Problem. Xarici ticarət və ölkənin beynəlxalq
rəqabətqabiliyyətliliyinin artırılması
“Xarici ticarət və əmək bazarı arasında əlaqələrin araşdırılması”
mövzusu üzrə tədqiqat işində qabaqcıl qərb ölkələrinin təcrübəsinə əsaslanaraq
amil tutumu modeli əsasında Azərbaycan üçün əməyin hansı növlərinin üstünlük təşkil
etdiyi ixrac sahələrini müəyyənləşdirmək məqsədi ilə Azərbaycan, Rusiya, Qazaxıstan və
İran iqtisadiyyatı üçün xalis ixrac və istehlak üzrə amil tutumu matrisi qurulmuşdur. Bu
ölkələrin sahələrarası balanslarının əhatə etdiyi iqtisadi fəaliyyət sahələri üzrə əməyin
ixtisaslara görə bölgüsü matrislərini qurmaq mümkün olmadığından ABŞ-ın əmək
matrisindən istifadə edilmişdir. Amil tutumu modelinə əsaslanaraq qeyd olunan ölkələr
üçün əməyin hansı növlərinin üstünlük təşkil etdiyi ixrac sahələri müəyyənləşdirilmişdir.
Tədqiqatın nəticəsinə görə, Rusiya, İran və Qazaxıstanla müqayisədə Azərbaycanda
qeyri-neft sektorunda hazırda istehsal olunan əmtəə və xidmətlər yüksək ixtisaslı əmək
növündə daha az, lakin daha aşağı ixtisaslı əməkdə (kənd təsərrüfatı və s.) üç ölkə ilə
müqayisədə daha yüksəkdir. Cari ildə Azərbaycan Respublikası Dövlət Statistika
Komitəsi tərəfindən 2011-ci ilin rəqəmləri əsasında sahələrarası balans nəşr olunduğu
təqdirdə tədqiqat işinin nəticələrinin yenilənməsi nəzərdə tutulmuşdur (məsul icraçı:
i.e.n. M.R.Rəsulova, icraçı: A.Ş.İmanova).
“Azərbaycanın beynəlxalq iqtisadi əlaqələrinin təhlili”
mövzusu üzrə tədqiqat işində Azərbaycanın beynəlxalq iqtisadi əlaqələrinin
mövcud vəziyyətinin təhlili məqsədilə tədiyə balansı üzrə 1995-2012-ci illəri əhatə edən
zəruri statistik məlumatlar toplanılmış və ilkin təhlil aparılmışdır. Tədqiqat işi davam
etdirilir və növbəti mərhələdə tədiyə balansının əsas komponentlərinin ekonometrik
qiymətləndirilməsi nəzərdə tutulmuşdur (məsul icraçı: i.e.n. M.R.Rəsulova; icraçı:
Ü.İ.İbrahimli).
“Azərbaycanın milli standartlaşdırma sisteminin beynəlxalq tələblərə
uyğunlaşdırılması üzrə nəzəri-metodoloji əsaslarının işlənilməsi”
mövzusu üzrə tədqiqat işində milli standartlaşdırma sisteminin nəzəri metodoloji
ə
sasları haqqında ilkin araşdırmalar aparılmış və standartlaşdırmanın iqtisadiyyata
təsiri, milli standartlaşdırma sisteminə dair beynəlxalq tələblər və həmin tələblərin
ölkəmizdə tətbiqi vəziyyəti təhlil edilmişdir. Nəticədə milli standartlaşdırma sisteminin
beynəlxalq tələblərə uyğunlaşdırılmasının zəruriliyi və uyğunsuzluğun zərərləri
müəyyənləşdirilmişdir (məsul icraçı: i.e.d. Ə.C. Muradov; icraçı: E.Ə.Mikayılov).
Problem. Azərbaycanda sahibkarlığın və regionların inkişafı
məsələləri
“Regionların sosial-iqtisadi inkişaf göstəricilərinin təhlili və inzibati
rayonlar üzrə prioritet investisiya istiqamətlərinə dair təkliflərin
hazırlanması”
mövzusu üzrə tədqiqat işində regionların sosial-iqtisadi inkişaf göstəricilərinin
təhlili və inzibati rayonlar üzrə prioritet investisiya istiqamətlərinə dair təkliflərin
hazırlanması İnstitut tərəfindən hazırlanan və mütəmadi olaraq yenilənən “Regionların
sosial-iqtisadi Pasportu”nun tərkib hissəsi kimi həyata keçirilmiş və hər il üzrə
yenilənməsi planlaşdırılmışdır (məsul icraçı: i.e.n. R.N. Hüseynəliyev, icraçı: i.f.d.
E.F.Qasımov,i.e.n. M.R.Rəsulova, A.Q.Davudov, N.F.İsmayılova).
