Efnisyfirli t
Yüklə 285,38 Kb.
|
- Bu səhifədəki naviqasiya:
- FORATHUGUN
FORSAGAUndanfarin ár hefur mikil vinna verið lögð í að greina húsnæðisþörf Sjúkrahússins á Akureyri og hvernig tiltækt rými mætti nýta sem best á hverjum tíma. Tæknilegar breytingar eru örar og þeim fylgja sífellt nýir möguleikar sem m.a. fela það í sér að þær lausnir sem bestar þóttu fyrir fáeinum árum heyra nú sögunni til og aðrar betri eru komnar í staðinn. Á árunum 1988 til 2004 störfuðu 6 nefndir/hópar sem höfðu það hlutverk að fjalla um framtíðar-uppbyggingu og nýtingu á húsnæði sjúkrahússins. Þetta voru byggingarnefndin 1988-1990, endurskoðunarnefndin 1993, starfshópur um nýtingu húsnæðis á Kristnesspítala 1993-1994, ráðgjafahópurinn 2000-2001, nýtingarnefnd húsnæðis FSA 2001 og framtíðarnefnd 2002-2004. Í viðauka 1 er nánar fjallað um vinnu og tillögur þessara nefnda/hópa. Sjá bls. 35.
Vinnuhópurinn um uppbyggingu legudeilda við Sjúkrahúsið á Akureyri (SAk) telur að nýbygging sé eini raunhæfi kosturinn til að leysa þann vanda sem við blasir í húsnæðismálum sjúkrahússins og það er ein af forsendum þess að hægt sé að virða lög um réttindi sjúklinga sem kveða á um að tryggja beri sem best öryggi þeirra, fylgja eftir lýðfræðilegri þróun og efla þjónustu SAk í samræmi við lögbundið hlutverk. Það eru sameiginlegir hagsmunir allra að þeir fjármunir sem á komandi árum verður varið til uppbyggingar og starfsemi SAk nýtist sem best og verkefni vinnuhópsins er m.a. að leggja fram tillögur sem stuðla að því að svo megi verða. Í ljósi þess hversu sveigjanleiki er mikilvægur í rekstri heilbrigðistofnana lítur vinnuhópurinn svo á að allar framkvæmdir í húsnæðismálum eigi að taka mið af því. 6.1. Lýsing verkefnis Eins og fram kemur í skipunarbréfi vinnuhópsins felst verkefnið í því að leggja fram tillögur að byggingu fyrir legudeildir sjúkrahússins. Tvær skýrslur voru gerðar um þetta efni árin 2003 og 2004, en ekkert varð úr byggingarframkvæmdum þar sem efnahagslegt hrun varð hér á landi skömmu eftir að innréttingu suðurálmu lauk. Suðurálma var reist á árunum 1994-1996 og tekin í notkun í áföngum á árunum 2000-2007. Í frumathugun frá 2004 var reiknað með 6.800 fermetra nýbyggingu og kjallara undir hluta hennar til að nýta hallann á lóðinni, (3 x 2.000 m2 + 800 m2). Hafa þarf í huga að þá var að mestu gert ráð fyrir tvíbýlum en nú er nær eingöngu gert ráð fyrir einbýlum fyrir sjúklinga og margt annað hefur breyst á síðustu 10 árum sem kallar á nýtt rýmismat fyrir einstakar einingar í starfseminni. Það er verkefni vinnuhópsins að bera saman mögulegar lausnir og útfærslur og rökstyðja þannig tiltekna niðurstöðu. Í desember 2012 var gerð skýrsla á vegum Embættis landlæknis um úttekt á gæðum og öryggi þjónustu Sjúkrahússins á Akureyri. Ekki fór fram sérstök úttekt á húsnæðinu en athugasemdir voru gerðar við atriði sem þóttu blasa við. Ástand húsnæðis stofnunarinnar var almennt talið gott nema á legudeild geðdeildar sem er enn í bráðabirgðahúsnæði (síðan 1986) og stenst ekki kröfur nútímans. Fram kom að gera þyrfti áætlun um úrbætur í húsnæðismálum deildarinnar. Stofnanir í heilbrigðisþjónustu eiga að sjá til þess að húsnæði uppfylli lágmarkskröfur um aðgengi og aðstöðu fyrir sjúklinga, svo sem biðstofu, salerni og hreinlætisaðstöðu og meðferðarrými svo og aðstöðu fyrir starfsfólk í samræmi við þá tegund heilbrigðisþjónustu sem þar er veitt eða fyrirhugað