Meierijse Schoutsrekeningen
Yüklə 405 Kb.
|
MICROFICHE 7078.7.1.1 ende toebehoerende SYMOENS VAN GHEELE zijnde die Arntken ende Henricken warden seggende: “Laet ons die ruyssche die wy in dat moelenwaater hoeren opheffen wy soelen daer wael wat vischs ynne veynden” ende alsoe hebben die selve Arntken ende Henneken/Henricken in presencien van den voirg. Pauwelse die selve ruyssche opgehaven soe als die hen die wech ontbloten is geweest – dair na zyn die selve Arntken ende Henneken gegaen in den voirs. moelenhuyse ende aldaer nemende eene karse seggende die selve Arntken: “Laedt ons desen moelen anesteken [vgl. aensteken] hij heeft my genouch gecost”. Niettemin die voirs. Pauwels dede soe vele als dat de voirs. Arntken es nyet en dede….wat de voirs. Pauwels conste gedoem om den voirs. Arntken ende Henneken te gecrigene, hebben zy nochtan daerenboven aldaer genomen des voirs. molnerengetouwe te weten een haex, een breet bijl ende sloegen ontwe – desgelics hebben zy oic van daer gedragen een spykelboer [ spikelboor], een poocknette [= visnet] ene dagge, een paer hantschoen en eene struysveere ende die voirg. Arnt nam al heymelic des voirs. molners hane ende wronck hem den hals af ende werpen doen int water – ende hoe wael die voirs. Pauwels Peter Ghybensone int geschieden van des voirs. is present is gewest en heeft men nochtan nyet connen bevynden anders dan dat hij dat gheerne hadde beledt, waer om hem die voirg. scouthet gemerct dat hij dairaen nyet en was handadich by advise ende raide van den heren van der cameren van den rekeningen te MECHELEN heeft laten componeren om die somme van vijftich rijns gulden alst blyct by zekeren memorien ende appointemente hier overgegeven des afgetogen den 10de penninck voer des scouthet van Maselant bedienen die welcke dair af bovengenoemde scouthet van den Bossche adverteerde ende den voirg. Pauwelse tot composicien hielp brengen
exployten bynnen PEDELANT van DANEELE NEYENS die welke alsoe hy ende zynen suster hadden vergadert zekere sporye hem toebehoerende ende alsoe beyde comende in den dorpe van DOREN [vgl. Deurne] in een bierhuys aldair te drinckene ende dair by hen gecomen JAN VAN DOREN ende PETER VAN DER BEECK mit zynre huysvrouwen ende meer andere goede mannen – ende alsoe die voirs. Daneel ende Peeter tanderen tyden onderlinge twist gehadt hadden, warde die selve Peeter den voirg. Daneele by hem te comen sittende ende alsoe vragende inne ruden woirden: “Ghy mensche weder soelen my te drincken gheven” of en soeld die voirg. Daneel nemende die kanne ende ghevende den selven Peteren ende zynre huysvrouwen te drincken, is gebuert dat soe wanneer de selve Daneel was opgestaen ende zyne gelach betaelt, dat de selve Peeter by inghevenen van zynre huysvrouwen geslagen ende gesteken heeft na den selven Daneele ende wat manieren die selve Daneel sochte om alsoe te mogen comen ut den handen des voirs. Peeters, heeft nochtan van den selven Peeteren ende zynre voirs. huysvrouwen ontfane meniger slach ende sunderlinge soe is die selve Daneel gequedst geweest ende twee wonden ontfaen aleer hy hem ennichsins heeft te weere gestelt – ende dair na soe heeft die selve Daneel altijt nochtans al vliedende utgetogen zyn mes mit den welcken hy den voirg. Peeteren heeft geraect te stekene enen steeck dair af hy corts dair na is aflivich geworden, van welcken ongevalle na dien dat die selve Daneel partien gebetert ende gesoent heeft gehadt, oic mede by informacie dat opt stuc genomen bevonden is toecomen wesende by sculden van den voirs. Peeteren
078.7.1.3 heeft hem die voirs. scouthet dair af laten componeren by advise ende raide etc. etc. om 18 rijnsgulden
om 31 rijnsgulden – de 10de penning voor de schout van Peelland exployten bynnen KEMPELANT van DIEDERICKE GERIT SWAERSSONE, CLAZE JAN QUANSSONE ende LAUREINSE JAN SCHOOFSSONE die welcke omtrent kerstmis lxxv comen wesende in den dorpe van HOGELOON onder den scouthet van Kempelant, zyn die selve Diederic ende Claes na woorde ende wederwoorde opgelopen geweest van JANNE BOYENS ende JANNE JANSSONE VAN HETSRODE, soe als dat die voirg. Jan Boyens in dier hanteringen gequedst wart ende van dier quedsueren gestorven – ende al eest soe dat die voirg. Laureyns dair by ende ane nyet en is geweest dair die voirs. Jan alsoe gequedst wart, zyn die selve Diederic ende Claes terstont nadien dat den voirs. twist geschiet was gecomen by den selven Laureynse ende is alsoe die selve Laureyns mit hen wech gegaen, waerom hy na de costume van den lande geacht is in den voirs. dootslage alsoe dyep als die voirs. Diederic ende Claes – ende hebben alsoe die voirg. Diederic Claes ende Laureins de partien van den selven Janne Boyens gebeetert ende gesoent – ende want na volcomen informacie genomen op die gelegentheit ende staet van den persone ende goeden des voirg. Diederics Claes ende Laureyns zunderlinge op die toecompste van den voirs. ongevalle den voirs. scouthet gebleken is geweest by affirmacien soe van scepenen van den banck van OERLE als van den scepenen van den banck van EERSSEL haer overgegeven ende anderssins na hoeren h…ken van voelen [= vele] anderen diversen personen dat die voirs. iii personen zeer onnoselyc int voirs. ongeval gecomen zyn, soe heeft die selve scouthet den voirs. iii personen mids dat zy zelve gheene vrienden en hadden die die saken om dair af tot composicien te mogen comen hadde willen vervolgen om beeters wille ende om mynen genedigen heren meest proffijt, want hy anders noch souden hebben ….ut den lande, laten componeren tsamen om die somme van 27 rijnsgulden 078.7.1.5 ontvangsten uit vorsterijen; andere ontvangsten van ‘geleyde te gheven’etc. etc. 078.7.1.6 uit ‘brantscatteren’etc. etc. – geen nieuwe informatie! 078.7.1.7 som van alle ontvangsten lx l. x s. gr. 078.7.1.8 UITGAVEN