“Sahibkarlığın inkişafında xüsusi iqtisadi zonaların rolu”
mövzusu üzrə tədqiqat işində Xüsusi İqtisadi Zonalar (XİZ) və sahibkarlığın (kiçik
və orta müəssisələrin) xarakteristikası, XİZ-lər tərəfindən sahibkarlara göstərilən
xidmətlər əks edilmişdir. Beləliklə, XİZ-lər qabaqcıl texnologiyaların inkişaf mərkəzləri
kimi regionların iqtisadi inkişafı üçün səmərəli üstünlükləri sürətlə yarada bilən, iqtisadi
siyasətə asanlıqla uyğunlaşan çevik alət olaraq sahibkarlara müxtəlif xidmətlər
göstərirlər:
1) kiçik və orta biznes müəssisələrini zəruri məlumatlarla (məsələn, XİZ-lər Ticarət
və İnkişaf üzrə BMT-nin (UNCTAD) konfransında qəbul edilmiş EMPRETEC (Müəssisə
və Texnologiya) proqramından istifadə etməklə) təmin edə bilərlər;
2) xüsusi inkubator ola bilərlər;
3) XİZ-lərin çoxillik xarici iqtisadi fəaliyyətinin formalaşması mexanizmləri üzrə
təcrübəsindən istifadə edilə bilər;
4) birgə müəssisələrin yaradılması üçün biznes əməkdaşlığının, daxili bazarın
təminatı üçün sazişlərin, malların və xidmətlərin istehsalının ötürülməsi, birgə istehsal,
texnologiyanın ötürülməsi, sənaye binalarının bölüşdürülməsi və birgə istifadəsi
haqqında müqavilələrin bağlanılması mexanizmləri yaradıla bilər;
5) xüsusi dəmiryol dəhlizləri, inzibati xərclərin azaldılması, sərhəddən malların
daşınmasının asanlaşdırılmış proseduru kimi üsul və mexanizmlərdən istifadə edə
bilərlər [mobilliyi (hərəkətliliyi) təmin etmək və məhsulların paylanmasını
asanlaşdırmaq məqsədilə];
6) maddi-texniki baza ola bilərlər (məsul icraçı: i.e.n. H.Ə. Eynalov, icraçı:
N.F.İsmayılova).
“Regionların iqtisadi potensialının qiymətləndirilməsi və ondan
istifadə səviyyəsinin təhlili (Dağlıq Şirvan)”
mövzusu üzrə tədqiqat işi “Dağlıq Şirvan iqtisadi rayonunun genişləndirilmiş
pasportu” adı altında icra edilmişdir. Belə ki, İnstitut tərəfindən hazırlanan və mütəmadi
olaraq yenilənən “Regionların sosial-iqtisadi Pasportu”u nümunə olaraq Dağlıq-Şirvan
iqtisadi rayonunun timsalında inzibati rayonların da göstəriciləri ayrıca verilməklə
genişləndirilmiş və bu təcrübənin digər iqtisadi rayonlar üzrə də aparılması üçün
imkanların araşdırılması vəzifə olaraq qarşıya qoyulmuşdur. (məsul icraçı: i.f.d.
E.F.Qasımov, icraçılar: S.A.Vəliyev, N.A.Cabbarova).
“Azərbaycanda kiçik və orta sahibkarlığın inkişaf perspektivlərinin
qiymətləndirilməsi”
mövzusu üzrə tədqiqat işində il ərzində Azərbaycanda (kiçik və orta) sahibkarlığın
inkişaf perspektivlərinin qiymətləndirilməsi üzrə elmi şəkildə təhlil aparılmış (SWOT və
PEST analizləri, xarici təsir analizi, steykholder analizi və s.), əsaslandırılmış, nəticə və
təkliflər hazırlanaraq müxtəlif elmi-praktiki konfranslarda təqdim edilmişdir. Gözlənilən
nəticələr - Azərbaycanda (kiçik və orta) sahibkarlığın sahələr üzrə inkişaf
perspektivlərinin göstərilməsi, innovasiya yönümlü sahibkarlıq subyektləri üçün uyğun
strategiyanın qurulması üsullarının verilməsidir (məsul icraçı: i.e.n. S.H. Abasova,
icraçılar: İ.B.Zeynalov, D.C.Hüseynova).
“Ölkədə kiçik və orta sahibkarlığın inkişafı üzrə SWOT analizin
aparılması, təklif və tövsiyələrin hazırlanması”
mövzusu üzrə tədqiqat işi aparılmışdır. Azərbaycanda il ərzində (kiçik və orta)
sahibkarlığın fəaliyyətinin SWOT təhlili aparılmış (SWOT analizi) və əsaslandırılmış,
nəticə və təkliflər hazırlanaraq müxtəlif elmi-praktiki konfranslarda aprobasiya
edilmişdir.