156
Maliyyə böhranının yaranması və yayılması bir sıra amillərlə
şərtləndirilir. Adətən, maliyyə böhranının şərti maliyyə sisteminin müəyyən
həlqələrində müxtəlif növ aktivlərin nisbətləri arasında pozuntuların,
uğursuzluqların mövcudluğudur. Belə ki, şirkətdə müvəffəqiyyətsizlik
əlamətləri müşahidə edildikdə, yaxud bilərəkdən yaradılmış vəziyyətdə
səhmdarların öz səhmlərini bazara çıxarmaqla onlardan can qurtarmağa
çalışması birja məzənnələrində aşağı düşmə meyilləri ilə nəticələnə bilər.
Bankların etibarlılığına şübhələr yarandıqda, əmanətçilər öz əmanətlərini
tezliklə geri götürməyə cəhd göstərirlər. Lakin bankların likvid vəsaitləri
məhdud olduğuna görə, onlar əmanətlərin böyük bir hissəsini eyni vaxtda
qaytara bilmir. Təsərrüfat sisteminin elementləri bir-biri ilə qarşılıqlı əlaqədə
olduğundan, maliyyə böhranı ilə nəticələnən zəncirvari reaksiya baş verə
bilər. Xarici kapitalla yanaşı, bəlkə ondan da tez milli kapital ölkədən
qaçmağa başlayır. Ölkədən kapitalın axını və qaçması xarici valyutaya
tələbatın artmasına gətirib çıxarır. Valyuta ehtiyatları böyük olduqda belə,
getdikcə artan tələbat ödənilməyə bilər. İnformasiya texnikasından geniş
istifadə olunması da milli maliyyə bazarlarında baş verən böhranların tez bir
zamanda beynəlxalq xarakter almasına səbəb olmuşdur.
Son onilliklərdə maliyyə böhranlarının daxili səbəblərinin üzərinə
böyük həcmdə kapital axınlarının sərhədləri aşması ilə əlaqədar olan, dövlət
tənzimləməsinin zəifləməsi nəticəsində ölkənin maliyyə vəziyyətini
pisləşdirə bilən xarici amillər də əlavə olunur. Kapitalın hərəkətinin dünya
miqyasında yayılması, ofşor əməliyyatlarının genişlənməsi, dövlətin
tənzimləyici rolunun zəifləməsi dünya maliyyə sistemində sırf möhtəkirlik
xarakterli hərəkətlərin yerinə yetirilməsi imkanlarını artırmışdır. Bu
əməliyyatlar maliyyə göstəricilərindən (valyuta məzənnəsi, səhmlərin
məzənnəsi, uçot dərəcələri) qərəzlə istifadə olunması sayəsində əlavə
mənfəət əldə etmək məqsədi güdür. Bunun üçün 10 və 100 milyard dollar
məbləğində vəsaitlər səfərbər olunur və bu cür imkanlar mövcuddur.
Dünyada möhtəkirlik əməliyyatları üzrə ixtisaslaşmış 8 mindən artıq
hecinq fondları mövcuddur və onların əksəriyyətinin aktivləri ABŞ-da
yerləşir. Onlar əlbir hərəkət etməklə, istənilən mərkəzdə möhtəkirlik
mənfəətinin əldə olunmasına imkan verən 100 milyardlarla likvid vəsaitləri
toplayırlar. BVF-in qiymətləndirmələrinə görə, 5-6 ən böyük fond istənilən
milli valyutaya, yaxud fond bazarına hücum etmək üçün 900 milyard
dollaradək vəsait səfərbər etməyə qadirdir. Maliyyə mərkəzlərinin çoxu bu
cür təzyiqə davam gətirmək iqtidarında deyil.
157
___________________________________________________
Maliyyə böhranlarının nəticələri
Ötən əsrin son 25 ili maliyyə böhranlarının sayının çoxalması ilə
xarakterizə olunur. Özü də, bu böhranlar inkişaf etmiş ölkələrlə müqayisədə
inkişaf etməkdə olan ölkələrdə daha tez-tez baş verir. Belə ki, 1990-cı illərdə
60-dan çox, o cümlədən bazarları inkişaf edən 41 ölkədə maliyyə böhranı
baş vermişdir. Ən güclü maliyyə sarsıntıları ilə Braziliyanın, Meksikanın,
Argentinanın, Cənubi Koreyanın, Cənubi-Şərqi Asiyanın, Rusiyanın,
Yaponiyanın maliyyə sistemləri üzləşmişdir. İnkişaf etmiş ölkələrin milli
təsərrüfatları da əsrimizin əvvəllərində güclü fəlakətlərlə qarşılaşmışdır.
Maliyyə böhranları dünyada iqtisadi inkişafın qeyri-sabit, iyerarxiya
formasında olmasını, böhranlı ölkələrdə kapitalın səfərbərliyi və
yerləşdirilməsi, valyuta ehtiyatlarının idarə olunması sahələrində qeyri-
mütənasibliklərin mövcudluğunu əks etdirmişdir. Sübut olundu ki, bu
böhranların ən mühüm səbəbi xarici ssuda kapitalının kütləvi şəkildə, özü də
qısa müddətə cəlb olunmasıdır. Böhran başlamazdan əvvəl inkişaf etməkdə
olan ölkələrdə qısamüddətli borc öhdəliklərinin ümumi xarici borca nisbəti,
bu vəziyyətə düşməyən ölkələrlə müqayisədə 2 dəfə yüksək olmuşdur.
Qısamüddətli borc öhdəliklərinin və xarici valyuta ilə təmin olun-
muş, yaxud indeksləşdirilmiş passivlərin böyük bir hissəsinin toplanması
milli pul-kredit sistemlərinin dayanıqlığını zəiflədirdi. İri məbləğdə xarici
qeyri-mütənasibliklər (ödəmələrin mənfi saldosu, faizlər üzrə böyük
məbləğdə ödənişlər, qısamüddətli borcların payının yüksək olması, xarici
passivlərin aktivləri üstələməsi və s.) təsərrüfatların xaricdə baş verən
hadisələrə, o cümlədən inkişaf etmiş ölkələrin dalğavari inkişafında, beynəl-
xalq maliyyə bazarlarında və aparıcı valyutaların mübadilə məzənnələrinin
strukturunda baş verən dəyişikliklərə qarşı həssaslığını artırır.
Maliyyə böhranı maddi istehsal sektoruna, kapital yığımına mənfi
təsir göstərir. İşçi qüvvəsinin məşğulluğu ən kəskin problemlərdən birinə
çevrilir. 1990-cı illərdə böhran keçirən ölkələr öz illik ÜDM-nin 14%-dək
itirirdi və onların böhrandan əvvəlki iqtisadi inkişafı səviyyəsinə çatması
üçün 6 ilədək vaxt tələb olunurdu. Böhran baş verən ölkələrdə tədiyyə
balansının ÜDM-ə nisbətən kəsiri böhran keçirməyən ölkələrlə müqayisədə
2% yüksək olurdu. 1990-cı illərin böhranları dünya təsərrüfatının istehsal və
pul-kredit sektorlarının inkişafına mənfi təsir göstərmişdir. 2008-ci ildə
başlayan və ümumdünya miqyası alan maliyyə böhranı böyük iqtisadi
itkilərlə nəticələnmişdir. Böhran keçirən təsərrüfatlarda istehsal həcminin
sürətlə azalması xarici ticarətin artım tempinin səngiməsi və daha sonra
ixtisarı, valyuta məzənnələrinin dəyişməsi səbəbindən rəqabətin
kəskinləşməsi ilə nəticələndi (valyuta müharibələri).