7
hissini itirmiş yetkin insan da dünyada özünü aciz və zəif hiss edir. Məhz təhlükəsizliyə nail ola bilməməklə bağlı
yaranan təşviş nevrozların əsasını təşkil edir.
Seksual pozuntular və aqressiv davranış isə həmin təşvişin nəticəsi kimi izah olunur. Horninin fikrincə,
artmaqda olan təşvişdən qorunmaq üçün insanlara tərəf hərəkət, insanlardan uzaqlaşmağa doğru hərəkət və
insanların əleyhinə doğru hərəkət meydana çıxa bilər. Bu istiqamətlərdən hər hansı birinin üstünlük təşkil etməsi
nevrotik şəxsiyyəti formalaşdırır. Bu zaman ya xidmətkeş, hamıya rəğbət göstərən adam, ya cəmiyyətdən ayrı
düşmüş, soyuq təbiətli insan, ya da hökmlü, aqressiv şəxsiyyət formalaşır. Horninin qadın seksuallığına həsr
olunmuş işləri böyük şöhrət qazanmışdır. O, haqlı olaraq göstərirdi ki, psixoanaliz kişilər tərəfindən işlənib
hazırlandığından qadınların psixoseksual inkişafını əks etdirən bir çox aspektlər düzgün izah olunmamışdır. Horni
pasiyentin öz problemlərini həll etmək üçün seçdiyi yolu analiz etməyi təklif etmiş və bununla psixoanaliz
texnikasını xeyli dəyişmişdir.
Horninin baxışları bir çox məqamlarda Erix Fromun (1900-1980) ideyaları ilə səsləşir. Müasir cəmiyyəti tarixi
inkişafda təhlil edən From belə bir qənaətə gəlir ki, insan fərdi azadlığa nail olduqca təhlükəsizlik hissini itirir.
Odur ki, itirilmiş təhlükəsizlik hissini qaytarmaq məqsədi ilə şəxsiyyət “azadlıqdan qaçma” patoloji
mexanizmlərinə əl atır. Fromun aqressiv və auto-aqressiv davranışa həsr etdiyi əsərləri böyük müvəffəqiyyət
qazanmışdır. “İnsanın ruhu”, “İnsan destruktivliyinin anatomiyası” kitablarında From müxtəlif tarixi
şəxsiyyətlər – Hitler, Himler, Stalini misal gətirərək destruktiv davranışın müxtəlif formalarını araşdırır. Fromun
öz əsərlərində nağıl və əfsanələrə müraciət etməsi də çox böyük maraq doğurur. Freyddən fərqli olaraq, from
burada seksual deyil, sosio-psixoloji və mədəni-tarixi aspektləri ön plana çəkir. Fromun baxışları daha ətraflı
şəkildə aqressiya və suisidə həsr olunmuş fəsildə əks edilmişdir. Psixoterapiyanın əsas məqsədini From insanın
mənliyinə nüfuz etmək və onun yaradıcı qüvvələrini neqativ amillərdən azad etməkdə görürdü.
Müasir psixoanalizin formalaşmasında Harri Stek Sallivan (1892-1942) böyük rol oynamışdır. Sallivan Freyd
nəzəriyyəsinə yeni baxışlar gətirmiş ilk Amerika analitiki olmuşdur. Sallivana görə şəxsiyyət konsepsiyası
hipotetik konstruksiyadır. Həqiqətən cərəyan edən real qarşılıqlı münasibətlərdir. Şəxsiyyətin fərdi təhlükəsizliyi
ilə bağlı təşviş hissini Sallivan insanlar arasındakı qarşılıqlı baxımından qiymətləndirirdi.
İnsanın təşəkkül tapması onun valideynləri ilə qarşılıqlı münasibətləri kontekstində baş verir. Bu münasibətlər
baxımından insanda özü haqqında rəy formalaşır (məsələn, ana narahat olarkən, onun təşvişi möcüzəli şəkildə
uşağa ötürülür və sonradan hər dəfə təhlükəsizliyinin pozula biləcəyini duyduqda təşviş meydana çıxır).
