37
- O bizim ailə şərəfimizi yerə vurub, təhqir edib, istəyirəm, övladım nə onun
adını bilsin, nə də soyadını daşısın...
* * *
Ev sahibi gedəndən sonra Fidan yuxudan oyanmış oğluna yemək verə-verə
dərin düşüncələrə daldı. Bundan sonra necə yaşayacağı, nədən başlayacağı
haqda fikirləşdi. Birdən telefon zəng çaldı. O, tez dəstəyi götürdü. “Tənha qadın,
susma danış!” lirik musiqisi eşidildi. Röyal idi, ədəb-ərkanla salam verib,
yaxından zəng etdiyini bildirdi, evə gəlmək üçün izn istədi. “vaxtınızı çox
almaram, sizə deyiləsi vacib sözüm var...”. Fidan əvvəl susdu, etiraz etmək
istədi, həyəcanla çırpınan qəlbinin dərinliklərində hansı hissə qadını cəsarətə
gətirdi, o Röyalı yaxından görmək istəyirdi. Artıq tək-tənha yaşamağa gücü
qalmamışdı. “Kaş, Röyal illər boyu xəyalımda yaşatdığım, arzuladığım adam
olaydı, yoxsa başıma gələn bu müsibətə yəqin dözə bilməyəcəyəm”... Susmaq
razılıq əlamətiydi. Amma buna baxmayaraq Röyal yenə soruşdu:
- İzn verirsiniz?
Fidan:
- Əgər mənə deyəcəyiniz vacib söz Əfqanla bağlıdırsa, zəhmət çəkməyin,
çünki daha buna ehtiyac yoxdur.
- ...
Bir azdan qapı döyüldü. Fidanın ürəyi həyəcanla çırpınmağa başladı.
Ürəyinin döyüntüsü qulaqlarında əks-səda tapdı. Daxilindəki səsli-küylü
təlatümlə qapını açdı. İçəri əlində gül dəstəsi tutmuş ucaboy, qarayanız bir
oğlan daxil oldu. “Qeyb olan illər” filmindəki Əsmərə tam bənzəməsə də, onun
kimi mənalı gözləri vardı. Havanın isti olmasına baxmayaraq uzunqol köynək
geyinmişdi. Uşaq Röyalı görən kimi anasının qucağından özünü oğlanın üstünə
atdı. Röyal uşağın bu mehribanlığından təsirlənərək bağrına basdı. Fidan bu
səhnəni ürək ağrısı ilə seyr edərək kövrəldi. Göz yaşlarını gizlətmək üçün tez
38
gül dəstəsini Röyalın əlindən alıb otağa keçdi. Arxasınca gələn oğlanı başdan-
ayağa sınayıcı nəzərlə süzüb soruşdu:
- Aptekə gedəndə arxamca düşən siz idiniz?
- Mənə, sən de, Fidan xanım, mən idim, yaxınlaşmağa yenə ürək eləmədim,
elə bildim gözlərinizdən vulkan püskürüb, məni bir anda külə döndərəcək,
şükür Allaha, o acı xəbərlə qəlbini yaralasam da, gözlədiyim kimi mənə acığın
tutmadı.
- Sənin nə günahın var, acığım da tutsun? Taledən qaçmaq olmur, yazılan
pozulmur, sağ olun ki, gec də olsa, gözümü açdınız. Hələ sizə minnətdar
olmalıyam.
- Elə bilirdim siz məni heç zaman görmək istəməyəcəksiz.
Fidan ancaq qəlbinin səsinə qulaq asdı: “Əslində çox görmək istəyirdim,
bəlkə də illər boyu xəyalımda axtardığım əsmər bənizli oğlan elə sənsən!”.
