II. Sinif rəhbərinin fənn müəllimləri ilə əməkdaşlığına aid tapşırıqların həlli:
Tapşırıq 1. Zəng vuruldu. Müəllimlər otağına daxil olan müəllimlər altıncı sinfin təlimə münasibətindən və davranışlarından sinif rəhbərinə şikayətlənməyə başladılar. Riyaziyyat müəllimi üzünü ona tutub dedi:
– Rəfiqə müəllimə, bu gün Tahir özünü çox pis apardı. O, bütün dərs boyu Rüstəmlə söhbət edir, kitab oxuyurdu.
Coğrafiya müəllimi şikayətləndi ki, bu gün uşaqların əksəriyyəti kontur xəritəni doldurmamışdılar.
İdman müəllimi bildirdi:
– Bu gün oğlanlardan dörd nəfər dərsdə iştirak etmirdi.
Sinif rəhbərinin düşdüyü vəziyyəti qiymətləndirin.
Müəllim yoldaşları Rəfiqə müəlliməyə hansı məsələlərə daha çox diqqət yetirməyi məsləhət görməli idi?
Sinif rəhbəri belə situasiyada onlardan imtina edə bilərdimi? Nə üçün?
Sən necə hərəkət edərdin? (F.M.Məmmədov, F.M.Ələsgərova. Pedaqogikadan məsələ və suallar. Bakı: Maarif, 1993, s. 187-188).
Tapşırıq 2. IX sinfə yeni sinif rəhbəri təyin edilən Arzu müəllimə sinifdə dərs deyən müəllimlərdən riyaziyyat müəlliminin şagirdlərlə daha sərt–avtoritar rəftarının, ədəbiyyat müəlliminin demoktarik–qarşılıqlı anlaşmaya əsaslanan münasibətinin, coğrafiya müəlliminin isə liberal münasibət göstərdiyinin, şagirdlərlə çox mülayim şəkildə rəftarının, bunun müqabilində şagirdlərin bu müəllimlərə və onların dərslərinə ayrı-ayrı münasibətdə olduqlarını müşahidə etdi.
Sinif rəhbərinin bu halda görəcəyi işləri xarakterizə edin.
Sinif rəhbərinin bu prosesə diqqət göstərməsini və müəyyən işlər görməsini məqbul hesab etmək olarmı?
Sinif rəhbərinin bu situasiyaya münasibət göstərməsi onunla müəllimlər arasında münasibətlərə necə təsir göstərə bilər?
Sinif rəhbəri kimi siz necə hərəkət edərdiniz?
Tapşırıq 3. Qrup 4-5 yarımqrupa bölünür, I qrupa sinif rəhbərinin avtoritar müəllimlə işinin xüsusiyyətlərini, II qrupa demokratik müəllimlə aparacağı işlərin xüsusiyyətlərini, III qrupa liberal müəllimlə aparacağı işlərin xüsusiyyətlərini, IV qrupa sinif rəhbərinin ev tapşırıqlarını tənzimləməsi prosesini əks etdirən işlərin xüsusiyyətlərini, V qrupa isə sinif rəhbərinin bütün fənn müəllimləri ilə qarşılıqlı fəaliyyətinin əsas istiqamətlərini qeyd etmələri tapşırılır. Tapşırıqların həllinə 5 dəqiqə vaxt verilir. Sonra təqdimat keçirilir, fikir mübadiləsi və müzakirələr aparılır. Tapşırıqlar ümumiləşdirilir və qiymətləndirmə aparılır.
Dostları ilə paylaş: |