Müasir dövr
Тарих вя онун проблемляри, №4 2010
87
XAQAN BALAYEV
AMEA İnsan Hüquqları üzrə Elmi - Tədqiqat
İnstitutunun doktorantı
E-mail: Xaqan28@gmail.com
CƏNUBİ AZƏRBAYCANDAN GƏLMİŞ MÜHACİRLƏRİN AZƏRBAYCAN SSR-in SİYASİ
HƏYATINDA İŞTİRAKI (1947-1991-ci İLLƏR)
Açar sözlər: Cənubi Azərbaycan, mühacirlər, sovet cəmiyyəti, siyasi həyat
Ключевые слова: Южный Азербайджан, мигранты, советское общество, политичес-
кая жизнь
Key words: Southern Azerbaijan, migrant, the soviet society, political life
Sovet cəmiyyətində mühacirlər öz əmək və təhsil, elmi və yaradıcılıq fəaliyyətləri ilə
bilavasitə siyasi həyatın iştirakçısına çevrilmişdilər. Ona görə ki, bütün ölkənin vahid ideologiya
əsasında siyasiləşmiş həyatı mövcud idi.
Məlum olduğu kimi, SSRİ-nin siyasi rejiminin əsasını təkpartiyalı sistem – yeganə avtoritar
hakim partiya olan Sovet İttifaqı Kommunist Partiyası təşkil edirdi və o, əslində, ali dövlət təsisatı
funksiyasını yerinə yetiridi. Ölkə, “respublikalar ittifaqı” adlansa da, unitar dövlət kimi Moskvadan
idarə olunurdu.
Beləliklə də, forma və təyinatından asılı olmayaraq ölkədəki bütün təsisatlar –
psevdodemokratik ümumölkə sovetlər piramidası, həmkarlar, gənclər və yaradıcılıq ittifaqları, uşaq və
qadın təşkilatları və digər bütün təsisatlar Kommunist Partiyasının rəhbərliyi altında kor-koranə
tabeçilik şəraitində fəaliyyət göstərirdilər.
Kütləvi təşkilatlar hamını öz əhatə dairəsinə salaraq siyasiləşdirirdi. Ölkənin iki ən iri kütləvi
təşkilatı olan SSRİ Həmkarlar İttifaqlarının və Ümumittifaq Lenin Kommunist Gənclər İttifaqının
(ÜİLKGİ) nizamnamələrində onların Kommunist Partiyasının rəhbərliyi altında işləmələri haqqında
müddəalar vardı (1, s. 7; 2, s.3). SSRİ Həmkarlar İttifaqlarının ali icraedici orqanı olan Ümumittifaq
Həmkarlar İttifaqları Mərkəzi Şurası (ÜİHİMŞ) Sov.İKP MK Siyasi Bürosunun tapşırıqları əsasında
işləyir, aşağı həmkarlar ittifaqları da müvafiq partiya orqanlarının tam tabeliyində idilər. Öz
nizamnaməsinə əsasən partiyanın fəal köməkçisi və ehtiyat qüvvəsi olan ÜİLKGİ-nin vəzifəsi bütün
üzvlərini Sov.İKP ətrafında birləşdirməkdən, onları Sov.İKP Proqramının, qərar və göstərişlərinin
yerinə yetirilməsinə səfərbər etməkdən ibarət idi (2, s.3). İbtidai sinif şagirdlərinin oktyabryat,
onlardan yaşlıların pioner təçkilatları fəaliyyət göstərirdi.
Məhz siyasi faktorlar sistemin bütünlükdə təsir qüvvəsini təmin edirdi. Əslində,
totalitar dövlətin bütün fəaliyyəti – siyasi, iqtisadi, ideoloji, sosial fəaliyyəti məhz buna əsaslanırdı.
Sovet
cəmiyyətinin tədqiqatçılarından olan Д. В. Прокудин və Б. М. Меерсон birgə
yazdıqları “Totalitarizm: təzahür və mahiyyət” adlı əsərdə sovet cəmiyyətindəki yuxarıda haqqında
bəhs etdiyimiz total siyasiləşdirmənin çox aydın sadə izahını verirlər: “Totalitar cəmiyyətdə hər bir
hərəkət mütləq siyasi məna daşımalıdır. Zavodda fəhlə sadəcə dəzgah arxasında dayanmır, kəndli
sadəcə torpağı becərmir, alim formullar üzərində yalnız elmi marağa görə baş sındırmır, musiqiçi
sadəcə ifa etmir, yazıçı sadəcə roman yazmır... Onların hamısı, hər şeydən əvvəl düşmənə çatmaq və
onu ötmək üçün mühüm siyasi iş görürlər. Hər kəs öz cəbhəsində (istehsalat, elm, idman və s.) imkanı
daxilində mübarizə aparır. Əhali bu minvalla siyasətə və onu müəyyənləşdirən hakimiyyətə bağlanır”
(3, s.117).
