Aydın Çobanoğlu
168
Mən bilirəm, düşünürsən,
Niyə buxovludur Araz?!
Sinəsində sərhəd dağı,
Niyə sərbəst deyil Araz?!
İnanıram, gün gələcək,
Xan Arazın sinəsində
Məskən salan o sərhəddi,
Araz özü yuyacaqdır.
Ovacaqdır
İçin-için, altdan-altdan.
İnanıram, çünki onun,
Mən bələdəm, sularının
Təlatümlü anlarına.
Qranitdən möhkəm olan,
Qayalarla
Bəhsə girən anlarına.
İnanıram, gün gələcək,
Sərhəd özü olacaqdır
Xan Arazın sinəsində
Yoxa çıxan, itən-batan!
İnanıram...
Bax o zaman bütövləşib,
Sevinəcək, birləşəcək,
Öz-özünü
İkiləşən Vyetnamçün,
Parçalanan Berlin üçün,
Məlhəm edən, Təbriz oğlu!
İnanıram, inanıram,
İnanıram, sən də inan!
Bakı şəhəri,
26-27.05.1981
Ömrün etməyəcək vəfa dedilər
169
GÜLNARƏ
Dostum Teymur müəllimin böyük qızı Gülnarənin 10 yaşına
Evin bini, bərəkəti,
Tavağı, sacı Gülnarə.
Ocağın qızıl dirəyi,
Məkkəsi, Hacı Gülnarə.
Teymurun dini, imanı,
Nərgizin damarda qanı.
Qoşqarın şöhrəti, şanı,
Aynura bacı Gülnarə.
Aydın deyər: – ondu yaşın,
Bundan belə düşün, daşın.
Yaranıb Qoşqar qardaşın,
Başının tacı, Gülnarə!
Bakı şəhəri,
19.05.1982
Aydın Çobanoğlu
170
AYNUR
Dostum Teymurun əziz qızının 3 yaşına
Aydan nur almısan, Günəşdən ziya,
Mehriban, gülərüz, şirindil Aynur!
Ana nəvazişli, ata kölgəli,
Tez boy at, pərvazlan, danış, gül, Aynur!
Sən dağlar qızısan, gəl, çıx dağlara,
Dəysin qədəmlərin göy yaylaqlara!
Toxunsun dodağın buz bulaqlara,
Sevinsin səninlə oba, el, Aynur!
Üç bahar keçibdir ömründən, üç yaz,
Hüsnünə bir şeir deməsəm, olmaz.
Aydınam, dil açır sinəm üstə saz,
Sənə nəğmə deyir incə tel, Aynur!
Bakı şəhəri,
09.09.1980
“Abşeron” qəzeti,
01.07.1982
Ömrün etməyəcək vəfa dedilər
171
GƏLMİŞƏM
Məlahət Yusifqızının “Gəlmişəm” şeirinə
Başına döndüyüm “şahın kənizi”,
Qulluğunda qul olmağa gəlmişəm.
Lazım deyil özgə ocaq, özgə od,
Bu ocaqdan qor almağa gəlmişəm.
Sevənlərdən bir müqəddəs ad alıb,
Şirin-şəkər dodaqlardan dad alıb,
Öz naləmdən, öz ahımdan od alıb,
Yanıb-yanıb qaralmağa gəlmişəm.
Mən Çobanoğluyam, əhdi, sözü düz,
İlqarı düz, peymanı düz, özü düz.
Çək kösövü, sinəm üstə közü düz,
Kərəm kimi kül olmağa gəlmişəm.
Aydın Çobanoğlu
172
DOYUNCA
Şair dostum Məmməd İsmayıla
Şair qardaş, gəl, bürünək dumana,
Seyrə çıxaq bu dağlara doyunca!
Məbəd kimi diz qatlayaq önündə,
Səcdə qılaq bulaqlara doyunca.
Gəzək çəmənini, tala-düzünü,
Cilovlayaq gədiklərin özünü.
Sinəmizin alov saçan sözünü,
Gəl, köçürək varaqlara doyunca.
Uca tutaq ana yurdun adını,
Sevindirək yaxınını, yadını.
Qəlbimizin atəşini, odunu
Töhfə edək qonaqlara doyunca.
Qoy, xoş keçsin ömrümüzün ay-günü,
Gözəlliyə, xoşbəxtliyə tay günü!
Əzizləyək İntizarı, Aygünü,
Qurban olaq balalara doyunca.
Dilimizdə bir əfsun var söz adlı,
Sinəmizdə bir sehr var saz adlı.
Aydın deyər, yar həsrətli, naz adlı
Nəğmə verək dodaqlara doyunca.
Ömrün etməyəcək vəfa dedilər
173
* * *
“Səyyadı”nın xoş sədası, xoş ünü
Yada saldı Səyyadımı, a Məmməd!
Şirin sözlü, gülər üzlü balamı,
Varlığımı, həyatımı, a Məmməd!
İstisu, 22.07.1984
Aydın Çobanoğlu
174
KİMLƏR GƏLMİŞ
Aşıq Hüseyn Saraclıya
Ola bilməz bir kəlmə söz
Sənətinə, amalına.
Neçə şagird yetirmisən,
Əhsən, ustad, kamalına!
Saraclıdı təxəllüsün,
Aləmi bürüyüb səsin.
Rövnəq verir xoş nəfəsin
O nurani camalına.
Yaşasan da cəmi, yetmiş,
Sanma ömür başa yetmiş.
Kimlər gəlmiş, kimlər getmiş?!
Çatmamış dünya malına.
Qartaltək çatılar qaşın,
Azmı olub boran, qışın?!
Heyrandı Aydın qardaşın
Bu günkü cəh-cəlalına.
Saraclı kəndi, 01.06.1986
Dostları ilə paylaş: |