Mövzu 8 Texnologiyaların beynəlxalq ötürülməsi beynəlxalq iqtisadi münasibətlərin forması kimi Texnologiya

Digər istehsal amillərində olduğu kimi, texnologiyaların beynəlxalq hərəkətinin əsasında da onun beynəlxalq bölgüsü durur. Bu bölgü texnologiyaların ayrı-ayrı növlərinin müxtəlif ölkələrdə tarixən formalaşmış və ya əldə edilmiş təmərküzləşməsidir. Bu təmərküzləşmə ölkələrə digər ölkələrə nisbətən iqtisadi cəhətdən daha səmərəli əmtəə istehsalı təşkil etməyə imkan verir. Texnologiyaların beynəlxalq bölgüsü ayrı-ayrı ölkələrdə əldə edilmiş elmi-texniki tərəqqinin inkişaf səviyyəsində olan fərqlərin nəticəsidir. Bu zaman ölkələrin əmək və kapital kimi istehsal amilləri ilə fərqli təmin edilmələri də mühüm rol oynayır. Texnologiyaların beynəlxalq hərəkətinə həmçinin ölkələrin bilik resursları ilə fərqli təmin edilmələri də təkan verir.