77
AVSTRİYA RESPUBLİKASININ
FEDERAL ƏDLİYYƏ NAZİRİ
DİTER BÖHMDORFERİN BAŞÇILIQ
ETDİYİ NÜMAYƏNDƏ HEYƏTİ İLƏ
GÖRÜŞDƏ SÖHBƏT
20 sentyabr 2003-cü il
İ l h a m Ə l i y e v: Hörmətli cənab nazir! Hörmətli qonaqlar!
Mən sizi salamlayıram, Azərbaycana xoş gəlmisiniz. Avstriya ilə Azərbaycan arasında münasibətlər
inkişaf edir. Biz ölkələrimiz arasında bütün sahələrdə əlaqələrin möhkəmlənməsində və genişlənməsində çox
maraqlıyıq. Öz tərəfimizdən çalışacağıq ki, gələcəkdə bütün sahələrdə, xüsusilə iqtisadi sahədə əlaqələrimiz
yeni pilləyə qalxsın.
Azərbaycan Respublikasının prezidenti cənab Heydər Əliyevin Avstriyaya səfərindən sonra biz ikitərəfli
münasibətlərimizin inkişafında nəzərəçarpacaq dərəcədə addım atıldığını hiss etdik. Əlbəttə, biz ümidvarıq ki,
ilk növbədə, iqtisadi sahədə mövcud olan ikitərəfli faydalı əməkdaşlıq öz nəticələrini verəcəkdir.
Azərbaycan sürətlə inkişaf edən ölkədir. Biz üç ildir Avropa Şurasının üzvüyük və bu təşkilatda çox fəal
iştirak edirik. Eyni zamanda, ölkəmiz iqtisadi sahədə böyük uğurlar əldə etmişdir,
Azərbaycana böyük həcmdə
xarici sərmayə qoyulur, ümumi daxili məhsul sürətlə artır.
Avropa ailəsinə inteqrasiya istiqamətində bütün sahələrdə – həm siyasi müstəvidə, həm də iqtisadi baxımdan
dinamik addımlar atılır. Bizim siyasətimiz məhz bundan ibarətdir. Adambaşına düşən xarici sərmayələrin
həcminə görə, Azərbaycan keçmiş sovet respublikaları arasında qabaqcıl yerdədir. Bu onu göstərir ki, ölkəmizdə
xarici sərmayədarlar üçün çox geniş şərait yaradılmışdır. Çox istərdik ki, Avstriyanın şirkətləri
də Azərbaycana
gəlsin, sərmayə qoysun və beləliklə, iki ölkə arasında münasibətlər daha da güclənsin və genişlənsin.
Bilirik ki, ölkələrimizin ədliyyə nazirlikləri arasında da gözəl münasibətlər qurulmuşdur. İmzalanmış
sənədlər onu göstərir ki, bu münasibətlər gələcəkdə də yüksək səviyyədə olacaqdır.
Sizi bir daha salamlayıram, əminəm ki, səfəriniz uğurlu olacaqdır.
D i t e r B ö h m d o r f e e r: Cənab Baş nazir, Sizə və əməkdaşlarınıza minnətdarlığımı bildirmək
istəyirəm. Biz bilirik ki, Sizin iş cədvəliniz çox sıxdır. Lakin buna baxmayaraq, vaxt ayırıb
bizi qəbul etdiyinizə
görə Sizə təşəkkürümü bildirirəm.
Bizim bu görüşümüz sizin ölkənin Ədliyyə nazirinin şəxsi təşəbbüsü ilə baş tutmuşdur. Buna görə mən
ona da öz minnətdarlığımı bildirərək, ümidvar olduğumu ifadə etmək istəyirəm ki, nazirliklər arasında
əməkdaşlıq bundan sonra da inkişaf etdiriləcəkdir. Mən öz tərəfimdən çalışacağam ki, Azərbaycana
Avstriya iş adamlarının sərmayəsi cəlb olunsun.
Biz onu da bilirik ki, müstəqillik əldə etdikdən sonra ölkənizin keçdiyi yol çox ağır olmuşdur. Lakin
Azərbaycanda Konstitusiyanın qəbul edilməsi, ölüm hökmünün ləğv olunması və Avropa Şurasına üzv
olmağınız məhz ölkənizin prezidenti cənab Heydər Əliyevin böyük xidmətləridir. Biz bu işlərin onun
fəaliyyəti nəticəsində gerçəkləşdiyini bilirik.
Mən Avstriya Prezidentinin də salamlarını Sizə çatdırıram. Ölkənizdə gedən proseslər haqqında dəqiq
məlumata malik olduğumuzu bildirmək istəyirəm. Eyni zamanda, bizə məlumdur ki, Siz Azərbaycanın
bugünkü siyasətində müstəsna rola malik bir insansınız. Qarşıdan prezident seçkiləri gəlir.
Bu seçkilərdə
Azərbaycana və Sizə uğurlar arzulayıram.
Biz Avstriyaya dönərkən Azərbaycanda olan qonaqpərvərlikdən ətraflı bəhs edəcəyik və çalışacağıq ki,
ölkənizin sənayesinə sərmayə qoyuluşu geniş vüsət alsın.
Qonaqpərvərliyə görə nümayəndə heyətinin üzvləri adından və şəxsən öz adımdan Sizə bir daha
minnətdarlığımı bildirmək istəyirəm.
