Risklərin İdarə Edilməsi Standartı Azərbaycan Mərkəzi Bankı
5
Risklərin idarə edilməsi böllməsi
Risklərin idarə edilməsi bölməsinin məqsədi gündəlik olaraq RİK-in fəaliyyətinə əməliyyat
dəstəyinin təmin edilməsidir. Risklərin idarə edilməsi bölməsinə RİK tərəfindən verilən
spesifik tapşırıqlar bankın fəaliyyətinin xüsusiyyətindən asılıdır.
Risklərin idarə edilməsi bölməsi bankın fəaliyyətinin Müşahidə Şurası tərəfindən
təsdiqlənən risk limitləri çərçivəsində həyata keçirilməsinə nəzarət edir. Risklərin idarə
edilməsi bölməsi hər bir əməliyyat bölməsinin fəaliyyəti nəticəsində üzləşdiyi bütün
spesefik risklərin müəyyən edilməsini, onların idarə edilməsi üçün qayda və prosedurları, o
cümlədən hər bir işçinin risklərin idarə edilməsi sahəsində vəzifə təlimatının hazırlamasını
təmin edir. Həmçinin, Risklərin idarə edilməsi bölməsi hər bir əməliyyat bölməsində
risklərin idarə edilməsi fəaliyyəti barədə müntəzəm olaraq hesabatları təqdim edən
sistemin fəaliyyət göstərməsini təmin etməlidir. Bu səbəbdən Risklərin idarə edilməsi
bölməsini əməliyyatlar barədə məlumatla təmin edən bölmələr bank fəaliyyətini həyata
keçirən əməliyyat bölmələrindən müstəqil olmalıdır. Əməliyyat bölmələri müəyyən
edilmiş limitləri aşarsa, baş verən pozuntu halları barədə Risklərin idarə edilməsi
bölməsinə məlumat verilir. Risklərin idarə edilməsi bölməsi yarana bilən riskləri müzakirə
edir və təcili görülməli tədbirlər barədə RİK-ə məruzə edir.
Risklərin idarə edilməsi qaydaları
Risklərin idarə edilməsi qaydaları, bankda risklərin idarə edilməsi düzgün tətbiqini təmin
etmək məqsədilə riayət olunmalı prosedurları tam və aydın müəyyən edən daxili
qaydalardır.
Bu qaydalar, Risklərin idarə edilməsi bölməsi və RİK tərəfindən hazırlanır, İdarə Heyəti
ilə razılaşdırılır və Müşahidə Şurası tərəfindən təsdiq edilir.
Risklərin idarə edilməsi qaydaları bankın fəaliyyətinə və üzləşdiyi risklərə uyğun olması
məqsədi ilə müntəzəm olaraq RİK tərəfindən təhlil edilir, təkmilləşdirilməsinə və ya
yenidən işlənməsi barədə rəyə gəldikdə bunu həyata keçirir və müvafiq qaydada təsdiq
olunması üçün tədbirlər görür.
Risklərin idarə edilməsi qaydaları hazırlanarkən aşağıdakılar nəzərə alınmalıdır:
Bankın ümumi biznes strategiyası;
Bankın riskə qarşı dözümlülüyü. Bu hədəflənmiş mənfəəti əldə etmək üçün bank öz
üzərinə götürəcək vəzifələrin və həyata keçirəcək əməliyyatların risk dərəcəsidir. Riskə
qarşı dözümlülük səviyyəsi öz əksini bankın əməliyyat bölmələri üçün təyin edilmiş risk
limitlərində tapır;
Bank tərəfindən aparılan əməliyyatların həcmi, xüsusiyyəti və mürəkkəbliyi;
Daxili nəzarət prosedurlarının keyfiyyəti;
Daxili təcrübənin səviyyəsi. Bu səviyyə risklərin idarə edilməsi bölməsinin
əməkdaşlarının müvafiq sahədə müxtəlif tapşırıqların yerinə yetirməsi üçün tələb olunan
xüsusi bilik və təcrübəyə malik olmaları ilə müəyyən edilir;
Bankın keçmiş risk təcrübəsi və risklərin təzahürü. Bəzən bankın keçmiş fəaliyyəti
nəticəsində bəzi risk amilləri özünü elə göstərir ki, onların gələcəkdə ayrıca olaraq nəzarət
edilməsi və qiymətləndirilməsi tələb edilir;
Bankın mükafatlandırma siyasəti və xüsusilə bank rəhbərliyinin və işçilərinin
mükafatlandırılmasının bankın fəaliyyət nəticələrindən asılılığı. Buraya hər bir işçinin və
hər bir istiqamətdə fəaliyyətinin qiymətləndirilməsi üçün bal sistemi və balların
mükafatlandırma məbləği ilə uyğunlaşdırılması daxil olmalıdır;
Risklərin İdarə Edilməsi Standartı Azərbaycan Mərkəzi Bankı
6
Risklərin idarə edilməsi bölməsi risklərin idarə edilməsi qaydalarını tərtib edərkən hüquq,
vergi və mühasibat uçotu məsələləri kimi digər amilləri nəzərə almalıdır, çünki bu
məsələlər bankın limit strukturuna təsir göstərə bilər.
