Solmaz Muxtarova
212
müsibəti elə-belə uda bilmirdi. Kiməsə sözünü demək, ürəyini
boşaltmaq istəyirdi. Bu istəyinə şübhə etsə də, yenə də
fikrindən əl çəkmirdi. Axır ki, özlüyündə nə etmək istədiyini
qət etdi.
Yanvarın iyirmi səkkizində Mirzə işə getdi. Yasəmən
isə hərbi hissədə fəaliyyət göstərən ŞİT İctimai Müstəqil Hərbi
komissiyanın qəbuluna yollandı. Çox qətiyyətli idi. Neçə
vaxtdır üzüldüyünə baxmayaraq ona haradansa güc gəlmişdi.
Qapıda dayanan silahlılar onu içəri buraxmadı:
– Stoy! Tuda nelzya!
Yasəmən əli ilə soldatı itələyib içəri keçməyə çalışdı.
Onu geri itələdilər.
– Əgər vətəndaşları qəbul etmirlərsə, niyə yığılıblar
bura? Tamaşaya gəliblər? – deyə Yasəmən qəzəblə bir də içəri
keçməyə cəhd etsə də, alınmadı.
– Vətəndaş, burada qayda-qanunu pozmaq olmaz! –
cavan bir zabit kabinetdən çıxıb kəskin şəkildə bildirdi və sərt
baxışları ilə Yasəməni süzdü. Yasəmənə elə gəldi ki, zabit düz
onun atasına söydü, özü də elə söydü ki, tükü də tərpənmədi.
Yasəmən özünü saxlaya bilmədi.
– Bu boyda cinayəti törətdiyiniz bəs deyil, indi də
qayda-qanundan danışırsınız?! Alçaqlar! Şərəfsizlər!
Sonra da Yasəmən özü də bilmədi daha nələr dedi. Səs-
küyə orta yaşlı balacaboy bir nəfər çıxdı. O, mülki geyimdə idi.
Yasəməndən heç nə soruşmayıb onu kabinetə buraxdı.
Kabinetdə Yasəmənin ilk gözünə dəyən yuxarı başda oturan
yaşlı rus generalı oldu. Onun qabağındakı uzunsov masa
arxasında hərbi ekspertlər, hüquqşünaslar, müxbirlər, Orta
Asiyadan, Yaponiyadan və başqa kimlərsə, xarici vətəndaşların
yanında isə tərcüməçilər oturmuşdu.
Hamının gözü Yasəmənə dikilmişdi. O, heç nəyə məhəl
qoymadan yaşlı generala tərəf yönəldi. Sifəti alışıb yanırdı. Rus
generalı başını qaldırıb tərs-tərs Yasəmənə baxdı. Qadının
Ağ göyərçinlər həsrəti
213
baxışlarındakı qəzəb, nifrət deyəsən ona qəribə göründü. O,
istehza ilə gözlərini qıydı. Yasəmən bir addım da irəli gəlib düz
generalla üzbə-üz dayanıb cəsarətlə onun gözünün içinə baxdı.
“Alçaqlar! Mən sizdən qorxmuram! Sizin əliniz qana batıb...
Sizdən qan iyi gəlir... Mən sizə nifrət edirəm! Mən sizdən
qorxmuram!..”
General elə bil onun fikirlərini oxudu. Geridə qalmış
ölkədə belə bir qadının varlığını o, heç ağlına da gətirməmişdi.
İndi imkanı olsaydı, qulağından tutdurub onu it kimi bayıra
atdırardı. Amma şahidlərin gözü qabağında bunu etmək
olmazdı. Odur ki, general özünü sakit göstərməyə çalışdı:
– Vətəndaş, sizə nə lazımdır?
Elə bil Yasəmənin içərisində nə isə partladı.
– Mənə heç nə lazım deyil. Mən öz evimdəyəm! Bəs
sizə nə lazımdır? Bu millətdən nə istəyirsiniz?
