Sevənlərə
Həyata bolluca qucaq açınız,
Sevgidən od alsın arzularınız.
Yerdə dayanmayın, göydə durmayın,
Uçsun yel qanadlı xəyallarınız.
Gündüzlər günəşdən, gecələr aydan
Zərif işıq əmsin duyğularınız.
İnsanı, torpağı, Allahı sevin,
Eşqə səcdə qılsın qayğılarınız.
Çaşdım, nə çaşdım!
Sən gəzdiyin guşələrdə məskən saldım,
Gedişindən, gəlişindən ilham aldım,
Eşq nəğməsi qoşdum, gülüm, gör nə qoşdum!
Gəl‐gəl deyən dillərinə möhtac qaldım,
Cənnət yolu dodağından məlhəm aldım,
Atəşləndim, coşdum, gülüm, gör nə coşdum!
Bir ovçuyam, nə oxum var, nə də nizəm,
Ayaq saxla, yorğun düşmüş bəndənizəm,
Dağlar, daşlar aşdım, gülüm, gör nə aşdım!
Zənn etmə ki, solğun, cansız kölgənizəm,
Çılğınlaşmış, fırtınalı bir dənizəm,
Sahilimdən daşdım, gülüm, gör nə daşdım!
Nə çox imiş üzüyola aşiqlərin,
Tər tökürlər qulluğunda dərin‐dərin,
Mənsə səndən qaçdım, gülüm, gör nə qaçdım!
Sənsizliyim şerə hopur sərin‐sərin,
Diz çökürəm hüzurunda kəlmələrin,
Bu sevdada çaşdım, gülüm, gör nə çaşdım!
Düyməciyin olaydım
Kaş sinəndə düyməciyin olaydım,
Gah örtülü, gah da açıq qalaydım.
Sığınaydım həyəcanlı köksünə,
Sinən üstə eşq havası çalaydım.
Gur saçların rəqs edəndə şur ilə,
İlişəydim, tellərini yolaydım.
Kaş sinəndə düyməciyin olaydım,
Gecə‐gündüz səndə qonaq qalaydım.
Növrəstə ay göy üzündən baxanda
Nurlanaydım, nəşə ilə dolaydım.
Odlu günəş canı oda yaxanda
Özüm yanıb sənə kölgə salaydım.
Duyğu zirvəsində
Günəş şölə həvəsində,
Ay tən olur vədəsində,
Nə ay batsın, nə gün solsun!
Arzuya hədd qoyma, könül,
Ömrümüzə şəfəq dolsun,
Yaşa duyğu zirvəsində!
Dünya‐tanrının töhfəsi,
Sevgi‐gəncliyin nəfəsi,
Nə dünya heç, nə sevgi puç!
Qəm evində yatma, könül,
Xəyala dal, qanadlan, uç,
Xəyal‐eşqin fəlsəfəsi!
Bəndə sal
Qoşa çaylar
Göy dənizdə qarışdı.
Bir xoş gündə
Ulduzumuz barışdı.
Soyuq sözlər
Ürəyimi üşütdü.
Qaynar yanaq
Can evimi isitdi.
Gözlərinlə
Gözlərimə işıq ver.
Gülüşünlə
Gülşənə dönsün hər yer.
Naz‐qəmzənlə
Ağlımı bu başdan al.
Şirin dillə
Qul bəndəni bəndə sal.
İnciçiçəyi
Sən gözələ gözüm düşüb,
Elin elimdən,
Dilin dilimdən.
Fələk elçi düşsə belə
Verməm əlimdən.
Naz eyləsən, əl ataram
Hər fəndi‐felə,
Əlləşmə göylə,
Eşqimə aç qucağını,
Şükürlər eylə.
Sənsiz gülşənim puç olar,
Duy bu gerçəyi,
Çöllər göyçəyi.
Sən məni məst eyləyibsən,
İnciçiçəyi.
Əzəl qayda
Canan canan olmazdı
Ürəyə dağ çəkməsə,
Aşiqinin başına
Od ələyib tökməsə,
Yarı yedəyə alıb,
Boynuna kəndir salıb
Arxasınca çəkməsə.
Gözəl gözəl olmazdı
Sevgilisi əyilib
Önündə diz çökməsə,
Gah köksünü ötürüb,
Gah boynunu bükməsə.
O, dilbərdir, o, afət,
Gözləməyin gözəldən
Təkcə incə lətafət,
Təkcə şəfqət, afiyət.
Cananın can almağı
Bir qaydadır əzəldən.
Bağbanın sevgisi
(Zarafatyana)
Sənə möhtac qalmışam,
Yaralıdır zümzüməm.
Heyvayam, saralmışam,
Gilələnən üzüməm.
Dilin yemiş dilimi,
Burnun kiçik tər xiyar.
Bərabərin tapılmaz
Dolaşsaq diyar‐diyar.
Üzündə qızıl alma,
Xalların qara kişmiş.
O, hansı bəxtəvərdir
Sən gözələ ilişmiş?
Gözün badam ləpəsi,
Ortası çiyələkmi?
Orda bir çağrı gördüm,
Doğrumu, ya kələkmi?
Yanağın al şaftalı,
Dodağın tazə ərik.
Bizi qonaq çağırsan,
Qaça‐qaça gələrik.
Bağ‐bağçanın narı sən,
Mənsə solğun budağı.
Bostanın bol barı sən,
Mənsə yerdəki tağı.
Gözə az görünürəm,
Dalınca sürünürəm.
Görüş yerimiz
Sərin gecələr,
Yalnız küçələr,
Şəhər dincələr,
Biz gəzişərdik.
Batdım günaha,
Qınama daha,
Üz tut sabaha,
Dəyişmiş hər şey...
Dəyişmiş təmiz,
Görüş yerimiz,
Görüşürük biz
İndi yuxumda.
Gecələr sərin,
Əlimdə əlin,
Göy çəmənlərin
Qoynundayıq biz.
Heyif ki, sənin
Yoxdur xəbərin,
Gündüz qədərin,
Gecə bizimdir...
Hicran
Keçən günlər keçdi, getdi,
Doğrudanmı hər şey bitdi?
Ürək bizə üsyan etdi,
Nə mən dindim, nə sən dindin.
Bayılırdıq işvələrdən,
Ayılırdıq hərdən‐hərdən,
Unudulmaz o günlərdən
Nə mən döndüm, nə sən döndün.
Dodaq susdu, göz ağladı,
Payız qışı soraqladı,