gəlmir. Bircə onu bilirsiniz ki, döşünüzü qabağa verəsiz. Nə gəldi – ura,
ura! Nə özünüzə bir gün ağlamısız, nə də bizi adam kimi yaşamağa qoyursuz.
Tanabay hirsləndi:
– Sən, dilini bir az dinc qoy, cavan oğlan. Barmağını gözümə soxma. Bunun
sənə dəxli yoxdur. Döşümüzü biz qabağa vermişik, sən
verməmisən. Özümüz də peşman deyilik. Sənin kimilər üçün eləmişik. Əgər biz
döşümüzü qabağa verməsəydik, indi sən belə yekə-yekə danışmırdın. Kino
nədir, qəzet nədir, heç öz adını da bilmirdin. İndi sənin bircə adın vardı –
qul!..
Bu cür açıq-saçıq danışmağına görə ürəyinin harasındasa ona hörmət
eləsə də, Tanabay Bektayı sevmirdi. Bu adamın iradəsi qırılmaqda idi.
Bektayın əyri yola düşdüyünü gördükcə Tanabayın ürəyi yanırdı. Elə ki,
yolları
tamam ayrıldı, bir dəfə onlar şəhərdə təsadüfən rastlaşarkən, Tanabay ona heç
bir söz demədi və onun dediyinə də qulaq asmaq istəmədi.
O ilin erkən
qışı...
Öz qızmış ağ dəvəsində o qış yaman tez çapıb gəldi, çobanları zara gətirib
keçmiş arxayınçılığın heyifini çıxdı.
Oktyabr ayı büsbütün quraqlıq
keçmişdi. Noyabrda qəfildən qış başlandı.
Axşamların birində yenə Tanabay sürünü ağıla qatıb evə qayıtmışdı, o axşam,
guya, hər şey qaydasında idi.
Ancaq gecə arvad onu yuxudan oyatdı:
– Dur ayağa, Tanabay. Mən lap donub əldən düşmüşəm. Qar yağır.
Caydarın əlləri buza dönmüşdü, ondan yaş qarın iyi
gəlirdi. Tüfəng də yaş idi, soyuq idi.
Tanabay çölə çıxdı. Gecənin rəngində qəribə bir ağımsovluq vardı. Əməlli-
başlı qar yağırdı. Ağılda qoyunlar
bərk narahat idilər, silkələnib üstlərindən qarı tökürdülər, qarsa ara vermək
bilmirdi. Tanabay bərk-bərk kürkə qısılıb: “Dayanın, möhkəm dayanın, –
dedi, – hələ bu harasıdır ki! Tələsmisən, qış, yaman tez gəlmisən. Xeyirdimi,
şərdimi? O başdan bəlkə bir az tez çıxıb gedəsən, hə? Doğum vaxtı.
Səndən özgə təvəqqemiz yoxdur. İndi isə nə bilirsən elə. İxtiyar
sahibisən...”
İxtiyar sahibi qış susurdu, xəlvətcə, tələsə-tələsə öz işini görürdü
ki, səhər hamını heyrətə gətirsin, çaxnaşdırsın, pərən-pərən salsın.
Dağların başına yağan da, hələlik qar deyildi, zülmət topaları idi. Bir də,
dağlara nə var ki! Dərd çobanın dərdi idi. Dağlar durduqları kimi də
duracaqdılar.
Tanabayın heç vaxt unuda bilmədiyi o qış belə başlanırdı, ancaq
onun nələr edəcəyi hələlik heç kimə məlum deyildi.
Yağan qar ərimədi, bir neçə gündən sonra yenə yağdı, bir də, iki də, nəhayət,
çobanlar payız
örüşlərindən əl çəkməli oldular. Sürüyə hürküşmə düşdü, qoyunlar dərələrə
soxuldular, qayalarda gizləndilər, qarı az olan yerlər axtardılar.
Çobanların minillik sənəti işə düşdü – davar üçün elə yerlərdə ot axtarıb
tapdılar ki, bir başqası o yerdən başını bulayıb keçərdi, orada qardan
savayı, bir şey görməzdi. Bunun üçün də onlara çoban deyirdilər... Böyüklərə
nə vardı ki? Gəlirdilər, baxırdılar, sorğu-sual aparırdılar, sonra isə
min cürə şey vəd eləyib, çıxıb gedirdilər. Qışla üz-üzə qalan yenə də çoban
olurdu.
Vaxt tapıb kolxoza baş çəkmək hər gün Tanabayın fikrindən keçirdi.
Tanabay doğum üçün nə kimi hazırlıq görüldüyünü bilmək istəyirdi. Ancaq vaxt
harada idi! İş əlindən baş qaşımaq olmurdu. Bir dəfə Caydar internata,
oğlunun yanına getdi, tez də qayıdıb gəldi, çünki onsuz heç cür mümkün
deyildi. Caydar olmayan günlər, Allah bilir ki, Tanabay nələr çəkdi. Kiçik
qızı qucağında oturdurdu, kürkünün arasında gizlədirdi, ancaq böyük qız atın
tərkində soyuqdan əsim-əsim əsirdi. Evdə odun-ocağın da ləzzəti
qalmamışdı.
Ertəsi gün anaları qayıdıb gələndə qızlar bir oyun çıxartdılar ki, gəl
görəsən! Atılıb analarının boynundan asıldılar, xeyli vaxt ayrılmaq
bilmədilər. Yox, ata, əlbəttə, atadır, ancaq anasız o da bir şeyə dəymirdi.
