vıy-vıy vıyıldayır, fənərləri söndürür. Belə vaxtlarda Tanabay kor kimi
ehtiyatla yeriyirdi, səntirləyirdi, pəncəsinin üstündə gedirdi ki, quzuları
ayaqlamasın. Fənəri tapıb yandırırdı və onun solğun işığında özünün qara,
şişkin, qana, peyinə bulaşmış əllərini görürdü.
O, nə vaxtdan özünü aynada
görməmişdi. Qocalmağından, saçlarının ağarmağından xəbərsiz idi. Bilmirdi ki,
indi onun bircə adı var – qoca Tanabay öz hayında deyildi. Heç
yuyunmağa, yeməyə də vaxt tapmırdı. Özünə də, özgələrinə də bir dəqiqə
rahatlıq vermirdi. Nəhayət, o, bu amansız fəlakətin qarşısında tam aciz
olduğunu hiss eləyib, bir gün cavan sahmançını ata mindirdi:
– Get Çoronu tap, – dedi. – De ki, tez özünü bura yetirsin. Gəlməsə, gözümə
görünməsin!
Qadın axşamüstü qayıdıb gəldi. İslanmışdı, gömgöy göyərmişdi, yəhərdən zorla
düşdü.
– Xəstədir, Tanake, – dedi. – Yorğan-döşəkdədir, ancaq deyir ki,
iki-üç günəcən, ölsəm də, özümü yetirəcəyəm.
Tanabay hirsləndi:
– Görüm onu heç xəstəlikdən baş açmasın!
Sonra Tanabay Çoronu söyməyə başladı. Caydar
onun ağzını yummaq istədi, ancaq cəsarət eləmədi.
Üç gündən sonra hava açıldı. Buludlar həvəssiz çəkilib getdilər, duman
dağlara qalxdı. Külək
dayandı. Ancaq gec idi. Bu bir neçə gündə boğaz qoyunlar elə bir kökə
düşmüşdülər ki, adam onlara baxmağa da qorxurdu. Qarnı qabağa çıxmış sısqa
qoyunlar namnazik qıçlarının üstündə zorla dayanırdılar. Bundan sonra onların
süd verib bala bəsləyəcəklərinə ümid etmək olardımı?! Heç doğmuş
qoyunların, yaxud sağ qalan quzuların da yaya çıxacağına ümid yox idi.
Naxoşluq gec-tez xirtdəklərindən yapışacaqdı. Lap naxoşluq olmasa da, onlar
beləcə qalacaqdılar, bu cür davardan nə yun, nə də ət gözləmək olardı...
Hava açılandan sonra yeni bir fəlakət üz verdi – su donmağa başladı. Bərk
soyuq gözlənilirdi. Ancaq günorta havanın yumşalmağı Tanabayı sevindirdi:
yenə ümid işləməyə qalırdı. Bellər, yabalar, xərəklər yenə də işə düşdü.
Heç olmasa tövlənin qabağını açmaq lazım idi, yoxsa orada tərpənmək mümkün
deyildi. Ancaq onlar bu işlə çox məşğul ola bilmədilər. Yetim quzuları
balası ölmüş qoyunların altına qoyub əmizdirmək lazım idi. Qoyunlarsa yad
quzuları yaxına buraxmırdı. Quzular ağızlarını marçıldadıb süd
istəyirdilər. Soyuq dodaqları ilə adamın barmağını tutub əmirdilər. Plaşların
ətəyini yalayırdılar. Onlar dəstə ilə adamın dalınca tökülüşürdülər –
mələşə-mələşə, ağlaşa-ağlaşa.
Ölsən də, çatlasan da bundan artıq iş görmək mümkün deyildi. Bu arvadları nə
qədər işlətmək olardı, bu yazıq qızcığaza
nə qədər zülm etmək olardı?! Yazıqlar ayaq üstdə zorla dayanırdılar.
Əyinlərinin plaşı, neçə gün idi ki, qurumamışdı. Tanabay onlara heç nə
demirdi.
Yalnız bircə dəfə özünü saxlaya bilmədi. Onda da qışqırmamaq mümkün deyildi.
Yaşlı qadın günorta çağı sürünü örüşdən qaytarıb Tanabaya kömək eləməyə
gəlmişdi. Tanabay sürüyə baş çəkməyə getdi. Nə görsə yaxşıdır: qoyunlar bir-
birinin yununu yeyirdilər. Bu, o demək idi ki, sürünü aclıqdan qırılmaq
təhlükəsi gözləyirdi. Tanabay qayıdıb qarının üstünə düşdü:
– Bu nədir, ay arvad! – dedi. – Görmürsənmi? Bəs niyə gəlib xəbər eləmirsən?
Rədd ol
burdan! Sürünü çıxart çölə. Qoyma dayansınlar, bir-birinin yununu
gəmirsinlər! Qov getsinlər. Bir dəqiqə də dayanmağa qoyma. Yoxsa, qırram
hamınızı!
