20 noyabr 2016-cı il, bazar
5
Tarixə ekskurs
Ölkənin adı tarixi vilayətlərin
–Bosniya və Herseqovinanın adını
özündə əks etdirir. Bosniya toponimi
Bosna çayının adından götürülüb.
Dövlət qurumu kimi Bosniya X-XI
əsrlərdə Bosna və Vrbas çayları
hövzəsində yaranmışdır.
Bizans imperatoru Konstantinin
məlumatına görə, serblər bu əraziyə
VII əsrin birinci yarısında gələrək
müasir Serbiya, Monteneqro, Bosniya
və Herseqovina və Xorvatiyanın bir
hissəsində məskunlaşmışlar. Balkan
yarımadasında məskunlaşan serblərin
ərazi birlikləri digər cənub slavyan-
larında olduğu kimi, jup adlanırdı.
Slavyanlar tərəfindən assimilyasiyaya
məruz qalan illiriyalılar isə dağlara
çəkiliblər.
Serb knyazı Çaslav Klonimiro-
viçin ölümündən sonra knyazlıqdan
ayrılan Bosniya Bizansın hakimiyyəti
altına düşsə də, bir müddət sonra
ölkənin bəzi əraziləri Macarıstanın
tərkibinə qatıldı.
XIV əsrdə Bosniya hakimiyyəti
nisbətən möhkəmlənsə də, Bosniya
kralı Stepan Tomaşeviç Osmanlı
imperatorluğunun təhdidlərindən
qorunmaq məqsədilə Roma və Venet-
siyaya yardım üçün müraciət etdi və
türklərə xərac verməkdən boyun qa-
çırdı. Hadisələrin belə cövlan etməsi
türk sultanının qəzəbinə səbəb oldu
və Sultan II Mehmet 1463-cü ildə öz
ordusu ilə Bosniyanın üzərinə yeridi.
Stepan Tomaşeviç edam olundu,
Bosniya dövləti süqut etdi. 1482-
ci ildə isə Herseqovina bütünlüklə
ələ keçirildi. 1878-ci ildə Rusiya və
Osmanlı imperiyası arasında bağlanan
San-Stefano sülh müqaviləsinə uyğun
olaraq, Bosniya və Herseqovinaya
muxtariyyət verildi. Lakin elə həmin
il Avstriya-Macarıstan ölkəni işğal
etdi.
1913-1914-cü illərdə Avstriya-
Macarıstan hakimiyyətindən xilas
olmaq məqsədilə genişlənən mübarizə
nəticəsində “Mlada Bosna” adlı serb
millətçi təşkilatı yaradıldı. Təşkilatın
fəallarından olan Qavrilo Prinsip
1914-cü il iyunun 28-də Sarayevo-
da ershersoq Frans Ferdinandı və
onun arvadı Sofiyanı qətlə yetirdi.
Bu qətl Birinci dünya müharibəsi ilə
nəticələndi. Bu müharibədə Bos-
niya və Herseqovinanın 407 min
sakini həlak oldu, bir çox yaşayış
məntəqələri tamamilə məhv edildi.
Ölkə ağır itkilər və məhrumiyyətlərlə
üzləşdi.
1945-ci ildə Bosniya və Herseqo-
vina Xalq Respublikası Yuqoslaviya
Federativ Xalq Respublikasına daxil
oldu. Ölkə 1963-cü ildə Bosniya və
Herseqovina Sosialist Respublikası
adı ilə Yuqoslaviya Sosialist Federativ
Respublikasının tərkibinə keçdi.
1992-ci ildə referendum
keçirilməsindən və ölkənin
müstəqilliyinin elan olunmasından
sonra Bosniya müharibəsi başlandı.
NATO-nun münaqişəyə müdaxiləsi
1995-ci il dekabrın 14-də Deyton
sazişinin imzalanması ilə nəticələndi.
Sazişdə iki hissədən – Müsəlman-
Xorvat Federasiyası və Serb Res-
publikasından ibarət vahid dövlətin
qorunub saxlanılması nəzərdə
tutulurdu. 1999-cu ildə Deyton sazi-
şinin əksinə olaraq Posavin dəhlizi
üzrə arbitraj komissiyası Brçko
dairəsinin beynəlxalq nəzarət altında
müstəqilliyini elan etdi.