Politoloq Y. D. Şevçenko “Sovet və postrovet Rusiyasının siyasi mədəniyyəti: institutsional
amillərin təsiri” adlı əsərində siyasətə və hakimiyyətə bağlanmağın mexanizmini açıqlayır: “Sovet
vətəndaşlarını siyasi sistemə uyğunlaşmağa hansı mexanizmlər məcbur edirdi? Sovet siyasi sisteminin
Müasir dövr
Тарих вя онун проблемляри, №4 2010
88
institutsional dizaynı dövlətin vətəndaş üzərində hakim mövqeyinə əsaslanırdı ki, bu da həm ideoloji
ritorikada, həm də hakimiyyətin siyasi fəaliyyətində əksini tapırdı. Şəxsiyyətin rifahı birbaşa siyasi
loyallıqdan asılı idi. Belə şəraitdə sovet vətəndaşı rasional düşünə bilən aktyor kimi öz siyasi
görüşlərini sistemə uyğunlaşdırmaq məcburiyyətində idi. Loyallıq ən uduşlu strategiya idi... Digər
tərəfdən, sovet siyasi sistemi kollektivizmi həyat fəaliyyətinin forması kimi fəal surətdə tətbiq edirdi.
Sistemin kollektivdə yer tutan hər bir üzvü göz qabağında idi və beləliklə də onun nə dərəcədə fəal
olması dərhal nəzərə çarpırdı. Siyasi iştirakdan yayınmaq görünməyə bilməzdi. Sistemə loyallığın
nümayiş etdirilməsi vasitəsi kimi fəallıq mükafatlandırılmaq şansına malik idi və bu, həmin
düşüncənin vətəndaşların şüurunda möhkəm yer tutmasına səbəb olurdu. Bundan əlavə, siyasi həyatda
iştirak üçün əlavə stimul olan repressiya təhlükəsini də unutmaq olmazdı” (4, s. 98).
Mühacirləri də sovet adamının taleyi gözləyirdi: ya dövlətə itaət etməli, ya da repressiyaya
məruz qalmalı idi. Mühacirlər Azərbaycana gələndə yerli əhali artıq 37-ci ilin repressiyalarından
keçdiyinə görə bütünlüklə itaətçilik psixologiyasının daşıyıcısı olan yekrəng kütlə təşkil edirdi.
Mühacirətin ilk illərindəcə mühacirlər arasından sovet rejimini qəbul etməyənlər həbs düşərgələrinə
göndərildikləri üçün qalanları artıq itaətçilik axınına qoşulmağa hazır idilər.
Mühacirlər əllinci illərin ortalarından etibarən həmkarlar ittifaqları təşkilatlarına üzv qəbul
olunmağa başlamışdılar və işləyənlər onun siyasi təsiri əhatəsində idi. “SSRİ-də siyasi mühacirlərin
hüquqi vəziyyəti haqqında” Sov.İKP MK Rəyasət Heyətinin 3 aprel 1961-ci il tarixli qərarında
ərazilərində siyasi mühacirlərin məskunlaşdığı vilayət, şəhər və rayon partiya komitələrinə “onları
həmkarlar ittifaqlarının, komsomol təşkilatlarının, könüllü cəmiyyətlərin və digər kütləvi təşkilatların
işinə daha fəal cəlb etmək” (5) tapşırığı verilmişdi. 1980-ci il yanvarın 1-ə olan məlumata görə bütün
işləyən mühacirlər həmkarlar ittifaqlarının üzvü idilər, onların sayı 3.299 nəfər idi (6).
Mühacir gənclərin ictimai-siyasi fəaliyyətə cəlb olunması məsələsi ADF MK-nı əllinci illərin
ortalarından düşündürməyə başlamışdı. Mühacirətə uşaqkən gələnlər artıq böyüyərək, gənc oğlan və
qızlara çevrilmişdilər.
ADF MK 1954-cü ilin sonunda ADF Komitəsinin Məsələlərinə Baxılması üzrə Komissiyaya
müraciət edərək, ADF-nin gənclər təşkilatının yaradılması haqqında təklif irəli sürmüşdü. Komissiya
5 yanvar 1955-ci il tarixli iclasında bu təklifə baxaraq, “ADF yanında hazırda xüsusi gənclər
təşkilatının yaradılmasının məqsədəuyğun hesab olunmaması haqqında” qərar qəbul etmişdi.
