141
bir məna verərdi ki, hökmdar öz-özündən soruşur: "Mən öz
təbəələrimdən necə davranış istəyə bilərəm?" Əgər cavab belədirsə ki,
onlar tabe olmalıdırlar, onda bu o mənanı verir ki, ölçü prinsipi
hakimiyyət və tabeçilik ənənəsi ilə uyuşur.
Konfusi sistematik fəlsəfəni inkişaf etdirmədi. Hər şeydən
öncə, o, insanlar arasında münasibətlərlə bağlı faydalı məsləhətlər
verdi və həmçinin bir çox öyüdlərə dəqiq ifadə forması verdi. Onun
ətrafında ardıcılların böyük dəstəsi yaranmışdı və bu dəstə də
"konfusiçiliyə" praktik olaraq başlanğıc verdi. Konfusiçilik elə indinin
özündə də Çin mədəniyyətində və cəmiyyətdə mühüm rol oynayır.
Praktik fəlsəfənin nəsihət, aforizm və kiçik hekayətlər formasında
ifadə tərzi müasir Çin üçün də səciyyəvidir. Maonun Qırmızı kitabı
(Maos Red Book. Quotes by chairman Mao Tse-tung) buna nümunə
ola bilər, bu kitab Mao Tsze-duna (1893-1976) iqtibaslar üzərində
qurulmuşdur.
Konfusian etika sonradan Men-tszı (Mencius və ya Meng Zi,
b.e.ə. təqribən 371-289) tərəfindən inkişaf etdirilmişdir. O da, Konfusi
kimi belə hesab edirdi ki, insan xeyirxah olaraq doğulmuşdur və bu
xeyirxahlıq tərbiyə yolu ilə inkişaf etdirilə bilər. Öz dövrünün bir çox
digər çin filosofları kimi, o, da həyatını müxtəlif imperator
saraylarında keçirmiş, şahzadələri iki mühüm fəzilətə - insansevərliyə
(jen) və ədalətə (i) öyrətmişdir.
Daosist fəlsəfə
Konfusiçilik praktik və siyasi olaraq etik fəlsəfəni inkişaf
etdirdiyi halda, daosizm (və ya taosizm) daha çox mistisizmlə və
holist təfəkkürlə səciyyələndirilirdi. Çinin mədəni həyatında daosizm
ənənələrinin ən böyük nümayəndəsi Lao-tszı (Lao Tzu) idi.
Daosizmin digər nüfuzlu mütəfəkkiri Çjuan-tszı (Chuang Tzu, b.e.ə.
369-cu ildə anadan olmuşdur) hesab olunur. Lao-tszının həyatı barədə
az şey məlumdur. Səhih olan məlumat yalnız odur ki, o, Konfusinin
yaşca böyük müasiri idi. Belə hesab olunur ki, o, tənhalıqda
yaşamışdır və şöhrətdən qaçmışdır. Lao-tszının adı onun məşhur
əsərindən Dao de tszin (Yol və onun fəzilətləri barədə Kitab və ya Dao
və de haqqında kitab) ayrılmazdır, baxmayaraq ki, bu kitabın məhz
onun tərəfindən yazılması şübhə doğurur. Mümkündür ki, bu kitab
onun ardıcılları tərəfindən yazılmışdır.
Dao de tszin daosist fəlsəfə üzrə klassik mətndir. Bu kitabın
anlaşılması çətindir və onun şərhi böyük problemlər yaradır. Çox vaxt
Lao-tszını da Heraklit kimi "sirli" və "əlçatmaz" adlandırırlar. Dao de
tszin Çinin təbiət və ya varlıq fəlsəfəsinə əhəmiyyətli bir tövhə oldu.
142
Bu onu praktik yönümlü konfusian fəlsəfədən fərqləndirir. O,
həmçinin adətən konfusian ənənə ilə səsləşən bir sıra əsas fəlsəfi
müddəalardan da kənarda dayanır.