Bosniya və Herseqovinanın
ümumdövlət əhəmiyyətli hakimiyyət
orqanları Rəyasət Heyəti, Parlament
Assambleyası və Nazirlər Şurasıdır.
Parlament Nümayəndələr Palatası
və Xalqlar Palatasından ibarətdir.
Dövləti təşkil edən xalqların üç
nümayəndəsindən ibarət olan Rəyasət
Heyəti ali kollektiv icra orqanıdır
və dövlətin başında durur. Rəyasət
Heyəti 4 il müddətinə seçilir.
Bosniya və Herseqovinadan
Rəyasət Heyətinə üzv olaraq 1 bosni-
yalı, 1 xorvat, Serb Respublikasından
1 serb seçilir. Seçki zamanı ən çox səs
toplamış üzv sədr olur, lakin 8 aydan
sonra sədr vəzifəsi digər üzvə keçir.
Beləliklə, hər üç üzv 4 il ərzində iki
dəfə sədr vəzifəsini tutur.
2014-cü il oktyabrın 12-də
keçirilən seçkidə Bakir İzetbeqoviç
(bosniyalı), Draqan Çoviç (xorvat)
və Mladen İvaniç (serb) Rəyasət
Heyətinin üzvləri seçilmişlər.
* * *
Təyyarə axşamdan xeyli keçmiş
ehmalca hava limanına enir. Yüngül
qar yağsa da, soyuq deyil. Ölkəmizin
Serbiyadakı səfirliyinin əməkdaşları
bizi gülərüzlə qarşılayırlar, otelə
yola düşürük. Yolboyu 25 ildən artıq
Sarayevoda yaşayan türk qardaşımız
bizə dolğun məlumat verir, Bosniya
(boşnak) dilinin serb dilindən azacıq
dialektik fərqinin olduğunu bildirir.
Dinar Alpının Sarayevo vadisində
təpəliklər üzərində salınmış bu
şəhərin əsası 1263-cü ildə qoyulub.
Əvvəllər Bosnovar, sonralar Bosna-
Saray, Saray-Ova adlanıb. 1429-1878-
ci illərdə Osmanlı imperiyasının,
1878-1918-ci illərdə Avstriya-Maca-
rıstan imperiyasının tərkibində olub.
Türk sultanının canişini 1850-ci ildə
öz iqamətgahını bu gözəl şəhərə
köçürüb. Osmanlı memarlığının
incilərindən Sahzadə Camesi, Bəy
Camesi, Ali Paşa Camesi, 50 mindən
artıq nadir kitabın və əlyazmanın
saxlandığı kitabxanası olan Kürsümlü
mədrəsəsi, Osmanlı çarşısı, karvan-
saraylar Sarayevoya xüsusi yaraşıq
verir. Osmanlı dövründə bu şəhər
Böyük İpək Yolu üzərində önəmli
məntəqələrdən biri olub. Sıldırımlı
qayalıq üzərindəki on iki qülləli türk
qalası da ulu babalarımızın möhtəşəm
yadıgarlarındandır.
Enişli-yoxuşlu küçələri, təpələrin
sinəsindəki qırmızı kirəmitli iki-üç
mərtəbəli evləri yaşıllıqlar dövrəyə
alıb. Əsrlərin tarixi, sevincli-kədərli
xatirələri sükuta dalıb bu yerlərdə.
Dindirsən, dil açıb danışar baba-
larımızın hekayətini. Ağır bir qəm
çökür qəlbimə, tariximizin itib-batan
səhifələri, ulularımızın nigaran ruhları
əbədi məskən tapıb lal sükuta qərq
olub bu yerdə.
Bristol mehmanxanasında bizi
ölkəmizin Serbiya, Monteneqro və
Bosniya və Herseqovinadakı səfiri,
sabiq baş prokuror Eldar Həsənov
qarşılayır. Açığı, bütün səfər boyu
Eldar Həsənov başda olmaqla,
səfirliyin əməkdaşlarının həssas və
qayğıkeş münasibətindən, ölkəmizi
Vətəndən uzaqlarda ləyaqətlə təmsil
etmələrindən qürur duyduq. Hətta
qısa müddət ərzində serb dilini belə
mükəmməl öyrənə biliblər.