Komissiyanın üzvü Səmədova tapşırılmışdı ki ki, İran demokratlarının uşaqlarının ÜİLKGİ-yə qəbul
edilməsi məsələsinə baxmaq və müsbət həll etmək haqqında Azərbaycan LKGİ MK-ya göstəriş versin
(7).
Komissiyanın qərarından mühacir yeniyetmə və gənclərin təhsil aldıqları orta və ali
məktəblərdə onların bu və ya digər təşkilata mənsubiyyət baxımından öz yerli yaşıdlarından
fərqlənməməsi kimi humanist məqsəd güdüldüyünü düşünmək olar.
Lakin
komissiyanın qərarına baxmayaraq, Azərbaycan LKGİ MK mühacirlərin komsomola
qəbulu məsələsini həll etməkdə səlahiyyətli deyildi. Azərbaycan KP MK da məsələni həll edə
bilməzdi. Buna görə də, Azərbaycan KP MK və ADF MK Sov.İKP MK-ya müraciət edirlər.
Sov.İKP MK katibliyi Azərbaycan KP MK və ADF MK-nın xahişini yerinə yetirərək, 1956-cı
il avqustun 27-də “İran siyasi mühacirlərinin oğlan və qızlarının ÜİLKGİ-yə qəbulu haqqında” qərar
qəbul etdi. Qərarda göstərilirdi ki, “İran siyasi mühacirlərinin oğlan və qızlarının ümumi əsaslarla
fərdi qaydada ÜİLKGİ-yə qəbul edilməsinə icazə verilsin” (8).
Bundan sonra respublikada mühacir gənclərin komsomola qəbulunu tənzimləmək üçün
Azərbaycan KP MK bürosunun 4 sentyabr 1956-cı il tarixli müvafiq qərarı qəbul edilmişdi. Həmin
büro iclasında Azərbaycan LKGİ MK katibi N. Hacıyev ÜİLKGİ MK-nın da bu barədə qərar qəbul
etdiyi haqqında məlumat vermişdi (9).
Azərbaycan KP MK-nın məsələyə necə ciddi əhəmiyyət verdiyi sonrakı arayış və qərarlardan
aydın olur. Azərbaycan KP MK-da hazırlanmış 28 aprel 1967-ci il tarixli arayışda göstərilirdi ki,
“Mühacir gənclərin ÜİLKGİ sıralarına cəlb olunması işi qənaətbəxş deyildir. Onlar arasında aparılan
iş bir dəfə də olsun Azərbaycan LKGİ MK-da müzakirə olunmamışdır. Hətta bəzi rayon komsomol
Müasir dövr
Тарих вя онун проблемляри, №4 2010
89
komitələrinin katibləri bilmirlər ki, siyasi mühacirlərin uşaqlarını ÜİLKGİ sıralarına qəbul etmək olar
və lazımdır” (10). Azərbaycan KP MK-nın 19 may 1961-ci il tarixli qərarında artıq ÜİLKGİ-yə qəbul
edilmiş mühacirlərin komsomol siyasi maarif sisteminə cəlb olunması tapşırılırdı (11).
Lakin komsomola qəbulla əlaqədar qəbul edilmiş qərarlar hüquqi əsasa malik deyildi. Ona
görə ki, ÜİLKGİ nizamnaməsinin 1-ci maddəsində komsomola yalnız “sovet gəncinin” qəbul edilə
biləcəyi haqqında aydın yazılmışdı (2, s. 6). Beləliklə də, ÜİLKGİ nizamnaməsi əvvəlcə Sov.İKP
MK, sonra isə ÜİLKGİ MK-nın özü tərəfindən pozulmuşdu (nizamnaməsində dəyişiklik etmədən
Sov.İKP MK katibliyinin qərarına əsasən qərar qəbul etdiyinə görə). Həmin qərarlar ÜİLKGİ
nizamnaməsində müvafiq dəyişiklik ediləcəyi təqdirdə hüquqi sənəd hesab edilə bilərdi. Sov.İKP MK
katibliyinin qərarı partiyaya (və deməli dövlətə) Xruşşovun rəhbərlik etdiyi və “partiya dedi, partiya
edər” prinsipinin hakim olduğu şəraitdə qəbul edilmişdi. Sonradan ölkə tarixində volüntarizm dövrü
kimi səciyyələndirilən həmin illərdə belə qərarların qəbul olunması geniş hal almışdı.
