Yox, Azərbaycandandır, türkdür. Maninin atası Həmədandandır, özü Mədinədə anadan olub.
Sonra yenə köçüb qayıdıblar Həmədana. Maniyə burada peyğəmbərlik yetişib. Onun əsərləri
bütün Avropaya və Çinə yayılıb.
O, manixeyizm dininin banisidir də.
-Bəli, Mani həmin adamdır. Amma o, bizim ədəbiyyatımızda (xüsusən Nizamidə) rəssam Mani
kimi tanınıb. Çox böyük rəssammış. 23, ya da 24 yaşında özünü peyğəmbər elan edib. Nəysə,
bu, başqa məsələdir.
Sonra keçdim "Bütöv Azərbaycan Yolunda" kitabına. Ümumi tanışımız Çingiz bəy mənim
Bütöv Azərbaycana aid çıxışlarımı toplamışdı. O, mənə dedi ki, bunları bir kitab şəklində
bütövləşdirmək lazımdır. Mən Kələkidə bir neçə yazı da yazdım, oraya əlavə etdik və hamısını
bir kitab halına saldıq, göndərdik Türkiyədə çap olunmağa. Bundan Sizin geniş məlumatınız
var, çünki özünüz də iştirak etmisiniz.
Bəy, oxucularımız həmin kitabın ümumi məzmununu bilmək istəyərlər.
Elə düşünürəm ki, Siz bu kitabı çap edincə o kitab çıxacaq. ("Bütöv Azərbaycan Yolunda"
kitabı 1998-in yayında Türkiyədə nəşr edildi və 24 yanvar 1999-da Bakıdakı "Hyatt Recensy"
otelində onun təqdimetməsi oldu - Ə.T.).
İnşallah.
Hə, məni maraqlandıran bir məsələ də vardı, o da çəkdi məni - Zərdüşt dinini öyrənmək. Bir
az yazdım. "Bütöv Azərbaycan Yolunda" kitabına həmin hissəni salmışam. İran şovinizminin,
fars şovinizminin zərdüştlüklə necə mübarizə apardığını, zərdüştlüyün fars şovinizminin
alətinə necə çevrildiyini və onu necə dəyişdirdiklərini, onu necə mifləşdirdiklərini
aydınlatmağa çalışmışam.
Yazdım, yazdım, amma yarımçıq qaldı. Bu da çox maraqlı mövzudur, axı Zərdüşt dini
dünyanın ən ilkin təkallahlı dinidir.
Necə yəni "təkallahlı"? Bəs Ahuraməzda (Hörmüz) - Anqramanyu (Əhrimən) cütlüyü?
Yox, yox. Onlar təqribən Tanrı - şeytan sistemidir. Zərdüştçülükdə də Allah təkdir -
Ahuraməzdadır. Əhrimən şeytandır.
Bəli, zərdüştçülük təkallahlı dindir. Çox qəribədir ki, avropalılar artıq etiraf və qəbul edib ki,
təkallahlılığı xristianlıq məhz zərdüştçülükdən götürüb.
Deməli, xristianlıq yəhudiliyin xələfi deyil?
Yox, orada yazıblar ki, xristian təkallahlılığının əsas mayasının bir hissəsi zərdüştçülükdən
götürülüb. Bu, çox maraqlı faktdır. Bəs nə cür olub ki, islam onu görməyib, götürməyib?
Əksinə, islam dini zərdüştçüləri müşrik sayaraq, məhv etməyi buyurub.
Bunun kökü haradan başlayıb? Zərdüşt dini düşür farsların əlinə...
Sasanlıların?
Sasanlılardan çox qabaq - Əhəmənlilərin, Daranın vaxtında bu dini təzədən yığışdırıb yeni
şəkildə dövlət dini elan edirlər. Bu zaman onun əsl qat’ları itir, amma müəyyən qat’ları qalır.
Zərdüştçülük davam edir. İsgəndər indi "İran" adlandırılan yeri tutanda "Avesta"nın öküz
dərisində yazılmış iki nüsxəsindən biri olub Əhəmənlilərin sarayında, onu götürüb yandırıblar,
ikinci nüsxəsisə başqa şəhərdə olub, onu aparıblar, yenə indiki terminlə desək, Yunanıstana.