Ertəsi gün Azərbaycan Milli
Məclisinin nümayəndə heyəti millət
vəkili, fəlsəfə üzrə fəlsəfə doktoru Ca-
vanşir Feyziyevin rəhbərliyi ilə Bosniya
və Herseqovina Parlamentinin Yuxarı
Palatasının (Xalqlar Evi) Sədri cənab
Safet Softiçlə görüşə yola düşdü.
Milli Məclisin deputatları Çingiz
Qənizadə və Elşad Həsənov, “Milli
Məclis” jurnalının baş redaktoru
Ülviyyə Abdullayeva, Milli Məclis
Aparatının beynəlxalq əlaqələr
şöbəsinin böyük məsləhətçisi Babək
Ağayev, Paralament Jurnalistləri
Birliyinin sədri Elşad Eyvazlı, İctimai
Televiziyanın əməkdaşı Bəxtiyar
Səlimov, “Diskovery Azerbaijan” jur-
nalının “Turan” bölməsinin redaktoru
Aida Eyvazlı və bu sətirlərin müəllifi
görüşdə iştirak edirdilər.
Görüşdə səfir Eldar Həsənov
Azərbaycan nümayəndə heyətinin
səfərinin məqsədi, Azərbaycanın siya-
si, iqtisadi və mədəni sahədə qazandı-
ğı uğurlardan bəhs edərək, Bosniya və
Herseqovina Parlamentində Xocalı
soyqrımına dair qətnamənin qəbulu
na görə parlamentarilərə ölkəmiz
adından təşəkkürünü bildirdi.
Yuxarı Palatanın Sədri cənab
Safet Softiç ölkəsində Azərbaycana
yüksək münasibət bəsləndiyini
vurğulayaraq, hər iki ölkənin eyni
dövrdə müstəqillik qazandığını, oxşar
problemlərlə üzləşdiyini diqqətə çat-
dırdı. Qeyd etdi ki, parlamentlərarası
əlaqələrin genişlənməsi xalqlarımızın
daha da yaxınlaşmasına, ölkələrimizin
çiçəklənməsinə, beynəlxalq
mövqelərimizin möhkəmlənməsinə
öz töhfəsini verəcək. Palata sədri bu
istiqamətdə planlı və səmərəli iş apar-
mağın zəruriliyini diqqətə çatdırdı.
Milli Məclisin nümayəndə
heyətinin rəhbəri, millət vəkili
Cavanşir Feyziyev səmimi qəbula
və ölkəmiz haqqında xoş sözlərə
görə Palata Sədrinə minnətdarlığını
bildirdi. Qeyd etdi ki, Azərbaycan
təkcə Cənubi Qafqazda deyil, regi-
onda böyük nüfuza malik qüdrətli
dövlətdir. Davos İqtisadi Forumunun
rəqabətqabiliyyətlilik indeksinə görə
Azərbaycan dünya dövlətləri arasında
38-ci yerdədir. Son 13 il ərzində
ümumi daxili məhsul 3 dəfə artmış,
1 milyon 300 min yeni iş yeri açılmış,
yoxsulluq səviyyəsi 10 dəfə aşağı
salınmışdır. Bu gün Azərbaycan xarici
ölkələrdə qlobal layihələrə böyük
həcmdə yatırımlar həyata keçirir.
Tərəflər hər iki ölkəni maraq-
landıran müxtəlif məsələləri geniş
müzakirə etdilər.
Parlamentin binasında
Azərbaycan-Bosniya və Herseqovina
parlamentlərarası əlaqələr üzrə işçi
qrupunun üzvləri arasında keçirilən
görüş qarşılıqlı faydalı əməkdaşlığın
genişləndirilməsi istiqamətində xalq-
larımızın istək və arzularının ifadəsinə
çevrildi. Səfir Eldar Həsənov, Milli
Məclisin deputatları Cavanşir Fey-
ziyev, Elşad Həsənov, işçi qrupunun
sədri Çingiz Qənizadə, Bosniya və
Herseqovina Parlamentindəki işçi
qrupunun üzvləri çıxış edərək təklif
və mülahizələrini bildirdilər. Qeyd
olundu ki, gənc müstəqil dövlətlər
olan Azərbaycanla Bosniya və
Herseqovina öz aralarında dostluq və
əməkdaşlıq münasibətlərini inkişaf
etdirməklə kifayətlənməməli, bütün
beynəlxalq təşkilatlarda, o cümlədən
BMT, ATƏT, Avropa Şurası, Avro-
pa İttifaqı çərçivəsində hər zaman
bir-birinə dəstək verməlidirlər.