78
AZƏRBAYCAN HÖKUMƏTİ ADINDAN
RUS MƏTBUATININ V ÜMUMDÜNYA
KONQRESİ İŞTİRAKÇILARININ ŞƏRƏFİNƏ
TƏŞKİL EDİLMİŞ QƏBULDA NİTQ
∗
20 sentyabr 2003-cü il
Hörmətli konqres iştirakçıları!
Hörmətli Lyudmila Aleksandrovna!
Xanımlar və cənablar!
İcazə verin, sizi Azərbaycan Respublikası hökuməti adından salamlayım və bu gün Azərbaycanda
olduğunuza görə sizə təşəkkür edim. Biz çox şadıq ki, Rusiya Federasiyasının hörmətli prezidenti, Azərbaycan
xalqının böyük dostu Vladimir Vladimiroviç Putinin xanımı bu gün Vətənimizin paytaxtına təşrif gətirmişdir. Bu,
ölkələrimiz arasındakı münasibətlərin dostluq, qardaşlıq xarakteri daşıdığını bir daha nəzərə çarpdırır. Rusiya prezidenti
Vladimir Vladimiroviç Putinin Azərbaycana rəsmi səfərindən, prezident Heydər Əlirza
oğlu Əliyev ilə keçirdiyi
danışıqlardan, görüşlərdən sonra münasibətlərimizin inkişafına güclü təkan verilmişdir. Onların arasındakı dostluq,
qarşılıqlı anlaşma, dərin şəxsi rəğbət ölkələrimizin münasibətlərinin son üç ildə müşahidə etdiyimiz sürətli inkişafını
əvvəlcədən bir çox cəhətdən müəyyənləşdirmişdir. Ümidvaram ki, gələcəkdə ölkələrimiz arasında münasibətlər ancaq
yüksələn xətlə inkişaf edəcəkdir.
Mən dünən və srağagün, iki gün ərzində Yaltada MDB ölkələri dövlət başçılarının görüşündə oldum və mənə
prezident Vladimir Putin tərəfindən rəsmən qəbul edilmək şərəfi nəsib oldu. Bizim çox yaxşı, konstruktiv
söhbətimiz oldu, qarşılıqlı fəaliyyətin bütün istiqamətlərində münasibətlərin daha da dərinləşdirilməsinə
ölkələrimizin sadiq qaldığını bir daha təsdiqlədik. Odur ki, bu fürsətdən istifadə edərək
mənə çox səmimi, xoş
münasibət göstərdiyinə görə Vladimir Vladimiroviçə dərin minnətdarlığımı bildirmək istəyirəm. Mən belə
görüşlərdə ilk dəfə iştirak edirdim və təbii ki, onun mehribanlığı, dəstəyi, xoş sözləri, ümumən, sammitin uğurla
başa çatması üçün, habelə bizim münasibətlərimiz üçün, zənnimcə, çox mühüm rol oynadı.
Mən bu gün Rus Mətbuatının Ümumdünya Konqresinin iştirakçılarını da ürəkdən salamlamaq istərdim.
Azərbaycanın konqresin keçiriləcəyi yer seçilməsi bizim üçün böyük şərəfdir. Lakin hesab edirəm ki, bu,
təsadüfi deyildir. Azərbaycanda rus dilinə, rus mədəniyyətinə, mətbuatına
olan münasibət, zənnimcə, dünyanın
bir çox digər ölkələri üçün də keçmişimizə qayğıkeşliklə yanaşmağın, qarşılıqlı mehriban münasibətlərimizin,
əlaqələrimizin qayğı ilə qorunub saxlanması və möhkəmləndirilməsi üçün örnək olmalıdır.
Bu gün dünyada rus mətbuatını irəliyə aparan və onu inkişaf etdirən qonaqlarımızla, müxtəlif ölkələrin
nümayəndələri ilə dostcasına görüşdə dedim ki, müstəqillik əldə edildikdən sonra Azərbaycanda rus dilində
nəşrlərin sayı azalmamış, əksinə, artmışdır. Bu, prezidentimiz Heydər Əlirza oğlu Əliyevin ölkələrimiz arasında
daha sıx inteqrasiyaya yönəlmiş strateji xəttinin daha bir sübutudur. Biz xalqlarımızı və ölkələrimizi birləşdirən
yaxşı nə varsa, hamısını qoruyub saxlamalı və artırmalıyıq.
Mən
ölkələrimizin şərəfinə, Rusiyanın və Azərbaycanın şərəfinə, onların keçmişi, bu günü və gələcəyi
şərəfinə badə qaldırmaq istəyirəm. Əminəm ki, bütün istiqamətlərdə münasibətlərimizin möhkəmləndirilməsi və
inkişafı ölkələrimizin mənafeyinə uyğundur.
Azərbaycan hökuməti adından sizi əmin edə bilərəm ki, biz münasibətlərimizin inkişafı və möhkəmlənməsi,
bu münasibətlərin ölkələrimizə və xalqlarımıza xeyir gətirməsi üçün əlimizdən gələni edəcəyik.
Sizin sağlığınıza!
∗
Qəbulda Rusiya Federasiyası Prezidentinin xanımı Lyudmila Putina nitq söyləmişdir.