18
Almaniyanın ciddi təzyiqi ilə üzləşdi. Osmanlı dövlətinin müttəfiqi olan Almaniya
Türkiyənin Azərbaycana hərbi yardım göstərməsinə qəti etirazını bildirdi. 1918-ci
il iyulun sonu - avqustun əvvəllərində Almaniya hərbçiləri Qafqaz İslam Ordusu
hissələrinin Bakıya doğru irəliləməsinin və Bakı neftinin Osmanlı hökumətinin
nəzarəti altına keçməsinin qarşısını almaq üçün Ənvər paşa qarşısında sərt tələblər
qoydular. Almaniyanın tələbinə görə, türk hərbi hissələri Bakıya doğru hücumu
dayandırmalı və geri çəkilməli idi. Əks təqdirdə, türk ordusunda xidmət edən
alman zabitləri geri çağırılmalı və Almaniya türk, hərbi hissələrinin Bakıya doğru
irəliləməsinin qarşısını almaq üçün konkret tədbirlər həyata keçirilməli idi. Odur
ki, Ənvər paşa türk ordusunda kifayət qədər yüksək vəzifələrdə olan alman
zabitlərinin diqqətini Bakını azad etmək əməliyyatından yayındırmaq üçün, rəsmi
olaraq, 1918-ci il avqustun 4-də 3-cü ordu komandanına göndərdiyi məktubunda
yazırdı: «Nuru paşaya çatdırılması lazımdır: əmri qəti təkrar edirəm ki, Bakıya heç
bir surətlə tərəfimizdən düçari-təərrüz (hücum) olmayacaqdır. Bundan başqa hansı
çətə (silahlı dəstə) olursa-olsun və haradan gəlirsə-gəlsinlər Bakıya qarşı heç
kimsənin irəliləməməsi haqda təkmili-nüfuzunuzu istemal etməlisiniz...» Bununla
alman hərbçilərini duyuq düşməyə qoymayan Ənvər paşa, eyni zamanda, Nuru
paşanın yanına şəxsi nümayəndəsini göndərib tələb etdi ki, rəsmi məktublara fikir
verməsin və Bakının azad olunmasını tezliklə başa çatdırsın. Bundan əlavə, Ənvər
paşa Bakının azad olunması əməliyyatını qələbə ilə başa çatdırmaq üçün 15-ci türk
diviziyasının da Azərbaycana göndərilməsinə nail oldu.
Ənvər paşanın Bakının azad edilməsinə nə qədər böyük önəm verdiyi onun
Nuru paşaya göndərdiyi teleqramdan da aydın görünür: «Böyük Turan
imperatorluğunun Xəzər kənarındakı zəngin bir qonaq yeri olan Bakı şəhərinin
zəbti xəbərini böyük bir sevinc və mutluluqla qarşıladım. Türk və İslam tarixi sizin
bu xidmətinizi unutmayacaqdır. Qazilərimizin gözündən öpər, şəhidlərimizə
fatihələr ithaf edərim».
Bakı azad edildikdən sonra Ənvər paşa onun mühafizəsinin
gücləndirilməsinə də xüsusi əhəmiyyət verirdi. 1918-ci il oktyabrın 1-də Nuru
paşaya məktubunda o, Bakının dənizdən mühafizəsinin gücləndirilməsini tələb
etdi. Bu məsələnin həlli və bütünlüklə Azərbaycan milli hərbi qüvvələrinin
möhkəmləndirilməsi üçün, Ənvər paşanın əmri ilə, 1918-ci il oktyabrın
əvvəllərində Azərbaycana çoxlu silah və sursat göndərildi. Türk hərbi qüvvələri
Azərbaycanı tərk etməyə məcbur olduqda, Osmanlı dövlətinin Qafqaz siyasətinin
əsas təşəbbüsçülərindən biri olan Ənvər paşa Nuru paşanın diqqətini Azərbaycanın
müstəqilliyinin qorunmasına və möhkəmləndirilməsinə yönəltməyə çalışırdı. O,
1918-ci il oktyabrın 15-də Nuru paşaya ünvanladığı məktubunda yazırdı:
«Düşmənlə... sülh yapmaq məcburiyyətinə girdim. ...Bizim vəziyyətdə
Azərbaycanın istiqlalını təmin qayət mühümdür».