Bir fəlakətin dalınca o biri fəlakət gəlirdi. Bu yandan da iki balalı bir
qoyun öz quzularına düşmən kəsildi. Ana öz balalarını itələyirdi,
təpikləyirdi, onları yaxına buraxmırdı. Quzularsa əl çəkmirdilər, yıxılıb-
durub uşaq kimi ağlaşırdılar. Bu, təbiətin amansız bir qanunu idi:
qüvvəsini itirmiş ana özünü yaşatmaq istəyirdi, daha onun bala əmizdirməyə
gücü çatmırdı və buna görə də instinkt ondan özünü yaşatmağı tələb
eləyirdi. Bu hal xəstəlik kimi yoluxucu bir hal idi. Bütün sürünün bu
xəstəliyə yoluxması üçün bircə qoyunun nümunə göstərməyi kifayət idi. Tanabay
bərk təşvişə düşdü. Aclıqdan vəhşiləşmiş qoyunu o öz qızı ilə birgə tövlədən
çıxartdı. Onu ağıla qatıb quzuları zorla altına saldılar. Əvvəl qoyunun
başını Tanabay saxladı, quzuları əmizdirmək işi qızın boynuna düşdü. Ancaq
qoyun təslim olmaq istəmədi, fırlandı, təpik atdı, qızcığaz heç nə eləyə
bilmədi.
– Ata, quzular əmə bilmir.
–Yalan demə, sən onları tuta bilmirsən.
– Yox, ata, bir bax, ayaq üstdə dura bilmirlər. – Qız az qaldı ki, ağlasın.
–
Yaxşı, gəl qoyunu saxla!
Onlar yerlərini dəyişdilər. Ancaq bu boyda qızın gücü nə olacaqdı. Tanabay
quzuları qoyunun altına salan kimi, hələ quzular
əmməyə macal tapmamış, qoyun vurnuxub aradan çıxdı, qızı yerə çırpıb qaçdı.
Tanabayın səbri tükəndi. Qızın üzünə şillə çəkdi. O heç vaxt uşağa əl
qaldırmamışdı, bu dəfə dözə bilmədi. Qızcığaz hıçqırıb ağladı. Tanabaysa
çıxıb getdi. Hər şeyə tüpürüb getdi.
Sonra o, yenə qayıtdı, bilmirdi ki,
qızın könlünü necə alsın, ancaq qızın özü onun qabağına qaçdı:
– Ata, daha qoyun təpik atmır. Biz anamla quzuları altına qoyduq. Heç nə
eləmədi.
– Bax,
bu başqa məsələ. Sağ ol, qızım.
Ürəkdə də o saat bir yüngüllük əmələ gəldi.
Yenə ümid baş qaldırdı. Sürüdən sağ qalanları, bəlkə də, axıracan qoruyub
saxlayacaqdılar. Budur, hava da düzəlirdi! Bəlkə də, əməlli-başlı yaz
gələcəkdi, çobanın məşəqqətlərinə son qoyulacaqdı. Hər halda dayanmaq
olmazdı.
İşləmək lazım idi. İş, iş və yenə iş – özgə çıxış yolu yox idi...
Kolxozun hesablayıcısı gəldi. Cavan oğlan idi, tez yatıb gec ayılmışdı.
Sorğu-sual
elədi: nə var, nə yox? Tanabay istədi ki, dişinin dibindən çıxanı desin.
Ancaq bu oğlandan çoxmu şey tələb etmək olardı?!
– Bəs indiyəcən harda idin?
–
Necə harda? Sürüləri gəzirdim. Təkəm, yetirə bilmirəm.
– Oralarda vəziyyət necədir?
– Yaxşı deyil. Bu üç gündə tələfat çox olub.
– Bəs çobanlar nə
deyirlər?
– Nə deyəcəklər? Kimisi söyüb-yamanlayır. Kimisi də heç danışmaq istəmir.
Birisi lap qovdu məni. Bektayı deyirəm. Hirslənib. Yaxınına düşmək
olmur.
– Baho-o. Heç mən də vaxt tapıb ona baş çəkə bilməmişəm. Sağlıq olsun, bəlkə
sonra vaxt tapıldı. Bəs sən?
– Nə mən? Mən uçot aparıram.
– Bəs bizə
bir kömək olmayacaq?
– Olacaq. Çoro, deyirlər, durubdur. Bir araba ot-saman göndərib, atların
ruzusudur – bundansa deyir, qoy atlar acından
qırılsınlar. Ancaq, deyirdilər, araba haradasa ilişib qalıb, yolları
görmürsənmi?
– Görürəm! Bəs indiyəcən harda yatmışdılar? Bizimki həmişə belədir.
Bundan sonra o arabanın xeyri nə olacaq? Yaxşı, vaxt gələr mən onlara
göstərərəm! – deyə Tanabay yumruğunu silkələdi. – Məndən heç nə soruşma. Get
özün bax, say, haqq-hesab elə. Daha mənim üçün heç bir isti-soyuğu yoxdur!
Tanabay söhbəti yarımçıq qoyub, tövləyə, doğan qoyunların yanına getdi. Bu
gün də yenə on beşəcən qoyun doğmuşdu. Tanabay öz işində ikən, hesablayıcı
gəlib əlindəki kağızı qabağa dürtüşdürdü:
– Tələfat aktına qol çəkin.
Tanabay gözüyumulu qol çəkdi. Elə hirsli-hirsli çəkdi ki, karandaşın ucu
qırıldı.
– Xudahafis, Tanake. Bir adama sözünüz yoxdur ki?
Tanabay:
– Yoxdur, –
dedi. – Sonra arxadan oğlanı səslədi: – Yolunu o tərəfə sal. Bektaya de ki,
sabah günorta çağı vaxt eləyib gələcəyəm.
Dostları ilə paylaş: |