610
mühüm rolu olmuşdur. 2000-ci ilin iyununda RF Prezidenti özünün Federal
Məclisi qarşısındakı çıxışında demişdir: "Kölgə iqtisadiyyatının və "boz
sxemlərin" hökmranlığına, korrupsiyanın tüğyan etməsinə və kapitalın
kütləvi surətdə xaricə axmasına bir çox hallarda dövlətin özü imkan
yaratmışdır". Kapital Qərb ölkələrinin kredit idarələrinin yardımı olmadan
ölkədən qeyri-qanuni yolla çıxarıla bilməzdi.
Kapitalların ölkədən qaçması investisiya prosesini ləngidir, ölkənin
valyuta mövqelərini sarsıdır, xarici borcların ödənilməsini çətinləşdirir.
Bunun nəticəsində Qərb ölkələrinin təsərrüfat potensialı güclənir. RF-dən
kapitalın qeyri-qanuni ixracı barədə göstərdiyimiz qiymətləndirmələr burada
bir neçə nəslin əməyi ilə yaradılmış milli sərvətin Qərb ölkələrinin iqtisadi
artımında böyük rol oynadığını sübut edir.
1991-2000-ci illərdə kapitalın rəsmi ixracı (Mərkəzi Bankın
lisenziyası əsasında) 33 milyard dollar, o cümlədən birbaşa və portfel
investisiyaları 4,5 milyard dollar, yaxud kapitalın icazə verilmiş məbləğinin
41%-i qədər olmuşdur. 2000-2010-cu illərdə ölkədən ildə orta hesabla 55
milyard dollar, yaxud ölkədə əsas kapitala yönəldilən vəsaitlərin həcminin
16,5%-i həcmində kapital çıxarılmışdır.
2009-cu ildə Rusiyanın XBKQ-nin həcmi 249 milyard dollara,
yaxud onların dünya üzrə ümumi məbləğinin 1,3%-nə çatmışdır.
Xarici iqtisadiyyata kapital ixracatçısı və investorlar qismində əsasən
mineral xammal və qara metallurgiya sektorunun maliyyə-sənaye qrupları
çıxış edir. "Lukoyl", "Evraz", "Severstal" şirkətlərinin transmilliləşmə
indeksi 30-47% təşkil edir. Rusiyanın kapital qoyuluşları Britaniyada,
Kiprdə, Niderlandda, Ukraynada daha böyük məbləğdədir. Kapitalın
ölkədən qanuni yolla ixracı onun qeyri-qanuni çıxarılması ilə müqayisədə
cüzi məbləğ təşkil edir.
Ötən onillikdə RF iqtisadi yardım göstərilməsində əsasən borcların
silinməsi formasında iştirak edirdi. SSRİ-nin hüquqi varisi olduğuna görə,
Sovet İttifaqının bütün xarici aktivləri RF-in sərəncamına keçmişdir. Xarici
dövlətlərin (MDB ölkələri nəzərə alınmadan) borclarının ümumi məbləği
120 milyard dollardan yüksək idi. Ancaq RF bu aktivlərdən tam həcmdə
istifadə edə bilmədi. Əsas borclular yoxsul, onların bir hissəsi isə ən aşağı
səviyyədə inkişaf etmiş ölkələr idi. 57 borclu ölkənin yalnız 1/3 hissəsi öz
öhdəliklərini mütəmadi olaraq yerinə yetirirdi. Bu aktivlərin böyük qismi
borclu ölkələrin iqtisadi inkişafına yardım göstərilməsi çərçivəsində
silinmişdi.
Ümumilikdə, RF-in xarici iqtisadi əlaqələri malların və kapitalların
ölkədən çıxarılması ilə ifadə olunan biristiqamətli xarakter daşıyır. Bu,
təsərrüfatın inkişafında qeyri-mütənasibliklərin yaranmasına gətirib çıxarır.
