Meierijse Schoutsrekeningen

MICROFICHE 8

078.8.1.1

van BOYEN BOYENSSONE van VESSEM die omtrent Sinte Lambrechtsmisse lestleden te Vessem was aldair te diere tyt een ghevicht [lees: ghevecht] was tusschen BOYEN VAN STEENSSEL, BOYEN VAN KNECHSEL, BOYEN VAN YERSSEL synre zuster kinderen ende WOUTEREN LOYEN ter eenre zyden tegen eenen geheeten CEELKEN HENRICK CELEN SOEN van LOON ende andere ende de voirs. Boyen Boyenssoen hoorende het gherucht van den ghevechte quam daer toe gheloopen ende dair by comende hadde die voirs. Ceelken eenen steeck ontfangen dair aff hy nedersanck ende was doot – de voirs. Boyen Boyenssone dit aensiende seyde tot den voirs. personen: “Ghij hoerenboeven wat hebdi ghemaict, siet yeghelyc om een gat dat ghij wech compt”ende tghemeyn volc vergaderde met grooten hoopen ende doen quam die voirs. Boyen Boyenssone mit synre pycken ende dede tvolc opstaen om dat de voirs. personen opt kerchof mochten comen ende is selve mede vluchtich gheweest end eheeft oick aen partyen selve mede hulpen soenen ende want die voirs. synre neven met Wouteren Loijen tvoirs. fayt alleen gedaen hadden ende als principale de partyen ghesoent ende den heer gebetert, daer af dat HENRICK DICBIER drossate van den voirs. iiii persoenen hadde xvi rijns gulden, soe heeft die voirs. scouthet den voirs. Boyen Boyenssone laten composeren van den voirs. fayte om xii rijns gulden
van HENRICK VERWAERDEN die des is gheleden omtrent xxx jaeren met meer anderen jonghen ghezellen tot HAPAIRT onder den scouthet van Kempelant des avonts in der manen sollede met eenen sollebal ende
078.8.1.2

die voirs. Henrick die nae den sollebal stooten waende gheraecte by crancker aventhueren ende sonder opset so men seyde eenen jonghen geheeten WIJNKEN WYNRICX CORTWIJNEN SONE die corts daer naer sieck werdt ende sterf van den welken faite die voirs. Henrick den vrienden beternisse ende soeninghe ghedaen heeft, die hen midts den onnoselen fayte met cleynen penninghen laten ghenoeghen ende midts dien ende oick aenghesien die voirs. onnozelheyt, soe heeft die voirs. scouthet den voirs. Henricke gecomposeert om xii rijns gulden

van JANNE HUBRECHTSSOEN VAN BAEST die des omtrent ij [1 ½] jaer gheleden is daer bij geweest hadde daer JAN BIERKENS van GHESTEL in den lande van LOON [vgl. Luiksgestel] met meer anderen tot BERCHEYCK onder den scouthet van Kempelant geboghen ter plaetsen geheeten WEEBOSSCH van lyve ter doot brochten GHEERIT PEETER FRANCKEN SOEN VAN DEN WEEBOSCH ende heeft die voirs. scouthet by informacien bij hem hier op ghenomen bevonden dat die voirs. Jan Hubrechtssone aent voirs. fait nit medeplichtich en is geweest, dwelc die selve Jan oick aen den heyligen gesworen heeft, daer mede de partijen van den dooden te vreden sijn geweest ende hebben hem van den voirs. fayte ontdraghen sonder eenighe beternisse ende want die voirs. Jan gheseten ende wonechtich is buyten den voirs. lande van Brabant ende bynnen Brabant niet gegoedt, soe heeft die voirs. scouthet den selven Janne laten componeren om vii rijns gulden
van JANNE BIERKENS woenende tot GHESTEL in den lande van LOON welke Jan met meer anderen tot BERCHEYCK

