102
mis qazanlar asıldı, sac qovurma, plov və s. yeməklərin tədarükü
görüldü. Bütün doğmalar qoca tut ağacının altına yığışıb hərə
bir işlə məşğul idi. Qaradolaqdan Həsən bəyin xalası uşaqları,
dayıları da onu təbrik etməyə gəlmişdilər. Həsən bəyin ailəcanlığı,
doğmalarına məhəbbəti, kənd əhalisinə, qocalara, kimsəsizlərə
ehtiramı bir qədər də artmışdı. O, anasından kənddəki qocalar
haqqında soruşdu:
– Ana, Laçın xala yaşayırmı?
– Yox, ağrın alım, oğlundan yazdılar, yazdılar, axırda Sibirə
göndərtdikdən sonra yazıq arvad dözmədi, ürəyi partladı.
– Bəs Novruz kişi, bizim biçənəklərdə qarovulçu işləyən
Novruz əmini deyirəm. Mən gedəndə onun ayaqları tutulmuşdu.
– Mehralı sağ olsun, onlara ev tikdi, hər ay da xərcliklərini
göndərir. Bizim tarlada işləyənlərdən kimlərin ailə və dolanışıq
çətinliyi var, qardaşların gücləri çatan qədər yardım edirlər. Allah
ürəklərinə görə versin. Atan köhnə qubernatorla elə münasibət
qurmuşdu, kimin problemi üçün getsəydi, düzələrdi. İndi Göyçay
qəzasına insafsızın birini göndəriblər, hamıya zülm edir.
Səfərəli əlində şiş içəri girdi, ana-balanın söhbətinə bir qədər
“duz” qataraq:
– Oğul Moskva alimi, ana da “Qarabağın köhnə siyasətçi
xanımı”, daha bizə nə lazımdır. Ay ana, sən siyasətlə məşğul
olmaqdansa, bu uşağın qeydinə qal, bir dəri, bir sümük qalıb.
– Bundan sonra yanımdadır, hər səhər, hər axşam könlü
istəyənləri bişirəcəm balama.
– Yox, ay ana, mən Zərdabda o qədər də çox qalmayacam. Hələ
Moskvada ikən mənim işləyəcəyim yeri də müəyyənləşdiriblər.
Mənə Tiflisdə torpaq ölçmə idarəsində işləməyim məsləhət
görülüb.
– Niyə belə, ay oğul, mən yenə sənin üzünə həsrət qalacam?
– Niyə ki, mən evə tez-tez gələcəm.
Hamı gedəndən sonra Mənzər xanımla Həsən çardaqda baş-
başa qaldı. Həsən yatağa uzanmamış Mənzər xanım fürsətdən
istifadə edərək dedi:
– Həsən, sənə bir şey demək istəyirəm. Bax, oğlum, fikrimcə,
tezliklə səni nişanlayaq, sonra get Tiflisə. Bir azdan sonra toyunu
103
edərik. Mən də arxayın olaram ki, Tiflisdə tək deyilsən, qayğını
çəkən var.
– Anam, gözəl anam. Niyə tələsirsən, mən öz qayğıma qala-
ram. Hələlik ürəyimdə bir qız yoxdursa, mən kiminlə nişanlana
bilərəm?
– Qıza nə gəlib? Bax, saymışam, xalaqızları, əmiqızları,
dayıqızları, bibiqızları içində sənin bəyənəcəyin on beşə qədər qız
var. Hidayət əminin qızı, balacasını deyirəm, ay parçası kimidir.
– Ana, sənin hər sözün mənim üçün qanundur, amma bu
evlənmək məsələsini hələlik ağzına alma, oldumu?
– Yaxşı, sən deyən olsun, Həsən.
– Ana, həyətdəki açıq çardaqda, sənin tikdiyin miçətkənin
altında yatmaqdan ötrü burnumun ucu göynəyirdi. Sən də yanımda
yatarsan, mənə olub-keçənlərdən danışarsan.
– Anan qurban, ay oğul, sən nə qədər evinə, ailənə bağlısan,
sənə qurban olum.
Həsən kənddə on gün qaldı, gecələr çardaqda yatdı. On günün
içində gördüyü, rastlaşdığı problemlər, kənd adamlarının idarə-
müəssisələrdə rastlaşdıqları haqsızlıqlar onu dərindən düşündürdü.