Dost ölkənin parlamentariləri
Azərbaycanın iş adamları üçün
əlverişli şərait yaradılacağını vurğu-
layaraq, ölkələrində qlobal layihələrə
yatırımlara ehtiyac duyulduğunu
diqqətə çatdırdılar. Qeyd olundu ki,
1994-cü ildən 2014-cü ilə qədər Bos-
niya və Herseqovina iqtisadiyyatına
cəmi 6 milyard avro xarici investisiya
qoyulmuşdur. Ağır müharibənin,
millətlərarası münaqişələrin vurduğu
yaralar, törədilən dağıntılar hələ də
tam aradan qaldırılmamışdır.
Dost ölkənin parlament
təmsilçiləri Ermənistan-Azərbaycan,
Dağlıq Qarabağ münaqişəsinin
həlli istiqamətində beynəlxalq
təşkilatlarda aparılan müzakirələrdə
Azərbaycanın ədalətli mövqeyinə
dəstək verəcəklərini ifadə etdilər. Gö-
rüş səmimi dostluq, qarşılıqlı anlaşma
şəraitində başa çatdı.
Bosniya və Herseqovina
Respublikasının Rəyasət
Heyətinin Sədri,
Azərbaycanın böyük dostu
Bakir İzetbeqoviçlə görüş
1956-cı ildə doğulmuş Bakir İzet-
beqoviç Sarayevo Universitetini bitir-
mişdir, ixtisasca arxitektordur. 2010
və 2014-cü illərdə keçirilən seçkilərdə
böyük səs çoxluğu ilə Bosniya və
Herseqovina Rəyasət Heyətinin üzvü
seçilmişdir. Ölkənin böyük nüfuza
malik siyasi və dövlət xadimidir.
Bakir İzetbeqoviç Azərbaycan
nümayəndə heyəti ilə mehribancasına
görüşərək xatirə şəkli çəkdirdi.
Azərbaycanın Serbiya, eyni
zamanda, Bosniya və Herseqovina və
Monteneqrodakı səfiri Eldar Həsənov
nümayəndə heyətinin rəhbərini və
üzvlərini Rəyasət Heyətinin Sədrinə
təqdim etdi, səfərin məqsədi haqqında
ətraflı məlumat verdi.
Bakir İzetbeqoviç 2012-ci ilin
oktyabrında Azərbaycana səfərini
və 2016-cı ilin aprelində İstanbulda
Prezident İlham Əliyevlə görüşünü
məmnunluqla xatırladı. Qeyd etdi
ki, dövlətimizin başçısı ilə ikitərəfli
əlaqələrin inkişafı və perspektivləri
barədə səmərəli fikir mübadiləsi
aparmışdır. Bu baxımdan “Cənub”
qaz dəhlizi və energetika sahəsində
əməkdaşlığın genişləndirilməsi hər
iki ölkənin maraqları çərçivəsindədir.
Rəyasət Heyətinin Sədri Bakir
İzetbeqoviç İstanbulda görüş zamanı
dövlətimizin başçısını Bosniya və
Herseqovinaya səfərə dəvət etdi-
yini bildirdi. Qeyd etdi ki, onun
Azərbaycana səfəri zamanı AZPRO-
MO ilə Bosniya və Herseqovina ara-
sında Anlaşma Memorandumu, təhsil
sahəsində əməkdaşlıq haqqında saziş,
ikiqat vergitutmadan yayınma barədə
Konvensiya imzalanmışdır.
Bakir İzetbeqoviç atası Aliya
İzetbeqoviçin ümummilli lider
Heydər Əliyevlə dost olduğunu, ona
böyük hörmət bəslədiyini qeyd etdi.
