Bu baxımdan Azərbaycan pis deyil. Əksinə, Azərbaycanın yüksək intellektual səviyyəli gözəl
alimləri, dəqiq elmlər sahəsində çox güclü mütəxəssisləri var. Hətta Azərbaycanda yetişən
dəqiq elmlər üzrə mütəxəssisləri Türkiyəyə çatan kimi universitetlərə, institutlara işə
götürürlər, çünki bizim mütəxəssislərin hazırlığı çox yüksək səviyyədədir. Amma indi
Azərbaycanda maarifə, elmə ögey, yabançı, yırtıcı, dağıdıcı, düşmən münasibət var. Rüşvət,
pul bunların hamısını dağıdır. Gələcəkdə indiki iqtidarın cinayətlərindən biri də bu sayılacaq.
Türkiyədə çox güclü bir ziyalı, aydınlar təbəqəsi var; o, imkan verməyəcək geri getməyə. Bu,
Türkiyənin xoşbəxtliyidir. Bu da sevindiricidir ki, o aydınlar təbəqəsi dağılmır - onlar artıq
maddi baxımdan da normal səviyyədə təmin olunurlar. Doğrudur, bəzən onların da, məsələn,
məişət çatışmazlıqları olur, yaxud, deyək ki, hələ Amerika alimi, alman alimi kimi yaşaya
bilmir, amma Türkiyə bu baxımdan, məsələn, Asiya ölkələrindən çox-çox qabaqdadır. O ziyalı
aydınlar təbəqəsi, məncə, imkan verməyəcək ki, Türkiyədə cahillik, geriçilik üstünlük əldə
etsin, əksinə, Avropaya yaxınlaşmaqçün onlar ölkəni inkişafa aparacaqlar. Sadəcə olaraq, bu
aydınlar təbəqəsinə dövlət yiyə durmalıdır, siyasətində ona geniş yer verməlidir, milli təhsilə,
ali savadlılığa pul buraxmalıdır. Türkiyənin universitetlər şəbəkəsi çox genişdir, çoxlu
tələbələri var. Allah qoysa, Türkiyə geriçilərə təzyiqi artırıb indiki doğru istiqamətdən sapmasa
5-6 ilə kimi bu gerilikçi böhrandan çıxacaq.
Türkiyə, eyni zamanda, başqa türk cümhuriyyətlərindən olan tələbələri də toplayır. Bu da
dövlətçün ağırlıqdır - başqa türk ölkələrindən aşağı-yuxarı on minlərcə tələbə oxuyur və
bunların hamısının təhsil xərci Türkiyənin üstünə düşür. Bu qədər insanı oxutmağa, oxuduğu
müddətdə yaşatmağa milyonlarca dollar xərc lazımdır. Doğrudur, indi Türkiyə bu nəhəng
xərci öz xalqının boğazından kəsərək çəkməli olsa da türk dövlətlərinin gələcəyi üçün bu
xərcdən qat-qat artıq olacaq mühüm strateci qazancın özülünü qoyur - onun yetişdirdiyi
kadrlar türk xalqlarının milli tərəqqisində əvəzsiz xidmət göstərəcəklər. Onlar daha Moskvanın
yetişdirdiyi, Tehranın yetişdirdiyi manqurd düşüncəli uşaqlar olmayacaqlar. Bunlar əsl türk
məfkurəsiylə, türk əxlaqıyla böyümüş aydınlar olacaqlar, indiyədək yalnız arzularımızda
mövcud olmuş böyük yeniliyin əsasını qoyacaqlar. Bu, çox sevindirici haldır...
Bəy, xatırlatmaq istəyirəm ki, Türkiyəyə ilk dəfə olaraq məhz bizim hakimiyyət dövründə 2
mindən artıq tələbə göndərildi.
Çox düzdür. O zaman rəhmətlik Turqut Özalla söhbət etdik, mənə söz verdi ki, Türkiyə hər il
Azərbaycandan 2 min tələbə götürəcək və onların bütün təhsil xərclərini ödəyəcək. Əgər biz
beş il hakimiyyətdə qalsaydıq bu, 10 min tələbə edəcəkdi. Ancaq bizdən sonra bunun
üstündə durmadılar, hər şey pozuldu, yarımçıq qaldı. Bizdən sonrakıların siyasətinin ən
mənfur cəhətləridən birisi o oldu ki, özümüzdə neyləmişdi cəhənnəmə, gərək Türkiyənin
yaratdığı şəraiti dağıtmayaydı; həmin həqiqətən qardaşlıq yardımından istifadə etməklə
gələcək çatışmazlıqları aradan götürməkdən ötrü böyük kadr potensialı, kadr ehtiyatı yarada
bilərdik. Bu da xəyanətin bir üzüdür. Bu da indikilərin öz siyasətlərini xalqa xidmət üstündə
yox, ancaq xalqı dağıtmaq üstündə qurduqlarını əyani göstərir.