Beləcə, günlər ötüb keçdi. Qışın da dilini başa düşmək çətin idi. Gah
isti, gah soyuq. Bir-iki dəfə çovğun qopdu, sonra hava yenə də yumşaldı, qar
əriməyə başladı. Tanabayı qorxudan da elə bu idi. Əgər doğum isti vaxta
təsadüf eləsəydi, çox yaxşı olacaqdı, bəs birdən soyuq düşsəydi, Tanabay
neyləyəcəkdi?
Vaxt keçdikcə qoyunların qarnı da get-gedə irəli çıxırdı. İri
bala, yaxud əkiz doğası qoyunlar tamam ağırlaşmışdı. Belələri zorla
yeriyirdilər, günbəgün arıqlayırdılar, sümükləri görünürdü. Zarafat deyil ki,
qoyunlar bətnlərində bala böyüdürdülər, onlara canlarından can verirdilər,
özləri isə hər çöpü qar altından min müsibətlə tapırdılar. Gərək belə
vaxtda çoban balalı qoyunlara səhər-axşam yem verəydi; onların dalınca
dağlara ot daşıyaydı, ancaq kolxozun anbarları çoxdan silinib-süpürülmüşdü.
Toxumdan və işlək atlar üçün ayrılmış yulafdan başqa anbarlarda heç nə yox
idi.
Hər səhər Tanabay sürünü ağıldan çıxaranda balalı qoyunları yaxşı-
yaxşı gözdən keçirirdi, onların qarnını, yelinini yoxlayırdı. Belə xəyal
eləyirdi ki, əgər havalar yaxşı keçsə, özünün quzu barəsindəki öhdəçiliyini
yerinə yetirə biləcək, ancaq yun sarıdan Tanabayın bu başdan gözü su içmirdi.
Qış ərzində gələn tük onu əsla qane eləmirdi, üstəlik, bəzi qoyunların
tükü artmaqdansa seyrəlirdi, – bunun da səbəbi, şübhəsiz, yemin azlığı idi.
Düşündükcə Tanabayın qanı qaralırdı, hirslənirdi, ancaq əlindən heç nə
gəlmirdi. Çoronun sözünə baxdığına görə o, ən pis söyüşləri özünə yağdırırdı.
Axı, o niyə tribunaya çıxdı? Yekə-yekə vəd verdi? Mən beləyəm, mən
eləyəm, qabaqcılam, partiyanın və xalqın qarşısında söz verirəm. Barı bu
sözləri deməyəydi! Axı, partiyanın və xalqın buna nə dəxli vardı! Adicə
təsərrüfat işi idi. Yox, gərək deyəydi... Belə tələb olunurdu. Bəs nə
vaxtacan, görəsən, tribunaya çıxanlar yerli-yersiz bu sözləri işlədəcəkdi?..
Nə
etmək, günahkar Tanabayın özü idi. Düşünməmişdi; onun-bunun ağzı ilə oturub-
durmuşdu. Onlara nə var ki, əkilib aradan çıxmışdılar, Tanabayın bircə
Çoroya yazığı gəlirdi. Çoronun heç baxtı gətirmirdi. Bir gün sağ olanda iki
gün xəstə yatırdı. Çoro ömrü boyu çalışıb-çapalamışdı. İndi də qüvvəsi
daxilində əlləşirdi, camaatı dilə tuturdu, inandırırdı, ancaq xeyri nə idi?
Özü də hər şeydən ehtiyat eləməyə başlamışdı, sözünə-söhbətinə sərhəd
qoyurdu. Madam ki, xəstə idi, çıxıb evində otursaydı, yaxşı olmazdımı?..
Qışsa öz işini görürdü, çobanları gah qorxuya salırdı, gah da sevindirirdi,
ürəkləndirirdi. Tanabayın sürüsündə iki anac qoyun ölmüşdü – zəiflikdən tab
gətirə bilməmişdilər. Onun hamiliyə götürdüyü cavan çobanların da
sürülərində bir neçə tələfat olmuşdu. Bunsuz mümkün deyildi. Hər sürüdə beş-
on tələfat qış üçün adi bir hal sayılırdı. Hələ əsas məsələ qabaqda idi –
yazın başlanğıcında.
Sonra havalar birdən-birə qızmağa başladı. Yelinlər günbəgün şişib yekəldi.
Adamın qoyunlara yazığı gəlirdi, arıqlıqdan zorla
yeriyirdilər, qarınlarını zorla çəkib aparırdılar, ancaq işə bax ki, məmələr
öz işində idi, qoyunların əmcəyi saatbasaat böyüyürdü. Arada söz gəzirdi
ki, hansı sürüdəsə bir neçə doğum olub. Deməli, cütləşdirmə vaxtı
diqqətsizlik edilmişdi. Bu hələ işarə idi. Bir-iki həftədən sonra quzular
yetişmiş
armud kimi tökülüşəcəkdi. Onları yığıb-yığışdırmaq mümkün olmayacaqdı.
Çobanın əsil məşəqqəti başlanacaqdı. Hər quzunun üstündə o, yarpaq kimi
əsəcəkdi, sürüyə gəldiyi günə lənət yağdıracaqdı və sevincinin həddi-hüdudu
olmayacaqdı – əgər quzunu saxlaya bilsəydi, yaşada bilsəydi, qışdan
çıxara bilsəydi.
Bəli, kaş belə olaydı! Elə olaydı ki, çoban camaatın üzünə alnıaçıq çıxa
biləydi...
Doğum vaxtı çobanlara kömək eləmək üçün kolxozdan
bir neçə qadın göndərdilər. Çoxusu ağbirçək qarılar idi, bir də uşaqsız
arvadlar gəlmişdilər, çünki kənddən hər qadın bura gəlməzdi. Tanabaya da iki
Dostları ilə paylaş: |