Şəxsiyyətin təşəkkül prosesinin birinci mərhələsində reallıq qeyri-mükəmməl qavranılır (protaktik təfəkkür).
Sonradan bu, simvolik təfəkkürlə əvəz olunur, o da öz növbəsində yerini sintaktik təfəkkürə verir. Bir tərəfdən
şəxslər arasında qarşılıqlı münasibətlər yaratmaq tələbatı, digər tərəfdən təhlükəsizliyi itirmək qorxusu bu prosesi
hərəkətə gətirir. Ona görə də Sallivan psixoanalitik terapiya fokusunda pasiyentin ətrafdakılara qarşı münasibətini
qiymətləndirməyi təklif etmişdi. Psixoterapevtik prosesdə həkimin xəstəyə qarşı fəal mövqeyi həlledici rol
oynayır.
Müasir psixoanalitiklərin baxışlarında olan fərqlərə və Freydin ilkin nəzəriyyəsindən xeyli uzaqlaşmalarına
baxmayaraq, psixoanaliz təliminin psixikanın struktur quruluşu, psixi proseslərin qeyri-şüurlu xarakteri, psixoloji
müdafiə mexanizmləri və s. haqqındakı müddəaları bu günə kimi öz əhəmiyyətini saxlamaqdadır.
Psixodinamikanın əsasları
Psixoanalizin əsas postulatlarını rəhbər tutaraq, müasir psixodinamik nəzəriyyə insan psixikasının quruluşunun
iki modelini nəzərdən keçirir:
Topoqrafik model – şüur, şüuraltı, şüursuzluq.
Freyd tərəfindən təklif olunmuş topoqrafik model fikirlərin, hiss və duyğuların şüur üçün nə qədər anlaşılan
olmasına əsaslanaraq, psixikanı üç tərkib hissəsinə bölür. Təbii ki, bu tərkib hissələri duyulmaz olub beyində heç
bir məkana malik deyil. Bunlar nəzəri konstruksiyalar olub, klinik prosesləri düzgün başa düşməyə xidmət edir.
8
Şüur – bizim dərk etdiyimiz fikir və duyğuları, eləcə də xarici mühitdən qəbul olunan sensor məlumatları
özündə birləşdirir.
Şüuraltı – yalnız diqqəti onların üzərində cəmləşdirdikdə meydana çıxan fikirlər, emosiyalar, xatirələrdən
ibarətdir. Məsələn, insanların əksəriyyəti şüurunda mümkün olan zəlzələ haqqında fikirlər saxlamır, lakinbir
zəlzələ haqqında düşündükdə, yəni bu mövzuya xüsusi olaraq müraciət etdikdə, həmin fikirlər meydana çıxır.
Beləliklə, şüuraltının əsas məqsədi senzura funksiyasını yerinə yetirməkdir. Senzura qeyri-şüuri materialın –
təşviş yarada bilən fikir və meyllərin şüura keçməsinin ya tamam qarşısını alır, ya da onu dəyişdirib tanınmaz
hala salır. Məsələn, gənc qızın yaxşı tanımadığı cavan oğlana qarşı cinsi meyli güclü həyəcana səbəb ola bilər
(əlbəttə, əgər bu meyl qızın mənəvi-etik baxışlarına zidd gedirsə).Odur ki, senzura bu impulsların ya tamamilə
qarşısını alır, ya da əks hissə, məsələn, ədavət hissinə çevrilir (təbii ki, gənclər arasında olan bütün qərəzli
münasibətləri bu nöqteyi-nəzərdən izah etmək olmaz).
Şüursuzluq – şüur üçün əlçatmaz olan fikir. Meyl və fantaziyaların məkanıdır. Bunların üzərində diqqəti
cəmləşdirdikdə belə şüur onları dərk edə bilmir. Belə fikir və duyğular itmir, sadəcə olaraq, yaddaşa buraxılmır və
buna görə də dolayı yolla, səhv sözlər, yanlış xatirələr, yuxular və nevrozlar aşkar olunurlar.
