əyləşmişdilər. Tanabay dinməz-söyləməz oturdu. Caydar sonra ayağa durub
ağılın divarlarından tökülmüş daşları hörməyə getdi. Burada iş qurtaran
deyildi. Ancaq ağılı başlı-başına buraxmaq da olmazdı, gecə davar buraya
qatılacaqdı. Bir azdan arvadlar da gəlib daş daşımağa başladılar. Hətta,
qızlar da işə girişdilər. Tanabay qızlara acıqlandı:
– Bircə siz qalmışdınız, – dedi, – qaçın evə!
O utanırdı. Başını qaldırıb arvadların üzünə baxa
bilmirdi. Çoro doğru deyirdi: Caydarsız öz bəlalı başını Tanabay, çox çətin
ki, saxlaya bilərdi...
16
Ertəsi gün Tanabay hamiliyə götürdüyü çobanların
köməyinə getdi, onları da köçürüb gətirdi, sonra bütün həftəni dinclik
bilmədən işlədi. Belə ağır işlə o, yalnız müharibədə, özü də müdafiə xətti
yaradılan vaxtlar üz-üzə gəlmişdi. Ancaq orada bütün diviziya işləyirdi,
bütün ordu işləyirdi. Burada isə üç nəfər – özü, arvadı, bir də bir nəfər
sahmançı qadın. O biri qadın yaxınlıqda qoyun otarırdı.
Tövlələrin peyinini təmizləmək və dərədən itburnu kolu kəsib gətirmək onlara
daha çox əzab
verdi. İtburnu yaman sıx bitmişdi, iti tikanları vardı. Kolların arasında
Tanabay çəkmələrini cırıq-cırıq elədi, öz əsgər şinelinin axırına çıxdı.
Tikanlı kolları iplə bağlayıb sürüyə-sürüyə daşıdılar, çünki onları nə ata
yükləmək mümkün idi, nə də dalda aparmaq olardı. Tanabay əldən-ayaqdan
düşdü. Buraya Beşağac vadisi deyirdilər, ancaq axtarsaydın heç beş kötük də
tapmazdın. İkiqat bükülüb tər tökə-tökə onlar itburnu kollarını tövləyə
sürüyüb yolları şum-porşum elədilər. Tanabayın qadınlara yazığı gəlirdi,
ancaq başqa əlac yox idi. Bir ucdan işləyirdilər, bir ucdan da göyə
baxırdılar. Qar yağsaydı, bütün zəhmətləri bada gedə bilərdi. Bu yandan da
Tanabay böyük qızı tez-tez sürüyə baş çəkməyə yollayırdı – yaxşı ki, hələ
doğum yox idi.
Peyin təmizləmənin əziyyəti bundan da çox oldu. Damı saz olan tövlədən quru,
bərk peyini daşımağa nə var ki? Onu parça-parça doğramaq
olur, üst-üstə qalayıb asanca aparmaq olur. Bu cür qoyun peyinini günə verib
qurudurlar. Qışda onun istisində oturmağın özgə ləzzəti var. Ancaq qar,
yağış altında qalmış peyini daşımaq katorqa işi idi, cəhənnəm əzabı idi. İş
çox, vaxt az. Hətta, gecələr də hisli fənərlərin işığında onlar bu soyuq,
bu yapışqan, bu qurğuşun kimi ağır palçığı xərəyə yığıb daşıyırdılar. İki gün
idi ki, onların gecəsi-gündüzü yox idi.
Həyətdə neçə-neçə peyin tığı
qalanmışdı, ancaq tövlənin peyini daşımaqla qurtaran deyildi, tezliklə
doğacaq qoyunlar üçün onlar tövlənin heç olmasa bir bucağını təmizləməyə
tələsirdilər. Ancaq bununla yara sağalmayacaqdı. Doğar qoyunları və onların
balalarını yerləşdirmək üçün bütün bu tövlə az idi – axı, gündə iyirmi-
otuz quzu doğulacaqdı! Tanabay peyini xərəyə yığırdı, aparıb boşaldırdı,
gedəndə də, gələndə də, yatanda da, duranda da o, yalnız bir şey barədə
düşünürdü: “Bu işin axırı nə olacaq?” Tanabayın başı gicəllənirdi. Qolları
sızıldayırdı. Bir yandan da külək hər dəqiqəbaşı fənərləri söndürürdü.
Yaxşı ki, sahmançı qadınlar işdən şikayət eləmirdilər, Tanabayla, Caydarla
bərabər onlar da gecə-gündüz işləyirdilər.
Bir gün də keçdi, beş gün də
keçdi. Yenə onlar peyin daşıyırdılar, damın-divarın deşiklərini suvayırdılar.
Nəhayət, bir gecə Tanabay xərəklə tövlədən çıxanda səs eşitdi: ağılda
quzu mələyirdi, anası ayaqlarını yerə döyüb, balasının səsinə səs verirdi:
“Deməli, başlandı!” Tanabayın az qala ürəyi yerindən qopdu. Dönüb arvadına
baxdı:
– Eşidirsən? – dedi.
Onlar xərəyi yerə atıb, fənərləri götürdülər, tələsik ağıla qaçdılar.
Fənərlərin işığı qoyunları birbəbir arayıb axtardı.
Bəs o harada idi? Nəhayət, ağılın bir küncündə onlar doğan qoyunu gördülər.
Ana təzəcə dünyaya gəlmiş balasının xırdaca, titrək bədənini yalayırdı.
Caydar quzunu götürüb ətəyinə qoydu.
