|
Hamlet İsaxanlı TƏzadlar
Şaxta vurdu, buz bağladı,
Nə mən dondum, nə sən dondun.
Hicran min cür oyun qurdu,
Kim əl qatdı, kim buyurdu?
Kədər cumdu ordu‐ordu,
Nə mən yendim, nə sən yendin.
Canımızı həsrət üzdü,
Ayrılıqlar ölçüsüzdü,
Bilməm ürək necə dözdü?
Nə mən qandım, nə sən qandın.
Çərxi‐fələk etdi xəta,
Hicrandan olarmı əta?[1]
Yəhərlənmiş qoşa ata
Nə mən mindim, nə sən mindin.
Kölgə çökdü gözümüzə,
Kül ələndi üzümüzə,
Bənzəmədik özümüzə
Nə mən məndim, nə sən səndin...
1.
bəxşiş (ə.)
Dərd
Dərdə düçar olmuşam,
Dərd düyündür, açılmaz.
Dərdə düçar eyləyən
Dərdimə çarə qılmaz.
Günəş dərddən əyilib,
Üfüqlərdə sürünsə,
Ay buluda bürünsə,
Aləmə nur saçılmaz.
Dərdim dağa dönübdür,
Başı dərddən açılmaz.
Eşq dərdi yaman dərddir,
Eşq dərdindən qaçılmaz.
Unuda bilsəydim səni
Səni sevmişdim
İlk gəncliyimdə,
Sənə bağlanmışdı
Hər ilim də,
Hər günüm də.
Sənsə dəyişdin...
Gah mənimlə döyüşdün,
Gah mənim kölgəmlə,
Gah da özünlə.
Məni üşütdün
Ucuz‐ucuz, bumbuz
Sözünlə.
Duyulmadın,
Get‐gedə söndün
Qəlbimdə titrəyən simdə.
Zəhərə döndün
Dilimdə.
Sən oldun
Vaxtsız sönən zilim də,
Sönməyən nisgilim də.
Sənə yer tapılmadı
Qar yağan, şaxta vuran
Qəlbimdə.
Söylə, günah kimdə?
Eh, nə fərqi var?...
Yaramı sağalda bilməz
Dünyanın o başından gəlmiş
Məşhur həkim də.
Könlümdəki şəhəri
Məhv etdin,
Ey qədirbilməz.
Daha üzüm gülməz,
Qaranlıq bürüdü
Hər yeri,
Açılmaz bir daha səhər.
Eh!...
Ey dili zəhər,
Unuda bilsəydim səni
Birtəhər...
Susma, danış, ay ana!
Səssizliyin nə dərindir, ay ana,
Səssizliyin inildəyir içimdə.
Bu ölçüdə, bu biçimdə
Səssizliyə dözmək olmur, ay ana.
Eşitməsəm səsini,
Duymasam nəfəsini,
Gen dünyada
Rahat‐rahat gəzmək olmur, ay ana.
Səssizliyin səsi‐
O deyilmi
Səsin ən yüksək mərtəbəsi?
Gözlərim qaralır;
Danış, ay ana, dillən,
Səbrim daralır.
Səsinin qanadları
Alsın məni qoynuna,
Sarılım boynuna,
Eşidim həzin səsini,
Duyum doğma nəfəsini, ay ana!
Səssizliyin də mənə tanış,
Səsin də.
Danış, ay ana, susma, danış!
Danışanda gülür həyat,
Səssizliyin qəlbimdə qoparır
Fırtına, tufan, fəryad,
Səssizliyin pozur dincliyimi.
Səssizliyinlə keçən gəncliyimi
Həmişəlik qoydum arxada, ay ana.
İndi sənsən mənə
Təsəlli də, arxa da.
İnsaf et, danış, ay ana,
Sözlərin canıma yayılsın
Sapsarı yağ kimi.
Taleyim qəm mürgüsündən ayılsın,
Dəmlənsin, kefdən bayılsın
Çən‐çiskini çəkilmiş
Çiçəkli dağ kimi.
Sən susanda
Canımı odda yandırırsan, ay ana.
Danışanda
Ruhuma sığal çəkən
mələkləri andırırsan, ay ana.
Baxışların nə məhzun...
Keçmişəmi baxırsan,
Sabahımı görürsən, ay ana?
Cansız barmaqlarınla
fikir‐zikir tellərindən
Nə hörürsən, ay ana?
De, baxırsan hayana?
De, gözlərin yol çəkir
nə uzun?
Baxışların nə məhzun?
Danış, gül, sevin, ay ana!
Sən güləndə qəlbim oynar yerindən,
Nəfəs allam dərindən.
Gülüşün niyə səssiz,
Qəhqəhən niyə ürkəkdir, ay ana?
Yoxsa gülüşün
Qüssənlə qonşumudur?
Yoxmu qismətində ürəkdən gülmək?
Qədərin cilvəsi bumudur?
Yamanca qocaldın, ay ana,
Bükülüb kiçildin;
Kiçildikcə sən böyüdün gözümdə.
Qarşında baş əydim,
Səcdəgahımsan ümdə.
Qocalıbsan, ay ana,
Yaman qocalıbsan;
Qocalığın da səssizliyin kimi
Göynədir içimi.
Gücsüzlükdən kəsər qalmır sözümdə,
Ay ana...
Gücsüzlükdən kiçilirəm
Öz gözümdə özüm də,
Ay ana...
Xatirində keçmişlərin üzüntüsü,
Gözlərində gələcəyin hüznü var.
Sənə yasaq yoxdur,
Nə istərsən de, danış, ay ana,
Gileyində İlahinin izni var.
Danış, nəğmə söylə, ay ana,
Zümzüməndə Füzulinin vəzni var.
Baxma uşaq olmayan yaşıma,
Əlini çək başıma, ay ana,
Gücsüz əllərinə ehtiyacım var.
Qayğılı gözlərinə,
Sayğılı sözlərinə
Ehtiyacım var, ay ana...
Susma, qurbanın olum...
Danış, ay ana!
Tək qalmaq istəyirəm
Yoruluram
Şəhərlərin hay‐küyündən,
Qaçmaq istəyirəm hərdən
İnsanlardan, bu gündən.
Bezirəm
Müdrik səbrdən,
Dünyanın gərdişinə dözümdən;
Uzaqlaşmaq istəyirəm
Özümdən.
Böyük‐böyük iclaslarda,
Haylı‐küylü məclislərdə
Sevmirəm söz deməyi,
Ya boş sözü dinləməyi.
Əvəzində,
Düşünürəm xəfif‐xəfif...
Bu yandasa bir hərif
Kürsüdən yağdırır
Tərif, tərif, tərif.
Lüğətində yoxdur qürur,
Cümləsində çox azdır
Xoş mübtəda, yaxşı xəbər,
Amma sifət nə qədər...
Sifət, sifət...
Özümü ələ alıram,
Şeytana lənət.
İçimdə boğulur nifrət
ətək‐ətək,
tək qalmaq istəyirəm, tək.
Gündəlik qayğılar
Başımdan aşanda,
Dünyanın haqsızlığı
Aşıb, daşanda
Sıxır məni
Şövkət də, şan da,
Toy da, nişan da.
Qaçmaq istəyirəm
Gurultulu çal‐çağırdan,
Dostları ilə paylaş: |
|
|