlu olsun, Vətənə ən xoş
təəssüratlarla qayıdasınız. Ümidvaram ki, hər şeyin məhz belə olması üçün yoldaşlarımız əllərindən gələni
əsirgəməyəcəklər.
M i x a i l P a p i y e v: Cənab Baş nazir, çox sağ olun. Əvvəlcə Ukraynanın Baş naziri Viktor Fyodoroviç
Yanukoviçin ən səmimi sözlərini Sizə yetirmək istərdim.
Xalqlarımızı çoxdan dostluq telləri bağlayır. Mən Bakıya birinci dəfə gəlirəm, düzünü deyəcəyəm, dərhal
hiss etdim ki, münasibətlərimiz protokol çərçivəsindən kənara çıxmışdır. Bəli, sən bir nazir kimi dövlət işlərini
həll etməyə gəlirsən. Lakin bu zaman nəinki, sadəcə olaraq,
dostluq münasibətləri ilə, hətta deyərdim, qardaşlıq
münasibətləri ilə qarşılaşırsan. Mən təəssüratlarımızı Sizinlə bölüşmək istərdim.
Bakıda geniş tikinti işləri aparılır, insanlar öz mənzil şəraitini yaxşılaşdırırlar. Onların həyatı daha firavan
olur. Müəssisələr işləyir. Mən sizin iqtisadi göstəricilərinizlə tanış oldum. Çox gözəldir – istehsalın artım həcmi
10 faizdir! Siz 10 ildə istehsalın həcmini iki dəfə artırmısınız. Bu onun sayəsində əldə edilmişdir ki, ölkənizin
prezidenti Heydər Əliyeviç Əliyev əhalinin həyat səviyyəsinin daim yaxşılaşmasına yönəldilmiş dəqiq siyasət
aparır. Mən bunu düzgün hesab edirəm. Əmək və sosial siyasət naziri kimi demək istərdim ki, Ukrayna
prezidenti Leonid Daniloviç Kuçma mənim təyinatım haqqında fərman imzalayarkən adi sözlər söylədi. Amma
mən bu sözləri həmişəlik yadımda saxlamışam. O dedi ki, ümumən hökumətin işi sizin nazirliyinizin işi əsasın-
da qiymətləndiriləcəkdir. Yəni nazirlik demoqrafik proseslərdən tutmuş əmək, peşə təlimi məsələlərinədək tam
bir sıra məsələlər üzrə iş aparan nazirliyin fəaliyyəti əsasında qiymətləndiriləcəkdir. İnsan əmək fəaliyyətini
başa çatdırdıqdan sonra sosial təminatı bizim nazirliyimiz həyata keçirir.
Bir sözlə, insanın bütün həyat yolu,
demək olar, nazirliyimizin himayəsi altındadır.
Dünən biz Böyük Vətən müharibəsi və Qarabağ müharibəsi əlillərinin tibbi xidmət almaq, müalicə olunmaq
imkanı əldə etdikləri Bərpa Mərkəzinə getmişdik. Mən bu mərkəzə, sadəcə olaraq, heyran qaldım. Biz protez
zavodunda da olduq. Sadəcə olaraq, nadir bir müəssisədir. Bizə bildirdilər ki, siz ehtiyacı olanları protezlə 100
faiz təmin edirsiniz. Bu o deməkdir ki, fiziki qüsurları olan adamlar indi dövlətdən pulsuz tibbi yardım ala
74
bilərlər, üstəlik, işləmək imkanına malikdirlər. Zənnimcə, sizdə ən mühüm məsələ, yəni, insanın əmək
hüququ
təmin edilir. Mən əlillər üçün mənzil tikintisi proqramı ilə tanış oldum. Düşünürəm ki, bu proqramı da
Ukraynada tətbiq edəcəyik. Mənzillər dövlət tərəfindən tikilir və pulsuz verilir. Görünür ki, Azərbaycan iqtisadi
cəhətdən inkişaf edərək ən başlıca məsələni unutmur, buna görə də insanlar özlərinə, hökumətə inanmağa
başlayırlar. İnsanların etimadı hökumət üçün çox vacibdir. Əslinə qalsa, hökumət də elə bunun üçün
mövcuddur.
