5
çıxarmaq olmaz ki, həmin oyunların kütləviliyi, xalq adət-ənənəsi ilə
bağlılığı onun daha qədimliyini sübut edir, bu sahədə müəyyən
qənaətlərə gəlməyə əsas verir.
“Yallı” rəqsi Azərbaycan xalqının bütün obalarında: Qazax,
Qarabağ, Gəncəbasar, Şəmkir, Şəki, Şirvan, Bakı, Naxçıvan,
Kürdüstan, Göyçə, Borçalı, Dərəçiçək, Dərələyəz, Lənkəran, İran
Azərbaycanında geniş yayılmışdır.
Azərbaycan xalq rəqslərinin sistemli tədqiqatçılarından olan
Bayram Hüseynli “Yallı” sözünün Azərbaycan xalqının dilində çox
qədim zamanlardan mövcud olduğunu göstərərək yazır ki,
Azərbaycan dilində “yal” sözü bir neçə mənada işlədilir. Bunlardan
biri də dağlar, təpələrdir ki, Azərbaycan xalqı arasında onlara “yal”
deyilir. Çox güman ki, “yallı” məfhumu da məhz bu mənada
yaranmışdır. Çünki “Yallı” rəqsində əl-ələ verib oynayan adamlar,
bir növ, çiyin-çiyinə durmuş dağları xatırladır.
“Yallı” oyunu həm musiqi, həm də mahnı müşayiəti ilə ifa
olunur. Burada iştirak edənlərin sayı hər iki cinsdən istənilən qədər
ola bilər. Maraqlıdır ki, ayrı-ayrı rəqslərdə olduğu kimi (məsələn,
“Cəngibaşı”, “Halaybaşı”), burada da “Yallıbaşı” vardır. Başçı
kollektiv rəqsin gedişinə, onun başlanmasına, qurtarmasına, rəqslərin
nizamla oynanmasına rəhbərlik edir. Başçıya bir qayda olaraq,
“rəqqas”, “müavin” və dəstənin axırında duran rəqqas “ayaqçı”
kömək edir.
“Halay” oyunu ərəfəsində qarşı tərəflərin musiqi müşayiəti ilə
mahnı oxuması, deyişməsi, şübhəsiz, aşıq sənətinə də müəyyən təsir
göstərmişdir. Bu mərasimlər aşıqların bir-birinə meydan oxumasını
nümayiş etdirməsi üçün zəmin yaratmışdır.
Ü.Hacıbəyli kütləvi ifaçılığın əsas mahiyyətindən, forma
əlamətlərindən bəhs edərək yazır: “Azərbaycanın bir çox
mahallarında toy-düyün zamanı, yaxud bayram və başqa şadlıq
günlərində camaat hamısı bir yerə yığılıb ikitərəfli olaraq
“deyişmələr” oxuyurlar”.
“Halay” oyun mərasimində ifa olunan deyişmələr tərəflərin
bir-birini sınaması, imtahana çəkməsi, həm də cəngi sədaları üzərində
6
qurulur. “Halay” oyun mərasimində kişilər kimi, qadınlar da çox fəal
iştirak edirlər.
Professor Bayram Hüseynlinin təbirincə desək, “Halay” rəqs-
mahnıları toy məclisində ancaq qadınlar tərəfindən ifa olunur. Hər
dəstəyə 6-8-dən 20-30 nəfərə kimi oxuyub-oynamağı bacaran, çox
bayatı bilən qız-gəlinlər düzülür. Bəzən halaya daha çox ifaçı cəlb
etmək üçün dəstəyə düzülənlər belə bayatı oxumaqla “Halay” rəqs
mahnılarını başlayırlar:
Halay cərgə düzülsün,
Xumar gözlər süzülsün.
Hər kəs halaya girməz,
Əli yardan üzülsün.