1974-cü ildə siyasi mühacirlərin uşaqlarının komsomola qəbulunun dayandırmasına da
yuxarıda göstərilən hüquqi əsassızlıq səbəb olmuşdu. Azərbaycan KP MK-nın bu barədəki sorğusuna
Azərbaycan LKGİ MK katibi V. Hüseynov 18 iyun 1974-cü il tarixli məktubunda belə cavab
vermişdi: “Azərbaycan LKGİ MK siyasi mühacirlərin uşaqlarının ÜİLKGİ-yə qəbulu haqqında
ÜİLKGİ MK ilə dəfələrlə məsləhətləşmişdir. Bizə izah etmişlər ki, bu məsələ bütünlükdə ölkə üzrə
öyrənilmişdir və bir daha təsdiq etmişlər ki, siyasi mühacirlərin uşaqlarının qəbulu məsələsində
ÜİLKGİ Nizamnaməsini rəhbər tutmaq lazımdır. Nizamnamənin I paraqrafında yazılmışdır ki, “Sovet
ölkəsinin hər bir gənc adamı ÜİLKGİ üzvü ola bilər”. Siyasi mühacirlər sovet vətəndaşlığına qəbul
edildikdən sonra onların uşaqları ÜİLKGİ-yə qəbul edilə bilərlər. İyunun 18-də ÜİLKGİ MK
komsomol orqanları şöbəsinin müdiri V. T. İvanov bir daha bunu təsdiq etmişdir” (12).
1974-cü
ildən mühacirlərin komsomola qəbulunun dayandırılması [həmin vaxtadək qəbul
olunanların sayı 2.963 nəfər idi (13)] heç də komsomol təşkilatlarının gənc mühacirlərin siyasi
tərbiyəsi işindən kənarda qalması demək deyildi. Azərbaycan KP MK-nın sonrakı qərarlarında da
Azərbaycan LKGİ MK-ya gənc mühacirlərlə iş haqqında tapşırıqlar verilirdi. Misal üçün, MK-nın 2
aprel 1985-ci il tarixli qərarında Azərbaycan LKGİ MK-ya ADF-nin gənclər təşkilatı ilə işi
gücləndirmək, fəaliyyət proqramının hazırlanmasında ona lazımi konsultativ yardım göstərmək,
Azərbaycan ərazisində yaşayan İran gəncləri arasında ideoloji işin səviyyəsini yüksəltmək, gənc
alimləri, mütəxəssisləri, mədəniyyət xadimlərini bu işə cəlb etmək, ADF-nin gənclər təşkilatları ilə
şəhər və rayon komsomol komitələrinin işi haqqında MK bürosunda vaxtaçırı məsələlər müzakirə
etmək tapşırılırdı (14).
ÜİLKGİ Nizamnaməsini sərf-nəzər edərək, mühacirlərin komsomola qəbulu haqqında qərar
qəbul etmiş Sov.İKP MK Kommunist Partiyası Nizamnaməsinin pozulmasına yol verməmək üçün
kifayət qədər intizamlı idi və partiyaya yalnız sovet vətəndaşları qəbul edilə bilərdi. Buna görə də,
Mustafayev Sov.İKP MK-ya göndərdiyi 3 avqust 1956-cı il tarixli məktubunda “qardaş və kommunist
partiyalarından çıxanların Sov.İKP-yə qəbul qaydası haqqında Sov.İKP MK-nın 11 dekabr 1954-cü il
tarixli P-98/ 17 nömrəli qərarının sovet vətəndaşlığını qəbul etmiş keçmiş ADF üzvlərinə də şamil
edilməsi məsələsini qaldırmışdı (15).
Sov.İKP MK tərəfindən buna icazə verilsə də, olduqca sərt rejim müəyyənləşdirilmişdi.
Qaydaya görə, rayon və ya şəhər partiya komitəsinin təqdimatına əsasən məsələ fərdi qaydada
Azərbaycan KP MK bürosunda müzakirə olunduqdan sonra partiya bileti verilməsi haqqında qərar
qəbul edilirdi (16). 1985-ci il martın 1-dək yalnız 53 nəfər belə etimada layiq görülmüşdü (17).
Halbuki, həmin vaxtadək sovet vətəndaşlığını qəbul edən mühacirlərin sayı 680 nəfər idi (18). Sovet
cəmiyyətində Sov.İKP-yə üzvlüyün bir çox imtiyazlar verdiyini nəzərə alsaq, partiyaya qəbul üçün
müraciətlərin qat-qat çox olduğu qənaətinə gələ bilərik.