Hər bir əsas risk kateqoriyası üçün risklərin idarə edilməsi qaydaları, Risklərin idarə
edilməsi bölməsində çalışan mütəxəssisləri tərəfindən müvafiq bölmə rəhbərlərinin
köməyi ilə tərtib edilməli və RİK-ə təqdim olunmalıdır. RİK-in tövsiyyələri əsasında bu
qaydalar Müşahidə Şurası tərəfindən təsdiq edilir.
Risklərin idarə edilməsi bölməsi və RİK müntəzəm olaraq hər bir risk kateqoriyası üzrə
risklərin idarə edilməsi qaydalarına düzəlişlər etmək üçün tövsiyələr verir. Bundan əlavə
lazım gəldikdə Risklərin idarə edilməsi bölməsi bankın spesifik risklərinin idarə edilməsi
qaydalarında fəaliyyət mühitindəki yeni hadisələri dərhal və uyğun olaraq əks etdirilməsini
təmin edir.
Səlahiyyət iyerarxiyası və səriştə səviyyələri
Bankın təşkilati strukturu aydın iyerarxiyaya və səlahiyyətlərə malik olmalıdır ki,
Müşahidə Şurası və İdarə Heyəti bankın fəaliyyətinə və fəaliyyət nəticəsində yaranan
risklərinə nəzarət etmək iqtidarında olsun.
Müşahidə Şurası İdarə Heyətinin tərkibini elə müəyyənləşdirməlidir ki, onun üzvləri
bankın fəaliyyətinin həcminə və xüsusiyyətinə uyğun lazımi səriştəyə, bankın dəyişən risk
profili və xarici bazarın inkişafı haqqında məlumatların yiyələnməsinə malik olsunlar.
İdarə Heyəti öz fəaliyyətləri ilə əlaqədar əsas riskləri anlamalı və bankın effektiv və
nəzarət olunan qaydada fəaliyyət göstərməsi üçün mükəmməl və etibarlı daxili nəzarət
mühitinin yaranmasına və saxlanmasına sadiq olmalıdır. Daxili nəzarət qaydaları, bankın
fəaliyyətinin xüsusiyyətinə və həcminə, üzləşdiyi risklərə uyğun olmalıdır. Bu qaydalar
üzrə məsuliyyəti İdarə Heyəti daşımalı və aşağıdakıları əhatə etməlidir:
Təşkilati strukturda: səlahiyyətlər iyerarxiyası, vəzifə və məsuliyyət, o cümlədən,
səlahiyyətlərin həvalə olunması, qərarların qəbul edilməsi prosedurları və önəmli
funksiyaların bölüşdürülməsi aydın şəkildə müəyyənləşdirilməlidir. Bu proses strateji
planlaşdırma prosesi ilə əlaqələndirilməlidir;
Maliyyə və uçot prosedurları: buraya maliyyə nəzarəti üzrə məsuliyyət, o cümlədən
hesabların tutuşdurulması, nəzarət siyahıları, rəhbərlik üçün maliyyə və qeyri-maliyyə
əməliyyat məlumatları daxildir;
Əməliyyat nəzarəti: buraya əsas nəzarət prosedurları, o cümlədən vəzifələrin
bölüşdürülməsi, çarpaz yoxlamalar, aktivlərin ikitərəfli nəzarəti, ikitərəfli imzalanmalar və
s. daxildir;
Aktiv və investisiyaların qorunması, o cümlədən fiziki nəzarət.
Risklərin idarə edilməsi səlahiyyətlərinin həvalə edilməsi
Bankın təşkilati strukturunda risklərin idarəedilməsi sisteminin əsasları təmin etməlidir ki,
onun əsasında risklərin idarə edilməsi səlahiyyətləri Müşahidə Şurası və İdarə Heyəti
tərəfindən müəyyən edilmiş aydın tapşırıqlar çərçivəsində əməliyyat bölmələrinə həvalə
edilsin, RİK və Risklərin İdarəedilməsi Departamenti tərəfindən nəzarət edilsin.
İdarə Heyəti, Risklərin İdarəedilməsi Departamentindən mütəmadi olaraq idarəedici
məlumat almalı və bu məlumatdan işgüzar qərarların qəbul edilməsi prosesində istifadə
etməlidir.
Ümumi təşkilati struktur daxilində Risklərin İdarəedilməsi Departamenti bankın risk
strategiyasının və risklərin idarə edilməsi qaydalarının tətbiq edilməsinə məsul olmalıdır.
Risklərə nəzarət, onların ölçülməsi və qiymətləndirilməsi üzrə gündəlik məsuliyyət, digər