Efnisyfirli t

INNGANGUR

Á undanförnum árum hefur mikil vinna verið lögð í að skoða húsnæðisþörf Sjúkrahússins á Akureyri (SAk) og meta hvað skynsamlegast væri að gera til að tryggja hagkvæma og góða þjónustu til lengri tíma litið. Nefndir hafa starfað og skilað af sér skýrslum um stöðu mála og tillögum um hugsanlega notkun húsnæðis, bæði þess sem fyrir er og einnig möguleikum á nýbyggingum.

Síðasta stórframkvæmd við SAk er svokölluð suðurálma en framkvæmdir við hana, uppsteypa og innrétting stóð á árunum 1994 til 2007. Nú er þráðurinn tekinn upp að nýju með því að heilbrigðis-ráðherra, Kristján Þór Júlíusson skipaði vinnuhóp um uppbyggingu legudeilda við SAk með skipunarbréfi dags. 20. nóvember 2014.

Vinnuhópinn skipuðu Sveinn Magnússon formaður, skrifstofustjóri í velferðarráðuneytinu, Anna Gilsdóttir yfirhjúkrunarfræðingur og gæðastjóri á HSN, Bjarni Jónasson forstjóri SAk, Eiríkur Björn Björgvinsson bæjarstjóri á Akureyri, Hildigunnur Svavarsdóttir framkvæmdastjóri hjúkrunar og framkvæmdastjóri bráða- fræðslu- og gæðasviðs SAk, Sigurður E. Sigurðsson framkvæmdastjóri lækninga og framkvæmdastjóri handlækningasviðs SAk og Þóra Ákadóttir hjúkrunarfræðingur. Einnig sátu nokkra fundi og störfuðu með nefndinni Gróa Björk Jóhannesdóttir og Ingvar Þóroddsson, bæði starfandi sem framkvæmdastjórar lyflækningasviðs SAk.

Í skipunarbréfinu segir: „Í febrúar 2003 skilaði nefnd Forathugun, áfangaskýrslu um skipulag og uppbyggingu á Fjórðungssjúkrahúsinu á Akureyri og í febrúar 2004 skilaði nefndin Frumathugun, áfangaskýrslu um skipulag og uppbyggingu á Fjórðungssjúkrahúsinu á Akureyri.

Verkefni vinnuhópsins er að endurskoða og uppfæra tillögur þær sem lagðar voru fram árin 2003 og 2004 um skipulag og uppbyggingu Fjórðungssjúkrahússins á Akureyri og koma með eigin tillögur að verkefninu.“

Þessar tvær skýrslur frá 2003 og 2004 byggðu að nokkru leyti á vinnu svonefnds ráðgjafahóps um framtíðarskipulag húsnæðis SAk, sem átti sér stað frá miðju ári 2000 fram á vordaga 2001 ásamt öðrum skýrslum frá fyrri tíð eins og nánar er greint frá í 5. kafla.

Forsætisráðherra, fjármála- og efnahagsráðherra og heilbrigðisráðherra og formaður Læknafélags Íslands og varaformaður Skurðlæknafélags Íslands skrifuðu undir yfirlýsingu í tengslum við gerð kjarasamninga lækna. Yfirlýsingin er dagsett 8. janúar 2015. Þar er m.a. kveðið á um að samvinna Landspítala og heilbrigðisstofnana á landsbyggðinni verði aukin og að fram fari heildstæð skoðun á skipulagi, uppbyggingu og fjármögnun heilbrigðiskerfisins.

Ætla má samkvæmt yfirlýsingunni að aukin samvinna verði milli LSH og SAk. Í því felast tækifæri sem ber að nýta.

Þessi frumathugun sem hér er sett fram af vinnuhópnum byggir á lögum nr. 84/2001 um skipan opinberra framkvæmda, reglugerð um sama efni nr. 715/2001 og verklagsreglur um tilhögun frumathugunar, áætlunargerðar og verklegrar framkvæmdar við opinberar framkvæmdir sem fjármálaráðuneytið gaf út 27. maí 2002.

Í 3. grein nefndra laga segir: Frumathugun er könnun og samanburður þeirra kosta er til greina koma við lausn þeirra þarfa sem framkvæmdinni er ætlað að fullnægja.

Í greinargerð um frumathugun skulu vera áætlanir um kosti. Þessar áætlanir skulu vera tvíþættar, annars vegar áætlun um stofnkostnað, þ.m.t. kostnað við áætlunargerð, og hins vegar áætlun um árlegan rekstrarkostnað, þ.m.t. lánsfjárkostnað og tekjur, ef við á. Í greinargerðinni skal skýrt frá þeim rökum er liggja að vali kosts þess sem tekinn er, þar á meðal hagkvæmnireikningum sem notaðir eru í samanburði. Greinargerð um frumathugun skulu auk þess fylgja tillögur um staðsetningu og stærð, svo og frumuppdrættir að fyrirhugaðri framkvæmd, eftir því sem við á.

Skýrslan skiptist í forathugun og frumáætlun, sbr. framannefndar verklagsreglur fjármála-ráðuneytisins.