Azərbaycanın bir sıra rayonlarında aparılan müşahidələr
göstərir ki, “Halay”da qadınlarla bərabər kişilər də iştirak edirlər,
eyni zamanda, bu rəqslərin icrası zamanı “Bayatı”, “Gəraylı”,
“Qoşma”, “Təcnis”, “Divani”, “Müxəmməs” və digər aşıq ədəbiyyatı
nümunələrindən istifadə olunur. Oyunda qarşı-qarşıya duran kişilər
“Halay” oyun mərasimində deyişmələri əsasən qıfılbənd ilə cəngi
havaları üzərində oxuyurlar.
“Halay” rəqs mahnılarında oxunan bayatıların məzmununu
başlıca olaraq əmək, təsərrüfat, təbiət, məhəbbət, gözəllik, vəfa,
sədaqət, etibar, gəlinin tərifi, oğlanın mərdliyi və bu kimi motivlər
təşkil edir ( notoqrafiya -16, 16).
Tanınmış folklorşünas-filologiya elmləri doktoru, professor
Azad Nəbiyev “El nəğmələri, xalq oyunları” kitabında çox qədim
zamanlarda qadın mərasimlərində onların həvəslə rəqs etdiklərini
diqqət mərkəzinə gətirərək yazır: “Xına yaxdı gecəsinə çox zaman
qadın xanəndə və çalğıçılar gətirilir. Xanəndə oxuyarkən qızlar rəqs
edirlər”.
Toy mərasimlərində rəqslərdən istifadə olunduğu kimi, qədim
türk tayfalarında, o cümlədən qədim Azərbaycan elində tanınmış
qəhrəmanların yas mərasimlərində ağlamaq, qəmgin mahnılar
oxunmaqla bərabər, eyni zamanda rəqslər də icra olunurdu. Böyük
ədibimiz Əbdürrəhim bəy Haqverdiyev həmin cəhətlə əlaqədar
yazırdı: “Qədim Azərbaycanda ölən böyük qəhrəmanlar üçün
7
ağlamaq adət idi. Qəhrəman ölən günü camaatı bir yerə toplayırdılar.
Toplantıya “yuq” deyirdilər. Toplananlar üçün qonaqlıq düzələrdi,
xüsusi dəvət edilmiş “yuqçular” isə iki simli qopuz çalıb
oynayardılar”.
Göründüyü kimi, tarixin müxtəlif dövrlərində hələ çox qədim
zamanlarda belə Azərbaycanda matəm rəqsləri də mövcud olmuşdur.
Lakin bu adət tədricən sıradan çıxmış, sonralar aradan
götürülmüşdür. Matəm mərasimlərində əsasən çox qəmli mahnılar
oxunulur və ağılar deyilirdi ki, bunları da xüsusi adamlar icra
edirdilər. Bununla bərabər ifa olunan “ağıçlar” qopuz aləti tərəfindən
müşayiət edilirdi. Onu da qeyd etmək lazımdır ki, indi də bir çox
xalqlarda matəm mərasimində musiqidən istifadə etmək adəti
mövcuddur. Bu gün artıq bizdə olan yas mərasimlərində musiqidən
istifadə olunmaması İslam dininin musiqini haram buyurmasından
irəli gəlir.
Qədim türk tayfalarının, o cümlədən, azərbaycanlıların şifahi
xalq yaradıcılığında meydan tamaşalarının da böyük əhəmiyyəti və
yeri olmuşdur. Meydan tamaşaları əsasən təmiz havada aparılırdı və
burada sözsüz tamaşalar, yəni pantomimanın ilk ünsürlərindən
istifadə əl-qol hərəkətləri ilə, mimikalarla ifadə edilmiş, sonralar isə
mənasız rəqslərdən süjetli rəqslərə doğru sürətli inkişaf yolu
keçmişdir.
Azərbaycanda meydan tamaşaları tarixən aşağıdakı kimi
təşəkkül tapmışdır:
–
Cıdır tamaşaları;
–
Zorxana;
–
Əyləncə tamaşaları;
–
Kəndirbaz tamaşaları;
–
Sim pəlvan tamaşaları;
–
Masxara tamaşaları;
–
Qaraçı tamaşaları;
–
Fərdi tamaşalar;
Həmin tamaşaların göstərilməsi zamanı mahnılar oxunmaqla,
qədim xalq çalğı alətlərində musiqi çalınmaqla bərabər, həm də