329
Bəs tənqidçilər kimlərdir: əlbəttə ki, köhnəsi
və yenisi. Bu, tənqidin əzəl mövcudluq şərti, prinsipi,
sxemidir. Köhnə ilə yeninin mübarizəsi tənqid
müstəvisində gerçəkləşir.
Fransız Madan Sarup poststrukturalizmin 4 tənqid
yönümünü sayır: tarixiliyin tənqidi, anlamın tənqidi,
fəlsəfənin tənqidi, subyekt konsepsiyasının tənqidi.
Mən bura əlavə edərdim tənqidin tənqidini. Belə ki,
tənqidin tənqidi digər 4 yönümü də özündə qapsıyır və
mövcudiyyətin tənqidi kimi zühura gəlir. Artıq bu
məqamda tənqid labüdlükdür, universal mütləqlikdir.
Çünki tənqid özünüyaşatma funksiyasının, insanın
özünüqoruma reaksiyasının təzahürüdür. Əfsuslar ki,
mədəniyyət tənqidin imici arxasında bunu görməyə
“ərinib” və ya bunu özünə sərfəli bilmədiyindən
nəzərində saxlamayıb.
Zamanın “tarixi bilincsizlik” kəsimində tənqidin
instinkt olduğu aydın məsələ. Tənqid instinkti olmasa,
tənqidi reaksiya da olmaz.
Elə ki “mən” yaranır, tənqid instinkti
strukturlaşır, tənqidi reaksiya və tənqidi mühakimə
ortaya çıxır. Tarix “mən”in gerçəkliyə refleksiyasıdır.
Məhz bu “mən” tarix müstəvisində həm tənqidin
obyektidir, həm də subyekti. Tənqid instinktinin
mədəniyyətdə qəbul edilmiş primitiv forması sual
(potensial inkar) və cavabdır (potensial təsdiq). Sual
reflektiv olaraq meydana gələn inkardır və yalnız sonra
tənqiddir. Özünün bütün təzahürlərində sual latent
hücumdur, inkardır və təcavüzdür. Sual uşaqların məxfi
aqressiyasının reallıq şəklidir. Uşaq sual vasitəsilə
özünü təsdiqləyir və çox zaman sonsuz sorğularla (onun
bir gün ərzində suallarının sayı 427-yə çatır)
böyükləri bezdirir. “Mən” əgər sual verirsə, deməli,
faktiki olaraq tənqid (təhlil) edir və nəticə etibarı
ilə özünü başqalarından ayırır: yəni müəyyən bir
qarşıdurum, oppozisiya yaradır. Sual (bilincsizlik
qatında həm inkar, həm tənqid), ilk öncə, “özüm”
330
uğrunda mübarizədir və “mən”i bildirən, tanıdan,
işarələyən əlamətdir.
Sual tənqid instinktinin uyqarlıq gerçəkliyidir.
İnsan sual vasitəsilə uyqarlığa addımlayır. Lakin kimsə
suala təkcə bilmək amacı kimi baxırsa, yanılır. Bu,
qətiyyən belə deyil. Sizə bir müşahidəmi danışım.
Görürsən ki, hər hansı bir məclisdə (konfransda,
simpoziumda) müəyyən problemlə bağlı çıxış edən natiqə
yerli-yersiz çoxlu sual verənlər tapılır. Hətta elələri
də olur ki, min bir sual onların daxilini gəmirsə də,
bu adamlar şəraiti, vəziyyəti, etik qaydaları nəzərə
alıb (və ya bəhanə gətirib) öz suallarından imtina
edirlər. Yəni bu o deməkdir ki, praktiki surətdə natiqi
dinləyənlərin hamısının ona sualı (və ya sualları) var.
