FORMÁLI
Eins og þekkt er kemur stefna íslenskra stjórnvalda að verulegu leyti fram í lögum og reglugerðum. Í 1. grein laga nr. 40/2007 um heilbrigðisþjónustu er m.a. kveðið á um að „allir landsmenn eigi kost á fullkomnustu heilbrigðisþjónustu sem á hverjum tíma eru tök á að veita til verndar andlegri, líkamlegri og félagslegri heilbrigði“.
Í lögunum segir einnig, 21. grein: Sjúkrahúsið á Akureyri er kennslusjúkrahús. Það veitir sérhæfða sjúkrahúsþjónustu, m.a. á göngu- og dagdeildum, fyrir landsmenn og almenna sjúkrahúsþjónustu í sínu heilbrigðisumdæmi. Hlutverk þess er að:
-
veita heilbrigðisþjónustu sem á hverjum tíma samræmist skyldu slíks sjúkrahúss, m.a. sérfræði-þjónustu í helstu greinum læknisfræði, hjúkrunarfræði og eftir atvikum öðrum greinum heilbrigðisvísinda sem stundaðar eru hér á landi, með aðgengi að stoðdeildum og rannsóknadeildum.
-
annast starfsnám háskólanema í heilbrigðisvísindagreinum við Háskólann á Akureyri.
-
taka þátt í starfsnámi annarra háskólanema og framhaldsskólanema í grunn- og framhalds-námi á heilbrigðissviði í samvinnu við Landspítala, Háskóla Íslands og aðrar heilbrigðisstofnanir og skóla.
-
stunda vísindarannsóknir á heilbrigðissviði.
-
gera fagfólki kleift að sinna fræðastörfum við Háskólann á Akureyri eða eftir atvikum aðra háskóla.
-
vera varasjúkrahús Landspítala.
Þjónustusvæði sjúkrahússins hefur verið Norðurland og Austurland að hluta, þó á vissum sviðum nái þjónustan til landsins alls. Samfara bættum vegasamgöngum, m.a. veggöngum undir Vaðlaheiði, er líklegt að eftirspurn eftir þjónustu á Sjúkrahúsinu á Akureyri (SAk) muni aukast á næstu árum og trúlega hafa breytingar á skipulagi heilbrigðismála einnig áhrif í þá átt.
Húsnæðismál SAk hafa lengi verið í athugun. Legudeildir spítalans fullnægja ekki kröfum nútímans og núverandi húsnæði gefur ekki möguleika á nauðsynlegum úrbótum. Það á einnig við um sumar stoðdeildir spítalans. Í þessu samhengi er rétt að vísa til úttektar Embættis landlæknis frá desember 2012 þar sem m.a. segir á bls. 38: „Aðstaðan á legudeild geðdeildar er óviðunandi og óforsvaranleg til lengri tíma litið“. Ljóst má því vera að aðgerða er þörf.
Sjúkrahúsið á Akureyri er kennslusjúkrahús í stöðugri þróun. Mikilvægt er að huga á markvissan hátt að framtíð þess bæði m.t.t. faglegra þátta en einnig húsnæðismála, enda þarf húsnæði á hverjum tíma að veita starfseminni nauðsynlega umgjörð. Sú skýrsla sem hér fer á eftir er þáttur í því og kemur til viðbótar fyrri athugunum og skýrslum um þau efni.
ÁGRIP
-
Vinnuhópurinn um uppbyggingu legudeilda við Sjúkrahúsið á Akureyri (SAk) telur að nýbygging sé eini raunhæfi kosturinn til að leysa þann vanda sem við blasir í húsnæðismálum sjúkrahússins og það er ein af forsendum þess að hægt sé að virða lög um réttindi sjúklinga sem kveða á um að tryggja beri sem best öryggi þeirra, fylgja eftir lýðfræðilegri þróun og efla þjónustu SAk í samræmi við lögbundið hlutverk.