078.8.1.3

van lyve ter doot gebracht heeft GHEERIT PEETER FRANCKEN SOEN van den WEEBOSSCH midts den welken die voirs. scouthet dede beslaen ende arresteren des voirs. Jans goede geleghen in Brabant welke goede de voirs. Jan achtervolgende der Blyder Incompst heeft doen verborgen voer xxxi rijns gulden ende dair af tprincipael fayt noch ongebetert is aen den heer ende also hier die voirs. xxxi rijns gulden
van WOUTEREN BELIEN van LOMMEL die in den dorpe van LOEMEL met PAUWELSE MAIGS van lyve ter doot heeft hulpen bringhen des es omtrent ij jaer [1 ½] geleden eenen geheeten AERT STOOTER [dubieus] midts den welken de voirs. scouthet hen goeden hadde doen beslaen ende dair af de heer noch ongebetert is, ende die voirs. Wouter heeft syne goede ghecocht teghen den heer om xxxi rijns gulden
van PAUWELS MAIGS wiens goede overmidts den voirs. dootslaghe die voirs. scouthet insgelycs hadde doen arresteren de welke de voirs. Pauwels teghen den heer gecocht heeft want sy niet beter en waren om vii rijns gulden ten prijse als voer
van WILLEKEN WYNRICSSOEN van EERSSEL onder Kempelant die welke van lyve ter doot gebracht heeft WILLEM VAN DUYSSEL welke Willeken Wynricxsoen achtervolgende der Blyder Incompst midts den voirs. fayte sijne goede teghen den voirs. scouthet gecocht heeft om xx rijns gulden want die niet beter en waren
078.8.1.4

van PEETEREN DIERICK GIELENSOEN die omtrent alreheyligenmiss lestleden in der stad van EYNDHOVEN in der heerlycheyt van CRAENDONCK van lijve ter doot heeft gebracht eenen geheeten JAN DIERICK GHEENENSOEN overmidts den welken de voirs. scouthet heeft doen beslaen ende arresteren alle die goede de svoirs. Peeters onder mijnen genedigen heer gheleghen, welke goede die voirs. Peete rheeft doen coopen teghen den voirs. scouthet nae inhoudt der Blyder Incompst om xxxi rijns gulden

van JANNE VAN REEST/Roest van dat hij nu in den meerte lestleden tot BERCHEYCK ghenomen heeft eenen coperen pot enen ketel alluttel vlas ende garen toebehoirende eender geheeten LIJSKEN tsGRONEN [vgl.Groenen] dwelck hij der selver wedergekeert heeft ende ghemerct de voirs. anders tot gheender quaeder famen noyt ghestaen en heeft noch oick van ghelycken noyt gedaen en heeft ende een arm man is, soe heeft hem die voirs. scouthet ter beden van viere goeden mannen ter composicien ghenomen om thien rijns gulden
van JACOPPE DE HOEL van WESTERHOVEN van dat hij comen is tot MATTHIJS GHIJSEN huys den selven uut eysschende ende segghende: “Sydi een man so compt uutte” ende gaf den selven vele onredelyckke woirden om dat hem die selve Mathijs die gesworen was uut hadde helpen kiesen om te treckene op die Ghelrissche, dair af die voirs. scouthet den voirs. Jacoppe calengierde ende heeft den selven dair af ghecomposeert om xii rijns gulden
078.8.1.5

van JANNE GHIJSKENS van LOEMEL die welke des is omtrent iiii jaer gheleden geslaghen heeft PEETEREN HEYTHOOFT vorster dwelc toeghecomen ende gebeurt soude sijn om tsrechts wille, midts den welken de voirs. schouthet den voirs. Janne te rechte bertoghen heeft maer en conste dat niet bethoonen niettemyn die voirs. scouthet heeft den selven Janne dair af ter composicien ghenomen om xii rijns gulden