Yaxşı ki, vaxtında gəlmişdilər, yoxsa quzu soyuqdan ölə bilərdi. Sonra məlum
oldu ki, qoyunların biri də doğub.
Özü də əkiz doğub. Onları Tanabay plaşının ətəyinə qoydu. Bundan əlavə, beş-
altı qoyun da bir azdan doğacaqdı, onlar yerə sərilib mələyirdilər,
çapalayırdılar. Deməli, doğum başlanırdı. Səhərəcən bu mələyib-çapalayan
qoyunlar da doğacaqdı. Sahmançıları çağırdılar. Doğan qoyunları sürüb
tövlənin az-çox təmizlənmiş yerinə apardılar.
Tanabay divarın dibinə saman döşədi, ilk dəfə ana südü əmən balaca quzuların
yerini rahatlayıb üstlərinə
çuval saldı. Soyuq idi. Ana qoyunları da Tanabay birtəhər burada yerləşdirdi.
Və düşündü. Dodağını dişləyib düşündü. Ancaq düşünməyin mənası vardımı?
Ümid bircə Allaha qalırdı, bəlkə onun bu xırdaca quzulara rəhmi gələydi. Hələ
görüləsi nə qədər iş vardı... Bu zəhrimar samansa da barı bol olaydı.
İbrahimə qalsa, o, buna da bir üzrlü səbəb tapacaqdı. Dağdır, deyəcəkdi, yol
yoxdur, mən bura samanı necə daşıyım?!
Qoy nə olacaq olsun! Tanabay
ürəyində hər şeyə tüpürüb tövlədən çıxdı. Gedib evdən bir şüşə mürəkkəb
gətirdi. Quzuların birini “2” rəqəmi ilə işarə elədi, o birini “3” rəqəmi ilə
nişanladı. Eyni cür anaları da nömrələdi. Yoxsa, sonra yüzü birdən mələşəndə
onları bir-birindən ayırmaq olmazdı. Bəli, o gün uzaqda deyildi, çobanın
əsil məşəqqəti başlanırdı.
Başlandı, özü də yaman başlandı, lap cəbhədə müdafiədə olduğu kimi. Sanki,
tanklar bir-birinin ardınca gəlirdi, səndə isə
qorunmaq üçün heç nə yox idi. Səngərdə dayanmışdın, çünki heç yana gedə
bilməzdin. İki yol qalırdı – ya ölmək, ya da təsadüfə ümid bağlamaq.
Səhərlər,
sürü otlamağa gedəndə Tanabay təpənin üstünə çıxıb ətrafı nəzərdən keçirirdi.
Sanki, o, yenə də cəbhədə idi, öz hərbi mövqeyini yoxlayırdı. Tanabayın
mövqeli çox zəif idi, lakin o dayanmalı idi, başqa əlac yox idi. Ortasından
çay axan balaca, kələ-kötür vadi təpələrin arasına sığınmışdı, o yanda
daha uca təpələr görünürdü, daha yuxarıda isə başı qarlı dağlar dayanmışdı.
Ağappaq təpəliklər boyunca çılpaq qayalıqlar qaralırdı, onlardan
yuxarıdakı buz bağlamış zirvələrdə qış dayanıb keşik çəkirdi. İstəsəydi, bir
göz qırpımında o, buranın üstünü alardı. Qara qış bircə dəfə silkələnib
buludlarını aşağı səpələsəydi, bütün bu vadi duman içində itə bilərdi.
Göy boz idi, boz dumana bürünmüşdü. Çöllərdən külək əsirdi. Ətraf sakit, dörd
yan dağ. Narahatlıqdan ürəyə üşütmə düşürdü. Soyuq, xaraba tövlədə quzular
mələşirdilər. Onacan boğaz qoyun indicə sürüdən ayrılmışdı; bu gün onlar
da doğacaqdılar.
Qoyunlar aram-aram çöllərə ot axtarmağa gedirdilər. İndi hər qoyunun üstündə
göz olmaq lazım idi. Sürüdə elə qoyunlar vardı ki,
onların doğacağını bilmək olmurdu. Heç gözlənilmədən özlərini kol dibinə
verib doğurdular. Bala gözdən yayınıb nəm torpaq üstündə qalsaydı, ondan
quzu olacağını gözləməyin mənası yox idi.
Tanabay təpənin üstündə çox dayanırdı, çox düşünürdü. Ancaq burada dayanıb
düşünməyin də heç bir mənası yox
idi. Tövlədə iş əlindən baş qaşımaq olmurdu. Yenə Tanabay qollarını
çırmalayıb işə girişirdi, tövlədə axşamacan əlləşirdi.
Sonra İbrahim gəldi, un
gətirdi – sən hələ utanmazlığa bax!.. Mən, deyir, sənin üçün sarayı hardan
tapım? Kolxozun olanı budur, başqa tövləmiz yoxdur. Hələlik kommunizmə
çatmamışıq.
Tanabay az qaldı ki, yumruq davasına keçsin.
– Bu istehza nədir? – dedi. – Mən sənə söz deyirəm, sən də sözə cavab ver.
Bundan ötrü sabah
mənim yaxamdan yapışacaqlar.
– Bəs mənim yaxamdan yapışmayacaqlar? Siz burda bir sürüyə cavabdehsiniz,
ancaq mən hamınız üçün cavabdehəm, bütün
maldarlıq üçün. Elə bilirsiniz mən əzab çəkmirəm?
Dostları ilə paylaş: |