Bilirəm ki, oktyabrın 15-də Azərbaycanda çox mühüm hadisə baş verəcək – ölkə prezidentinin demokratik
seçkiləri keçiriləcəkdir. Açığını deyim ki, mən Siz sarıdan arxayınam. O qədər çox iş görürsünüz ki, indi mən
Sizə müxalif ola biləcək adamlar görmürəm.
İ l h a m Ə l i y e v: Biz də görmürük.
M i x a i l P a p i y e v: İlk növbədə, hörmətli Heydər Əliyeviçə cansağlığı arzulamaq istərdim. Arzu
edirəm ki, Sizin bütün ideyalarınız həyata keçsin. Ən başlıcası budur ki, bütün bu işlərdə Siz Ukraynanın,
Ukrayna xalqının simasında dəstəyə, arxa-dayağa və qardaşlıq yardımına malik olacaqsınız.
İ l h a m Ə l i y e v: Cənab nazir, çox sağ olun. Səmimi sözlərə görə sizə təşəkkür etmək istəyirəm. Xahiş
edirəm, belə səmimi münasibətə görə ən xoş diləklərimi Ukrayna prezidenti hörmətli Leonid Daniloviç
Kuçmaya və Baş nazirə yetirəsiniz.
Siz çox düzgün qeyd etdiniz ki, ehtiyacı olanlara dövlət qayğısı və bazar
iqtisadiyyatı şəraitində iqtisadi inkişaf Azərbaycanda olduqca yaxşı uyğunlaşdırılır. Son 10 ildə bizdə bu
istiqamətdə böyük müsbət dəyişikliklər baş vermişdir. Təxminən 6-7 ildir ümumi daxili məhsulun artımı 10
faiz, inflyasiyanın səviyyəsi isə, təxminən 2 faiz həddində qalmaqdadır. Bu isə əmək haqqını vaxtaşırı qaldır-
mağa imkan verir. Bu yaxınlarda insanların böyük bir qrupunun – tibb işçilərinin, müəllimlərin, mədəniyyət
xadimlərinin və başqalarının əmək haqqı, pensiyalar artırılmışdır.
İqtisadiyyat inkişaf edir, ölkə möhkəmlənir, büdcə genişlənir, valyuta yığımları çoxalır. Sizə deyim ki,
valyuta ehtiyatları təqribən 1 milyard 400 milyon dollara çatmışdır. Halbuki 10 il əvvəl valyuta ehtiyatları,
ümumiyyətlə, yox idi. Demək istəyirəm ki, bütün bunlar məhz prezidentimiz Heydər Əliyevin iqtisadi sahədə
apardığı düşünülmüş siyasətin nəticəsidir.
Əlbəttə, iqtisadi inkişaf əsasən özəl sektorun iştirakı ilə bağlıdır. Bizdə torpaq özəlləşdirilib kəndlilərə
paylanmışdır, iqtisadiyyatın bütün sahələrində geniş özəlləşdirmə aparılır. Nəzarət
paketlərində özəl sektorun
payı dövlət sektorunun payından çoxdur. Lakin dövlətin vəzifəsi də məhz öz ehtiyatlarından istifadə edərək
sahibkarlıq, iqtisadi inkişaf üçün yaxşı şərait yaratmaqdan, ehtiyacı olanlara kömək etməkdən ibarətdir. Siz
qeyd etdiniz, mən də demək istəyirəm ki, Əmək və Əhalinin Sosial Müdafiəsi Nazirliyinin xətti ilə
Azərbaycanda ehtiyacı olanların sosial müdafiəsi sahəsində çox böyük iş aparılır. Əminəm ki, bu proses bundan
sonra da davam etdiriləcəkdir. Bir sözlə, bu gün nə yaradılmışdırsa, onların hamısı real işlərdir.