Politologiya
elmində siyasi iştirakın, adətən, iki əsas tipinin (konvensial – bərqərar olmuş
ənənələrə uyğun olaraq ictimai siyasi təşkilatlarda üzvlük, siyasi aksiyalarda fəallıq və s.; və qeyri-
konvensial – mitinqdən zor tətbiq etməyə qədər müxtəlif etiraz formalarının tətbiqi)
müəyyənləşdirildiyini (19) nəzərə alsaq, sovet adamları kimi mühacirlərin də siyasi həyatda
Müasir dövr
Тарих вя онун проблемляри, №4 2010
90
fəaliyyətini yalnız konvensial iştirak kimi səciyyələndirmək olar. Yuxarıda göstərdiyimiz kimi, onlar
bütün kütləvi təşkilatların işində iştirak edirdilər. Eyni zamanda, ADF-nin rəhbərliyi ilə siyasi
mühacirlər də ölkə üzrə kommunistlər arasında keçirilən siyasi aksiyaların eyni hüquqlu iştirakçılarına
çevrilmişdilər. Misal üçün, ADF Komitəsinin Məsələlərinə Baxılması üzrə Komissiya 1956-cı il
aprelin 11-də “Sov.İKP XX qurultayının yekunları ilə əlaqədar olaraq ADF partiya fəallarının rayon
yığıncaqlarının keçirilməsi haqqında” məsələ müzakirə edərək, ADF MK-nın bu barədəki təklifinə
tərəfdar çıxmış, Azərbaycan KP şəhər və rayon komitələrinə müvafiq tədbirlərin keçirilməsində ADF
təşkilatlarına köməklik göstəriməsi üçün göstəriş verilməsini tövsiyə etmişdi (20). Yaxud, Azərbaycan
KP MK-nın 6 iyun 1967-ci il tarixli qərarında belə bir maddə vardı ki, “Bu ilin oktyabr ayında Bakı və
Kirovabad şəhərlərində, Şamaxı, Quba. Ağdam və Zaqatala rayonlarında Böyük Oktyabr sosialist
inqilabının 50 illiyi münasibətilə siyasi mühacirlərin sovet vətəndaşları ilə birlikdə “Sovetlər ölkəsi,
biz sənə minnətdarıq!” devizi altında dostluq günləri keçirmək haqqında ADF MK-nın xahişi təmin
edilsin. AHİŞ, Azərbaycan LKGİ MK, Mədəniyyət nazirliyi, Azərbaycan SSR İdman Cəmiyyətləri və
Təşkilatları İttifaqı və respublika Qırmızı Aypara Cəmiyyətinin Mərkəzi Komitəsinə tapşırılsın ki,
dostluq günlərinin hazırlanması və keçirilməsinə köməklik göstərsinlər” (21). Arxiv sənədləri belə
faktlarla zəngindir.
SSRİ-də cəmiyyətə münasibətdə qeyri-konvensial siyasi iştirak, mühacirlər də daxil olmaqla,
istisna olunurdu. Etiraz və həmrəylik mitinqləri imperializmə və onun qurbanlarına ünvanlana bilərdi
(“Amerika, Vyetnamdan əlini çək!”, “Kuba biz səninləyik” və s.).
Sovet
cəmiyyətinin maksimum siyasiləşdirilməsinə baxmayaraq, dayaqlarının daim
möhkəmləndirilməsi üçün Sov. İKP MK hər neçə ildən bir zəhmətkeşlərin siyasi tərbiyəsinin
gücləndirilməsi istiqamətində qərarlar qəbul edirdi. Moskvanın nəzərincə, mühacirlərin buna daha çox
ehtiyacı olmalı idi. Buna görə də, mühacirlərə dair müntəzəm qəbul edilən qərarlar arasında tək-təkini
tapmaq olar ki, siyasi tərbiyəyə aid maddəsi olmasın. Ayrı-ayrı vaxtlarda isə müştərək (“siyasi
mühacirlər arasında təşkilati və siyasi işin daha da yaxşılaşdırılması”, “siyasi mühacirlər arasında
siyasi və tərbiyəvi işin daha da gücləndirilməsi”), yaxud müstəqim olaraq (“siyasi mühacirlər arasında
siyasi işin daha da gücləndirilməsi”) bu mövzuda qərarlar qəbul edilirdi. Mühacirlərin 1947-ci ildən
başlayan siyasi tərbiyəsi davamlı prosesə çevrilmişdi.