Olsun ki, bu prosesdə kimsə aktiv iştirakçı, kimsə
aktiv müşahidəçi mövqeyini öz psixofizioloji portretinə
daha uyğun bilsin. Lakin burada bir psixoloji məqam
maraqlıdır. Sualı olub öz sualını verənlərin də, sualı
olub öz sualını verməyənlərin də hamısı bilir ki,
faktiki surətdə bu sualların heç bir konkret əhəmiyyəti
yoxdur. Amma bir qayda olaraq bu dialoqda iştirak etmiş
hər bir şəxs özündən razı qalır və əksərən o, cavab
barəsində heç fikirləşmir də. Əslində, cavab ona heç
lazım da deyil. Çünki bu cavab real zaman hüdudlarında
nəyisə dəyişməyə qabil olmayacaq. Bəs onda sualların
hər hansı bir natiq qarşısında belə püskürməsinin
səbəbi nədir? Hamı danışanı tam şəkildə başa düşübmü?
Əminəm ki, yox. Qəribəsi budur ki, natiqə sualla
müraciət edən şəxs heç də nəsə öyrənməyə can atmır.
Sual (görüşlər, xatirə gecələri və s. bu kimi
yığıncaqlarda verilən teatral-dekorativ xarakterli
suallar nəzərə alınmır) əsas etibarı ilə söz sahibini
çaşdırmaqdan, onu yoxlamaqdan, sınağa çəkməkdən, özünü
camaat arasında fərqləndirməkdən, xüsusiləşdirməkdən
ötrüdür (yəni baxın, mən də danışdım ha).
Sual öz təbiətinə görə tapmacadır, başqası üçün
hazırlanmış tələdir, operativ instinktiv reaksiyadır,
331
yəni, görək, danışandan başçı (rəəhbər, öcül) olar,
yoxsa yox.
Sual özgəsinə doğru yönəlmiş təcavüzün maskalanmış
formasıdır.
Elə isə suala hər şeydən öncə özünütəsdiq vasitəsi
kimi yanaşılmalıdır. Məhz ona görə də sual həmişə
bilincsizlik səltənətində azğın bir istək kimi tüğyan
edir və qəfildən peyda olur. Burada artıq anlamaq cəhdi
ikinci plandadır:
əsas məsələ özünütəsdiqdir.
İndividualizm öz kimliyini ayırd etməkdən ötrü verilən
sualdan başlanır. Sual (tapmaca) həmişə özgəsinin
təkzibidir, özüm haqqında informasiyadır, elə bir
informasiya ki burada “mən”in özü barədə haray salmaq
təbiəti hər şeyi üstələyir. Sual inkarın yumşaq
(kompromis) variantıdır. İnkarsa hökmdür, başqası
haqqında hökmdür. Ancaq bu hökm, eyni zamanda, “özüm”
barəsində hökmdür: “mən”in mütləqləşməsi (hifz
edilməsi) amacıdır. Əslində, inkarı meydana gətirən
faktor “özüm” üçün qorxudur. O nəsnəni ki, biz başa
düşmürük, qavraya bilmirik, onu inkar edirik. Məntiqi
nəticə isə budur: o nəsnə ki bizə məlum deyil, bizdən
ötrü qorxu obyektidir. Bu psixologiyanın faktıdır və
mən təzə heç nə kəşf eləmirəm.
İnkarsa stress məqamının tənqididir, özgəsinə
qarşı aşkar, barbaşa təcavüzdür.
Güman edirəm ki, sual və inkarın psixoloji
motivlərilə bağlı bəzi məsələlər aydınlaşdı. İndi
təzədən dönürəm tənqidin üstünə.
Mədəniyyət müstəvisində tənqid sual və inkarın ali
təzahürüdür. Tənqid özünü yozum, metod kimi təsdiq
etməmişdən öncə qarşıdurumdur. Belə ki, hər bir yozum,
əgər o, həqiqətən yozumdursa, oppozisiyadır. Çünki hər
hansı bir faktın təbiətini yenidən strukturlaşdırmağa
və onu da öz növbəsində yeni fakt kimi təqdim etməyə
meyllidir.
Tənqidin arxaik strukturu tarixi bilincsizlik
çağında
“ATA-OĞUL” münasibətlərinin
(konfrantasiyasının) nümunəsində mədəniyyət olayı kimi
Dostları ilə paylaş: |