Lao-tszı üçün fundamental anlayış "dao" anlayışıdır. Dao
barədə deyilir ki, o, "qeyri-müəyyəndir", "sonsuzdur", "dəyişməzdir",
"məkan və zaman baxımından sərhədsizdir", "həm xaosdur, həm də
forma". Oxşar söz simvolları yalnız işarə etdiklərinə işarə vura
bilərlər. Dil, ciddi mənada, bu hal üçün qeyri-adekvatdır, o, daonun nə
olduğunu deyə bilmir, dao barədə yalnız gümanlarını söyləyir, hətta
bu mənfi təyinlər yolu ilə edildikdə belə. Oxşar yanaşma qərb
təfəkküründə mənfi (apofatik) teologiya ilə səsləşir, mənfi (apofatik)
teologiyaya uyğun olaraq biz Tanrı barədə müsbət (müəyyən) bir fikir
söyləmək iqtidarında deyilik. Biz yalnız onun nə olmadığını təsdiq edə
bilərik. Bununla belə, Lao-tszının dao barədə mühakimələri yunan
naturfəlsəfəsində istifadə olunan suallar və onlara verilən cavablarla
bir çox ümumi cəhətlərə malikdir. Belə ki, Anaksimandr hesab edirdi
ki, "ilk başlanğıc" apeyrondur, qeyri-müəyyəndir və sərhədsizdir.
Burada, şübhəsiz ki, dao və apeyron arasında bəzi semantik
oxşarlıqları görmək olar. Anaksimandr kimi, Lao-tszı da təsdiq edirdi
ki, dao Səmadan və Yerdən daha öncədir, dao mövcud olan hər bir
şeyin doğuluşunun və məhvinin mənbəyidir. O, obrazlardan istifadə
edirdi və dao bu obrazlarda "dünyanın anası", mövcud müxtəlifliyin
ilkin nöqtəsi kimi təqdim olunurdu. Mümkün izah budur ki, dao
varlığın mahiyyəti, ilkin qeyri-müəyyən qüvvə, mövcud olan hər bir
şeyin əsası kimi çıxış edir. Lakin başqa yerlərdə Lao-tszı deyir ki,
"varlıq yoxluqdan törəyir". Mümkündür ki, o, ilkin qüvvəni və ya
"varlığı" nəzərdə tutur, bu ilkin qüvvə və ya "varlıq" daonun şeyə və
ya nəsə mövcudata çevrilməsinin qarşısını almaq üçün "yoxluqla"
şərtlənmişdir. Oxşar şərhlər bir sıra qeyri-müəyyənliklərlə bağlıdır,
amma əgər onlar qəbul olunsa, təsdiq etmək olar ki, Lao-tszı dao
problemini Sokrata qədərki filosofların substansiya probleminə analoji
qaydada qoymuşdur.
Lao-tszının dəyişikliklə bağlı nöqteyi-nəzəri ilk yunan fəlsəfəsi
ilə aşkar paralellərə malikdir. Görünür, o, belə hesab edirdi ki, bizim
mövcudluğumuzda ədalət prinsipinin nəsə bir əsası vardır. Bu prinsipə
görə, nəsə həddindən artıq olduğu halda, əks reaksiya yaranır:
"Xoşbəxtlik bədbəxtliyə çevrilir, xoşbəxtlik bədbəxtlik üzərində
qurulur". Nəsə öz ifrat nöqtəsinə gəlib çatırsa, öz əksliyinə çevrilir.
Həddindən artıq xoşbəxtlik kədərə çevrilir. Həddindən artıq
bədbəxtlik sevincə çevrilir. Deməli, nəsə bir qüvvə mövcuddur, nəsə
öz təbii sərhədlərindən kənara çıxdıqda, həddindən artıqlıq (hybris)
təntənə çaldıqda, nizam bərpa olur, olmalıdır və ya olacaqdır. Oxşar