160
ATƏT-in HAZIRKI SƏDRİ, NİDERLAND
KRALLIĞININ XARİCİ İŞLƏR NAZİRİ
YAAP DE HOOP SXEFFER VƏ ONU
MÜŞAYİƏT EDƏN NÜMAYƏNDƏ HEYƏTİ İLƏ
GÖRÜŞDƏ SÖHBƏT
22 oktyabr 2003-cü il
İ l h a m Ə l i y e v: Hörmətli cənab nazir!
Hörmətli qonaqlar!
Sizin hamınızı ürəkdən salamlayıram, Azərbaycana xoş gəlmisiniz. Mən bilirəm ki, regiona səfəriniz
çərçivəsində müxtəlif görüşlər keçirirsiniz. Bu gün də Azərbaycanda görüşləriniz olmuşdur. Əminəm ki,
keçirdiyiniz bütün görüşlər, burada aparılan danışıqlar Azərbaycanda baş verən hadisələr haqqında sizdə daha
geniş təəssürat yaradacaqdır.
Azərbaycan inkişaf edən ölkədir və müstəqillik əldə etdikdən sonra bütün sahələrdə böyük uğurlar
qazanmışdır. Əlbəttə, ölkəmizdə problemlər də vardır və onların ən vacibi Ermənistan–Azərbaycan, Dağlıq
Qarabağ münaqişəsidir. ATƏT və onun Minsk qrupu bu məsələ ilə bağlı uzun illərdir məşğul olur və göstərilmiş
bütün səylərə görə mən sizə öz minnətdarlığımı bildirirəm. Eyni zamanda, ümid edirəm ki, bu fəaliyyət davam
edəcək və konkret nəticələr əldə olunacaqdır. Biz hamımız münaqişənin ədalətli şəkildə həll olunmasını istəyirik
və bu istiqamətdə ATƏT-in Minsk qrupunun fəaliyyəti güclənməlidir, yeni təkliflər hazırlanmalıdır. Əminəm ki,
veriləcək bütün təkliflərə diqqətlə baxılacaq və beynəlxalq hüquq normaları əsas
tutularaq, münaqişə tezliklə öz
həllini tapacaqdır.
Y a a p d e H o o p S x e f f e r: Cənab yeni seçilmiş Prezident, hər şeydən əvvəl, çox sağ olun ki, bu
gün bizim nümayəndə heyətini qəbul edirsiniz. Bizim regiona olan səfərimiz, həqiqətən, çox böyük əhəmiyyət
kəsb edir. Çünki bu regionda olan bir sıra problemlər çoxdan bəri öz həllini gözləyir.
Bu problemlər həm də bəşəri dəyərlər, insan haqları və qanunun aliliyi ilə bağlıdır.
Düşünürəm və ümid
edirəm ki, Sizin bu yaxınlarda Azərbaycan Prezidenti kimi fəaliyyətə başlamağınız bu problemlərin həllinə yeni
bir pəncərə açacaqdır. Bu, Dağlıq Qarabağ ətrafında danışıqların davam etdirilməsi üçün imkan pəncərəsi
olacaqdır. Bildiyiniz kimi, ATƏT bu məsələdə Sizə əlindən gələn yardımı etməyə həmişə hazırdır. Ümidvaram
ki, Minsk qrupunun həmsədrləri də bir sıra müzakirələr apardıqdan sonra ilin axırında regiona gələ bilər. Bu
qrup heç vaxt fəaliyyətini dondurmayıb və daim bu məsələ üzərində işləyir. Son nəticə isə neçə illərdir ki,
uzanır. O da məlumdur ki, bir çox insanlar bu son nəticəni gözləyərək əziyyət çəkməkdədirlər. Bu nəticə
Ermənistandan və Azərbaycandan asılı olacaqdır. Həmçinin ümidvar olduğumu bildirirəm ki, bu məsələnin həlli
regionda sabitliyin və təhlükəsizliyin daha da möhkəmlənməsinə səbəb olacaqdır. Sabitlik və təhlükəsizlik isə
region üçün çox vacibdir. Buna görə də Avropa Şurası, Avropa Birliyi və ATƏT kimi beynəlxalq təşkilatlar
buraya gəlməli və öz fəaliyyətlərini davam etdirməlidirlər.