Generalın bir qədər domba gözləri elə bil yerindən
çıxdı. Dönüb mənalı-mənalı xarici ölkə nümayəndələrinə
baxaraq dedi:
– Baxın görün bu millətin qadınları belədirsə, bəs
kişiləri necədir?! Bunları birdəfəlik susdurmaq lazımdır!
– Bizi susdurmaq heç də asan deyil! Siz buna nail ola
bilməyəcəksiniz!
General ayağa durdu. Əlini masaya çırparaq dedi:
– Gəlişininizin məqsədi nədir? Nə istəyirsiniz? Sizə nə
lazımdır?
General ilə Yasəmənin arasında gedən bu söhbət
tərcüməçiıər tərəfindən xarici ölkə nümayəndələrinə tərcümə
edilirdi.
– Mənim mənzilim iki saat fasiləsiz atəşə tutulub! İki
azyaşlı uşağımla atəş altında qalmışam. Sonra da binanı
partlatmaqla bizə hədə-qorxu gəliblər. Axırda da mənzilimə
soxulub ekstremist axtarıblar. Məndən, uşaqlarımdan başqa heç
kəsi tapmayıblar. Ekstremistlər kimdir? Bəlkə mənəm? Yoxsa
Solmaz Muxtarova
214
mənim balalarımdır ekstremist? Mən istəyirəm ki, mənim
yaşadığım bina, mənzil yoxlanılsın, orada ekstremistin olub-
olmaması müəyyən edilsin! Mən bunu istəyirəm!
Sonra Yasəmən ünvanı deyərək cavab gözlədi.
– Vətəndaş, biz boş-boş şikayətlərə baxmırıq. Biz ancaq
rəsmi müraciətlərə baxırıq.
– Rəsmi müraciət? Onu da edərəm! – deyib Yasəmən
çıxdı və azca keçməmiş o, ərizə ilə geri qayıtdı. O, ərizənin
ikinci surətini özündə saxladı və həmin nüsxədə ərizənin qəbul
edilməsi barədə zabitin imzası və qəbul tarixini qeyd etdirdi.
Ərizəni verdikdən sonra Yasəmən hər gün hərbi hissəyə
gedib bu məsələyə baxılmasını tələb etsə də, buna nail ola
bilmədi. Hiss edirdi ki, bu məsələyə baxmaq istəmirlər. Amma
Yasəmən nəyin bahasına olur-olsun buna nail olmalı idi.
Bu arada Yasəmənin mənzilinə başqa bir kommisiya
gəldi. Vurulan ziyanı təyin etmək üçün. Gələnlər dövlət
işçiləri, həmkarların nümayəndələri və başqa kimlərsə. Onlar
yazdılar-pozdular, çəkiliş apardılar, sonra uzun bir siyahı tutub
imzaladılar. Bir nüsxəsini apardılar, ikinci nüsxə isə qaldı.
Məsələ dəyən ziyanda deyildi. Nə olsun ki, Yasəmən
hər şeyi çətinliklə alıb yığmışdı – zərrə-zərrə, gilə-gilə. Az
yemişdi, pis geymişdi, çox şeylərdən imtina etmişdi. Amma
bütün baş verənlərin qabağında bunlar heç nə idi. Heç nə... Ən
qəribəsi də o idi ki, həmin kommisiya elə o gedən getdi,
onlardan bir də xəbər çıxmadı.
Yanvarın iyirmi doqquzunda Nadya mənzilinə qayıtdı.
Yasəmən bu vaxta kimi elə güman etmişdi ki, onlar yaxşı
qonşu olublar. Həmişə bir-birinin xeyrində-şərində necə
lazımdır bir-birinə yarayıblar, vaxtlı-vaxtsız bir-birinin qapısını
açıblar, gedib-gəliblər. Amma bu hadisələrlə bağlı Nadyanın
ailəliklə xəbərsiz-ətərsiz çıxıb getməsi Yasəmənə qəribə gəldi.
Başqa vaxt olsaydı Yasəmən bu barədə heç fikirləşməzdi də.
Dostları ilə paylaş: |