salaris van schout en klerk resp. xx l. iii s. iiii d. gr. en xx s. gr. justiciegelden: gericht mitten sweerde enen geheiten JAN DE MOLNERE van wiens misdaet hier boven in den ontfange mencie wort gemaect; som van alle uitgaven xxi l. xiii s. iiii d. gr. aldus is die voirs. scouthet hier sculdich xxxviii l. xvi s. viii d. gr. is ontfanc gemaict van dese rekening HENRIC CELEN van den rentmeesterscape van den Bossche eyndende ultima septembris 1476 folio lxviii alsoe hier quite – gesloten 24 december 1476 078.7.1.10 NIEUWE REKENING VAN PETER VAN VERTAING ridder over de periode Sint Jan 1476 tot en met kerstmis 1476 van GHIJSKEN HERMANS LOEKEMANS SONE schoenmeker wonachtich in der stad van sHertogenbossche die welcke op ten heyligen Sint Jansdach anno lxxv [1475] sittende mit noch andere gesellen en drincken in der voirs. stad van den Bossche is in den voirs. geselscape gecomen een geheten in der wandelingen FRIESKEN geboeren van uut VRIESLANT die welcke Friesken na dat hy wat gedroncken hadde ende licht van hoode werddende heeft den voirs. Ghijsken veele quader woerden gegeven, nyettemyn alsoe hem de voirs. Ghijsken die een zeer jonc knecht is van den voirs. Friesken die een zeer strac ende rude geselle was ontsach heeft by tusschen sprekene van den voirs. anderen gesellen die in den selve geselscape waeren, soe voele gedaen als dat zy alle van daer zyn geweest sonder yemande te wesen mesdaen ende van daer soe gescheyden wesende ende die voirs. Ghijsken gaende tot zynen huyse alleene als nyet denckende dat die 078.7.1.11 voirs. Frisken yet meer hadde willen mesdoen, is die selve Friesken gecomen ende heeft den voirg. Ghijsken gesteken twee wonden, mit welcken wonden hy hem pijnende te loepende is is daer na noch van den selven Friesken achterhaelt geweest ende die voirs. Ghijsken die hem nyet en conste ontcomen, mer hem van noode wesende ter weer te stellen gelyc als gebleken is by informacien daer op genomen wesende, heeft hem ter weer gestelt ende den selven Friesken geraect te gevenen ene wonde van der welcke bynnen enigen tyden daer na hy van lyve ter doot comen is, den selven Ghijsken na dat hy partien heeft gesoent ende genouch gedaen heeft en die voirs. scouthet by advyse van der heeren van der cameren van der rekeningen alsoe noch wesende in der stad van MECHELEN ende na behoirlicke informacie opt voirs. ongeval genomen hebbende den selven Ghijsken laten componeren alst blyct by zekere memorien advise ende appointemente hier overgegeven om die somme van 15 rijnsgulden van JACOPPE DE HAEST sone wijlen GERITS DE HAEST geboren van BEERSE die welcke heeft sitten drincken bynnen der stad van sHertogenbossche met meer anderen in welcken geselscape comen is een geheiten JAN HOUTMAN die een kint hadde gehadt by des voirs. Jacops nichte, die welcke Jacop ende Jan Houtman na dat zy wat woerden hadden gehadt sloech die voirs. Jan den voirg. Jacoppe soe dat hy bloedde, dwelck alsoe by tusschen gaende van den anderen die daer waren wart bescudt dat dair aff gheen hynder meer en quam – ende dat aldus siende een geheiten JAN FRANCKEN wesende van den dorpe van Beerse gelyc die voirs. Jacop, heeft den voirs. Janne Houtman gevraight waerom dat hy dat alsoe dede zynen gebuere, die welcke antwordende ende hem daer na soe tierende dat van noode was hem uut den huyse te dringen ende nadien dat de voirs. Jacop ende Jan Francken ut den huyse daer dit gebuerde gescheyden zyn geweest om elc tot zynen huyse te ghane, quam die voirs. Jan Houtman die hem heymelic hielt onder den Craen ten Bossche daer hy wyste dat die voirs. Jan Francken lyden moeste om thuyswerts te gane ende die selve Jan Francken daer alsoe voorby lydende is gecomen den voirs. Jan Houtman ende 078.7.1.12 heeft den selven Janne Francken oploop gedaen ende gequedst ende meer gedaen soude hebben en hadde hy zyn lyf nyet besculdt gehadt in welcke bescuddinge die voirs. Jan Houtman gecreech enen steeck van den welcke hy corts dair na van lyve ter doot comen is, van welcken fait die voirg. Jacop de Haest nyet en heeft te doene dan alleene dat die ierste ….om zynen wille …in der manieren hier boven – ende want hy partien heeft gesoent in alsoe verre als hy daer inne mochte wesen gehouden ende hy insgelycs begheert heeft om alle ongenuechten te stouwenen tot composicien ontfaen te worden, soe heeft die voirs. scouthet na dien nochtan die hy hem volcomelyc heeft doen informeren op die gelegentheyt van den toecompst, den selven laten componeren by advise etc. etc. om 15 rijnsgulden van MEEUSKEN ROBBRECHTS die welcke comen gaende zyn anderomtrent den dorpe van BAERDWYC ter plaetssen aldair zyn vader ende meer andere goede luden hadden gaende zekeren runderen in der weyden, soe dat die voirs. Meeusken geselle waerden seggende soe die selve Meeusken namaels heeft gesegt: “Meeusken wat soudi dair aff seggen oft wy van desen runderen ewech leydden het neect den avont, wy souden die wael nu ewech dryven ende 078.7.2.1 die morgen ergens vercopen”, dair op die selve Meeusken soe hy seght antworde, dat hy dat nyet wael en soude dorven aventueren mer conset hy gekennen zyns vaders rynderen hy woude wael aventueren die ewech te helpen leyden – ende alsoe samentlyc gaende in der weyden off campe aldair die voirs. rynderen ghinghen weyden ende hebben aldair genomen twee rynderen waert wesende beyde omtrent vi peeters, niettemin die personen die de voirs. rynderen toebehoirden hebben die gevolght ende wedergecrigen ende die vrienden van den selven Meeusken zyn gecomen by den voirs. scouthet om van desen te moegen geraken tot guedelycke composicien, die welcke scouthet hen antwordende dat het in hem nyet en was om dat te doene, maer dat zy ghingen by den heeren van den cameren van den rekeningen ende dat zy vertasten souden off zy souden connen gecomen tot composien, die welcke partien na dat zy hen dair op beraden hebben gehadt, zyn wederomme gecomen by den selven scouthet ende hem biddende om van dien te mogen hebben verdrach hem oic adverterende by alsoe hy den voirs. Meeusken nyet en woude ontfangen tot composicien zy dat souden laten berusten ende den selven Meeusken doen houden uut zynen oegen tot aen der tyd toe dat onse PRINCESSE soude dlant ontfangen, als dan zy hoopten in desen gracie te verwerven – die voirs. scouthet dit aenhorende ende na dat hy hem oic hier op beraden heeft gehadt, heeft met den voirs. personen van Beers laten spreken om te weten in den gevalle hijse hoeren soude willen wat zy mynen genedigen heer souden willen te goede doen – ende met dier manieren na dat zy te meer stonden dair op vergadert ende gesproken hebben gehadt ende na veele heeschen ende diverse presentacien, soe heeft die voirs. scouthet aensiende die gelegentheyt van den voirs. Meeusken ende sunderlinge want hy hem beduchtende voer der voirs. incompste ende dat in dien gevalle myn genedigen heer daer aff nyet en soude hebben gedient geweest, oic mede want die voirs. runderen