Segja má að þetta sé síðara skrefið í vinnu hópsins en hann skilaði áfangaskýrslu í lok febrúar 2015 eins og kveðið var á um í skipunarbréfinu. Verkefninu er lýst og mismunandi lausnir skoðaðar. Jafnframt er reynt að meta rekstrarkostnað mismunandi lausna bæði að því er varðar húsnæðið sjálft og kostnað vegna breytinga á rekstrarumhverfi starfseminnar.

Frumuppdráttum af staðsetningu og stærð á nýrri legudeildabyggingu er bætt inn á teikningu af núverandi aðalbyggingu SAk til að veita yfirsýn yfir fyrirkomulag hennar. Í því felst ekki mótandi afstaða til endanlegrar gerðar og útfærslu, enda ekki rétt að ganga svo langt á þessu stigi málsins.

Í ljósi þessara atriða er síðan farið yfir kostnaðar- og rekstraráætlun húsnæðis og niðurstöður rökstuddar út frá fyrirliggjandi og gefnum forsendum.

Vinnuhópurinn hefur haldið 8 bókaða fundi, sbr. viðauka 1 bls. 38. Þess utan hafa þeir sem í hópnum eru unnið að verkefninu hver fyrir sig og sameiginlega milli funda til að hinir formlegu fundir yrðu skilvirkari og gagnlegri.

Valtýr Sigurbjarnarson var starfsmaður hópsins. Við vinnu að þessu verkefni hefur verið haft samband við marga sem tengjast heilbrigðismálum og hönnun. Öllum sem í hlut eiga er þakkað kærlega fyrir gagnlegar upplýsingar og góð ráð.

4. SKILGREINING HÚSNÆÐIS

Í þessari skýrslu er fjallað um tilteknar húsnæðiseiningar Sjúkrahússins á Akureyri (SAk) og til að skilgreina þær eru eftirfarandi nafngiftir notaðar, sjá yfirlitsmynd á næstu síðu.

Norðurálma er elsti hluti SAk, tekin í notkun 15. desember 1953. Þar eru m.a. fæðingadeild, lyflækningadeild og skurðlækningadeild. Einnig eldhús og tölvudeild. Gamli aðalinngangurinn, nú merktur inngangur A, er í þessa byggingu en er ekki notaður lengur.

Tengibygging. Í tengibyggingu er aðalinngangur SAk, inngangur B. Þessi hluti hússins tengir hinar einingarnar saman eins og nafnið bendir til. Frá 1986 hefur legudeild geðdeildar verið þar til húsa. Einnig eru þar skrifstofur, bókasafn, kennslustofa o.fl. Jafnframt er þar húsnæði rannsóknadeildar.

Kjarnabygging er sá hluti aðalbyggingar sem hýsir m.a. svæfinga- og gjörgæsludeild, myndgreininga-deild og slysa- og bráðamóttöku. Að vestanverðu er inngangur C á slysadeild. Kjarnabyggingin var tekin í notkun á árunum 1982-1990.

Suðurálma er álman sem gengur austur úr sunnanverðri tengibyggingu. Þar er barnadeild á þriðju hæð, aðalskrifstofur á annarri hæð, almenn göngudeild (dag- og göngudeild, speglun og smáaðgerðastofa) á fyrstu hæð, iðjuþjálfun, sjúkraþjálfun, meinafræðideild o.fl. er í efri kjallara (K1) og í neðri kjallara (K2) eru m.a. búningsherbergi og tæknirými. Að sunnanverðu er inngangur D í suðurálmu. Suðurálma var reist 1995-1996 og tekin í notkun í áföngum á árunum 2000-2007.

Sel er stakstætt hús vestan aðalbyggingar sem hefur verið tengt henni með yfirbyggðri brú. Í Seli er dag- og göngudeildarþjónusta geðdeildar. Byggt í áföngum 1964, 1982 og 1987.

Saumastofa og verkstæði er stakstæð bygging vestan aðalbyggingar, byggð 1967

Kristnesspítali er hluti af SAk. Starfsemi Kristnesspítala var sameinuð rekstri FSA (nú SAk) í ársbyrjun 1993 og þar með allt húsnæði sem tengist heilbrigðisstarfsemi á Kristnesi. Þar er nú endurhæfing og öldrunarlækningar. Kristnesspítali var tekinn í notkun 1927.

Nýbygging er ný legudeildarálma sem fyrirhuguð er sunnan núverandi aðalbygginga SAk.

N


B

A

C


D


Mynd 1. Afstöðumynd.


N


H

MAAA


Mynd 2. Skipulagsmynd.

Á mynd 2 má sjá að lóð Sjúkrahússins á Akureyri á Eyrarlandstúni er stór, 75.874 m² samkvæmt deiliskipulagi og býður upp á mikla möguleika til langrar framtíðar. Lystigarðurinn (grænn flötur) skilur að lóðir SAk og Menntaskólans á Akureyri (merkt MA). Vestan Þórunnarstrætis (upp á myndinni) við norðvesturhorn lóðar SAk er Hlíð, Öldrunarheimili Akureyrarbæjar (merkt H). Þetta er heppileg nánd og gefur færi á góðu samstarfi þessara stofnana.

Aðkomuleiðir eru greiðar sem skiptir miklu máli vegna umferðar sjúkrabíla og það á t.d. við um leiðina að og frá flugvelli vegna sjúkraflugs.

5.