er að veita, sbr. reglugerð um eftirlit landlæknis með rekstri heilbrigðisþjónustu og faglegar lágmarkskröfur nr. 786/2007. Legudeildir á SAk uppfylla ekki nútímakröfur um aðbúnað sjúklinga, s.s. einbýli og snyrtingar (barnadeild undantekning). Í skýrslu Embættis landlæknis segir m.a. á bls. 37: „Legudeild geðdeildar er enn í bráðabirgðahúsnæði en hún er barn síns tíma og stenst ekki kröfur nútímans. Húsnæðið er afar þröngt og óheppilega staðsett innan sjúkrahúsbyggingarinnar. Öll er aðstaða farin að láta á sjá, loftleysið og hreinlætisaðstaða er óásættanleg. Þess ber einnig að geta að þar er ekki aðstaða fyrir dagsjúklinga en þeir eru samt á deildinni. Aðstaða starfsfólks er lítil og eykur það enn á álagið. Göngudeild geðdeildar er hins vegar komin í mjög bjart og rúmgott húsnæði og vinnuaðstaða þar er til fyrirmyndar nema hvað tölvuútbúnað varðar.“ Gerðar hafa verið athugasemdir af hálfu eftirlitsaðila sem koma reglubundið í heimsókn á SAk. Þær lúta einkum að auknu rými og betri loftræstingu. Markmið þessarar forathugunar er að leggja fram rökstuddar tillögur að nýbyggingu fyrir legudeildir sjúkrahússins og svara þannig kalli ráðherra samkvæmt skipunarbréfi. Rökin fyrir því að ráðast í slíka framkvæmd eiga sér m.a. stoð í skýrslu Embættis landlæknis og umfjöllun fagaðila og stjórnenda á SAk, eins og nánar verður rakið í síðari köflum forathugunarinnar og í frumáætluninni sem þar fylgir á eftir. 6.2. Hagsmunaaðilar Notendur heilbrigðisþjónustu á SAk eru einkum þeir sem búa á þjónustusvæði stofnunarinnar, þ.e. íbúar á Norður- og Austurlandi þó að sjálfsögðu geti skjólstæðingar SAk verið hvaðan sem er af landinu og jafnvel frá öðrum löndum. Má þar t.d. nefna aukin umsvif vegna fjölgunar ferðamanna. Til þess að átta sig betur á hvað er í húfi er mikilvægt að skoða hve margir sækja þjónustu til Reykjavíkur af skilgreindu upptökusvæði SAk. Ástæður þess eru margþættar en í fjölda tilvika er auðvelt að rökstyðja að þjóðhagslega væri hagkvæmt að gera viðkomandi aðilum auðveldara að sækja þjónustuna nær sínu heimili. Samkvæmt tiltækum upplýsingum um göngu- og dagdeildarþjónustu á sjúkrahúsum er ljóst að þessi þáttur heilbrigðisstarfseminnar fer ört vaxandi. Miðað við niðurstöður fyrri kannana er hlutfall þeirra sem leita sér sérfræðilegrar heilbrigðisþjónustu á SAk og búa á Norðurlandi eystra hátt í flestum sérgreinum, nokkuð mikið lægra á Norðurlandi vestra og lágt á Austurlandi. Orsakir þess hvert sjúklingar sækja slíka þjónustu eru margþættar. Þar má nefna samgöngur, möguleika til dvalar (sjúkrahótel) og búsetu ættingja, auk þeirrar grundvallarforsendu að sérfræðingar á tilteknum sviðum séu til staðar þar sem þjónustunnar er óskað. Samkvæmt fyrirliggjandi upplýsingum frá LSH þá voru 2,3% af komum á göngudeildir þar árið 2013 frá Norðurlandi, þ.e. starfssvæði Heilbrigðisstofnunar Norðurlands en þá bjuggu 10,9% landsmanna þar. 1,6% komu frá Austurlandi en þá bjuggu 3,2% íbúa landsins þar. Mismunur milli sérgreina er gríðarlega mikill en í heildina talið er þetta vísbending um að ef þjónustuna er hægt að fá nær en í Reykjavík fyrir íbúa þessara landshluta þá leyti fólk þangað, t.d. til Akureyrar og þá einkum Norðlendingar. Sjúklingar frá Akureyri voru 56,7% þeirra sem voru inniliggjandi á SAk árið 2014. Nokkur sveifla er á milli ára, sjá töflu 1. Tafla 1. Búseta inniliggjandi sjúklinga á SAk – hlutfallsdreifing.