Bir gün həyətdə alaqapı arxasında oynayan uşaqların səs-küyünün
şahidi oldu. Yaşlı bir kişi armud satmaq istəyirdi. Uşaqlar onun
arxasınca düşərək müxtəlif hərəkətlərlə “dolamağa” çalışırdılar.
Uşaqların bir hissəsi onun başını qatır, o birilər açıq xurcundan
armudları oğurlayırdılar. On-on beş uşaq xorla:
– Göy Vəli, ay göy Vəli, əsanı yerə döy, Vəli, – deyərək yaşlı ki şini
küçə boyu müşayiət edirdilər. Kişi gah acıqlanır, gah susur, nəhayət,
xurcundan armud götürən uşağı qəfil tutaraq, döyməyə başlayır:
– Ay köpək uşağı, mən sizin əlinizdən bir dənə də olsun armud
satmamışam. Belə həyat olar, belə ömür-gün olar?!
Uşaq çığıranda yoldaşları bir az aralandılar, kişini də, ulağı da
daşlamağa başladılar. Həsən darvazadan küçəyə çıxdı:
– Ay əmi, uşağı niyə döyürsən?
– Ay oğul, kasıb adamam, bunların əlindən mən bu kənddə bir
dənə də armud satmamışam.
Həsən xurcundakı bir tay armudun pulunu ödəyərək uşaqlara
payladı.
104
– Sağ ol, ay oğul, vallah, gəlib həyətdə nə qədər yeyirlər,
yesinlər, bunları bir tikə çörək pulu üçün satmağa gətirmişəm.
Həsən sual verdi:
– Uşaqlar, söz verirsiniz, bir də belə şeylər etməyəcəksiniz?
– Bəli, bəli! – uşaqlar səs-səsə verdilər.
– Kim mollaxanada oxuyur?
– Heç birimiz.
“Necə oxusunlar, ona da nəsə ödəmək lazımdır”.
Həsən bəy uşaqların biliklərini, sadə say, vurma-toplama,
çıxma, bölmə bilgilərini yoxladı. Uşaqlar heç nəyə cavab verə
bilmədilər. Tapmacalar soruşdu. Uşaqlar bir-birinə aman vermədən
yüzə qədər tapmaca, oyun adı söylədilər. Demək, ev məktəbinin,
ana, nənə məktəbinin nəticəsi yüz faizdir, mənimsəmə qabiliyyətləri
əladır, hər şey aydın idi.
“Mütləq, mütləq burada məktəb açmaq lazımdır. Biz buna nail
olmalıyıq. Belə ağıllı, çevik, mehriban uşaqların göz görə-görə kor
olmasına dözə bilmərik. Hər bir uşağın təhsili növbəti mərhələlərdə
yüzlərlə yeni uşağın savadlı olması deməkdir. Beləliklə, hər on ildən
sonra minlərlə insanın savadlı olması tezliklə ölkədə savadsızlığın
kökünü kəsər. Əgər hər kənddə dörd sinifli bir məktəb açılarsa...”
Bu an uşaqların yaşlı kişiyə oxuduqları nəğmənin mənası
Həsənin yadına düşdü: “Göy Vəli”, yəni xəsis, simic Vəli deyir-
miş lər… “Ay aman bu uşaqlar kişiyə göy, göy – yəni xəsis-xəsis
deməklə, ondan müftə armud qoparmaq istəyirmişlər. Nə qədər
çevik düşünürmüşlər bu şeytanlar”.
Həsən hər dəfə Moskvadan gələndə kənddəki yaşlı adamlarla
hal-əhval tutmağa gedərdi. Bunu o qədər sevə-sevə edərdi ki,
gördüyü işdən könül rahatlığı tapardı.
Bir gün Həsən mədrəsənin yanından keçib əmisi Hidayətgilə
gedərkən, qardaşı Səfərəli söylədi ki, molla Məhəmmədi görsən,
heç tanımazsan, çox qocalıb… Amma məni nə zaman görsə, səni
soruşur, deyir “mən bilirdim, onunku mədrəsəlik deyil”. Molla,
Səfərəlidən Həsənin namaz qılıb-qılmadığını soruşanda o cavab
verib ki, gələr, özündən xəbər alarsan.
– Həsən, gəlsənə, yolüstü molla Məhəmmədlə görüşək.
Həsən bu görüşə məmnuniyyətlə razılaşdı. Molla həyətdə
Dostları ilə paylaş: |