Solmaz Muxtarova
188
Ardınca da Bakı şəhərində və onun ətrafında fövqəladə
vəziyyət tətbiq edilməsi barədə əhaliyə rəsmi xəbər verilmədən
gecə saat 12-dən başlayaraq səhərə kimi qanlı faciə törədildi.
Daha sonra bu faciəyə don geydirmək üçün şəhər hərbi
komendantı gecə saat 5.30-da radio çıxışı ilə, həmçinin,
vertolyotlardan səpələnən vərəqələrlə əhaliyə fövqəladə
vəziyyət elan olunması barədə məlumat çatdırıldı. Küçələrdə
qanına qəltan olan, atəş altında başını itirən, öz mənzilinə belə
gedə bilməyən kəslər, həmçinin, mənzilində oturanlar bundan
xəbər tutmadı. Fövqəladə vəziyyət haqqında eşidib bilənlərin
də əksəriyyəti haradan biləydi ki, fövqəladə vəziyyət nə olan
şeydir? Belə vəziyyətdə nəyi etmək olar, nəyi etmək olmaz. Bu
barədə nə orta məktəbdə, nə institutda, nə də başqa mənbələrdən
insanlara məlumat verilməmişdi. Bütün bunları, fövqəladə
vəziyyəti elan edənlər, bir də qismən hərbiçiıər bilərdi. Sadə
xalqın bu barədə heç bir məlumatı yox idi.
Yasəmən də bütün bunlardan xəbərsiz idi. Yasəmən çox
şeylərdən xəbərsiz idi – şəhərdə baş verənlərdən, Mirzədən,
televiziya verilişlərinin qəflətən nə üçün dayandırılmasından.
Şəhərdə qırğın törədildiyini isə heç ağlına belə gətirmirdi.
Onun fikrincə bu, mümkün olan iş deyildi.
Hava işıqlanırdı. Qara, boz buludlar az qala binaların
üstünə ələnmişdi. Çox az hallarda şəhər belə tutqun görünürdü.
Hava dolub durmuşdu. İndi küçədə baş verənləri aydın görmək
olurdu. Qaranlığın xofu az da olsa yox olmuşdu. Yasəmən tez-
tez pəncərədən bayıra baxıb tankın üstündə pusquda duran,
küçədə sağa-sola şütüyən silahlıların nə etmək istədiyindən baş
aça bilmirdi. Gecəyə nisbətən atışma səngisə də, tamam kəsil-
məmişdi. Kimin kimi atəşə tutduğu da məlum deyildi.
Yasəmən çox nigaran idi. Mənzil onu məngənə təki
sıxırdı. Gecə yarısı bloku niyə partlatdılar? Valya xala? Bəlkə
başına bir iş gəlib? Qıraqda başqa nələr baş verir? Mirzə? Indi
o haradadır? Yasəmən bütün bunlardan nigaran idi, bir xəbər
Ağ göyərçinlər həsrəti
189
bilmək istəyirdi və o, özünün bu istəyində qorxulu heç nə
görmürdü. Adi bir qadının evdən çıxıb harasa getməsində
qəribə nə ola bilərdi? O, birinci qocadan xəbər tutmaq, sonra da
şəhərə getmək niyyəti ilə qapıdan çıxdı. İki pilləkən düşmüşdü
ki, elə bil aləm bir-birinə dəydi, sanki yer göyə qovuşdu. Hər
tərəfdən güllələr yağış kimi yağdı. O, cəld özünü geriyə atdı və
sürünə-sürünə mənzilə girib qapını bağladı.
– Ana!.. – Samir qaçaraq anasının üstünə atıldı. Ar-
xasınca Məlahət göründü.
– Ana! Ana! – uşaqların səsi bir-birinə qarışdı.
– Mənim balalarım... – Yasəmənə qəribə bir qüvvə
gəldi, uşaqları geriyə itələdi. – Mənim balalarım!.. – Başqa heç
nə deyə bilmədi.