Azərbaycan KP MK-nın “Azərbaycan SSR-də yaşayan iranlı siyasi mühacirlərin maddi-
məişət şəraitinin və siyasi tərbiyəsinin yaxşılaşdırılması haqqında” 4 noyabr 1958-ci il, “Azərbaycan
SSR-də yaşayan siyasi mühacirlər arasında siyasi və tərbiyəvi işin daha da gücləndirilməsi tədbirləri
haqqında” 18 dekabr 1962-ci il, “Azərbaycan SSR-də yaşayan siyasi mühacirlər arasında siyasi işin
daha da yaxşılaşdırılması tədbirləri haqqında” 6 iyun 1967-ci il, “İran siyasi mühacirləri arasında
təşkilati və siyasi işin daha da yaxşılaşdırılması tədbirləri haqqında” 2 aprel 1985-ci il tarixli
qərarlarında mühacirlər arasında aparılan siyasi işin vəziyyəti dərindən təhlil olunmuş, onun daha da
yaxşılaşdırılması və gücləndirilməsi üçün kompleks tədbirlərin həyata keçirilməsi nəzərdə
tutulmuşdu.
18 dekabr 1962-ci il tarixli qərarın icrası ilə əlaqədar Azərbaycan KP MK-da hazırlanmış 28
aprel 1967-ci il tarixli arayışda göstərilirdi ki, respublikanın partiya təşkilatları, Azərbaycan Qırmızı
Aypara Cəmiyyətinin Mərkəzi Komitəsi, nazirlik və baş idarələr MK-nın qərarını icra edərək, siyasi
mühacirlərin ideya-siyasi səviyyəsinin yüksəldilməsi məsələləri ilə dərindən məşğul olmağa, ADF
təşkilatlarına bu sahədə kömək etməyə başlamışlar. Siyasi mühacirlərin müəyyən hissəsi iş yerində
partiya (Kommunist Partiyası – X. B.) maarifi sistemində təhsilə cəlb olunmuşdur. Əksər şəhər və
rayon partiya komitələrində siyasi mühacirlər arasında təbliğat işi aparmaq üçün qruplar yaradılmışdır.
Onlar beynəlxalq mövzularda, Yaxın və Orta Şərq ölkələrində daxili siyasi vəziyyət haqqında
mühazirələr oxuyur, məruzələr edirlər.
Bununla
belə, mühacirlər arasında aparılan siyasi iş kifayətləndirici hesab edilməmişdi. Arayış
və qərarlarda qeyd olunurdu ki, bəzi şəhər və rayon partiya komitələri mühacirlər arasında siyasi
tərbiyə işi aparmaqdan daha çox onların maddi-məişət məsələlərinin həlli ilə məşğul olurlar. İlk
partiya təşkilatları ilə ADF hövzələri kütləvi-siyasi iş aparılmasında fəaliyyətlərini zəif
Müasir dövr
Тарих вя онун проблемляри, №4 2010
91
əlaqələndirirlər. Siyasi mühacirlərin əksəriyyəti partiya maarifi şəbəkəsinə cəlb olunmamış, onlar
üçün nəzəri seminarlar, cari siyasətin öyrənilməsi üzrə dərnəklər təşkil olunmamışdır. Bakıda yaşayan
830 nəfər ADF üzvündən yalnız 350 nəfərinin, Kirovabad və Əli Bayramlı şəhərlərində, Şamaxı,
Ağdam, Quba, Göyçay, İsmayıllı, Bərdə, Qazax və Tovuz rayonlarında ADF üzvlərindən yalnız
yarısının partiya təhsili sistemində məşğul olması partiya təşkilatları üçün böyük nöqsan hesab
olunurdu. Göstərilirdi ki, müəssisə, idarə və təşkilatlarda siyasi mühacirlər sovet kollektivlərinin fəal
ictimai-siyasi həyatına kifayət qədər cəlb olunmurlar, ADF komitə və hövzə sədrlərinin, İran Siyasi
Mühacirlər seksiyaları sədrlərinin partiya yığıncaqlarına, təsərrüfat fəalları müşavirələrinə,
Azərbaycan KP-nin müvafiq komitələrinin büro və plenum iclaslarına dəvət olunması təcrübəsindən
zəif istifadə edilir (22).
Buna
görə də, Azərbaycan KP MK bürosunun təxminən bir ay sonra qəbul etdiyi
“Azərbaycanda yaşayan siyasi mühacirlər arasında siyasi işin daha da yaxşılaşdırılması tədbirləri
haqqında” 6 iyun 1967-ci il tarixli qərarla siyasi mühacirlər arasında ideoloji işin mühümlüyü nəzərə
alınaraq, bu iş üçün məsuliyyət bilavasitə şəhər və rayon partiya komitələri birinci katiblərinin üzərinə
qoyulmuşdu. Bunun üçün ciddi əsas vardı. Qərarda siyasi mühacirlərlə aparılan siyasi işin müsbət
cəhətləri göstərilməklə yanaşı, bu işdə ciddi nöqsanların olduğu, mühacirlərin iş yerlərində fəal
ictimai-siyasi həyata kifayət qədər cəlb olunmaması, marksizm-leninizm nəzəriyyəsinə və SSRİ-də
kommunizm quruculuğu təcrübəsinə dərindən yiyələnmələrinə lazımi yardım göstərilməməsi qeyd
olunurdu.