Cənab
yeni seçilmiş Prezident, Sizə dediklərimi eynilə Ermənistanın prezidentinə də söyləmişəm. Elə
bilirəm ki, məsələnin həlli üçün imkanlar hələ də mövcuddur və gərək çalışaq ki, bu tunelin sonunda olan işıq
yanmaqda davam etsin və sönməsin.
Qonaqpərvərliyə görə Sizə bir daha minnətdarlığımı bildirmək istəyirəm və ümidvaram ki, tezliklə bu məsələ
öz həllini tapacaqdır.
İ l h a m Ə l i y e v: Çox sağ olun, cənab nazir, mən sizinlə tamamilə razıyam. Regionda sülhün, sabitliyin və
təhlükəsizliyin qorunması çox mühüm bir vəzifədir. Azərbaycan öz tərəfindən bu istiqamətdə işlər görür və hesab
edirəm ki, regionda sabitliyin qorunmasına öz dəyərli töhfələrini vermişdir.
Siz qeyd etdiyiniz kimi, bu münaqişədən çox insanlar əziyyət çəkir. Bildiyiniz kimi, münaqişə nəticəsində
Azərbaycanın torpaqlarının 20 faizi işğal olunmuşdur və nəticədə bir milyondan artıq vətəndaşımız qaçqın və
məcburi köçkün vəziyyətinə düşmüşdür. Əlbəttə, onların yaşayış şəraiti çox ağırdır və münaqişədən ən çox
əziyyət çəkən məhz onlardır.
Eyni zamanda, biz bilirik ki, bu münaqişə Ermənistana da çox böyük ziyan vurmuşdur.
Bu ölkənin də
iqtisadi inkişafı münaqişənin həlli ilə bağlıdır. Ona görə də Ermənistan tərəfi də münaqişənin tezliklə həllində
çox maraqlıdır. Hər iki tərəfdən xoş niyyət olarsa, ədalətli prinsiplər üzərində və beynəlxalq hüquq normaları
əsasında münaqişənin həlli mümkün olarsa, bu həm Azərbaycan, həm Ermənistan, həm də bütün region üçün
böyük bir inkişafa səbəb olacaqdır. ATƏT-in Minsk qrupu öz fəaliyyətini davam etdirir və biz bu qrupun
həmsədrlərini Azərbaycanda qəbul etməyə, onlarla danışıqlar aparmağa hazırıq. Ümidvarıq ki, onların yeni
təklifləri məhz beynəlxalq normaların bərqərar olunmasını təmin edəcək və münaqişənin həllinə nail
olmağımıza imkan yaradacaqdır.
161
Y a a p d e H o o p S x e f f e r: Cənab yeni seçilmiş Prezident! Mən istəyirəm sözlərimi ümid notları ilə
tamamlayım. Çünki biz həmişə ümidlə yaşayırıq. Prezident seçkiləri beynəlxalq
təşkilatlar tərəfindən, o
cümlədən mənim təmsil etdiyim ATƏT tərəfindən bəzi tənqidlə qarşılandı. Lakin buna baxmayaraq, biz
ümidvarıq və gözləyirik ki, Sizin liderliyiniz dövründə ölkənizdə tam razılıq olacaqdır. Əlbəttə ki, cinayət
törədənlər cəzalandırılmalıdır, eyni zamanda, hesab edirik ki, bəzən həbsxanalarda lazımsız saxlanılanlar da olur
və onlar azadlığa buraxılacaq, onların yanına hüquqşünasların getməsinə icazə veriləcəkdir. Bir daha demək
istəyirəm ki, Sizin liderliyiniz altında ölkədə tam razılıq və konsensus olacaqdır.
Mən qədim ənənələrə malik olan Hollandiyadanam. Bəlkə də buna görədir ki, Azərbaycandan daha çox şey
gözləyirəm. Deməliyəm ki, bu mənada Sizin ölkəniz müəyyən uğurlar əldə etmişdir.
Öncə Seçki Məcəlləsinin
uğurla hazırlanması haqqında bir neçə kəlmə xoş söz demək istəyirəm. Bu sənəd, həqiqətən, çox yüksək
səviyyədə hazırlanmışdır və ümid edirəm ki, bu məcəllənin müddəalarına gələcəkdə də əməl olunacaqdır.