Görüşdə Milli Məclisin de-
putatlarının, kütləvi informasiya
vasitələrinin rəhbərlərinin iştirakını
yüksək dəyərləndirən Bakir İzetbe-
qoviç ölkələrimiz arasında qarşılıqlı
səfərlərin, investisiya yatırımları-
nın, turizm potensialının təbliğinin
zəruriliyini vurğuladı, Azərbaycanın
dost ölkələr arasında xüsusi yer tutdu-
ğunu qeyd etdi.
Azərbaycan nümayəndə heyətinin
rəhbəri, Milli Məclisin deputatı Ca-
vanşir Feyziyev hər iki ölkənin eyni
vaxtda müstəqillik qazanmasına diqqət
çəkərək Bosniya və Herseqovinanın
üzləşdiyi problemlərə Azərbaycanın
yaxşı bələd olduğunu bildirdi.
Dost ölkənin parlamentində Xocalı
soyqrımına dair qətnamənin qəbul
olunmasında xidmətinə görə Rəyasət
Heyətinin Sədri Bakir İzetbeqoviçə
minnətdarlığını ifadə etdi. C. Feyziyev
nümayəndə heyətinin Sarayevoya
səfər proqramı barədə ətraflı məlumat
verərək, gələn il yaradıcı ziyalıların
qarşılıqlı səfərlərinin təşkil olunmasına
dair təklif irəli sürdü.
Görüşdə əməkdaşlığın
genişləndirilməsi, beynəlxalq
təşkilatlarda ölkələrimizin bir-birinə
dəstək verməsi istiqamətində faydalı
fikir mübadiləsi aparıldı.
Bakir İzetbeqoviçin atası Aliya
İzetbeqoviç görkəmli yazıçı, filosof
və dövlət xadimi olmuşdur. 1970-
ci ildə “İslam deklarasiyası”nı nəşr
etdikdən sonra 14 il müddətinə azad-
lıqdan məhrum edilmişdir. Həbsdən
azad olunduqdan sonra 1990-cı ildə
keçmiş Yuqoslaviyanın tərkibində
Bosniya və Herseqovina Rəyasət
Heyətinin sədri seçilmişdir. 1990-
1996-cı illərdə Prezident, 1996-2000-
ci illərdə Prezident Şurasının üzvü
olmuşdur. Aliya İzetbeqoviç tanınmış
zadəgan ailəsindən idi. 2003-cü ildə
ürək çatışmazlığından vəfat etmişdir.
Səfər zamanı Azərbaycan
nümayəndə heyətinin üzvləri “Kova-
çı” qəbirstanlığına gedərək, bu böyük
insanın məzarını ehtiramla ziyarət
etdi.
Şərqi Avropada kor və zəif
görən uşaqlar, gənclər üçün
yeganə mərkəz
Bu böyük ixtisaslaşmış komplek-
sin qarşısında nümayəndə heyətini
və səfirliyin əməkdaşlarını mərkəzin
direktoru, tanınmış yazıçı- alim Da-
mir Ovçina qarşıladı. Ötən əsrin 90-
cı illərində ölkədə gedən müharibə
nəticəsində mərkəz dağılıb, yararsız
vəziyyətə düşüb. Müxtəlif instan-
siyalara müraciətlərə baxmayaraq,
bərpa işlərinə vəsait ayıran, yardım
edən tapılmayıb. Dost ölkənin çətin
günündə onun çağırışına səs verən
Azərbaycan olub, Heydər Əliyev
Fondu olub. Heydər Əliyev Fondu-
nun vitse- prezidenti Leyla xanım
Əliyeva bir neçə dəfə bu ölkəyə
səfər edərək mərkəzin bərpası,
Azərbaycan-- Bosniya və Herseqovi-
na dostluq parkının abadlaşdırılması,
bu parkda 1992-1995-ci illər Bosniya
müharibəsinin və Xocalı soyqrı-
mı qurbanlarının xatirəsinə abidə
kompleksinin ucaldılnası layihəsi
üzrə işlərin gedişi ilə tanış olmuş,
hərtərəfli dəstək vermişdir. Layihə
ölkəmizin və Heydər Əliyev Fondu-
nun təşəbbüsü və maliyyə dəstəyi ilə
reallaşdırılmışdır.