Qərarda göstərilirdi ki, siyasi mühacirlər arasında siyasi və tərbiyəvi iş aparılması, onların
ideya-nəzəri, ümumi təhsil və mədəni səviyyəsinin yüksəldilməsi Azərbaycan KP şəhər və rayon
komitələrinin, ilk təşkilatlarının ən mühüm vəzifələrindən biri hesab edilməlidir..
Mühacirlərin məskunlaşdıqları şəhər və rayon (Bakı, Kirovabad, Sumqayıt, Əli Bayramlı,
Nuxa, Yevlax, Ağdam, Bərdə, Vartaşen, Göyçay, Dəvəçi, Zaqatala, İsmayıllı, Qazax, Qasım
İsmayılov, Quba, Mirbəşir, Salyan, Tovuz, Xaçmaz, Şamxor, Şamaxı) partiya komitələrinə hər bir ilk
partiya təşkilatında siyasi mühacirlərlə siyasi işin vəziyyətini əsaslı surətdə öyrənib, onun
gücləndirilməsi üçün praktik tədbirlər həyata keçirmək; Azərbaycan KP ilk təşkilatları ilə ADF
özəklərinin siyasi-tərbiyə işinin düzgün əlaqələndirilməsinə nail olmaq, partiyadaxili işin
yaxşılaşdırılması üçün ADF partiya özəklərinə yoldaş məsləhəti və təcrübə mübadiləsi yolu ilə
köməklik göstərmək; ADF komitələrinin təqdimatı ilə ADF üzvlərini yeni dərs ilindən partiya təhsili
sisteminin məktəb və nəzəri seminarlarına cəlb etmək, partiya üzvü olmayan siyasi mühacirlər üçün
cari siyasət dərnəkləri yaratmaq tapşırılmışdı.
İranlı fəhlə və qulluqçuların 30 faizindən çoxunun həmkarlar ittifaqlarının üzvü olmamasını
düzgün hesab etməyən MK Azərbaycan Həmkarlar İttifaqları Şurasına siyasi mühacirlərin və onların
ailə üzvlərinin çalışdıqları müəssisə və idarələrdə bütünlüklə həmkarlar ittifaqlarına cəlb olunması
üçün təxirəsalınmaz tədbirlər görmək haqqında göstəriş vermişdi.
Qərarın preambulasında göstərilirdi ki, siyasi mühacirlərin uşaqları ilə aparılan iş müasir
tələblərə cavab vermir. Azərbaycan LKGİ MK iranlı gənclərin komsomola cəlb olunması üçün
səmərəli tədbirlər görmür. Komsomol yaşlı 4.300 mühacirdən yalnız üçdə bir hissəsinin ÜİLKGİ üzvü
olmasını qənaətbəxş hesab etməyən MK tərəfindən Azərbaycan LKGİ MK-ya siyasi mühacirlərin
uşaqlarının ÜİLKGİ-yə və pioner hərəkatına cəlb olunması üçün sistemli iş aparmaq, iranlı
komsomolçuların siyasi tərbiyəsini gücləndirmək, onları fəal komsomoldaxili işə cəlb etmək, siyasi
mühacirlərin uşaqları ilə iş üzrə məsələlərin Azərbaycan LKGİ MK bürosunda vaxtaşırı müzakirə
etmək tapşırılmışdı (23).
1983-cü ilin aprelindən 1985-ci ilin mart ayınadək İrandan Azərbaycana gəlmiş minə qədər
mühacir də əvvəlkilərə əlavə olunanda Azərbaycan KP MK “İran siyasi mühacirləri arasında təşkilati
və siyasi işin daha da yaxşılaşdırılması tədbirləri haqqında” 20 aprel 1985-ci il tarixli qərarını qəbul
etdi. Qərarda mühacirlər arasında siyasi işin aparılması məsələlərinə geniş yer ayrılmışdı.
Mühacirlərin məskunlaşdıqları şəhər və rayonların partiya komitələrində onlarla iş üzrə ayrıca
Müasir dövr
Тарих вя онун проблемляри, №4 2010
92
təlimatçının müəyyənləşdirilməsi, mühacirlərin yenidən Bakı Ali Partiya Məktəbinə qəbul edilməsi
qərara alınmışdı (24).