wederomme waeren gerestitueert geweest, den selven laten componeren om die somme van xxix [29] rijnsgulden 078.7.2.2 andere ontvangsten uit breuken als huisstotingen, slaan van de schout, schepenen tegenspreken en ontamelijke zaken 078.7.2.3 van JANNE VAN ARCKEL onlangs onderscouthet van tsHertogenbossche die welcke van der gemeynten der selver stad omtrent den halfvasten in den jaer xiiii c lxxvi [1476] gevangen ende opter STEENPOIRTEN geleght wart om zekere redenen wille die zy hem tyende waeren daer aff dat zy aensprake in den rechte op hem gedaen hadden, als dat hy gebroect soude hebben tegen den hoocheyt ende heerlicheyt onsen genedigen JOUFFROUWEN DER HERTOGINNEN zyn lyf ende goet van welcken aensprake die voirg. Jan van Arckel nyet gemoeyde noch getroest en was recht dair aff te verwachten – ende begheerde gracie ende genade voer strenge recht ende leghde zyn hoeft in den schoet van den drie leden der selver stad die welcke hem in gracien ende genaden ontfingen, de welcke drie leden van der selver stad van tsHertogenbossche hebben den selve Janne alsoe gecondempneert in die somme van sesshondert rijnsgulden ten prouffijte der voirg. stad ende dair toe hy rijnsgulden lijfrenten die hy op die voirs. stad geldende hadde nyet meeer te boeren ende die quit te zyne, daer aff den brief van der selven renten geschiet waert ende dat hy den heer ter beternissen soude gheven tweeendertich bourgoins gulden met meer clauselen ende articulen in der terminacien des voirs. Jans begrepen, alsoe hier die voirs. xxxii bourgoins gulden [ waarde: 10 pond en 16 grote schellingen] 078.7.2.4 hier volgt de lijst van breuken als vuistslagen, messen trekken etc. etc. 078.7.2.5 exployten onder den scouthetambachte van MASELANT van BOLLEN REMBOUTSSONE ingeseten van den dorpe van BERCHEN gelegen onder scouthetscap van Maselant die welcke des is geleden omtrent iii jaeren tusschen zekeren partien in den voirs. dorpe van Berchen enen oploop van gevecht geresen is geweest, in welcken gevechte onder dander die COSTEREN van Berchen cruyn hebbende gequedst wart, van welcker quetsueren die voirs. Bollen befaemt waert dat gedaen te hebben, ut welcker diffaniacien [= een vorm van achterklap] die selve Bollen ten vervolge des procureurs fiscaels myns heren van LUDIC by den VICE CUREYT der CURIEN van OS gemaent wart op zekere groete penen bynnen zekeren tyden te LOEVEN te compareren ende mynen HEER van LUDICK daer aff beteringe te doene, na welcker maningen ende der geestelycker executien alsoe gedaen wesende die voirs. Bollen is comen met enen boge als een weegeveerdich man om te gaen synre veerden tot zekeren plaetsen buyten den dorpe van Berchen voers. dair by te doene mochte hebben – aldair hem in ontmoete quam die voirs. VICECUREYT van OS ende met hem die VICECUREYT van BERCHEN die welcke die voirs. Bollen aensiende ende wael by dranck wesende decte op die executie die de voirs. vicecureyt in den voirs. manieren op hem gedaen hadde heeft zynen boge gespannen uut hittigen bloede ende heeft alsoe na die voirs. vicecureyt geschoten, mer emmers nyet geraect, van welcken oploepe die voirs. vicecureyt negheene beteringe en hebben begheert te hebben gemerct de gelegentheyt van der toecompst ende dan dat die aldus all geschiet is geweest ende die voirs. Bollen wetende dat die voirs. scouthet op hem op te diverse plaetsen heeft doen wachten heeft byden selven scouthet gesonden enige van zynen vrienden, begherende gracie ende genade op dat hy wederomme mochte comen by zynen wyve ende kynderen ende zyn broot winnen om zyn voirs. wyf ende kynderkens te onderhouden, die voirs. scouthet antwerdende dat
het in hem nyet en was om van desen hem tot composicien tontfaene sonder tconsent van der cameren van den rekeningen, daer op dat die voirs. Bollens vriende andwerden alsoe verre hem geliefde van desen den voirs. Bollen te ontfaene te guedelycker composicien soe souden zy daer toe geerne verstaen – mer als van vorderen te vervolgen en was hen dat nyet wel doenlic gemerct die turbulacie als der in den lande van Brabant wesende die voirs. scouthet hem beduchtende oft zy crigen gracie van den PRINCESSEN hadden moegen verwerven ende aengesien die gelegentheyt van den voirs. mesuse desgelics die aermheyt van den voirs. Bollen gelast wesende met wyve ende veele cleynder kynderen gheen goet op desen tytelycker weerelt hebbende dan hy dagelics mit grooten swaeren arbeydene als met grane dorsschene ende diergelycke wynnen moege oic mede dat die voirs. zyn wyf ende kynderkens in zynre absentie van armoeden wael geschapen hadden moegen wesen jammerlycke armoede te hebben moeten lyden ende sunderlinge want hy nyemande en hadde gequedst noch geraect ende dat hem dat de voirs. vicecureyten hadden om godswille vergheven, soe heeften oic die voirs. scouthet van desen laeten componeren om beters wille om die somme van x rijnsgulden van GERIDE JANSSONE VAN BERLICHEM die mids zynen mesusen byden voers. scouthet aengetast ende gevangen is geweest ende in zynre examinatien ende pyningen geleden dat hy sittende en drincken met COPPENE GHYBEN in eenre herbergen tot BERLICHEM hem heeft gehiesche iii stuvers die hy seyde dat die selve Coppen hem sculdich soude zyn geweest des die selve Coppen ontkende, want hy in hem nyet gehouden en was, waer om die voirs. Gherit comende opter straten met enen boge ende vyndende in zynen wege eene van desselven Coppens toe hieft die voirs. int dlyf geschoten daer affe die selve is geweest gestorven, - daer nae is die sleve Gherit gegaen cloppen voer des voirs. Coppens doere ende ende gesecht: “Coppen oem ghy hebt my ontseght iii stuvers 078.7.2.7 [nogal wat donkere vlekken in de tekst] te geven, mer ic hebbe u meer leew (?) gedaen”. Item heeft die selve Gerit oic geweest tot Meester JANNES VAN BERLICHEM aldair hy sat over tafele seggende: “Meester Jan ic hebbe hoeren seggen dat ghy soude hebben geseght dat ic lynen laken soude hebben genomen ende …den selven den voirs. meesteren …slaende met … koye eene wonde ende daer voer hem …veelrehande quader woorden. Item heeft HENRICKEN DEN JONKER genomen zekere lynen laken ende dat recht ende van meer ander diverse quade faiten, daer die selve Gerit aff befaemt was, overmids welcken fayten die sleve Gerit die een geloepenen knecht was geen goet in den weerelt hebbende is gericht geweest mit den sweerde exployten