van JANNE HERMANS LEMMENSSOEN van ROESSEL die welke hadde sitten drincken by JANNE HENRICK tsCOSTERS SONE ende waren beyde wel bij drancke ende die voirs. Jan Henrick tsCosterssoen ghinc sitten slapen op een hout ende doen hij wacker werdt seyde hy dat hy uyt synen buydel verloren hadde x oft xii penninghen ende so ghinck die fame dat die voirs. Jan Herman Lemmenssone die ghenomen soude hebben, maer en wert den selven dat nyet aengeteghen ende heeft altijt tot goeder namen ende famen ghestaen ende heeft uut vreesen van ghevanghen te mogen werden teghen den heer dair af ghecomposeert om x rijns gulden
078.8.1.6

exployten OISTERWYCK

van ADRIANE JAN GHIJBEN woenende in der vryheit van OISTERWYCK die tot BELVER oic onder Oisterwyck gelegen van lyve ter doot gebracht heeft eenen geheeten BACK BERTHOUTSSONE welc fait seer onverzienlyc ende onmoghens toe quam ghemerct dat die voirs. Back vechtende was tegen eenen anderen ende die voirs. Adriaen synde int bescheet te gane ende hadde eenen stock in syn hant daer hijse met meynde te scheyden ende gheraecte den voirs. Back by crancker aventhueren op syn hooft dat hij corts dair nae sterf ende heeft partyen nae sinder aermen macht daer van ghesoent ende gebetert ende want die voirs. Adriaen meynde mit onsen genedigen heer ten Bossche inne ghecomen hebben, soe heeft die voirs. scouthet den selven laten composeren tot behoef mijns voirs. ghenedigen heeren om xiiii rijns gulden
van ROELOF VAN DONGHEN die van lyve ter doot gebracht heeft tot OISTERWYCK RUTGHEERDE VAN HAREN synen neve overmidts den welken die voirs. Roelof achtervolgende der Blyder Incompst syne goede heeft doen coopen tegen den voirs. scouthet voer xxxi rijns gulden
van LAUWEREYSE ELYAS die daer bij ende aen gheweest is dair HEER HENRICK PUYNENBERCH priester syn swager in den dorpe van HELVOIRT onder den scouthet van Oisterwyck van lyve ter doot gebracht heeft eenen geheeten CLAES VAN DEN STAKE ende want den voirs. scouthet gebleken is by goeder informacien bij hem dair op ghenomen dat Lauwereys ende Heer Henrick voirs. hen moesten verweren in noode
078.8.1.7

van haren lyve ende dat sy beyde seer gequedst waeren eer sy hen ter were stelde ende dat oick die voirs. HE[E]R HENRICK principael es die gheen goede en heeft daer die voirs. scouthet yet van verhaelen mochte gemerct hij een gheestelijck persoon is ende de voirs. Lauwereys seer sober gegoede is ende heeft hem altijt uut der heeren handen gehouden meynde te verwachten der Blyder Incompst ende midts die voirs. redenen heeft die voirs. officier den voirs. Lauwereyse ter composicien genomen om xxviii rijns gulden

van JANNE VAN DER HELLEN dat hy JANNE HEYMBRECHT anders geheeten SCHUT die hem yet mesdaen en hadde in der stad van den Bossche op een avont daer hy ghinck danssen syne ooge uutgesteken heeft dair af hy den selven niet en heeft willen beteren. Item van dat hij oick in der stad van den Bossche huysstotinge gedaen heeft ten huyse WOUTERS VAN DEN HOEVE ende den selven Wouteren ghequedst ende sijn kovel ghenomen ende die vercocht.

Item ende om dat hij JANNE DEN LUYKENEER smit ende poirter van den Bossche gedreyght hadde doot te slaen ende van dat hij den VORSTER van GHESTEL ghesteken hadde in sijn been mit meer andere quaeden fayten, die de selve gedaen heeft overmidts den welken hij opter heyden tusschen GHESTEL ende OISTERWYCK bij HILVARENBEKE ghericht is mit den zweerde ende also hier – nyet