Birinci dünya müharibəsinin nəticələrinə əsasən, Osmanlı hökuməti istefa
vermək məcburiyyətində qaldıqda, Ənvər paşa Azərbaycana gəlmək və ölkənin
19
müstəqilliyinin möhkəmləndirilməsinə xidmət göstərmək niyyətində idi. O, 1918-
ci il oktyabrın 23-də Xəlil paşaya göndərdiyi məktubda yazırdı: «Ümumi
vəziyyətin sülhə getməmizi icab etdiyini yazmışdım. Bu vəziyyətdə Azərbaycanın
təşəkkülünü təmin etməyi mühüm bir vəzifə bilirəm. Əvvəla, oranın təşkilatının
ikmalı üçün adam, silah, cəbbəxana ilə həmən yardım edilsin. Buradan ora 700 min
lirə göndəririm. ...Başladığımız hərbi iyi bitirmədiyimiz üçün çəkilmək üzrəyiz.
Mən işsiz indi sıxılacağımdan bəlkə Azərbaycana indilik səyahət üçün, bilaxərə də
orada bir həyat əsəri görərsəm, büsbütün qalmaq üçün hərəkəti düşünürəm».
Müttəfiqlər tərəfindən məğlub edilmiş Osmanlı dövləti üçün təslim aktı olan
Mudros barışığı (1918) imzalanandan sonra Ənvər paşanın həyatına təhlükə
yarandı. Belə olduqda o, 1918-ci il noyabrın 8-də hökumətin bir neçə üzvü ilə
birlikdə Azərbaycana gəlmək üçün gizlicə Türkiyəni tərk etmək məcburiyyətində
qaldı. Alman gəmisi ilə Krıma gələn Ənvər paşa Şimali Qafqazda hərbi şəraitin
kəskinləşməsi üzündən Azərbaycana gələ bilmədi və Moskvaya getdi. Ənvər paşa
burada «İslam ihtilal cəmiyyətləri ittihadı»nı yaratdı. Bu cəmiyyətin nümayəndəsi
kimi Azərbaycana gəldi və 1920-ci il sentyabrın 1-7-də Bakıda keçirilən Şərq
xalqlarının qurultayında iştirak etdi. Qurultayda iştirak edən türk kommunistlərinin
tələbi ilə onun çıxışına imkan verilmədikdə, Zinovyevin təklifi ilə Ənvər paşanın
çıxışının mətni bolşevik Ostrovski tərəfindən oxundu.
Lakin bolşevik hökuməti ilə əməkdaşlığın onun əqidəsinə zidd olduğunu
anlayan Ənvər paşa 1922-ci ildə yenidən Bakıya gəldi və buradan Türküstana
keçdi. Türküstanda sovet-bolşevik işğalçılarına qarşı azadlıq mübarizəsinə
qoşuldu. Ənvər paşa 1922-ci il avqustun 4-də indiki Tacikistan ərazisində, Abi-
Dərya çayı kənarında bolşevik qüvvələrinə qarşı döyüşdə şəhid oldu. 20-ci əsrin
90-cı illərində onun cənazəsinin qalıqları İstanbula gətirilərək burada torpağa
tapşırıldı. İndi isə Azərbaycanın müstəqilliyi tarixinə böyük töhfə verən Nuru
Paşanın həyat tarixçəsinə qısaca nəzər salaq.
Nuru Paşa (1889, İstanbul - 1949, İstanbul) - Qafqaz İslam Ordusunun
komandanı, Osmanlı ordusunun general-leytenantı. 1934-cü ildən etibarən Killigli
soyadını götürmüşdür. İlk təhsilini başa vurduqdan sonra 1906-cı ildə quru
qoşunları məktəbinə daxil olmuş, 1909-cu ildə həmin məktəbi bitirərək, zabit kimi
xidmətə başlamışdı. 1913-cü ildə yüzbaşı, 1916-cı ildə minbaşı, 1918-ci ildə isə
yarbay rütbələri almışdı. Birinci dünya müharibəsi (1914-18) illərində Şimali
Afrikada olan Osmanlı ordusunda xidmət edirdi. O, Liviya ərazisində cəbhə
komandanı idi. Elə buradakı xidməti dövründə Nuru paşa özünün hərbi istedada
malik olduğunu nümayiş etdirmişdi. Liviya cəbhəsində göstərdiyi igidliklərə görə
Nuru paşa minbaşı rütbəsinə, 1916-cı ildə «Altun ləyaqət» medalına, Almaniyanın
Dəmir xaç medalına, 1917-ci ildə «Altun imtiyaz» medalına, habelə Avstriya-
Macarıstan dövlətinin üçüncü dərəcəli fərqlənmə nişanına layiq görülmüşdü.
Trablus qərb cəbhəsində göstərdiyi şücaətə görə, Nuru paşa Trablus qərb
qəhrəmanı kimi də tanınır.