İxracın xammal yönümlü olması maddi istehsal çərçivəsində daxili və xarici
611
bazarlar üçün işləyən 2 sektorun ayrılması ilə nəticələnmiş, bu isə, təkrar
istehsal prosesinin vəhdətini pozmuşdur. Bu sektorlardan biri üçün böyük
gəlirlər, digəri üçün isə aşağı mənfəət və əsas məşğulluq səciyyəvidir.
XBKQ-nin xammal sahələrinə və ticarətə axını bu qeyri-mütənasibliyi
aradan qaldırmaq əvəzinə, onu daha da dərinləşdirirdi. Daxili və xarici
sektorların vəziyyətinin dəyişməsi nəticəsində Rusiya təsərrüfatı inkişafın
periferiya-asılı tipinin cəhətlərini qazandı.
33.4. MDB ölkələri ilə xarici iqtisadi əlaqələr
_____________________________________________________
MDB ölkələrinin təsərrüfatlarının inteqrasiyasının pozulması
RF-in xarici iqtisadi əlaqələr sistemində SSRİ-nin süqutu nəticəsində
1991-ci ilin dekabrında yaradılmış Müstəqil Dövlətlər Birliyi (MDB)
ölkələri xüsusi yer tutur. Buraya keçmiş 15 müttəfiq respublikadan 11 dövlət
daxildir. Ötən illərin təcrübəsinin göstərdiyi kimi, dövlət birliyinin əvəzinə
siyasi birliyin yaradılması müttəfiq respublikaların bir-birindən tədricən
uzaqlaşdırılması, Sovet İttifaqının əmlakının bölüşdürülməsi, öz
müstəqilliyini elan etmiş dövlətlərin rəhbərlərinin şəxsi və milliyyətçi
təkəbbürlərinin ödənilməsi məqsədi daşıyırdı. Vahid iqtisadi məkanın
dağılması bütün keçmiş müttəfiq respublikaların təsərrüfat potensialını
zəiflətdi, yeni yaranmış dövlətlərin, demək olar ki, hamısında istehsalın
həcmi 30-50% azaldı. Azad ticarət yollarının itirilməsi, resurs potensialının
azalması RF-in geosiyasi rolunun əsaslı dərəcədə zəifləməsi ilə nəticələndi.
Yeni yaranmış dövlətlərdə iqtisadi cəhətdən salamat qalma problemlərinin
baş qaldırması obyektiv olaraq yenidən inteqrasiyanın vacibliyini göstərirdi
və bəzi MDB ölkələrinin hakim dairələri öz siyasətində bundan təbliğat
məqsədləri üçün istifadə etmişdi.
MDB-nin mövcud olduğu dövrdə dövlət və hökumət başçıları
tərəfindən ticarət, maliyyə, istehsalat, texniki, müdafiə və sosial-humanitar
xarakterli 1300-dən çox sənəd imzalanmışdır. Təsərrüfatların birləşməsi
rəsmən 1993-cü ildə bağlanmış, bütün MDB ölkələrinə şamil olunan İqtisadi
birliyin yaradılması haqqında Müqavilə, sonra isə nisbətən aşağı səviyyəli
razılaşma - 1994-cü ildə bağlanmış Sərbəst ticarət zonasının yaradılması
haqqında Müqavilə ilə təmin olunur. 30-dan artıq əlaqələndirmə və icra
orqanı, o cümlədən Dövlət başçıları Şurası, Hökumət başçıları Şurası,
Dövlətlərarası İqtisadi Komitə, İqtisadi Məhkəmə və s. yaradılmışdır.
Onların qərarları məsləhət və tövsiyə xarakteri daşıyır. Nə MDB-nin, nə də
onun ayrı-ayrı orqanlarının dövlətüstü səlahiyyətləri yoxdur.
İmzalanmış müqavilələrə baxmayaraq, MDB daxilində qarşılıqlı
iqtisadi əlaqələr pərakəndə hissələrin vahid təsərrüfat sisteminin elementləri