van WOUTEREN HERMANSSONE woenende onder den scouthet van Kempelant van dat hij tot OISTERWYCK is comen gaende als zondeneer mit meer anderen ghezellen om onsen ghenedighen heer te dienste te trecken des is
[deze tekst loopt door op 078.8.1.8 maar er staat nog een andere tekst met een andere schrijfhand tussen geschreven]
van ARNDEN LAURENSSEN die hem omtrent ii jaeren mysgrepen had aen enen sluytcorff die hy nam uut enen wagen tot BEECK
078.8.1.8

omtrent een jaer gheleden welke Wouter wael bij dranck was ende daer hinck teghen des PASTOORS van OISTERWYCK dore over op eenen tuijn seker lynen laken om te bleycken ende nam die voirs. Wouter sijn lanck mes ende sneet omtrent ii ellen van den voirs. lakene segghende: “Dit sal my altewel vueghen om mynen hoet te dragene” ende bant om synen hoet dwelc hy dede uut dronckenscape, nyettemin de voirs. Wouter heeft tvoirs. laken den goeden luden wedergekeert van welken faite ghemerct hij in mijns genedigen heeren dienst was ende dat hij oick tot gheender quader famen en steet, de voirs. scouthet hem heeft laten composeren om xxvii rijns gulden

ontvangsten uit de vorsterijen
078.8.1.9

en andere typen breuken en de bijdrage aan de HEER ADOLF VAN CLEVE ; som van alle ontvangsten clxxi l. vii s. vi d. gr.

078.8.1.10

UITGAVEN

salaris van schout en klerk resp. lvii l. ii s. vi d. gr. en xxxiii s. iiii d. gr.
andere uutgheven van penningen in preste gedaen opte voirs. officie:
078.8.1.11 [erg donker verfilmd]

lening van geld in vlaamse ponden; JUSTICIEGELDEN uit berechtingen: berecht door de

scherprechter zijn o.a. metten zweerde JANNE VAN BERLICHEM, metten sweerde ARNDE VAN EYNDHOUTS
078.8.1.12

mitten sweerde SLOM anders geheeten BERCKERCKEN, mitten baste ARNKEN BECKERS WILLEMSSOEN VAN DEN KERCHOVE van Vlierden van wiens mesdaet mencie wordt ghemaict onder tcapittel van Pedelant, mitten sweerde JANNE VAN DER HELLEN van wiens mesdaet mencie is ghemaict onder tcapittel van Oisterwyck

078.8.2.1

ander uutgheven van costen byden voirs. scouthet gedaen int vervolgen op ARIANE ARIAENS PEETERSSONE van BERCHEYCK voer myne heeren den cancellier ende raide in Brabant tegen de UNIVERSITEIT van LOVEN welc vervolghen geschiet is ten bevele van den heeren van den cameren van den rekeninghen te BRUESSEL

inden iersten heeft die voirs. schouthet selve geweest in de palmweke lestleden te Bruessel bij de heeren van den rekencameren voirs. dair hij u alsdoen te kennen gaf alle die faiten ende articulen die Ariaen voirs. gedaen hadde [met notitie in de marge met een andere schrijfhand];
item alsdoen werdden den officier gegheven ende verleent van den voirs. raide sekere brieven ons ghenedichs heeren tsHertoghen gaende aen die universiteyt daer mede hen bevolen werdt dat sij cesseren ende aflaten souden den voirs. Ariana in den voirs. fayte midts synre voirs. studentscape te willen defenderen ende verantwerden dair om die selve scouthet uutgeweest is rijdende lettende ende keerende mit iiii peerden xiii dage ende elke daighs twee croonen tstuck te xxiiii stuvers gerekent
item nyet yegenstaende dien so heeft die voirs. universiteit gesonden brieven van inhibitien slaende op den scouthet van Kempelant den scepenen ende wethoudertn van Bercheyck ende oick op die vorsters ende dieners aldair ende nae der voirs. inhibicien brieven van citacien
078.8.2.2

