26
Platonun kosmosentrik nəzəriyyəsinin zəminini təşkil edən
hipotezə görə, dünya insan üçün faydalı bir varlıq olmaqdan daha çox,
özlüyündə dəyəri olan nizamlılıq və gözəllik təcəssümüdür.
Platon ilahi gözəlliyə və kamilliyə malik olan kosmosun eydos
paradiqmasına uyğun olaraq sənət əsəri kimi yarandığını güman edir.
Belə halda o, qeyri-məntiqi başlanğıc kimi anlaşılan “təbiət”ə, yəni
“fyuzis”ə qarşı qoyulur. Fyuzis kosmosdan fərqli olaraq zərurət
üzündən yaranır. Sonradan Aristotel eydosları təbii cisimlərə daxil
etməklə bu ziddiyyəti həll etmiş oldu
7
.
Sokratın nöqteyi-nəzərincə, dünya fanidir - ötəridir və həqiqi
deyildir, həqiqi olan isə axirət dünyasıdır. Platonun nöqteyi-nəzərincə
isə, dünya əbədiyyətə də qovuşa bilər, qovuşmaya da bilər. Həqiqi də
ola bilər, olmaya da. Əgər bütövlükdə dünya və ayrılıqda hər bir şey
öz ideyasına uyğundursa, həqiqidir, yox əgər öz ideyasına uyğun
deyildirsə, həqiqi deyildir.
Platonda ideyalar ilahi təbiətli hesab olunur, onlara ilahi
mahiyyət aid edilir və hər bir ideya özündə əbədiyyət əlamətini
daşıyır. Tanrılar da beləcə dəyişməz, əbədidirlər – onlar pisliyə doğru
dəyişə bilməzlər, çünki təbiətləri buna yol vermir. Tanrılar yaxşılığa
doğru da dəyişə bilməzlər, çünki onlar mövcud olan varlıqların ən
kamilləri və ən yaxşılarıdırlar.
İdeyaların dəyişməzliyi və əbədiliyi nöqteyi-nəzəri ilə bağlı
olaraq Kratil dialoqu da diqqəti cəlb edir. Bu dialoq bir fəlsəfi
problem ətrafında iki əks mövqenin toqquşmasını təsvir edir. Həmin
bu problemin mahiyyəti isə aşağıdakılardan ibarətdir: Predmetlərə
verilmiş adlar onların özlərinin təbiətinə uyğundurmu? Predmetlərin
adları məlum olduqda onların mahiyyəti dərk edilə bilərmi? Başqa
sözlə, adlar predmetlərin dərk olunma aləti rolunu oynaya bilərlərmi?
Dialoqda iştirak edən personajlardan biri - Protaqorun şagirdi
Germogen belə hesab edir ki, adlar predmetlərə insanlar tərəfindən
təsadüfi olaraq verilir. Dialoqda iştirak edən başqa bir personaj -
Kratil isə adların təbiiliyini, yəni onların predmetlərin təbiətlərinə
uyğun gəldiyini israr edir. Kratilin gəldiyi nəticə, hətta bu günün özü
üçün də maraqlıdır: hər bir şeyə müəyyən düzgün ad xasdır, amma
adamlar bu adları unutmuş, şeylərə təhrif olunmuş adlar verməyə
başlamışlar
8
.
Predmetlərin özləri ilə onların adları arasındakı münasibətlərin
bir problem kimi fiksasiyası qədim hind fəlsəfəsinin bir qədər öncə
7
Круть И. Б., Забелин И. М. Очерки истории представлений о
взвимоотношении природы и общества. М., 1988.
8
Платон. Кратил – Платон, Соч. Т. 1. ч. 1. С. 413-491.
27
xatırladığımız
nyaya təlimini bir daha yada salır. Xatırladaq ki, burada
müqayisə (şeylərin mahiyyətinin onların adları ilə müqayisəsi nəzərdə
tutulur) məntiqi idrakın dörd əsas mənbəyindən biri hesab olunur. Bu
kontekstdə bir Çin ideyasını da yada salmaq yerinə düşərdi. Bu,
adların təshihi ideyasıdır. Konfusiyə məxsus olan bu ideyaya görə,
dünyada hər bir şeyin, o cümlədən, hər bir insanın da öz təbii adı
vardır. Eyni zamanda, hər bir insan gördüyü konkret işin məzmununa
uyğun olaraq cəmiyyətdən də müəyyən ad alır. Əgər insanın təbii adı,
onun təbii təyinatını ifadə edən ad cəmiyyətin ona verdiyi adla
uyğunluq təşkil etmirsə, cəmiyyət nizamsızlıq, xaos içərisindədir.
Cəmiyyətdə nizamı bərpa etmək üçün haqqında bir qədər öncə bəhs
etdiyimiz adların təshihi prinsipi həyata keçirilməlidir. Yəni insanlara
o işlər həvalə olunmalıdır ki, bu iş onun təbii təyinatına uyğun gəlir.
Bu halda insanın təbii adı ilə cəmiyyətin ona verdiyi ad üst-üstə
düşmüş olur. Platonun da mülahizələri bir qədər elə bu mülahizələrə
bənzəyir. Platon da konfusiçilik kimi adlarla bağlı mülahizələrdən
həm də siyasi əhəmiyyət daşıyan nəticələr çıxarır.
Platonun ideyalar haqqında təlimi əslində onun siyasi
nəzəriyyəsinin əsasında durur. Platon elə bundan çıxış edərək belə
hesab edir ki, onun yaşadığı dövrə təsadüf edən dövlət - demokratik
dövlət, ümumiyyətlə, dövlət ideyasının qeyri-kamil təcəssümlərindən
biridir.
Antik demokratiyanın dərin böhran keçirdiyi dövrü yaşayan
mütəfəkkir olaraq Platon belə hesab edirdi ki, dövlət hakimiyyəti
xalqa deyil, idarəetmə sənətini ən yaxşı mənimsəmiş, ən ədalətli, ən
əxlaqlı təbəqəyə verilməlidir. Platon bu missiyanı həyata keçirməyi
özünün həyat amalı olaraq hiss edirdi. Lakin o, bunu artıq qeyd
olunduğu kimi, öz iradəsinin gücü ilə deyil, öz zəkasının gücü ilə
etməyə çalışırdı. Elə həmin dövrü yaşayan Sokrat isə əxlaqın və
ədalətin öz həqiqi qiymətini yalnız axirət dünyasında alacağına, insani
xoşbəxtliyin yalnız axirət dünyasında gerçəkləşəcəyinə inanırdı.
Platon dünyanın və cəmiyyətin yenidən, düzgün əsaslar
üzərində qurulmasını özünə borc bilirdi. Sokrat isə belə bir cəmiyyəti
Tanrıdan bir pay olaraq almaq istəyirdi. Bu hal Sokratın digər bir
şagirdində – sonradan kiniklər məktəbi adlandırılacaq fəlsəfi
cərəyanın yaradıcısı olan Antisfendə özünü qabarıq bir şəkildə
göstərirdi. Antisfen dünyadan bir qədər faydalanmaq istəsə də, dünya
işlərinə, xüsusilə də, cəmiyyətin özünütəşkil məsələlərinə aktiv
müdaxilə etmək istəmirdi. «Siyasətlə necə rəftar etmək lazımdır? –
sualına Antisfen «odla rəftar edən kimi, - cavabını verir. - Nə o qədər
yaxın durmaq lazımdır ki, səni yandırsın, nə də çox uzaq olasan ki,
soyuqdan donasan».