Samirin gözləri dəhşətdən böyümüşdü. Məlahət isə
ağlayırdı. Yasəmən onları bərk-bərk qucaqlayıb divara sıxıldı.
Qonaq otağı küçə tərəfdən, yataq otağı və mətbəx isə hərbi
hissədən – hər yer atəş altında idi. Pəncərələrin şüşələri
şaqqaşaraqla sınıb tökülürdü. Elə bil mənzildə göy guruldayıb,
ildırım çaxırdı. Yasəmən ondan kömək uman balalarının
qabağında aciz idi, nəinki onlara kömək edə bilmirdi, heç
təsəlli üçün bir söz də tapıb deyə bilmirdi.
Atəş səslərindən az qalırdı beyni çatlasın. Yasəmənə elə
gəlirdi ki, əzrail mənzilin qapısında durub. Fürsət düşən kimi o,
mənzilə soxulacaq. Ölüm xofu... Ölüm iyi... “Mirzə?..” O, ərini
çağırmaq istədisə də, səsi çıxmadı.
Atışma isə ara vermirdi. “Yəni bu dünyanın yiyəsi
yoxdur?” Yasəmən özündə qüvvə tapıb sürünə-sürünə telefona
yaxınlaşıb nömrəni yığdı.
– Alo! Oktyabr rayon milis şöbəsi sizi dinləyir.
– Alo! Alo! Bizə kömək edin! Danışan Səlyan ka-
zarmasındandır... Bizə kömək edin!..
Yasəmən ünvanı dedi.
– Alo?! Alo?! Alo?!
Solmaz Muxtarova
190
– Atışma səslərini eşidirsiniz?! Bizi evimizin içində
güllə-baran edirlər!.. Bizə kömək edin!.. Bizə kömək edin...
Xətdə qəribə qatışıq səslər eşidildi.
– Alo!..
– Alo!..
Səslər bir-birinə qarışdı. Sonra dəstəyi qoydular. Yasə-
mənin qulaqlarında aramsız səslər eşidildi. Elə bununla da
telefon xətti kəsildi.
İki saata qədər davam edən atəş axır ki dayandı. Bir-iki
dəqiqə sonra blokda ayaq səsləri eşidildi və qapı bərk-bərk
döyüldü. Samir qapıya tərəf getmək istəsə də, Yasəmən ona
imkan vermədi:
– Yox! Sən dayan!
Bayaqdan əsəblərini zorla cilovlayan Yasəmən qəzəblə
qapını açdı. Gözləri qan tutmuş əlisilahlılar silahlarını mənzilə
tuşlayaraq içəri soxuldu. Yasəməni itələyib evə keçdilər.
Mətbəxi, eyvanı, hər yeri yoxlayıb, keçiddə yorğana bürünmüş
uşaqlara istehza ilə baxıb qapıya tərəf yönəldilər:
– Nikovo net... – deyə yekəpər saqqallı dodağının
altında mızıldandı. Bu an Yasəmən özünü saxlaya bilmədi.
Saqqallının yaxasından tutub silkələdi:
– Siz bizdən nə istəyirsiniz? Bu uşaqların nə günahı
var?!
Saqqallı dartınıb Yasəmənin əlindən çıxdı. Silahını
uşaqlara tərəf tuşlayıb irişdi:
– Şto? Jit nadoyelo?
Yasəmən iki qolunu açaraq uşaqlarının qabağında
dayandı. Məlahət qışqırdı, Samir isə elə bil donmuşdu.
– Svoloç!..
Saqqallı nə fikirləşdisə, atəş açmadı, barmağı çaxmaqda
dayandı. Qapıya tərəf yönəldi və qapı çırpıldı. Ayaq səsləri
uzaqlaşdı. Yasəmən isə özündə deyildi. Hələ də qolları açılmış
vəziyyətdə uşaqlarının qabağında donub qalmışdı. O, balalarına
Dostları ilə paylaş: |