item dat midts dien den voirs. schouthet van noode was te bespreken metten voirs. heren van den raide wes hy dair inne schuldich soude wesen van doene ende reet daer om te Bruessel den voirs. raidsheeren dit te kunnen ghevenen waer op den voirs. raet appointeerde ende verboot den voirs. scouthet daer toe nyet meer te doene ghemerct de sake onsen ghenedighen heer aenghinck ende dat men hen soude die brieven sij sonden verantwerden waer om HENRICK BATEN des voirs. scoutheten diener uute is geweest mit eenen peerde rydende lettens ende wederkeerens xi daghe ende tsdaighs x stuvers

item hebben die voirs. universiteyt niet yegenstaende ennigen bevelen van boven hen ghedaen den voirs. schouthet van Kempelant scepenen ende dieners van Bercheyck voirscr. te banne gedaen ghelijc dat blyct by sekeren acten
waer om die voirs. scouthet ghesonden heeft tot Bruessel aen de voirs. heeren van den raide ende hen dit te kennen doen gheven, daer hij alsdoen verwerf zekere brieven van mandementen daer mede gedaight werden die promoteur ende conservateur voer den voirs. raidt teghen den voirs. officier ten sekeren daghe daer toe gheordineert te compareren ghelijc dat oick blyct by sekeren acten om welck mandement te verwerven hy uutgeweest heeft mit eenen peerde vii daghe elcs daighs x stuvers
item om tvoirs. mandement ter executien te doen stellen uutgheweest mit eenen peerde v daghe elcs sdaighs als voer x suvers

078.8.2.3

item den ondermeyer van LOUVEN die tvoirs. mandement aen den conservateur ende promoteur der voirs, universiteit ter executien stelde gegeven xiiii stuvers
item opten xxv dach may doen sy compareerden voer deen voirs. raide werde aldair gheappointeert dat men den voirs. Adriana op sekeren conditien ende cautie ontslaen soude ende dat die voirs. gheexcommuniceerde persoenen costeloos ende schadeloos van haren ban souden werden ontslaghen ende gherelaxeert ghelijc dat blyct bij sekeren acten dair af sijnde ende dair om uutgeweest mit enen peerde wyndens lettens ende keerens xi dage ende elcs daighs als voer x stuvers
item verzochten die vrienden des voirs. Ariaens den selven ontslaghen te werdene dwelc die voirs. officier hen weijgherde ghemerct sij die relaxacie van den gheexcommuniceerde personen ghelijc dat gheappointeert was achtervolgende ende naar inhout der acten niet en vrochten
item midts dien compareerden die voirs. partyen wederom voer den voirs. raide daer alsdoen in der voirs. saken gheordineert worden iiii commissarysen te wetene twee van ons voirs. genedigen heeren weghen ende twee van weghen der voirs. universiteyt ende daer om uutgeweest mit eenen peerde weyndens lettens ende keerens x daeghen elcx sdaigs x stuvers als voer
078.8.2.4

item dit aldus gheschiet synde wat de sake uutgestelt ende ghecontinueert tot des goensdaighs post Magdalenen om alsdan de voirs. commissaris hoer uutsprake te doene ghelijc die continuacie blijct bij sekeren acten ende om die uutsprake te hooren uutgeweest met eenen peerde x daghe ende elcs sdaighs x stuvers

item betaelt voer iii acten xxiiii stuvers – somma van den partyen voirs. iii l. x s. gr. – somma van alle den uutgheven deser rekeninghen xcvi l. x d. gr. – aldus is die voirs. scouthet sculdich lxxv l. vi s. viii d. gr. – ende hy is oick sculdich byden eynde zynre naister voergaende rekening hier gedragen xii l. vi s. viii d. gr. – van beyde de partien die de voirs. scouthet hier sculdich lxxxvii l. xiii s. iiii d. gr. – van desen reste is ontfanc gemaict byder 2^de rekening JANS VAN OLMEN van den rentmeesterscape generael van Brabant van den jaer eyndende ultima septembris anno lxxix folio xxxiii
op 078.8.2.6. volgt nog een serie franstalige notities

EINDE VAN DIT INVENTARISNUMMER

bewerking: Henk Beijers Heunpark 1021 5261 WB Vught 073 – 657 99 15 email: [e-mail]