13
Cədvəl 1.1. Dövlət təşkilatlarının istehlakı, MDM-də %
1980
1999
2008
Hökumətlərin istehlakı
15
15
17
Fərdi təsərrüfatların istehlakı
61
62
61
Mənbə: World Development Report. 1999/2000, 2000/2001, 2010.
World Bank.
Dövlətin istehlakı şirkətlər üçün kifayət qədər təminatlı və tutumlu
satış bazarı yaradır. Bu, milli sahibkarlıq subyektlərinin vəziyyətinə nəinki
birbaşa, həmçinin dolayı təsir göstərir. Dövlət sifarişləri təkcə müqavilə
bağlayan firmaların deyil, həm də subpodrat firmaların mallarının və
xidmətlərinin satışı üçün imkanlar açmaqla, təsərrüfatda zəncirvarı reaksiya
yaradır.
Dövlət kapital qoyuluşlarının həcminə və strukturuna həm birbaşa,
həm də dolayı təsir göstərir. Əsrimizin başlanğıcında dövlət kapital
qoyuluşlarının rolunun zəifləməsinə baxmayaraq, həcmi hələ də
əhəmiyyətli, MDM-in təqribən 3%-i civarındadır.
Dövlət tərəfindən kreditlərin və subsidiyaların verilməsi investisiya
prosesinə və özəl sektorun istehlakına təsir göstərilməsinin mühüm alətidir.
Qiymətləndirmələrə əsasən, sahibkarlıq subyektlərinə verilən subsidiyaların
məbləği ÜDM-in orta hesabla 5%-i həcmindədir. Bir sıra sahələrin inkişafı
bütövlükdə dövlətin kapital qoyuluşlarından və subsidiyalarından birbaşa
asılıdır. İnkişaf etmiş ölkələrdə kənd təsərrüfatı və elmi-tədqiqat sahəsi buna
ən parlaq nümunədir.
Dövlət məşğulluğun təqribən 20%-ni təmin etməklə, iri işəgötürən
rolunu oynayır.
Dövlət bilavasitə sahibkarlıq fəaliyyətini həyata keçirir. İstehsalın
birbaşa dövlət nəzarətinə keçirilməsi xüsusi mülkiyyəti məhdudlaşdırdığına
görə, hakim dairələr təkrar istehsal prosesində yaranan ziddiyyətlərin,
çətinliklərin aradan qaldırılması üçün başqa üsullar tapa bilmədikdə, bundan
istifadə edirlər. Adətən, dövlətin sahibkarlıq fəaliyyəti funksiyasının
güclənməsi və dövlət mülkiyyətinin genişlənməsi sosial-siyasi məsələlərin
həlli, səfərbəredici (müharibələr, böhranlar, müharibədən sonrakı bərpa) və
qovalayıcı inkişaf tipləri üçün səciyyəvidir. 1970-ci illərdə inkişaf etmiş
ölkələrdə ÜDM-in 8,5%-ni dövlət müəssisələri təmin edirdi. Müasir dövrdə
isə, dövlətin iqtisadi rolu əsasən istehsal proseslərinə milli gəlirin yenidən
bölgüsü, təkrar istehsalın tənzimlənməsi vasitəsilə təsir göstərilməsi
üzərində cəmləşir. Dövlət müəssisələrinin MDM-də istehsal payı 5%-dən də
aşağı düşmüşdür.
14
Ümumilikdə isə, dövlət hakimiyyət inhisarından istifadə etməklə
milli strategiyanı müəyyənləşdirir, cəmiyyətin inkişafının hüquqi əsaslarını
təmin edir, pul-kredit münasibətlərini, infrastrukturun, sosial sahənin
inkişafını tənzimləyir, xarici təhlükələrin qarşısını alır. Milli istehsalın bütün
proporsiyaları onun təsir obyekti kimi çıxış edir. Dövlət təkcə iqtisadi
fəaliyyətin tənzimlənməsinə görə deyil, həmçinin sosial bərabərliyin təmin
olunmasına, insanların inkişafına yardım göstərilməsinə, cəmiyyətin və
təsərrüfatın səmərəli və ədalətli fəaliyyətinə görə cavabdehdir. Bu
məsələlərin həllinin istiqamətləri və xarakteri siyasi qüvvələrin müxtəlif
əhali qrupları arasında nisbətindən, hakim qrupların məqsədyönlü
fəaliyyətindən, bunun bütün cəmiyyətin maraqlarına uyğunluğundan asılıdır.
Ümummilli, ümumdövlət maraqlarının təmin olunması tarixən öz
ərazisinə üstünlük verilməsini ifadə edir. Dövlət öz təsərrüfat subyektlərinin,
əhalisinin sahibkarlıqla məşğul olması üçün daha əlverişli imkanlar yaradır,
təsərrüfat sistemi çərçivəsində daxili iqtisadi, milli və mədəni əlaqələrin
mühüm yer tutmasını təmin edir. Bu, dünya iqtisadi sistemində milli
təsərrüfatın müstəqil rolunu müəyyənləşdirmiş və hazırda da müəyyən edir.
Dövlət tərəfindən dünya təsərrüfatının başqa subyektlərinə və bütövlükdə
sistemə təsir göstərilməsi ölkənin təsərrüfat potensialından, sahibkarlıq
fəaliyyəti göstərən milli subyektlərin beynəlxalq bazarlarda oynadığı roldan
asılıdır.
_____________________________________________________
Transmilli korporasiyalar
TMK dünya təsərrüfatında xüsusi yer tutur və onun fəaliyyətinə,
başqa sahibkarlıq subyektlərinin və altsistemlərin fəaliyyətinə hərtərəfli təsir
göstərir.
Tədqiqatçılar beynəlxalq təsərrüfat birlikləri anlayışını birmənalı
tərzdə təfsir etmirlər. Onların beynəlxalq, çoxmillətli, qlobal, transmilli
korporasiyalar adlandırılması müxtəlif iqtisadi məkanlarda fəaliyyət
göstərən şirkətlərin müxtəlif funksiyaları üçün müvafiq ifadə axtarıldığını
göstərir.
İki və daha çox ölkədə fəaliyyət göstərən, əməliyyatlarında müəyyən
xarici komponent (ixrac və xaricdə istehsal) olan təsərrüfat müəssisələri
çoxmillətli, transmilli şirkətlərə aid edilir. Onlar bir, yaxud bir neçə
mərkəzdən razılaşdırılmış siyasətin və ümumi strategiyanın həyata
keçirilməsinə, ümumi təsərrüfat strukturunun başqa iştirakçılarına müvafiq
təsir göstərilməsinə imkan verən qərarların qəbul edilməsi sisteminə
malikdirlər. Adətən, bu şirkətlər beynəlxalq miqyasda yayılmış istehsal
kompleksləri şəklindədir və onların tərkib hissələri arasında daxili
münasibətlər bazar deyil, istehsal xarakteri daşıyır.