bynnen den scouthetambacht van PEDELANT van ARNDE COLEN FRANCKEN SONE, YMBRECHT PEETRS, ROBBRECHT WILLEMS SONE ende HEYNE WILLEMS SONE die welcke des is geleden den tijt van omtrent ii jaeren samentlyc zyn comen vaerende mit hueren peerden ende wagenen zeer swaer geladen wesende met waren tusschen SCHINDEL ende die DUNGHEN onder ….der scouthetscape van Pedelant aldaer hen quam …enen ongeladenen wagen ….eenen geheyten YWAN die welcke 078.7.2.8 voer alzoe met zynen ydelen wagen in des voirs. Imbrechts wagenen ende daerenboven om dieswille dat zynen wagen wat geraecte te breken toech zyn mes ende sloech na den voirs. Imbrecht ende alsoe continueerde zyn steken toech den voirs. Arnt Colen een pasmesken om den voirs. Imbrecht mede te helpen bescudden, dair mede hy den voirs. Ywanne geraecte te quedsene met den rugge van den voirs. pasmesse in zyn hooft dat die selve Ywan dair na mids quaden toesiene alsoe hy dair mede ghinck wercken zeer langen tyt sonder op die voirs. quetsueren te achten van lyve ter doot comen is van welcken ongevalle na dat zy partien gebeetert ende genouch hebben gedaen, soe heeftse die voirs. scouthet aensiende hueren alder grooter armoeden want zy anders oick nyet en hebben dan zy comslijfs (?) met torven te vueren torven te maken ende diergelycke neringe wynnen mogen, oic mede want het hem gebleken heeft van personen die de voirs. onlede van bijs genouch opten plaitsen aldairt geschiede aensagen dat van noode was dat hem die selve Arnde Colen te weer stellen oft die voirs. Ymbrecht zyn medegeselle soude daer geschapen hebben geweest selve gebleven te hebben desgelics oic want der waghenen recht is soe wie met enen ongeladen wagen comende vaeren tegen enige andere geladenen wagenen in den wagen van den voirs. Ymbrecht als voirs. is den selven Arnde om beters wille Ymbrecht Robbrechte ende Heynen laten composeren, want ten tyde als zy dese composicie maecten was in den tyd dat die cameren van den rekeningen te MECHELEN schieden hen beduchtende die voirs. scouthet dat men naer dien zeer qualic soude hebben connen gecomen tot expedicien ende zunderlinge want men in den weerelt nyet meer en soude hebben connen affgenomen om de somme van vierthien rijns gulden van REYNEREN TEMPLAER van dat hy van lyve ter doot bracht heeft [niets ingevuld] den selven by advise van den heren van den cameren van der rekeningen laten componeren om die somme van xiiii rijnsgulden 078.7.2.9 van HENRICK MEGEVELS geheyten SPAPEN die welcke mids zynre quader famen by den voirs. scouthet aengetast ende gevangen is geweest ende in der examinacien gekent ende geleden dat by zynen raide een zyn meisen geheyten AELKEN [achternaam niet ingevuld] genomen heeft haeren oem geheyten HENRIC VAN BOETEN die somme van viii rijns gulden dwelc die selve Henric verteerde utgenomen omtrent een croone daer om dat tselve zyn meysken cochte eenen rock voer haer dragen. Item heeft noch geleden genomen te hebben tot ANTWERPEN ii rijnsgulden. Item heeft oic verclaert dat hy een zyn andere meyssen sloech soe dat zy daer om van lyve ter doot comen is tot DENDERMONDE in den GASTHUYSE aldair. Item heeft oic geleden dat hij te PULERBOSCH genomen heeft eene swertte huycke met witte gevoedert. Item dat hij oic corts dair na met PEETEREN DEN CUYPER heeft hulpen nemen een peert tot HOIGSTRATEN dwelck zy vercochten tot DIEST om iiii postulatus gulden dwelc is geleden den tyt van omtrent ix jaeren ende heeft noch insgelycs geleden dat hy genomen heeft i nden stad van den Bossche ii slaplakene ii stucken ryntvleesch ende eene handweele overmids welcken die excessen die voirs. henric geexecuteert is geweest mit den zweerde ende want hy negeene handen goeden achter gelaten en heeft alsoe dat een geloepen geselle was van ADRIANE WYTKENS, WILLEM WYTKENS ende WILLEM DE COCK die welcke hebben sitten drincken te HILWAERENBEKE met meer anderen soe dat die voirs. Willem ende een geheyten HUBEN SCHELLEKENS die beyde na hoeren seggene zeer wael by drancke waeren ende doen den anderen veele quader woerden 078.7.2.10 gevende hieft die selve Huyben na den voirs. Willem geslagen die welck Willem desgelics slaende na den voirs. Huyben heeft gequedtst in zyn hooft dat die selve Huyben dair na van lyve ter doot comen is ende want partien gesoent zijn ende die voirs. scouthet na behoirlicke informacie genomen bevonden die voirs. persoenen wesende zeer arm schamele luden zeer belast met wyne ende kynderen ende anders geen goet hebbende dan zy dagelycx met armoede wynnen moegen – ende sunderlinge aensiende die disposicie van den tyde ende dat zy met onsen PRINCESSEN zouden hebben innegecomen by alsoe hy tyts met hen nyet en hadde guedelyc willen overcomen, soe heeft hy de voirs. drie persoenen laeten pointen om beeters wille om die somme van xxv rijnsgulden van xx stuvers [te verdelen over de hertog en de Heer van Merode] van DIEDERICKEN NEELLEN sone natuerlyc JANS NEELLEN geboren van ESSCHE onder der vridicheyt ende banck van OISTERWIJCK die welcke dair by ende ane is geweest daer de voirs. Jan zyn vader ende wijlen JAN BERCKELMANS woerde hebben gehadt ende soe emmers dat die selve wijlen Jan Berckelmans overmids hrooten smeedigen woerden ende anderssins die zy undelinge hadden enen steec gecreech ende van den selven van lyve ter doot gecomen, welck fait die selve Jan Nellens aen ende op hem geheelyc ende all nemende ende na dien dat hy ende die voirs. Diederic partien gesoent ende gebetert hebben gehadt hieft die selve Jan Nellens van den voirs. ongevalle remissie verworven aen mynen genedigen heer ende als van den selven Diedericke mids dien dat hy partien gesoent heeft als voirs. is in alsoe verre het hem aencleven mach, soe heeft die selve scouthet hem laten componeren by advyse van den heren van den cameren hier overgegeven om die somme van x rijns gulden van JANNE VAN HAREN die welcke van lyve ter doot brachte enen geheyten [niets ingevuld] den selven dair af laten componeren na dat hy partien gesoent heeft om die somme van xl rijnsgulden ende dat by advise van den heren van den cameren van den rekeningen 078.7.2.11 ontvangsten uit vorsterijen en uit andere zaken zoals ‘geleye gheven’etc. etc. – geen wijzigingen 078.7.2.12 vervolg van genoemde zaken zoals ‘brantscatteren’etc. etc. – geen wijzigingen; bijdrage aan HEER ADOLF VAN CLEVE som van alle ontvangsten lvii l. iii s. vi d. gr.