6.3. Þarfagreining - húsrýmisáætlun Rýmisþörf einstakra starfseininga í heilbrigðisþjónustu hefur tekið miklum breytingum á næstliðnum árum og horfur eru á að svo verði áfram. Það verður því sífellt augljósara hve mikilvægt er að húsnæði fyrir þessa starfsemi gefi möguleika á breytingum í takt við þarfir og tíðaranda án óheyrilegs kostnaðar. Þetta er ein af meginástæðum þess að stjórnendur hafa ítrekað skipað nefndir til að meta stöðuna hverju sinni og gera tillögur um úrbætur. Í áfangaskýrslu vinnuhópsins frá því í febrúar 2015 er umfjöllun um greinargerðir frá forsvarsfólki einstakra deilda/starfseininga sem er sýn þess á núverandi stöðu og framtíðarhorfur. Til að treysta enn frekar grundvöll niðurstaðna hafa verið starfandi notendahópar, þ.e. fagfólk innan SAk sem þekkir best til starfseminnar og hvaða umgjörð húsnæði þarf að veita henni. Í hnotskurn snýst þessi þarfagreining og húsrýmisáætlun um það. Nýting legudeilda í heild hefur verið að sveiflast á milli 67% til 70% síðustu fimm ár. Það sem vekur athygli er aukning á stóru bráðadeildunum, lyflækninga- og skurðlækningadeild frá árinu 2012. Áframhaldandi aukning er á nýtingu þessara deilda tímabilið janúar til júní 2015, sjá töflur 2 og 3 og mynd 3. Almennt er talið æskilegt að deildir sem sinna bráðaþjónustu séu ekki með meiri nýtingu en 85% til að geta brugðist við óvæntum innlögnum. Tafla 2. Nýting allra legudeilda á SAk 2010-2014.
Lyflækningadeild er stærsta deild sjúkrahússins og hefur verið starfrækt frá 1953. Markmið deildarinnar er að veita alhliða þjónustu í lyflækningum og hjúkrun á sem flestum sviðum lyflækninga, auk þess sem deildin hefur mikilvægu hlutverki að gegna sem kennslu- og þjálfunardeild fyrir nema í heilbrigðisfræðum. Á deildinni er aðaláhersla lögð á almennar lyflækningar og undirsérgreinar. Mynd 3. Nýting lyflækningadeildar SAk 2010 til maí 2015. Starfsemi 2014 Á lyflækningadeild eru 23 sjúkrarúm. Alls voru 1.463 sjúklingar útskrifaðir frá deildinni á árinu, það eru 40 færri en árið áður. Legudagar voru þó 403 fleiri en árið áður, eða 6.615. Meðallegutími var 4,52 dagar og hafði lengst frá árunum áður, sjá töflu 3. Tölurnar bera vitni um aukið álag á deildina. Tafla 3. Fjöldi sjúklinga á lyflækningadeild SAk og fleira.
Tafla 4 Skipting inniliggjandi sjúklinga eftir sérgreinum á lyflækningadeild SAk, meðaltal 2012-2014.
Innlagnir á lyflækningadeild eru nánast allar bráðainnlagnir. Skipulögð innlögn án biðlista eru einkum sjúklingar sem eru að koma frá öðrum sjúkrastofnunum, sjá töflu 5. Tafla 5. Hlutfallsleg skipting innlagna á lyflækningadeild SAk, fjöldi og legudagar, meðaltal 2012-2014.