Dobrinya çayının sahilində
yerləşən parkda yenidənqurma işlərinə
2011-ci ildə başlanıb. Ərazisi 1 hektar
olan parkda Sarayevo sakinlərinin
istirahəti üçün hər cür şərait yaradılıb,
çayın digər sahilində yerləşən Dob-
rinya Təhsil Kompleksinə keçid üçün
körpü inşa olunub.
Dostluq parkının və abidənin
açılışında Bosniya və Herseqovi-
na Rəyasət Heyətinin Sədri Bakir
İzetbeqoviç və Leyla Əliyeva iştirak
etmişlər.
Heydər Əliyev Fondunun vitse-
prezidenti Leyla Əliyevanın qayğısı
ilə kor və zəif görən uşaqlar, gənclər
üçün mərkəzdə tədris və təlim-tərbiyə
prosesi üçün müasir tələblərə uyğun
şərait yaradılmış, yeni texnologiyalar-
dan istifadə olunmuşdur.
Damir Ovçina bildirdi ki,
burada Şərqi Avropanın müxtəlif
ölkələrindən olan gənclərin təhsil
alması, cəmiyyətə inteqrasiyası
üçün yaradılan şərait dünya stan-
dartlarına cavab verir: “Buna görə
də biz Azərbaycan Prezidentinə,
Heydər Əliyev Fondunun prezidenti
Mehriban xanım Əliyevaya, fon-
dun vitse-prezidenti Leyla xanım
Əliyevaya dərin minnətdarlığımızı
bildiririk. Əvvəllər biz Azərbaycanı o
qədər də yaxşı tanımırdıq, indi bilirik
ki, bu ölkə Cənubi Qafqazın lider
ölkəsidir, qüdrətli dövlətdir”.
Azərbaycan nümayəndə
heyətinin rəhbəri Cavanşir Feyzi-
yev və səfir Eldar Həsənov bundan
sonra da mərkəzin problemlərinin
diqqətdə saxlanılacağını, hər zaman
kömək göstərməyə hazır olduqlarını
bildirdilər. Azərbaycanın bu mərkəzə
yardımından, humanist dəstəyindən
qürur hissi ilə döyünən ürəklərimizdə
xoş duyğularla oradan ayrılıb
proqramdakı növbəti tədbirlərə yola
düşdük.
Kitabların təqdimat mərasimi
Səfərin ən maraqlı məqam-
larından biri Sarayevonun Belq-
raddakı Azərbaycan Mədəniyyət
Mərkəzinin dəstəyi ilə boşnak
dilinə tərcümə olunmuş kitabla-
rın – Xalq yazıçısı Çingiz Abdul-
layevin “Avropanın oppenentləri”
və Milli Məclisin deputatı, fəlsəfə
doktoru Cavanşir Feyziyevin “Türk
Dövlətləri Birliyi: Qlobal inteqra-
siyanın Azərbaycan modeli” kitab-
larının “Holiday” otelində təqdimat
mərasimi oldu. Yüksək səviyyədə
təşkil edilən mərasimdə Bosniya və
Herseqovina Parlamentinin sədri
Safet Softiç, Rəyasət Heyəti sədrinin
iki köməkçisi, tanınmış yazıçılar, elm,
mədəniyyət və incəsənət xadimləri,
azərbaycanlı və türk tələbələr,
ictimaiyyətin nümayəndələri iştirak
edirdilər.
Xalq yazıçısı Çingiz Abdulla-
yevin əsərlərinin bu günə qədər 32
dilə tərcümə olunması, 28 milyondan
artıq tirajla nəşr edilməsi, Cavanşir
Feyziyevin 6 dili mükəmməl bilməsi,
yüzlərlə elmi məqalə və kitabların
müəllifi olması faktı auditoriyada
ciddi maraq oyatdı.