ƏDƏBİYYAT:
1. SSRİ Həmkarlar İttifaqlarının Nizamnaməsi. Bakı: Azərnəşr, 1983, 56s.
2. Ümumittifaq Lenin Kommunist Gənclər İttifaqının Nizamnaməsi. Bakı: Gənclik, 1974, 32 s.
3. Прокудин Д. В., Меерсон Б. М. Тоталитаризм: явление и сущность.
www.sch57.msk.ru/collect/wst9.htm
4. Шевченко Ю. Д . Политическая культура советской и постсоветской России:
воздействие институциональных факторов. www. polit-hub.spb.ru/mag3.doc
5. Azərbaycan Respublikası Prezidentinin İşlər İdarəsinin Siyasi Sənədlər Arxivi (ARPİİSSA): f.1,
siy. 48, iş 53, v. 2
6. ARPİİSSA: f.1, siy. 67, iş 188, v. 24
7. ARPİİSSA: f.1, siy. 89, iş 157, v. 31
8. ARPİİSSA: f.1, siy. 43, iş 97, v. 89
9. ARPİİSSA: f.1, siy. 43, iş 97, v. 89
10. ARPİİSSA: f.1, siy. 54, iş 46, v. 106
11. ARPİİSSA: f.1, siy. 48, iş 53, v. 2
12. ARPİİSSA: f.1, siy. 61, iş 160, v. 54
13. ARPİİSSA: f.1, siy. 74, iş 60, v. 59
14. ARPİİSSA: f.1, siy. 89, iş 203, v. 31
15. ARPİİSSA: f.1, siy. 74, iş 60, v. 59
16. ARPİİSSA: f.1, siy. 63, iş 64, v. 117
17. ARPİİSSA: f.1, siy. 74, iş 60, v. 59
18.Каазе М. О политическом действии и не только. www.politex.info/content/view/308/30/
19. ARPİİSSA: f.1, siy. 89, iş 198, v. 1
20. ARPİİSSA: f.1, siy. 74, iş 59, v. 29
21. ARPİİSSA: f.1, siy. 54, iş 46, vv. 104-105
22. ARPİİSSA: f.1, siy. 54, iş 46, vv. 93-95
23. ARPİİSSA: f.1, siy. 74, iş 59, v. 29
24. ARPİİSSA: f.1, siy. 46, iş 68, v. 30
ХАГАН БАЛАЕВ
Докторант Научно-Исследовательского
Института по Правам Человека НАНА
E-mail: Xaqan28@gmail.com
УЧАСТИЕ ЭМИГРАНТОВ, ПРИБЫВШИХ ИЗ ЮЖНОГО АЗЕРБАЙДЖАНА, В
ПОЛИТИЧЕСКОЙ ЖИЗНИ АЗЕРБАЙДЖАНСКОЙ ССР (1947-1991 гг.)
Статья посвящена вопросам участия эмигрантов, прибывших из Южного Азербайджана
после 1946 года в результате поражения демократического движения, в политической жизни
Азербайджанской ССР. Автор на основе многочисленных архивных документов проводит ис-
следование различных форм и направлений участия эмигрантов в политической жизни совет-
ского общества в условиях доминирующего положения единой коммунистической идеологии.
Müasir dövr
Тарих вя онун проблемляри, №4 2010
93
KHAGAN BALAYEV
Doctorate student of the Human Rights
Scientific Research Institute,
Azerbaijan National Academy of Science
e-mail: Xaqan28@gmail.com
PARTICIPATION OF THE IMMIGRANTS FROM SOUTH AZERBAIJAN IN THE
POLITICAL LIFE OF THE FORMER AZERBAIJAN SSR. (DURING 1947-1991 YEARS)
This article deals with the participation of the immigrants in political life of community who
came to the former Azerbaijan Soviet Sosialist Republic after collapse of the democratic movement in
South Azerbaijan in December, 1946. On the Bases of rich archive documents, the author describes
the movement and specific pecularities of immigrants’ participation in political the life of the soviet
community where unique communist ideology was dominating.
Rəyçilər: t.e.d. C. Həsənli, ò.å.ä. Ì.Á. Ôÿòÿëèéåâ
AMEA İnsan hüquqları üzrə Elmi -Tədqiqat İnstitutu Elmi Şurasının 16 sentyabr 2010-cu il
tarixli iclasının qərarı ilə çapa məsləhət görülmüşdür (ïðîòîêîë ¹ 1 )
Dostları ilə paylaş: |