UITGAVEN
salaris van schout en klerk resp. xix l. i s. ii d. gr. en iii l. gr. kosten van justicie: gericht mitten sweerde GIERDE JANS SOENE ende HENRICK MEGEVELS van wiens mesdade mencie worde gemaict in den ontfange hier voer 078.7.3.2 andere uitgaven zoals LENEN van geld nl. een som geld van 250 pond van 40 vlaamse groten per pond; som van alle uitgaven xxxv l. xi s. ii d. gr. – aldus is die voirs. scouthet hier sculdich xxi l. xii s. iiii d. gr. - van desen reste is ontfanck gemaict byder ierster rekening JANS VAN OLMEN van den ontfange generael van Brabant van den jaren eyndende ultima septembris lxxviii folio xxxi – nyettemin is hy sculdich quitancie dair op dienende – die scouthet heeft geaffirmeert d’inhout deser rekening alsoe dat navolgende d’instructie behoert – gehoort ende gesloten in den cameren van den rekeningen te BRUESSEL 12 martij anno lxxvii
donker verfilmde pagina met vermoedelijk allerlei composiciebedragen van veroordeelden t.b.v. HENRIC DICBIER hoogschout van ‘sBosch – moeilijk leesbaar 078.7.3.6 NIEUWE REKENING van HEER PETER VAN VERTAING Heer van Heeswijk, Gestel, Asten en Dinther over de periode Kerstmis 1477 tot en met Sint Jan 1478.
van DIEDERICK JANSSONE die welcke, des is geleden den tyd van omtrent vi jaeren hebbende geweest eeten ende drincken bynnen der stad van den Bossche mit zynre huysvrouwen ende alsoe op wege tuyswerts te gaen ende lydende voirby eenre lakeniere [dubieus] in der straten geheiten ARNT BERWOUTS STRATE is geweest na geroepen om te comen drincken van ennigen gesellen aldair wesende ende meynende te drincken ut enen gelaese dat hem aldair was gepresenteert heeft tselve glas laten vallen ut zynre hande ende anderwerf drinckende ut eenen potte is in denselven geselscape een geweest geheiten DIEDERIC HENRICS SONE die welcke alsoe hy wael by drancke was is op gestaen van zynre tafelen ende den voirs. Diedrick Janssone gequedst te veele staden mit eenre daggen, soe dat na informacie die opt selve stuc genomen is geweest hem van noode was ter weer te stellen ende alsoe den voirs. Diedricke Henricssone gequedst als dat hy corts dair na dair af is gewest gestorven – ende want die voirs. Diedrick Janssone partien gesoent ende gebetert heeft gehadt ende men bevonden heeft tvoirs. fayt wesende toecomen by sculdich ende …..van den 078.7.3.9 voirs. Diedricke Henrics sone oic mede dat de selve Diedric Janssone stont anderssins tot goeden name ende famen, soe heeft die voirs. scouthet dair af laten componeren by advyse etc. etc. als blyct by zekeren memorien acten appointemente ende informacien hier tsamen overgegeven om die somme van xviii gulden van x stuvers van HEYNE REGGER die welcke des es geleden den tyd van omtrent ii jaeren geraecte enen man diens name die voirs. scouthet nyet en weet te noemen te quedsene mer soe dat den selven man dair af van lyve ter doot comen es, waer om die selve Heyne hem heeft altyt zedert geabsenteert ende buten lants gehouden alsoe dat de scouthet den selven nergens en heeft weten te crigene niettemin hy heeft vernomen dat de selve Heyne hadde liggende een cleyn stucxken lants in der prochien van SCHYNDEL dwelc die selve scouthet in handen genomen heeft ende dat van myns voirs. genedigen heer wegen vercocht om thien rijns gulden van HERMANNE JANSSONE die welcke heeft van lyve ter doot bracht enen geheiten quade REYNEKEN wair om hem de voirs. scouthet aengeveert heeft ende in der examinacien bevonden dat hy bovendien noch genomen hadde tot GRAVE ten huyse die DERICS DE KEYSER veelrehande diversche partien van huysrade als van slapelakenen ende diergelycke desgelycs heeft noch geleden 078.7.3.10 in der stad van den Bossche te hebben gestolen veele ende diversche partien van huysrade als van slapelakenen hemden huycken ende diergelycke begrepen in eenre cedullen hier overgegeven, wair om ende overmits de voirs. Herman de partien van den voirs. dooden nyet gesoent noch gebetert en hadde, die voirs. scouthet hem heeft doen executeren midden [lees: mitten] sweerde dair om ende want een arm schamel geselle was geen goet hebbende andere breuken als vrede breken, huisstotingen etc. 078.7.3.11 vervolg van de andere breuken slaan van de schout, tegenspreken van schepenen
vervolg met: ontamelijke zaken en voorts volgt de lijst van vuistslagen, messen trekken etc. 078.7.4.1 exployten MASELANT van JANNE REYNERS van LYTH die welcke hadde be…cht tot Lyth voirscreven PEETEREN SNYDERS een stuc ….ende hoe wael die voirs. Peeter den selven Janne dair af volcomelyc genouch gedaen hadde, soe dwanck hy nochtans den voirs. Janne ende hielt hem in dien dat hy tselve erme nyet en mochte noch en conste gebruyken, overmids den welcken ende meer andere excessen die voirs. scouthet den selven Janne heeft doen richten mit den sweerde