Çox qəribə bir mənzərə yaranır - dünyanı dərketmənin Yunanıstanda dəyişdirilməsinin əsas
şərtlərindən biri də zərdüştçülükdür.
Bu yəqin ki, "Avesta"nın yunancaya tərcümə edilməsinin nəticəsidir.
Yox. Əvvəldən də varmış. "Avesta"dan təbiətə aid hissələri götürərək dinə aid hissələri rədd
ediblər. Sonra bu itib. Daha sonra iranlılar Orta Asiyada dövlətlər yaradırlar: Parfiya və s.
Bundan bir qədər keçmiş, Sasanlılar yenidən hakimiyyətə gələndə göstəriş verirlər ki, həmin
kitablardan tapıb yığsınlar. Hətta Yunanıstana da adam göndərirlər ki, qalan nə varsa
gətirsinlər. Beləliklə, "Avesta"nı təzədən tərtib ediblər; bu edilənsə "Avesta"nın özü deyil.
Onun əsl qat’larını əlavələr etməklə saxlayıblar, qalanlarını bütöv dəyişdiriblər.
"Avesta"nın adı əslində "Zənd Avesta"dır. Bu, "Avesta"nın özü deyil, onun şərhidir. Bununla
da kifayətlənməyərək "Pa Zənd Avesta" ("Avesta" şərhinin şərhi) da yaradıblar. Bizdə buna
"haşiyə" deyirlər. Bütün Orta Asiyada qədimdən mövcud fars miflərini doldururlar bu kitaba.
"Avesta" kitabını din əsəri olmaqdan çıxarıb mifləşdirir, öz istəklərinə uyğun şəklə salırlar.
İslam bu əsərlə tanış olanda görür ki, tamamilə miflərdən ibarətdir. Çox qəribədir ki, "Xuday-
namak"a - "Avesta"nın sistemini davam etdirən bir əsərə farslar götürüb öz hökmdarlarının
adlarını saldılar: "Tanrı Hörmüz Qubada belə dedi", "Keyqubad saray tikdirdi" və b. Belə
şeylərlə doldurdular dini kitabları, onlardan din adına istifadə etdilər. "Xuday-namak"ı
ərəbcəyə çevirib verdilər həzrəti-Ömərə. O da oxuyub dedi ki, nağıldır, yığışdırın - belə din
olmaz. "Onların inancı budur" deyildiyində həzrəti-Ömər göstəriş verdi ki, orada yazılanlar
allahsızlıqdır, onların kitabı Tanrıdan gəlmə deyil.
Buna görə də zərdüştçüləri müsəlmanlar əhli-kitab saymadılar.
Saymadılar və onlara qarşı mübarizəni gücləndirdilər. Nəticəsini də bilirik.
Bir də, əlbəttə, Xosrov Pərvizin peyğəmbərimizin (s.ə.s.) məktubunu cırıb atması artıq tamam
düşmənçilikdi. O, Yəmən valisinə göstəriş vermişdi ki, peyğəmbəri tut, gətir. Bir adam gəlir
ki, onu tutub aparsın. Ona Məkkədə müqavimət göstərilir. Elə bu vaxt Xosrov Pərviz ölür və
həmin adam yenidən qayıdır Yəmənə. Bir müddət sonra onun özü peyğəmbərə iman
gətirərək islam dinini qəbul edir. Yəni burada düşmənçilik pozuldu.
Deməli, ərəblər Zərdüştün özünü də, ideyasını da qəbul etmədilər və bununla da qurtardı.
Ancaq o dinin adı "Zərdüşt dini" deyil - "mağ" da gedir, "muğ" da gedir. Mən indi düzgününü
axtarıram. Ola bilsin ki, "mağ" ilkin, "muğ" sonrakı variantdır və hər ikisi bu dinin adıdır. Onun
təbliğatçısı Zərdüşt olduğuna görə dinə "zərdüştçülük" deyirlər. Əslində bu, düzgün deyil.
Məsələn, peyğəmbərlərin adıyla islam dininə "Məhəmmədiyyə", xristian dininə "İsaviyyə",
yəhudi dininə "Musaviyyə" deyirlər, halbuki dinin adı belə deyil. Zərdüşt bu görüşləri təbliğ