- Fidan, bəlkə də ilk görüşdən mənim belə danışmağım sənə qəribə gələcək,
ancaq illər boyu qəlbimdə saxladığım, yalnız anama bildirdiyim hisslərdən
xəbərin yoxdur. Mən səni çox sevirəm, kaş, biləydin ki, sənsiz həyat mənim
üçün necə cansıxıcı, mənasızdır. Gəl Əfqandan ayrıl, evlənək, uşağına öz balam
kimi baxacam, sənin xoşbəxtliyin üçün canımdan belə keçərəm, Fidan! Sən
mənə çox lazımsan, yalvarıram, “yox” demə, anam da səbirsizliklə o bəxtəvər
günü gözləyir.
Fidan göz yaşlarını saxlaya bilmədi, elə bil çoxdan bəri gözlədiyi əziz,
doğma bir adamı gəlib çıxmışdı, içində ona sarılmaq, başını çiyninə qoyub
ürəyindəkiləri demək hissi baş qaldırmışdı. Artıq özündən asılı deyildi, Fidanın
başı oğlanın köksündə idi.
Güclü bir kişi köksünə sığınıb əzizlənmək, sevilmək ehtiyacı gənc qadının
varlığını elə çulğalamışdı ki, dinib-danışmağa taqəti də qalmamışdı. Röyal
nəvazişlə köksünə sığınmış Fidanın saçlarını sığallayıb, bəndi dağıtmış sel kimi
axan göz yaşlarını dodaqları ilə qurudub ovutmağa çalışırdı. Nəhayət, bir az
sakitləşib eyvana çıxdılar. On yeddinci mərtəbədən şəhəri, uzaqdan görünən
39
dənizi birgə seyr etdilər. Axşam düşmüşdü, qonşuluqda tikilən yeni
hündürmərtəbəli binada isə fəhlələr hələ də vurnuxurdular.
Röyal o gün bərk həyəcanlı idi, sanki özündə deyildi, tez getdi, Fidansa onun
yubanmasını istəyirdi. Uşağın başı oyuncaqları ilə oynamağa qarışmışdı.
... Ayrılıq məqamı çatanda onlar sevgililər kimi bir-birinə sarılıb öpüşdülər.
Röyal Fidanın sidqi-ürəkdən öpdüyü ilk kişi idi. Bu ilk öpüşün dadı
dodaqlarında qalan gənc qadın güzgü qarşısında dayanıb özünə baxa-baxa için-
için ağlayırdı.
* * *
Fidan cürbəcür bəhanələr gətirir, valideynləri ilə görüşdən yayınırdı. Son vaxtlar
nə özü ata evinə gedirdi, nə də anasının gəlib bir gün onunla qalmasına razı olurdu.
“Mən tək qalmağa öyrəncəliyəm, tək qalmaqdan qorxmuram...” – deyirdi.
Bir gün anasının ürəyi ayrılığa tab gətirmədi, iki daşın arasında qızını arayıb
tapdı:
- Nəvəmdən ötrü burnumun ucu göynəyirdi, elə darıxmışdım ki...
- Yaxşı oldu gəldin, ana, uşaq bir müddət sənin yanında qalsın, iş axtarmaq
qərarına gəlmişəm, babat yer tapsam, uşağı bağçaya verərəm...
- Nədən narazısan, qızım, gül kimi evin-eşiyin, ərinin maşını, dəniz sahilində
bağınız... Bir də axı, işi neynirsən, məgər Əfqan az qazanır?
Fidan təmkinini pozmadan dilləndi:
- Ana, ev-eşik, maşın-bağ ağ yalandı, o tərbiyəsiz sizi də aldadıb, məni də. Bu
mənzil onun deyilmiş, dəm-dəstgah, dəniz sahilində malikanə uydurmaymış... Gəl
otur, hər şeyi olduğu kimi sənə danışım.
Ana-bala oturub xeyli dərdləşdilər.
- Mənim kimi ananın başı batsın, sən “tək qalmağa öyrəncəliyəm” deyəndə
Əfqanın yenə xaricdə olduğunu zənn etmişdim. Əgər atanın sağlamlığı imkan
versəydi, bu işi belə qoymazdı... Fikir eləmə qızım, Allah kərimdi, təki
Dostları ilə paylaş: |