Bizdə qaçqın-köçkünlərin çox vacib və ciddi problemlərinin həllində də bu cür proseslər gedir. Ermənistanın
təcavüzü və ərazilərimizin 20 faizinin işğal edilməsi nəticəsində bir milyonadək vətəndaşımız qaçqın və
məcburi köçkün vəziyyətindədir. Onların əksəriyyəti çox ağır şəraitdə yaşayır. Ona görə də dövlət neft
sektorunun inkişafından ilk real gəlir götürən kimi, Neft Fondu yaradıldı. Neft Fondundan elə ilk ayırmalar
məhz onların ehtiyaclarına yönəldildi. Prezidentin fərmanı ilə üst-üstə 70 milyon dollar ayrılmış, bu pulun hesa-
bına tamamilə yeni şəhərciklər, qəsəbələr tikilmişdir, çadır şəhərcikləri sökülüb yığışdırılır, qaçqın-köçkünlər
torpaq
sahələri ilə, lazımi infrastrukturla təmin edilirlər. Bu şəhərciklərə köçənlər müasir evlərdə, çox yaxşı
şəraitdə yaşayırlar. Odur ki, prezidentimiz Heydər Əliyevin iqtisadi inkişaf siyasətinin əsas cəhəti məhz bu
istiqamətə – bazar münasibətlərinin insana daimi qayğı ilə uyğunlaşdırılmasına yönəldilmişdir. Bəzən elə olur
ki, bu iki istiqamət bir-biri ilə uyğun gəlmir. Ya bazar münasibətləri olmur, – belə cəmiyyətdə biz də yaşamışıq,
– ya da əksinə olur. Yəni bazar münasibətlərinin həddindən artıq inkişaf etdiyi yerdə insana qayğı arxa plana
keçir. Biz bunu insanın taleyinin ümidinə buraxıldığı bəzi ölkələrin təcrübəsindən bilirik. O mənada ki, get, necə
istəyirsən, elə də yaşa. Ona görə də bu iki istiqamətin uyğunlaşdırılması, zənnimcə, çox vacibdir.
Azərbaycan çox yaxşı iqtisadi inkişaf perspektivlərinə malikdir. Bizdə neft, kommunikasiya layihələri həyata
keçirildikdən sonra böyük məbləğdə valyuta əldə ediləcəyi gözlənilir. Bu, sonrakı 2-3 il ərzində baş verəcəkdir.
Əlbəttə, siyasətimiz, ilk növbədə, insana qayğıdan ibarətdir. Bunu nəzərə alaraq,
neft layihələrimizin
gerçəkləşdirilməsi sayəsində 2-3 il ərzində həyat səviyyəsinin nə qədər yüksələcəyini təsəvvür etmək olar. Bunu
sizdən eşitmək mənim üçün çox xoşdur. Biz burada yaşayırıq, necə deyərlər, adət edirik və bizə elə gəlir ki, belə
də olmalıdır. Bunu buraya yenicə gəlmiş, xüsusən də belə yüksək vəzifə tutan adamdan eşitmək ikiqat xoşdur.
Ona görə də əminik ki, Prezidentin siyasəti bundan sonra da davam edəcəkdir. İstər dövlətin müstəqilliyinin
möhkəmlənməsi baxımından, istərsə də Azərbaycanın dünyada layiqli yer və regionda lider mövqeyi tutması
baxımından bu siyasətin alternativi yoxdur. Biz bütün istiqamətlərdə müsbət irəliləyiş görürük.
Səmimi sözlərə görə sizə bir daha təşəkkür edirəm. Düşünürəm ki, xalqlarımızın rifahı naminə ölkələrimiz
və hökumətlərimiz bu istiqamətdə bundan sonra da işləyəcəklər.
B o r i s A l e k s e n k o (
Ukraynanın Azərbaycandakı səfiri): Hörmətli cənab Baş nazir!