Səfir Eldar Həsənov, kitabların
müəllifləri, 1531-ci ildə əsası qo-
yulmuş Sarayevo Universitetinin
rektoru Erkan Türe, Sarayevo Elm və
Texnologiya Universitetinin professo-
ru, Bosniya və Herseqovina Yazıçılar
İttifaqının sədr müavini Edin Kon-
hodjiç, yazıçı, ədəbiyyatşünas Muyo
Musaqiç, Sarayevo Universitetinin
hüquq fakültəsinin dekan müavini
Edin Halapiç, Amerika Universite-
tinin professoru Nenad Tanoviç,
Sarayevo Universitetinin dekanı Metin
Boşnak çıxış edərək hər iki kitab və
müəlliflərin yaradıcılığı haqqında öz
fikirlərini bölüşdülər. Qeyd olundu
ki, Xalq yazıçısı Çingiz Abdullayevin
“Avropanın opponentləri” əsəri bu
dünyada, eləcə də Avropa məkanında
baş verən mürəkkəb hadisələrə, Qərbin
arxasında məkrli niyyətlər duran məxfi
layihələrinə sistemli baxış sərgiləyən
detektiv roman kimi yüksək dəyərə
malikdir. Bu roman, Xalq yazıçısı
Çingiz Abdullayevin sanballı çıxı-
şı və incə replikaları auditoriyada
Azərbaycan ədəbiyyatı və xalqımız
haqqında dolğun təsəvvür yaratdı.
Milli Məclisin deputatı Cavanşir
Feyziyev müasir dünyada baş verən
prosesləri və aparıcı tendensiyaları
təhlil edərək siyasətin pozitiv trans-
formasiyasında, yeni dünya düzəninin
formalaşmasında Türk Dövlətləri Bir-
liyinin rolunun, missiyasının nədən
ibarət olduğunu, bu birliyin bəşər
sivilizasiyasına davamlı əməkdaşlıq,
qarşılıqlı etimad nümunələri əsasında
önəmli töhfələr verə biləcəyini açıq-
ladı. Mərasimin sonunda Sarayevo
Universitetinin rektoru bildirdi ki,
Xalq yazıçısı, hüquq elmləri doktoru
Çingiz Abdullayev və millət vəkili,
fəlsəfə doktoru Cavanşir Feyziyev
Bosniya və Herseqovina Yazıçılar
İttifaqının fəxri üzvləri seçilmişlər.
Vəsiqələr təqdim edildikdən sonra
imza mərasimi oldu.
Səfər zamanı keçirilən bütün
görüşlərdə və tədbirlərdə ümum-
milli liderimiz Heydər Əliyevə,
möhtərəm Prezidentimiz cənab İlham
Əliyevə böyük hörmət və ehtiramın,
Azərbaycana və xalqımıza tükənməz
bir sevginin şahidi olduq. Bu ehtira-
mın, o tükənməz sevginin arxasında
fədakar insanlarımızın əməyi, xalqı-
mızın nəcib əməlləri, yüksək insani
keyfiyyətləri, mənəvi dəyərlərimiz
durur. Bizi sədaqətli dost, haqq-ədalət
carçısı, sivil bir ölkə kimi tanıyırlar.
Bundan yana qəlbimizdə xoş duyğu-
larla Vətənə dönürük.
Həsən HƏSƏNOV,
Azərbaycan Respublikasının
Əməkdar jurnalisti
Bakı-Sarayevo-Bakı
Sarayevo:
Dostlarımız arasında
Azərbaycan xüsusi yer tutur
Bosniya və Herseqovina Cənub-Şərqi Avropada, Balkan
yarımadasının qərbində yerləşir. Sahəsi 51,2 min kvadratkilo-
metr, əhalisi 4,1 milyon nəfərdir. Şimal, qərb və cənub tərəfdə
Xorvatiya, şərqdə Serbiya, cənub-şərqdə Monteneqro ilə
həmsərhəddir. Cənub-qərbdə Adriatik dənizinə çıxışı var. Sa-
hil xəttinin uzunluğu 20 kilometrə bərabərdir. Dövlət quruluşu
federativ respublikadır.
Bosniya və Herseqovina Federasiyasından, Serb
Respublikasından və Brçko dairəsindən ibarətdir. 1992-ci
ildən BMT-nin üzvüdür, 2016-cı ilin fevralında Avropa İttifaqına
daxil olmaq üçün rəsmi müraciət etmişdir. Əsas xarici ticarət
tərəfdaşları Avropa İttifaqı ölkələridir. Pul vahidi konvertə
olunan markadır.