exployten PEDELANT van WILLEM CLUYTEN die welke befaemt is geweest dat hy tot DOEREN een panser ontvremdt soude hebben mer wants die voirs. scouthet nyet en conste overtugen ende dat hy stont te goeder famen anderssins, soe heeften die voirs. scouthet na dien dat hy hem hadde doen besueken mit woorden ende aen hem negenssins en conste bevynden, dat hy tselve panser ontvremdt soude hebben gehadt, dair af laten componeren om die somme van x rijns gulden
exployten KEMPELANT van JACOPPE ELEN ende SIMOEN ELENSSONE geneven die welke na dat zy hadden sitten drincken met ARNDE GERIT DIRCSSONE tot BEERSE by OIRSCHOT mit meer anderen warden onderlinge worden hebbende om des gelaeghs wille dair af nochtans den pays was gemaict aleer zy van dair scheiden – niettemin die voirs. Arnt is opgestaen in stollen moede ende gegaen hem bergen onder eenen wal aldair hy wyste dat de voirs. Jacop voorby moste lyden om thuys te comenen ende die selve Jacop aldair alleene lydende, want de voirs. Simoen was oic gegaen slapen al eenen anderen wech, is de voirs. Arnt van dair hy lach geborgen opgestaen ende den selven Jacoppe geslagen met eenen groten stocke soe lange ende soe veele als dat den selven stoc brack, die voirs. Jacop die hem te weer stelde heeft den selven Arnt gequedst ende van der selven quedtsueren van lyve ter doot comen van welken ongevalle na dat de voirs. Jacop ende Simoen partien genouch hebben gedaen heeft hem die selve scouthet na behoirlycke informacie op tvoirs. fayt genomen laten componeren by advyse van den heren van den cameren van den rekeningen te BRUESSEL alst blyct by zekeren memorien ende appointe[mente] hier overgegeven om die somme van dertich rijns gulden
LIJSKENE GROENEN eenen ketel enen coperen po[o]t ende wat vlas, mer want de voirs. Lijsken de voirs. partien wederomme hadde ende zy over hem nyet clagen en woude zonderlinge overmits dat de voirs. Jan anderssins te goeder famen stont, soe heeften de voirs. scouthet laten componeren om die somme van x rijns gulden van JANNE CUELEN die welke comende gaende mit YDEKEN PETER PETIS dochter tusschen VESSSEM ende LOON coutde der voirs. Ydeken toe maniere makende of hy geerne zynen wille van hair gecregen hadde ende faytelyc den doec van haeren hoofde treckende sonder haer anderssins yet te hebben mesdaen, dwelc comen wesende ter kennissen van den voirs. scouthet heeft den selven Janne doen aentasten ende voorts gesonden by der voirs. Ydeken om van haer te weten of hy haer yet mesdaen mochte hebben, die welke bekennende dat haer nyet messchiet en ware geweest dan dat de voirs. Jan haeren doec van haeren hoofde hadde getogen, dair over zy oick ghene wracke en begeerde, nyettemin dat die voirs. scouthet hem optygende dat hy der voirs. Ydeken hadde meshandelt ende dat hy was in wille ende begeerde der selver te schoffieren ende soe hem met worden aengaen als dat hy begeerde van dyen mesuse te componeren ende heeften alsoe die voirs. scouthet laten componeren om die somme van xxv rijns gulden 078.7.4.5 van JANNE COLEN diens huysvrouwe was bevonden in eenen borrenputte doot ende hadde die selve Jan de voirs. zynre huysvrouwe sonder dair by te roepenen hem of wet ut den selven bornenputte getogen wair by ende sonderlinge want die fame ghinc datse de voirs. Jan selve gedoot hadde hem de voirs. scouthet heeft aengetast ende alle zyne goede in arrestemente gestelt, die voirs. Jan comende mit zynen nagebueren ende begeerden dlantrecht ende te worden aengesproken ter plaetssen dair dat behoirde ende dair onder hy geseten was onder OERLE – ende by toedoene ende onderwysene van goede mannen zunderlinge want zy hem wouden behulpen mit der Blijder Incompst, soe heeften de voirs. scouthet gerelaxeert, behouden dat hy geloofde te rechte te comene op een pene van xxv gulden leeuwen – ende alsoe heeft hem de voirs. Jan geabsenteert wair om de voirs. scouthet voer de pene voirs. alle zyne goeden heeft aengevaert ende die mit proclamacien ende kercgeboden doen vercopen den genen meest dair om biedende tsamen om die somme van dertich rijns gulden 078.7.4.6 exployten OISTERWYCK van ANTHONYSE EMBRECHTS die welke gestolen hadde tot WEELDE tot HILVARENBEKE ende meer andere diversche plaetssen te weten een huycke hosen ende oic gelt tot ALPHEN wair om hem de voirs. scouthet heeft doen vangen ende mits dien doen rechten mit den bast dair om hier want hy geen goet achter en liet – nyet
andere ontvangsten volgens de ordonnantie – geen wijzigingen; bijdrage aan HEER ADOLF VAN CLEVE 078.7.4.8 UITGAVEN salaris van schout en klerk resp. xii l. xviii s. iiii d. gr. en xxx s. gr.