Fenomenologiya
Psixoanalizlə eyni vaxtda Almaniya və İsveçrədə psixologiyanın yeni cərəyanı yarandı. Fenomenologiya adını
almış bu cərəyanın əsasını xəstələrin ruhi həyatının subyektiv təzahürlərinin öyrənilməsi təşkil edir. Bu metodun
əsas məqsədi sağlam və patoloji psixi proseslərin müşahidəsi və təsviridir. Psixologiyanın digər cərəyanlarından
fərqli olaraq fenomenologiyada müşahidələrin sayı deyil, ayrılıqda götürülmüş hər bir hadisənin mahiyyətinə
varmaq, onun dərinliyinə nüfuz etmək mühüm əhəmiyyət kəsb edir. Beləliklə, əsas informasiya mənbəyi kimi
təcrübi məlumatlar və testlərin nəticələri deyil, pasiyentin özünün nəql etdiyi subyektiv duyğular və düşüncələr ön
plana çəkilir.
Fenomenologiyanın baniləri Hüsserel və Yaspersin fikrincə, konkret xəstənin ayrılıqda götürülmüş subyektiv
hisslərinin öyrənilməsi digər xəstələrə də xas olan qanunauyğunluqları aşkara çıxarmağa imkan verir. Digər
tərəfdən ümumi qanunauyğunluqlar çərçivəsindən kənara çıxan unikal və təkrarolunmaz təsadüflər
fenomenologiya üçün qiymətli hesab olunur. Psixi həyatın ümumi kontekstindən müəyyən fenomenləri ayıraraq
şəxsin subyektiv hisslərini ətraf aləmin obyektiv şəraitinə qarşı qoymaq fenomenologiyanın əsas prinsipini təşkil
edir. Bu zaman müşahidə və təsvir tədqiqatçının şəxsi təfəkkür modelindən və nəzəri konsepsiyalarından asılı
olmadan həyata keçirilməlidir. Əvvəlcədən belə qəbul edilmişdir ki, fenomenlərdən hər biri tədqiqatçının
marağından asılı olaraq müxtəlif baxımdan qiymətləndirilə bilər.
Fenomenlərin təsnifatı həyat proseslərindən, onların psixi sferaya aid edilməsindən asılıdır. Belə ki, obyektiv
həqiqətin dərk olunması, bir-birindən xeyli fərqlənən qavrama və təsəvvür fenomenlərin iştirakı ilə həyata
keçirilir. Qavrama obyektiv xarakter daşıyır, xarici mühitdə meydana çıxır, kifayət qədər aydınlığa malik olur,
yaxşı yadda qalır, şəxsin iradəsindən asılı olur.
Ekzistensial psixologiya
Birinci və ikinci dünya müharibələrinin acınacaqlı nəticələri, ağır iqtisadi vəziyyət, cəmiyyətin humanizm
dehumanizasiyası, eləcə də, insan psixologiyasını bioloji mövqedən izah etmək cəhdlərinin iflasa uğraması
psixologiyada fenomenologiya cərəyanının ekzistensional cərəyana transformasiyasına təkan verdi.
Ekzistensionalizm cərəyanının əsasını ekzistensiya “insanın özü-özündə mövcudluğu”, eləcə də onun azadlığı və
daxili aləminin formalaşması üçün məsuliyyət daşınması təşkil edir. Ekzistensionalizm nümayəndələri
L.Binsvanker, Q.Haydaqqer, S.Kyerkkoqor və Kuntsa görə insan varlıq, şüur və mənəviyyatı özündə birləşdirən,
digər canlılardan fərqlənən yeganə məxluqdur. İnsan, nəinki yaşayır və duyur, həmçinin yaşadığını və duyduğunu
bilir. Bu bilik onun subyektiv kateqoriyaları obyektivlərdən fərqləndirmək qabiliyyətindən irəli gəlir. Öz
varlığının dərk olunması subyektiv kateqoriyadır. Ekzistensialistlərin fikrincə, hər bir şəxs zaman və məkan