Skurðlækningadeild er skilgreind 18 rúma deild, ásamt innritunarmiðstöð. Helstu sérgreinar á deildinni eru bæklunarlækningar, almennar skurðlækningar, æðaskurðlækningar, þvagfæra-skurðlækningar, háls- nef- og eyrnalækningar og kvensjúkdómalækningar. Bæklunarlækningar veita þjónustu í almennum bæklunarskurðlækningum, handarskurðlækningum og hryggjarskurðlækningum. Sjúklingar bæklunarlækninga vistast á skurðlækningadeild með öðrum sjúklingum. Undir skurðlækningar tilheyrir starfsemi sérfræðinga í handlækningum og undirsérgreinum, og í háls,- nef- og eyrnalækningum. Konur með kvensjúkdóma hafa lagst inn á skurðlækningadeild síðan 1. apríl 2008. Konum með vandamál á meðgöngu (jákvætt þungunarpróf) er sem fyrr sinnt á fæðingadeildinni. Síðustu ár hefur verið reynt að einfalda ferli í kringum skurðaðgerðir og stytta legutíma hjá annars hraustum konum. Innskrift fyrir valaðgerðir getur farið fram annars vegar á innritunarmiðstöð og hins vegar í gegnum síma. Konurnar mæta síðan að morgni aðgerðardags beint á skurðstofu. Áfram er unnið skv. verkferlum flýtibatameðferðar og þannig hefur verið hægt að stytta legu á deild eftir aðgerðir. Tafla 6. Starfsemi skurðlækningadeildar SAk 2011-2014.
Tafla 7. Skipting innlagna eftir sérgreinum á skurðlækningadeild SAk, meðaltal 2012-2014.
Tafla 8. Skipting innlagna skurðlækninga á SAk (án bæklunarlækninga) eftir bráðleika, meðaltal 2012-2014.
Tafla 9. Skipting innlagna bæklunarlækninga á SAk eftir bráðleika, meðaltal 2012-2014.
Geðdeild SAk er eina geðdeildin á Íslandi utan höfuðborgarsvæðisins og þjónar íbúum á stóru og strjálbýlu landsvæði. Á deildinni allri starfa hátt á fimmta tug starfsmanna í ríflega 30 stöðum. Árlega eru brautskráðir sjúklingar af legudeildinni um 250 talsins. Meðallengd dvalar á legudeild er tæplega 11 dagar. Það er mat verkefnishóps (notendahóps) um húsnæði geðdeildar SAk að fjölga þurfi sólarhrings-rýmum á legudeild úr 10 í 12. Viðbótin þarf að vera hönnuð til að uppfylla kröfur um geðgjörgæslu. Mynd 4. Fjöldi innlagðra sjúklinga á geðdeild SAk yngri en 30 ára 2004-2014. Taka þarf mið af spá Hagstofunnar til 2040 um að fólki 60 ára og eldra mun fjölga um 48% og í hópi 65 ára og eldri fjölgi um 60%. Hlutfall sjúklinga 60 ára og eldri sem nýta geðdeildarþjónustu er um 10%. Má því reikna með aukningu á eftirspurn eftir þjónustu úr þeim hópi. Undanfarin ár hefur þjónusta dag- og göngudeildar aukist og er líklegt að hún muni enn aukast á komandi árum. Er nú svo komið að eftirspurn eftir þjónustu er mun meiri en hægt með góðu móti að sinna. Sjúklingum fjölgaði um 7,7% milli áranna 2013-2014 og komum fjölgaði um 18%. Alls fengu 685 sjúklingar þjónustu árið 2014 og komur höfðu aldrei orðið fleiri eða 5.052.
Rýmisþörf legudeilda hefur verið skoðuð út frá ýmsum forsendum. Meðaltal innlagna og fjöldi legudaga árin 2012-2014 er notað til að reikna tíðni innlagna og legudaga fyrir hvern aldurshóp. Það sýnir núverandi stöðu og út frá henni er síðan hægt að reikna áætlaða stöðu fram í tímann út frá mannfjöldaspá, þ.e. íbúaþróun og vænta breytingu legudaga eftir aldurshópum. Mynd 5. Íbúaþróun og vænt breyting legudaga til 2040. Þegar bornir eru saman ýmsir útreikningar út frá mismunandi sjónarhornum kemur í ljós að niðurstaðan er alltaf nokkuð svipuð. Árið 2040 má reikna með að lyflækningadeild og skurðlækningadeild þurfi samtals um 70 rúm og legudeild geðdeildar 12 rúm. Alls eru þetta 82 rúm fyrir þessar legudeildir á SAk og gengið er út frá því að sjúkrastofur séu einbýli.