notitie over de in de voorgaande rekening aangehaalde lening van 250 ponden 078.7.4.10 [donkere vlekken in de tekst] JUSITIEGELDEN uit berechtingen: gericht metten sweerde HERMANNE JANSSONE; gericht metten bast EVERARDE JANSSONE; gericht metten bast ANTHONISE EMBRECHTS
van den Bosch naar VESSEM gereden i.v.m. de inbeslagname van de goederen van JANNE COLEN 078.7.4.12 Jan Colen was bovendien nog schuldig aan huurpenningen i.v.m. de huur van een beemd som van alle uitgaven xxiii l. viii s. iiii d. gr. – aldus is die voirs. scouthet hier sculdich vii l. viii d. gr. die verdragen zyn ten laste van den voirs. scouthet in zynre navolgende rekening – soe hier quite – gehoort ende gesloten in der camren van den rekeningen ende genedigen heren te BRUESSEL xix oct. anno lxxix – die voirs. scouthet ende zyn stadhouder zyn sculdich affirmatie op d’inhoudt van desen rekening navolgende der instructien 078.7.5.1 liggend briefje met franstalige tekst waarin genoemd worden de hoogschout van ‘sBosch, GOYART KERYS en HENRIC DE WITT 18 september 1476 078.5.2
NIEUWE REKENING van HEER PETER VAN VERTAING Ridder en Heer van Heeswijk etc. over de periode Sint Jan 1478 tot en met 22 april 1479 na Pasen van HENRICKEN VAN DUFFEL die daer binnen ende aen geweest is daer in der stad van den Bossche daer GHYSBRECHT 078.7.5.3 [donker verfilmde pagina] WOUTERSSONE van lyve ter doot bracht heeft eenen geheiten HENRICK SECKERS [dubieus] wellcke voirs. Henrick van Duffel hem mede vluchtich hielt ende heeft mede ghesoent partien ende want den voirs. scouthet was gebleken is dat die voirs. Ghysbrecht tfait principalyck aen hem toegh, soe heeft die voirs. scouthet midts dien dat Henrick van Duffel voirs. met mynen ghenedigen heer …ten Bossche inne te comen den selven Henricke van den voirs. fayt te laten composeren ende ter composicien ghestelt om x rijns gulden van GHYSBRECHT VAN DER HEYDEN ende GHEENKEN VAN ……die omtrent nalre heyligenmisse anno lxxvii in der stad van den Bossche int wate rin eenre pleyten ter plaetsen aen den VOLRETRAP ghenoempt van lyve ter doot brachten uut crancker aventueren eenen geheyten ROOVER SLOETMAKERS ende want die voirs. Ghijsbrecht tvoirs. fayt niet en dede mer allenlyc Gheenken voirs. om hem te ontsetten ende sij wonachtich syn tot GHESTEL by HAIRLAIR ende syn seer sober van goede ende verwachten aldair die incompste ons ghenedigen heeren voirs. soe heeft die voirs. scouthet den voirs. Ghysbrechte ende Gheenken van dien fayte laten componeren voer xiiii rijns gulden van GIELISE DEN SCHEEMAKER [of: Schoe[n]maker] die in der stad van den Bossche in die …lestleden van lijve ter doot bracht heeft eenen geheyten JAN LOUWE dair om die voirs. scouthet heeft doen arresteren des voirs. 078.7.5.4 Gielys haeffelycke goede ende want die selve Gielys partijen noch oic den heeren gebetert en heeft, so heeft die voirs. scouthet de voirs. goede vercocht om viii rijns gulden van JANNE VAN BERLICHEM die overmidts eenen dootslaghe dien hy gedaen hadde in den persoen van RUTGER VAN DEN KOEVERINGHEN ende omdat hy die van NYMEGHEN ende die van GRAVE by sekeren zytweghen geleydt hadde in der meyerien van den Bossch by nachte ende by ontyde ende den selven aldair om seker penninghen die sy hem gaven den wech ghewesen daer sy die arme ondersaten in der voirs. meyeryen van den Bossche eensdeels vinghen ende schatten ende hadde oick mit den voirs. ghe[l]derschen verboirt ghemaict en dierghelyck noch te doene in de voirs. stad van den Bossche gheexecuteert is van lyve ter doot mit den zweerde van ARNDE VAN DEN EYNDHOUTS alias HOUTMAN die overmids quaeden excessen by hem gedaen ende oick mids dat hy op vrouwen ledich ghinck ende dat hij in der commotien die in der stad van den Bossche gebuerde des es omtrent ii jaer gheleden een van den principalen was ende dat hy oick teghen sekere geboeden by deen heer ende den drie leden der voirs. stad gheordineert te houden op lyf ende goet gedaen hadde in der voirs. stad van den Bossche ghericht mitten sweerde 078.7.5.5 van eenen geheeten SLOM int ghemeyne anders geheten BECKERCKEN die overmids dat hy oick teghen tvoirs. geboth gedaen hadde ende mids dat hy oick mede van den roepers gheweest hadde in der voirs. commotien in den voirs. stad van den Bossche ghericht is geweest mit den zweerde
andere ontvangsten uit breuken als vrede breken, huisstotingen slaan van hoogschout en andere schouten etc. van DIRCK BOCK wonende op die DUNGEN die hem tanderen tyde misgrepen heeft gehadt tot diversen plaetsen onder den HEER VAN PERWEYS ende oick onder mynen genedigen heer dair aff hy tanderen tyden metten voirs. Heer van Perweys gecomponeert heeft des niet te myn die selve Dirck hem beduchtende mits dat deselve die dieften tanderen tyden gedaen synde by hem onder mynen genedigen heer heeft dair om begeert gehadt te componeren metten hoigenscouthet van den voers. fayt, soe heeft die voirs. scouthet gemerct dat hy tanderen tyden gecomponeert hadde mynen Heer van Perweys van den selven fayte hem laten componeren voer die somme van xvii rijnsgulden 078.7.5.7 andere breueken als tegenspreken van schepenen, ontamelijke zaken begaan en hierna volgt de bekende lijst met vuistslagen, messen trekken enz. 078.7.5.8 exployten MAESLANT van LAUWREYNS VAN HERPT ende CLASE VAN HERPT keteleren die omtrent Sint Jansmisse lestleden syn comen gaende tot LYTTOYEN aen den dijck ende van daer voert tusschen LYTH ende LOET (?) comende by eenre herberghe aldair ende meynden in die contreye hen broot te wynnen mit ketelen te manghelen ende te hermaken ende waren aldair te dier tijt comen twee andere ketelers gebruederen om die selve neringhe te doen geheeten MYS GHERITS SONE VAN MOLLE ende GIELIS GHERITSSONE VAN MOLLE die onderlinge worden kyvende ende vechtende ende die voirs. Mijs quetste den voirs. Lauwereyse mit eenre pycken in synen aerm ende Gielys voirs. mit eenen messe so dat die voirs. Lauweryes wel drie wonden ontfanghen hadde al eer hy hem begonst te weren ende dat alsdoen de voirs. Lauwereys mit Clasen synen sone in nootweringhen syns lijfs hem te weren stelde ende raecte Mijsen voirs. met eenen cleynen sceymeskene dat hy corts daer naer aflivich is geworden ende want die voirs. scouthet metter waerheit bevonden heeft dat die voirs. Lauwereys ende Claes syn sone hen moesten verweren doer noot ende partyen daer af ghesoent ende gebetert hebben, soe heeftze die voirs. scouthet laten componeren om xii rijns gulden