Bütün bu olub-keçənləri düşündükcə elmlə məşğul olmaq həvəsim də ölürdü. Bəzən
istəyirdim ki, bir elmi işi yazım. 2-3 gün yazırdım, sonra öz-özümə deyirdim ki, mən oturub
burada elmi kitab yazıram və oradasa cəmiyyət aşılanır; gərək daha çox mübarizəyə üstünlük
verəm.
Yəni siyasi fəaliyyəti elmi fəaliyyətdən daha faydalı sayırdınız?
Bəli. Ona görə də çalışırdım müsahibələr verim, radiolarda çıxış edim, xaricə məlumatlar
çatdırım ki, Azərbaycanın taleyi dünyanın siyasi gündəmindən düşməsin, daha çox marağı
bura çəksin. Türkiyə qəzetlərinə, televiziyalarına tez-tez müsahibələr verirdim ki, Azərbaycan
problemi Türkiyənin də diqqətindən qaçmasın. Buna çox vaxt sərf edirdim. Elmi məsələlərə
gəlincə, məni çox maraqlandıran bir problem üzərində müəyyən qədər işlədim, sonra gördüm
ki, ədəbiyyat çatışmır. Bilirsiniz, kəndə sifarişlə 5-6 kitabı gətirtməklə özünü tam razı salacaq
əsər yaratmaq olmaz. Bununçün gərək mərkəzdə yaşayıb böyük kitabxanalarda aylarla
oturasan ki, ortaya sanballı əsər qoya biləsən.
Mən uzun müddət - 20 il apardığım araşdırmalar nəticəsində belə qəti qənaətə gəldim ki,
dünya mədəniyyətinin mərkəzi Şumer deyil. Çoxları, məsələn, Kramer yazır ki, "Tarix
Şumerdən başlayır", yəni yazılı tarix oradan başlayır.
Uzun müddət "tarix nədir?" sualı üstündə baş sındırdım. Mənimçün açıldı ki, tarixi 2 halla və
bir neçə xətdə izah etmək olar. Mən 2 xətdə izah etməyi üstün tutdum. Birincisi, tarixə bir
dinçi kimi baxırsan.
Allah-taala filan vaxt yeri yaratdı, filan vaxt göyü yaratdı, filan vaxt insanları yaratdı...
Bəli, çünki tarix zamandır. Tanrı yaradandan zaman başlayır. Zaman başlayırsa, deməli, tarix
başlayır. Yerin neçə min il yaşı var - bu, Yerin tarixidir. Daşın, suyun da öz tarixi var. Bax,
tarix oradan başlayır. Biz tarixin başlanğıcını oradan götürməliyik. Amma biz birdən-birə
keçirik cəmiyyətin tarixinə. Yerin, fəzanın, ulduzların tarixini astronomlar müəyyənləşdirir -
artıq bu tarix milyon illərə gedib çıxır. Coğrafiyaçılar, geoloqlar daşın tarixini, əlvan metalların
tarixini öyrənirlər. Deməli, dünya alimlərinin böyük bir hissəsi mövcudatın, mühüm hissəsi də
cəmiyyətin tarixini öyrənməklə məşğul olur.
Adəmlə Həvvadan bu tərəfə...
Bəli. Ancaq elə buradaca bildirim ki, biz türklər tarix yazmaq məsələsində çox geridə qalmışıq.
Ona görə də dünya tarixi yazılanda türkün tarixini hərə öz istədiyi kimi, əksəriyyəti, təbii ki,
düşmən mövqeyindən yazır. Çünki orta əsrlərdə türklər Avropaya böyük təzyiqlər ediblər və
Avropa 400-500 il türkə düşmən olub. Deməli, türklərlə bağlı nə varsa 400-500 il
düşmənçiliklə qələmə alıblar, buna görə də onların yazdıqları doğru sayıla bilməz. Sonra da
meydana məqsədi türk dünyasını məhv etmək, parçalamaq olan, "türk" adı gələndə canına
üşütmə düşən, gecə-gündüz onu necə yox etməyi düşünən rus imperiyası çıxdı. Bu
imperiyanın alimləri də türk tarixini saxtalaşdırmaqçün az iş görmədilər. Bunu izah etməkçün
həmin məsələlərə ekskurs etdim. Bu kitabıma onlardan müəyyən qədər saldım.
Hansı kitabı nəzərdə tutursunuz?
"Bütöv Azərbaycan Yolunda" kitabını. O kitabda Sizin mənə göndərdiyiniz fars şovinizmi
məsələsinə aid sənəddən də istifadə etdim. Elə orada da yazdım ki, Ədalət bəy mənə kömək
etdiyinə görə ona öz təşəkkürümü bildirirəm. Bu sənədləri mənə o göndərib. Siz dilimizə aid
qəzet məqalənizi də göndərmişdiniz, amma onu salmadım kitaba. Başladım yazmağa - nə cür
oldu ki, dilimiz "Azərbaycan dili" adlandırıldı? Bunun tarixini ortaya qoydum. Rus
imperiyasının türkləri parçalamaqda terminlərdən necə istifadə etdiyini açıqladım.