Þegar lausnir eru skoðaðar til að leysa húsnæðisvanda tiltekinna starfseininga á SAk er alveg augljóst að það verður ekki gert nema með nýbyggingu. Núverandi húsnæði legudeilda er gamalt, liðlega 60 ára. Það er meira en fullsetið og svigrúm til breytinga er afar takmarkað og gefur ekki möguleika á að uppylla þær kröfur sem gerðar eru til sjúkrahúsa í dag. Í þessu samhengi er mikilvægt að huga að framtíðarsýn til ársins 2017, eins og hún hefur verið sett fram af framkvæmdastjórn. Framtíðarsýn til 2017:
Öll umfjöllun um nýbyggingu hlýtur að taka mið af þessu enda er augljóst að aðstaða fyrir legudeildir, líknardeild, sjúkrahótel og margt fleira sem nefnt er í framtíðarsýninni getur ekki orðið að veruleika nema með auknu húsrými. Unnið er að því að fá alþjóðlega vottun samkvæmt stöðlum Det Norske Veritas, DNV International Accreditation for Hospitals. Þeir staðlar gera kröfur til aðbúnaðar sem miðar að því að tryggja öryggi sjúklinga og starfsmanna m.a. til smitvarna sem erfitt er að uppfylla svo vel sé í núverandi húsnæði. Þegar framtíðarnefnd vann að Frumathugun , sbr. skýrslu frá febrúar 2004, var gengið út frá því að ný bygging risi á lóð SAk á næstu árum og það var ein af forsendunum fyrir vinnu nefndarinnar. Vinnuhópurinn um uppbyggingu legudeilda á SAk hefur við gerð þessarar skýrslu skoðað aðstæður og kynnt sér fyrri skýrslur um húsnæðismál sjúkrahússins. Sjá nánar í viðauka 1 bls. 35. Einnig hefur verið leitað til forstöðumanna deilda og starfseininga til að fá fram þeirra sýn á stöðu mála og framtíðarhorfur jafnframt því sem skipaðir voru notendahópar. Hér er tekið undir margt af því sem lagt var til í frumathuguninni frá 2004. Grundvallaráherslan er sú sama. Reisa þarf nýja álmu undir legudeildir og fleira. Útfærslur taka jafnan einhverjum breytingum í tímans rás en þó er á þessu stigi málsins lagt til að skoðuð verði nánar þríarma bygging á þremur hæðum með kjallara að hluta. Það er í grunninn hið sama og fyrri nefndir hafa lagt til þó að stærðir og notkun húsnæðisins hafi tekið breytingum í takt við fyrirliggjandi staðreyndir og það sem nú er best vitað um framtíðina. Vinnuhópurinn hefur fengið á sinn fund fulltrúa frá LSH og þá voru meðal annars skoðaðar teikningar og farið yfir ýmsar forsendur fyrir legudeildir. Sjá nánar í þriðju fundargerð í viðauka 2, bls 41. Einnig hafa verið skoðaðar teikningar af erlendum legudeildum. Þegar suðurálma var byggð var horft til fyrri tillagna um stækkun sjúkrahússins. Á sínum tíma var reiknað með að í fyllingu tímans yrði kjarnabyggingin stækkuð ásamt tengibyggingu og að austur úr henni kæmu tvær álmur, þ.e. suðurálma og önnur hliðstæð henni. Nú er það ekki inni í myndinni að stækka kjarnabygginguna að sinni og í ljósi reynslunnar af suðurálmu er ekki talið heppilegt að reisa aðra samhliða álmu til austurs úr tengibyggingu. Þess vegna er nú horft til þess að reisa þriggja arma byggingu sunnan núverandi húsnæðis sem hefði góða tengingu við mikilvægar stoðdeildir svo sem slysa- og bráðamóttöku, skurðstofur, gjörgæslu og myndgreiningadeild. Legudeildir þarf að byggja upp með sérstakri áherslu á sérbýli (einbýli með salerni) og vaxandi þörf fyrir einangrunaraðstöðu inni á deildum. Varðandi flutningaleiðir innan spítalans er mikilvægt að gert verði ráð fyrir því að hafa þær sem allra stystar fyrir sjúklinga og starfsmenn og að þær skarist sem minnst við aðra umferð. Eftirfarandi eru myndir sem gerðar eru af AVH ehf. (Fanney Hauksdóttir arkitekt). Á þeim má sjá hugsanlega byggingu frá ýmsum sjónarhornum. Þrívíddarmyndirnar eru á „skissuformi“ sem sýna tillögu að staðsetningu og tengingu við núverandi byggingu og innra skipulagi. Hver hæð er um 2.500 m2 þannig að fullar 3 hæðir eru um 7.500 m2. Austurkjarninn er 4 hæðir og með tengingunni við núverandi byggingu eru það um 1.000 m2, samtals 8.500 m2
Myndin hér að ofan sýnir núverandi aðalbyggingar SAk og inn á myndina er teiknað líkan sem sýnir hugsanlega staðsetningu og tengsl við eldri byggingar. 