Həmçinin ümidvar olduğumu bildirmək istəyirəm ki, Siz iqtidarla müxalifət arasında dialoq yaratmağa nail
olacaqsınız.
Mən isə bu gün Hollandiyaya qayıtmalıyam. Çünki orada məni parlamentdə gözləyirlər. Bu, demokratiyanın
ən çətin, lakin eyni zamanda, ən gözəl cəhətlərindən biridir ki, biz parlament qarşısında məsuliyyət daşıyırıq.
Bir daha ümidvar olduğumu bildirirəm ki, Sizin liderliyiniz altında Azərbaycan inkişaf etməkdə davam
edəcəkdir
və ölkənizdə mətbuat, əvvəllər olduğu kimi, yenə də azad fəaliyyət göstərəcəkdir. Siz region ölkələri
ilə yaxşı münasibətlərə nail olacaqsınız və eyni zamanda, Avropa Şurası və Avropanın digər beynəlxalq
təşkilatları ilə əlaqələriniz yeni səviyyəyə qalxacaqdır.
Cənab yeni seçilmiş Prezident, icazə verin, ümidvar olduğumu bildirim ki, bundan sonra da Azərbaycana
gəlmək və Sizinlə yenidən görüşmək imkanım olacaqdır. Onda biz bu gün toxuna bilmədiyimiz digər məsələləri
də müzakirə edəcəyik. Təəssüf ki, bu səfərim zamanı Sizin atanızla – prezident
Heydər Əliyevlə görüşə
bilmədim. Sizdən çox xahiş edirəm ki, mənim ən xoş arzularımı və salamlarımı ona yetirəsiniz.
İ l h a m Ə l i y e v: Hörmətli cənab nazir! Qeyd etmək istəyirəm ki, Azərbaycanda prezident seçkiləri
ədalətli və şəffaf şəkildə keçirilmişdir. Azərbaycan xalqı sərbəst və azad surətdə öz iradəsini ifadə etmişdir. Bəzi
qüsurlar olmuşdur və heç kəs onları inkar etmir. Bu təbiidir. Çünki Azərbaycan demokratiya yoluna yeni qədəm
qoymuş ölkədir. Əlbəttə, bu nöqsanların aradan qaldırılması istiqamətində ciddi iş aparılacaqdır. Ancaq eyni
zamanda, onu da deməliyəm ki, bu qüsurlar ümumi nəticəyə heç bir təsir etməmişdir. Deyə bilərəm ki, beş min
məntəqədən 3600-də protokollar bütün komissiya üzvləri, o cümlədən müxalifətin nümayəndələri tərəfindən
imzalanmışdır. Bununla yanaşı, mən razıyam ki, biz gərək Azərbaycanda fəaliyyət
göstərən bütün siyasi
qurumlarla dialoq aparaq. Seçki kampaniyası ərzində mən bir neçə dəfə müxalifətə dialoq təklif etmişdim.
Təəssüf edirəm ki, onlar məni eşitmədilər. Əksinə, onlar qeyri-qanuni hərəkətlər edərək Azərbaycanda sabitliyin
pozulması istiqamətində addımlar atmışlar. Əlbəttə, bütün bu xoşagəlməz hadisələrin qarşısı qanun çərçivəsində
alınmışdır. Artıq bu hadisələrdə fəal iştirak etməyən şəxslərin böyük bir hissəsi azadlığa buraxılır və bu proses
davam edəcəkdir. Əmin ola bilərsiniz ki, biz bu məsələyə yalnız hüquq prizmasından baxacağıq və burada heç
bir siyasi aspektdən söhbət gedə bilməz.
Azərbaycanda demokratiya inkişaf edir, biz demokratiya prinsiplərinə sadiqik. Biz də Azərbaycanın Avropa
Birliyi ilə əməkdaşlığının gələcəyinə böyük ümidlərlə baxırıq.
Sizin salamlarınızı hörmətli cənab prezident Heydər Əliyevə çatdıracağam. Mən də təəssüf edirəm ki, Siz
onunla görüşə bilmədiniz və ümidvar olduğumu bildirmək istəyirəm ki, növbəti dəfə Azərbaycana gələndə onunla
görüşə biləcəksiniz.