exployten PEDELANT van VRANCKEN VAN DEN BERGHE ende WILLEM VAN DEN BERGHE synen sone woonende tot DOERNEN die van lyve ter doot gebracht hebben eenen geheeten AERNT VRIENT ende hielden hen midts dien vluchtich ende meynden te verwachten die Blijde Incompst ons ghenedigen heeren ten Bossche dien niet yegenstaende, soe heeft die voirs. schouthet hier inne groote dieligencie gedaen ende doen om tproffijt ons genedigen heeren voirs. ende heeft die voirs. Vranck ende Willemen van den Berghe by bedwanghe doen composeren om xxxii rijnsgulden te xx stuvers tstuck daer die HEER van DOEREN hem seeght ghericht te syne in die heelicht van den voirs. composicien midts dat den voirg. dootslach onder hem gheschiede ende also hier voer ons voirs. ghenedigen heeren deel xvi rijns gulden
VAN BINDEREN synen sone die tot VECHEL dootgeslaghen hebben eenen geheeten DRIES HENRICKS SONE opten vastelavont lestleden van welken faite Melys voirs. achtervolgende der Blyder Incompst heeft syne haeffelycke goede doen verborghen voir xxxi rijns guldens ende en hadde die voirs. Henrick negheene haeffelycke goede ende woenende met den voirs. Melys syne vader ende also hier die voirs. xxxi rijns gulden van AREKEN BEKERS WILLEMSSONE VAN DEN KERCHOF van VLIERDEN die midts vele quaeden excessen overdaden ende dieften die hy gedaen hadde te wetenen ierst HENRICK DRIES dore foertselyc opgheloopen ende nae den selven Henrick gheschoten ende daer toe denselven gestolen eene gheminghde hoyke ende xvii stuvers. Item ende om dat hy [te] EERSSEL in Kempelant eens coepmans knecht van ANTWERPEN in eene herberghe daer hij ghelogert was nam eene tesschen dair inne waren meer dan veertich rijns gulden daer de selve knecht scape om gecocht soude hebben ende werp die selve tessche ende borse tusschen STEENSSEL ende EERSSEL in een hulstbosch.Item hadde oick deselve Areken gestolen REYNEREN VAN DEN RAVENACKER ix peeters ende nae den selven Reyneren gheschoten ende dat hij des opten goeden vrydach lestleden twee jaer was eender geheeten HEYLEN ZEGHERS ghestolen hadde vi rijns gulden daer om dat hy aen den gherichte des vrijheyt van SINT OEDENRODE ghericht is geweest mitten baste van GHEERIT PEETERS SONE van SCHYNDEL die ghestolen hadde sekere scapen daer voer hij ghevanghen sat ten Bossch opder STEENPOIRTEN van welken fayte WILLEM VAN OS stadhouder een supplicatie u heeren overgegeven van CORSTKEN BACXZOEN die hem mysgrepen had aen thien rijns gulden die hy enen man genomen hadde MICHIEL DIE RUYTER genoemt welck thien rijns gulden die voers. HEYN van Cortken voers. bynnen vi oft vii daige weder om creech dair aff dat officier Corstken voirs. heeft laten componeren want hy altyt ter goeder famen gestaen heeft ende waell hallff tfeyt genoecht geschiet is voer een somme van vi rijns gulden 078.7.5.11 van CORNELYSE VAN DER SCHAUT die met JANNE VAN DER SCHAUT bastaerdt synen vader, JANNE AREKENS ende WILLEME AERNTS BECKERS kinderen, JACOPPE VAN DER SCHAUT, JANNE VAN DER SCHAUT synen sone ende JANNE CLAES SONE des es omtrent twee jaer gheleden, op eenen morghenstont tot VLIERDEN ontscaecten tot Vlierden een jonck meysken geheeten LIJSKEN JANS sBECKERS dochter ende dat tot behoef des voirs. Cornelys die ter stont van HENRICKEN DRIES harer moeijen man daer sy mede woende achterhaelt werdt met eenen peerde want sij boven enen halve mijle niet ewech en was, die voirs. persoen aensiende dat die voirs. Henrick huer na quam ghereden settense van den waghene ende ende quam hueren om te ghemoete, diese doen achter hem op syn peert sette ende voerdese wederom thuysweert ende haer en was niet mesdaen ende sy en hadde oick niet ghecreten, van welken fayte HE[E]R WILLEM VAN ERPE ridder van weghen der voirs. personen u heeren overgegeven heeft eene supplicatie, inhoudende hoe dat tfayt gheschiet is ende midts dier heeft die voirs. schouthet ten bevele van u heeren de voirs. personen laten componeren ende dat om hondert rijns gulden tstuck te xx stuvers want hij niet meer gecriygen en conste ende want die voirs. persoenen meest wonechtich syn tot ASTEN onder enen smalen heer ende oick dmeestedeel van hueren goeden gelegen is aldair, welke smale heer midts dien meynt oick ghericht te syne inder penningen voirscr. dwelc die voirs. officier u heeren te kennen gaf ende wert by heeren alsdoen denselven officier mondelinghe bevolen, dat men metten voirs. HEER van ASTEN overcomen soude ende den selven daer inne laten deylen, soe 078.7.5.12 heeft die voirs. officier den voirs. Heer van Asten daer af moeten gheven xxv rijns gulden – blijven mijnen ghenedegen heer lxxv rijns guldenen van ENGHEL JANS ROYMANS dochter woonende in der heerlicheyt van DOEREN die over maghet ghinc ende des goensdaigs ante festum Assumptios Marie anno lxxviii lestleden baerde een dootkindeken in der voirs. heerlycheyt ter plaetsen geheeten LIESEL datse ghedraghen hadde omtrent drie maenden van eenen jonghen ghezelle geheyten HENRICK JANS sBRUYNEN SOEN oick in der voirs. heerlycheyt woonende, welc doot kindeken overmits dat sy alleene was ende om huer eere te behouden sy meynde te verbergen ende leydt in een loopende waterken ende bedectet met eenen eerden roysken om dat mens niet sien en soude, dwelc comen synde ter kinnessen des voirs. officiers heeft hy informacie opt voirs. fait ghenomen ende heeft claerlyc bevonden dat sij tvoirs. kindeken doot gebaert heeft ende als die voirs. Enghel vernomen hadde dat het comen ware ter kinessen des voirs. officiers ende beduchte haer daer aen mesdaen te hebben ende dat sy tot misgrijpe ghestelt soude werden, hielt haer die selve uut den handen desvoirs. officiers ende die voirs. officier dit aensiende ende dat de voirs. Inghel negheen goet en hadde mits dat haer vader ende moeder noch leefden anders dan sy haer gheven mochten, heeft de selve Inghel ter beden ende begheerten van vele goeder mannen ende dat onsen ghenedigen heer meer proffijte gedaen dan ghelaten ghemerct sy verwacht soude hebben de Incompst ten Bossche, laten composeren van den voirg. faite voer xxviii rijns gulden ten prijse voirscr. Yüklə 405 Kb. Dostları ilə paylaş:
|