-
Legudeildir spítalans fullnægja ekki kröfum nútímans og núverandi húsnæði gefur ekki möguleika á nauðsynlegum úrbótum. Í þessu samhengi er rétt að vísa til úttektar Embættis landlæknis frá desember 2012. „Aðstaðan á legudeild geðdeildar er óviðunandi og óforsvaranleg til lengri tíma litið“. Ennfremur segir þar: „Legudeild geðdeildar er enn í bráðabirgðahúsnæði en hún er barn síns tíma og stenst ekki kröfur nútímans. Húsnæðið er afar þröngt og óheppilega staðsett innan sjúkrahúsbyggingarinnar. Öll er aðstaða farin að láta á sjá, loftleysið og hreinlætisaðstaða er óásættanleg“. Ljóst má því vera að aðgerða er þörf.
-
Rýmisþörf legudeilda hefur verið skoðuð út frá ýmsum forsendum. Meðaltal innlagna og fjöldi legudaga árin 2012-2014 ásamt mati á faraldsfræði sjúkdóma er notað til að reikna tíðni innlagna og legudaga fyrir hvern aldurshóp. Það sýnir núverandi stöðu og út frá henni er síðan hægt að reikna áætlaða stöðu fram í tímann út frá mannfjöldaspá, þ.e. íbúaþróun og vænta breytingu legudaga eftir aldurshópum. Til að treysta enn frekar grundvöll niðurstaðna hafa verið starfandi notendahópar, þ.e. fagfólk innan SAk sem þekkir best til starfseminnar og hvaða umgjörð húsnæði þarf að veita henni. Í hnotskurn snýst þarfagreiningin og húsrýmisáætlunin um það.
-
Frumathugun er könnun og samanburður þeirra kosta er til greina koma við lausn þeirra þarfa sem framkvæmdinni er ætlað að fullnægja.
-
Þegar lausnir eru skoðaðar til að leysa húsnæðisvanda tiltekinna starfseininga á SAk er alveg augljóst að það verður ekki gert nema með nýbyggingu. Núverandi húsnæði legudeilda er gamalt, liðlega 60 ára. Það er meira en fullsetið og svigrúm til breytinga er afar takmarkað og gefur ekki möguleika á að uppylla þær kröfur sem gerðar eru til sjúkrahúsa í dag. Það á einnig við um sumar stoðdeildir spítalans
-
Unnið er að því að fá alþjóðlega vottun samkvæmt stöðlum Det Norske Veritas, DNV International Accreditation for Hospitals. Þeir staðlar gera kröfur til aðbúnaðar sem miða að því að tryggja öryggi sjúklinga og starfsmanna m.a. til smitvarna sem erfitt er að uppfylla svo vel sé í núverandi húsnæði.
-
Lóð Sjúkrahússins á Akureyri á Eyrarlandstúni er stór og býður upp á mikla möguleika til langrar framtíðar. Aðkomuleiðir eru greiðar sem skiptir miklu máli vegna umferðar sjúkrabíla og það á t.d. við um leiðina að og frá flugvelli vegna sjúkraflugs.
-
Vinnuhópurinn telur að forsenda þess að leysa húsrýmisþörf legudeilda sé að byggja þriggja hæða hús, hver hæð með þremur álmum (kjörnum) og kjallari undir einni þeirra til að nýta hallandi grunn með hagkvæmum hætti, samtals um 8.500 m2, (3 x 2.500 m2 + 1.000 m2).
-
Við mat á stofn- og rekstrarkostnaði húsnæðis var horft til eldri tillagna, en einnig þekktra dæma frá nýlegum og fyrirhuguðum framkvæmdum, t.d. við legudeildir á LSH. Í skýrslu frá 2004 var meðal annars byggt á reynslutölum vegna byggingar barnaspítala við Hringbraut í Reykjavík.
-
Hvað varðar gerð og gæði mannvirkis er reiknað með steinsteyptu húsi sem fellur vel að þeim byggingum sem fyrir eru.
-
Kostnaður hefur verið gróflega metinn og niðurstaðan bendir til að hann verði um 5 milljarðar króna.
Dostları ilə paylaş: |