Mynd 7. Afstöðumynd af SAk. Myndin hér að ofan sýnir afstöðu núverandi bygginga á lóð SAk og hvernig hugsanleg nýbygging tengist þeim. 
Mynd 8. Líkan af SAk. Hér að ofan er mynd sem sýnir með öðrum hætti og öðru sjónarhorni það sem fram kemur á tveimur fyrri myndum. 
Mynd 9. Ofanmynd af heilli hæð. Hér að ofan er mynd sem sýnir hugsanlegt fyrirkomulag á einni hæð. 
Mynd 10. Ofanmynd af einum kjarna. Hér að ofan er mynd sem sýnir hugsanlegt fyrirkomulag í einum kjarna. Þarna eru sýndar 12 sjúkrastofur en því má breyta við nánari útfærslu. Til að gefa hugmynd að mögulegum fjölbreytileika þá er ein stofan sýnd með tveimur rúmum þó að almenna reglan sé einbýli með snyrtiaðstöðu sem innangengt er í. Einnig er sýnt hvernig hægt væri að koma fyrir einangrunarherbergi með anddyri. Allt er þetta gert til að gefa hugmyndir um möguleika og ber að skoða sem slíkt, enda er forathugun til þess gerð, þ.e. að bera saman ýmsa kosti með skipulegum hætti, bæði tæknilega og einnig út frá áætluðum kostnaði. Hin eiginlega hönnun er síðan seinni tíma mál þegar ákvörðun hefur verið tekin um framhaldið. 
Mynd 11. Sjúkrastofa. 
Mynd 12. Sjúkrastofa. 
Mynd 13. Grunnmynd af hugsanlegri nýbyggingu. 6.5. Mat á stofn- og rekstrarkostnaði lausna Við mat á stofn- og rekstrarkostnaði húsnæðis var horft til eldri tillagna, en einnig þekktra dæma frá nýlegum eða fyrirhuguðum framkvæmdum, t.d. við legudeildir á LSH. Í skýrslunni frá 2004 var meðal annars byggt á reynslutölum vegna byggingar barnaspítala við Hringbraut í Reykjavík. Ekki dugar að framreikna gamlar tölur í tilviki eins og þessu og fyrir því eru margar ástæður. Hafa þarf í huga að nú er nær eingöngu gert ráð fyrir einbýlum fyrir sjúklinga og margt annað hefur breyst á síðustu 10 árum sem kallar á nýtt rýmismat fyrir einstakar einingar í starfseminni. Búast má við stærra húsnæði og hærri byggingarkostnaði, en á móti kann að vera hægt að ná meiri hagkvæmni í rekstrinum. Byggingarkostnaður á fermetra er metinn svipaður hvort sem byggð yrði ný álma samsíða suðurálmu eða þríarma bygging með miðlægum vöktum. Ætla má að rekstrarkostnaður síðartalda kostsins verði minni og gefi mun meiri sveigjanleika í allri starfsemi. Má þar t.d. nefna að umferðarleiðir verða styttri og nýting á vinnutíma starfsmanna þar af leiðandi betri. Nánar er fjallað um þetta í kafla 7.3 á bls. 33.
Eftir að hafa borið saman þær lausnir sem nefndar hafa verið er það mat vinnuhópsins að hagkvæmast sé að reisa þriggja hæða þríarma byggingu sunnan við núverandi húsnæði SAk, með kjallara undir einni álmunni, eins og nánar er fjallað um í síðari hluta þessarar frumathugunar 6.7. Niðurstaða Niðurstaða vinnuhópsins er tillaga um nýbyggingu sunnan núverandi húsnæðis SAk, það er þriggja hæða hús, hver hæð með þremur álmum og kjallari undir einni þeirra, samtals um 8.500 m2, (3 x 2.500 m2 + 1.000 m2), eins og nánar er fjallað um í eftirfarandi frumáætlun, sem er seinni hluti þessarar frumathugunar.
|
